Chapter 14

manonivāraṇaṃ nāma sargaḥ |
caturdaśaḥ sargaḥ |
vasiṣṭhaḥ |
saṃsārasāgarāsārakalloleṣūhyamānayā |
mana eva na mūkaṃ svaṃ yayā janatayā jitam || 1 ||
[Analyze grammar]

ātmalābhamayodāraphalābhiriha sā mayā |
vicāroktibhiretābhiśśāstre'sminnopadiśyate || 2 ||
[Analyze grammar]

na paśyatyeva yo hyandhastasya kaḥ khalu durmatiḥ |
vicitramañjarīcitraṃ sandarśayati kānanam || 3 ||
[Analyze grammar]

kaḥ kuṣṭhaghargharaghrāṇaṃ nānāmodavicāraṇe |
mūrkhamātmopadeśe ca pramāṇaṃ kurute'matiḥ || 4 ||
[Analyze grammar]

viparyastendriyaṃ mattaṃ madirāghūrṇitekṣaṇam |
dharmanirṇayasākṣitve kaḥ pramāṇīkarotyadhīḥ || 5 ||
[Analyze grammar]

kaśśavaṃ vā śmaśānasthaṃ samupāyakathāṃ śaṭhaḥ |
paripṛcchati sandehe kaśca mūrkhaṃ praśāsti vai || 6 ||
[Analyze grammar]

yenāśayabilastho hi mūko'ndho'pi na nirjitaḥ |
manovyālaḥ sa durbuddhiḥ kathaṃ nāmopadiśyate || 7 ||
[Analyze grammar]

jitameva mano viddhi vastuto yanna vidyate |
nikaṭātsā cirāstaiva yā śilā naiva vidyate || 8 ||
[Analyze grammar]

mano na vijitaṃ rāma yenāsadapi durdhiyā |
tenāgrastaviṣeṇaiva mriyate viṣamūrchayā || 9 ||
[Analyze grammar]

jñaḥ paśyati sadaivātmā spandante jñānaśaktayaḥ |
indriyāṇi svadharmeṣu mano nāma kimucyate || 10 ||
[Analyze grammar]

prāṇānāṃ spandinī śaktirjñā śaktiḥ paramātmanaḥ |
indriyāṇāṃ nijā śaktirevaṃ ko'tra nibadhyate || 11 ||
[Analyze grammar]

sarvāśca śaktayastasya sarvaśakteḥ kilātmanaḥ |
pṛthaktā cānyatā ceyaṃ kuto nāmetarotthitā || 12 ||
[Analyze grammar]

kiṃ nāma jīva ityuktaṃ yenehāndhīkṛtaṃ jagat |
cittaṃ caivāsadeva tvaṃ viddhi kāstyasya śaktatā || 13 ||
[Analyze grammar]

manonirdagdhadṛṣṭīnāṃ dṛṣṭvā duḥkhaparamparāḥ |
matirme karuṇākrāntā rāma mugdheva tapyate || 14 ||
[Analyze grammar]

kaḥ kilātra kutaḥ khedo yanmūrkhaḥ paritapyate |
duḥkhāyaiva hi jāyante karabhāḥ prākṛtāstathā || 15 ||
[Analyze grammar]

vināśāyaiva jāyante jaḍadeheṣvabuddhayaḥ |
anāratodayāpāyā budbudā jaladhiṣviva || 16 ||
[Analyze grammar]

kiyantaḥ paśya paśavaḥ pratyahaṃ pratimaṇḍalam |
sūnāvadbhirnihanyante kevātra paridevanā || 17 ||
[Analyze grammar]

arbudānyanilo hanti kṣupājāleṣu cānvaham |
daṃśānāṃ maṣakānāṃ ca kevātra paridevanā || 18 ||
[Analyze grammar]

diśaṃ prati girīndreṣu pulindaughā vane vane |
nighnanti prāṇilakṣāṇi kevātra paridevanā || 19 ||
[Analyze grammar]

jale jalacaravyūhāttanuṃ sthūlo nikṛntati |
grāsāya pratyahaṃ matsyaḥ kevātra paridevanā || 20 ||
[Analyze grammar]

gṛdhraśyenādayo vyomni pakṣipūgaṃ vihaṅgamāḥ |
anārataṃ vilumpanti kevātra paridevanā || 21 ||
[Analyze grammar]

likṣāmaṇukaṇakṣāmāṃ kṣudhā khādati makṣikā |
tāṃ kośakāraḥ kṣudhito daṃśastamapi cañcalaḥ || 22 ||
[Analyze grammar]

taṃ daṃśaṃ darduro bhuṅkte vyālastamapi darduram |
sarpamugrakharo hanti babhruścainaṃ nikṛntati || 23 ||
[Analyze grammar]

babhruṃ hinasti mārjāro mārjāraṃ śvā nikṛntati |
ṛkṣaḥ kauleyakaṃ hanti ṛkṣaṃ vyāghro nikṛntati || 24 ||
[Analyze grammar]

siṃho'bhibhavati vyāghraṃ śarabhaḥ siṃhamatti ca |
śarabho nāśamāyāti mattameghavilaṅghane || 25 ||
[Analyze grammar]

meghā vātairvidhūyante vāyavo giribhirjitāḥ |
girayo vajraniṣpiṣṭāśśakrasya vaśagaḥ paviḥ || 26 ||
[Analyze grammar]

viṣṇunā dhriyate śakro viṣṇurgacchati jantutām |
sukhaduḥkhadaśāveśajarāmaraṇamālitām || 27 ||
[Analyze grammar]

jantavo'pi mahākāyā api vidyāyudhānvitāḥ |
likṣābhiraṅgalagnābhirupajīvyanta eva hi || 28 ||
[Analyze grammar]

ajasramevamālūnaviśīrṇaṃ bhūtajaṅgalam |
parasparamalaṃ mohādbhakṣyate rakṣyate'pi ca || 29 ||
[Analyze grammar]

anārataṃ vinaśyanti vividhā bhūtajātayaḥ |
anārataṃ ca jāyante vicitrāḥ kakubhaṃ prati || 30 ||
[Analyze grammar]

jalakośeṣu jāyante matsyebhamakarādayaḥ |
bhūmāvantaḥ prajāyante kīṭaughā vṛścikādayaḥ || 31 ||
[Analyze grammar]

antarikṣe'pi jāyante ākāśe vihagādayaḥ |
vanavīthīṣu jāyante siṃhavyāghramṛgādayaḥ || 32 ||
[Analyze grammar]

prāṇyaṅgeṣvapi jāyante likṣāyūkāpipīlakāḥ |
sthāvareṣu ca jāyante ghuṇājagarajātayaḥ || 33 ||
[Analyze grammar]

śilāntareṣu jāyante kīṭabhekaghuṇādayaḥ |
viṣṭhāyāmapi jāyante nānākīṭagaṇāstathā || 34 ||
[Analyze grammar]

evamanyeṣvasaṅkhyeṣu janmasvapacayeṣu ca |
ajasraṃ karuṇāvanto nandantūparudantu vā || 35 ||
[Analyze grammar]

anāratamṛtāvasminnanāratasamudbhave |
saṃsārasambhrame yuktā na tuṣṭirna ca duḥkhitā || 36 ||
[Analyze grammar]

paṅktayastvevamevemā vṛkṣaparṇagaṇaiḥ saha |
utpatyotpatya līyante bhūtānāṃ bhūrisambhavāḥ || 37 ||
[Analyze grammar]

yaḥ pravṛttaḥ kubuddhīnāṃ dayāvānduḥkhamārjane |
sa hastacchattranirmṛṣṭasūryāṃśuḥ khedametyalam || 38 ||
[Analyze grammar]

na tiryaksamadharmāṇa upadeśyā narā bhuvi |
kathāprakathanenārthaḥ kaḥ sthāṇuvikaṭe vane || 39 ||
[Analyze grammar]

kiṃ kilotphālamanasāṃ paśūnāṃ ca viśeṣaṇam |
kṛṣyante paśavo rajjvā manasā mūḍhacetasaḥ || 40 ||
[Analyze grammar]

svacittapaṅkamagnānāṃ svāśāṃśaracitātmanām |
mūrkhāṇāmāpadam dṛṣṭvā prarudantyupalā api || 41 ||
[Analyze grammar]

anirjitātmacittānāmanantā duḥkharāśayaḥ |
tanmārjane kṛtaprajño nātaḥ sampratipadyate || 42 ||
[Analyze grammar]

vinirjitātmacittānāṃ duḥkhāni raghunandana |
sunivāryāṇi tenātra jñātajñeyaḥ pravartatām || 43 ||
[Analyze grammar]

mano nāsti mahābāho mā mudhaitatprakalpaya |
anena kalpitena tvaṃ vetāleneva hanyase || 44 ||
[Analyze grammar]

yāvadvismṛtavānātmatattvaṃ mūḍho'bhavadbhavān |
tāvattava manovyālo babhūvābhyuditastataḥ || 45 ||
[Analyze grammar]

idānīṃ bhavatā jñātaṃ yathābhūtamarindama |
saṅkalpādvardhate cittaṃ tadevāśu parityaja || 46 ||
[Analyze grammar]

dṛśyamāśrayasīdaṃ cettatsacitto'si bandhavān |
dṛśyaṃ santyajasīdaṃ cettadacitto'si mokṣavān || 47 ||
[Analyze grammar]

ayaṃ guṇasamāhāro bandhāyaiva samāśritaḥ |
santyakta eva mokṣāya yathecchasi tathā kuru || 48 ||
[Analyze grammar]

nāhaṃ nedamiti dhyāyaṃstiṣṭha tvamacalācalaḥ |
anantākāśasaṅkāśahṛdayo hṛdayeśvaraḥ || 49 ||
[Analyze grammar]

ātmano jagataścāntarvibhāgakalanāmalam |
rāma dvitvamayaṃ tyaktvā śeṣasthaḥ susthiro bhava || 50 ||
[Analyze grammar]

ātmano jagataścāntardraṣṭṛdṛśyadaśāntare |
darśanākhye svamātmānaṃ sarvadā bhāvayanbhava || 51 ||
[Analyze grammar]

svādyasvādakasantyaktaṃ svādyasvādakamadhyagam |
svadanāntassthitaṃ dhyāyannityamātmamayo bhava || 52 ||
[Analyze grammar]

rāmānubhavanīyasya tathānubhavituḥ svayam |
avalambya nirālambaṃ madhyamadya sthiro bhava || 53 ||
[Analyze grammar]

bhavabhāvanayā hīnaṃ bhāvābhāvadaśojjhitam |
bhāvayitvaivamātmānamātmasaṃsthaḥ svayaṃ bhava || 54 ||
[Analyze grammar]

ātmasattāṃ tyajannenāṃ cetyaṃ bhāvayasi svayam |
yadā rāma tadā yāsi cittatāmatiduḥkhadām || 55 ||
[Analyze grammar]

cittatāśṛṅkhalāmenāṃ svarūpajñānayuktibhiḥ |
balācchittvā mahābāho svātmasiṃhaṃ vimocaya || 56 ||
[Analyze grammar]

paramātmadaśāṃ tyaktvā cetyaṃ paripatanmalam |
yadā gacchasi saṅkalpaṃ cetyaṃ sampadyase tadā || 57 ||
[Analyze grammar]

ātmano vyatiriktaṃ saccetyamityaṅgasaṃvidā |
manaḥ sampadyate duḥkhi kṣīyate tyaktayā tayā || 58 ||
[Analyze grammar]

ātmaivedaṃ jagatsarvamityantaḥ saṃvidodaye |
kva cettā kva ca vā cittaṃ kiṃ cetyaṃ cintanaṃ ca kim || 59 ||
[Analyze grammar]

ahamātmeti jīvo'smītyetāvaccittakaṃ viduḥ |
anenedamanādyantaṃ duḥkhaṃ rāghava tanyate || 60 ||
[Analyze grammar]

ahamātmā na jīvākhyāḥ sattāḥ santītarāḥ kvacit |
ityeva cittopaśamaḥ paramaṃ sukhamucyate || 61 ||
[Analyze grammar]

ātmaivedaṃ jagaditi jāte rāghava niścaye |
asattā cetaso jātā bhavatyeva na saṃśayaḥ || 62 ||
[Analyze grammar]

evaṃ satyāvabodhena svātmaivedamiti sthite |
manaḥ sugalitaṃ viddhi sūryabhāsā tamo yathā || 63 ||
[Analyze grammar]

manassarpaśśarīrastho yāvattāvanmahadbhayam |
tasminnutsārite yogādbhayasyāvasaraḥ kutaḥ || 64 ||
[Analyze grammar]

bhrāntimātrotthitaścittavetālo bhavatānagha |
samyagjñānena mantreṇa prasabhaṃ vinipātyatām || 65 ||
[Analyze grammar]

dehagehādgate cittayakṣe balavatāṃ vara |
nirādhirvigatodvegaṃ tiṣṭha nāsti bhayaṃ tava || 66 ||
[Analyze grammar]

nīrāga eva nirupāñjana eva cāsmītyetāvataiva galitā tava cittasattā |
nirduḥkhamuttamapadaṃ paramaṃ gato'si tiṣṭhopaśāntasakalaiṣaṇa evamantaḥ || 67 ||
[Analyze grammar]