Chapter 12

cittānuśāsanaṃ nāma sargaḥ |
dvādaśaḥ sargaḥ |
vasiṣṭhaḥ |
evaṃ vicārayaṃstatra svarājye janako nṛpaḥ |
cakārākhilakāryāṇi na mumoha ca dhīradhīḥ || 1 ||
[Analyze grammar]

na manaḥ prollalāsāsya kvacidānandavṛttiṣu |
kevalaṃ susamaṃ svacchaṃ sa sadaiva vyatiṣṭhata || 2 ||
[Analyze grammar]

tataḥ prabhṛtyasau dṛśyaṃ nājahāra na cātyajat |
kevalaṃ vigatāśaṅkaṃ vartamāne vyavasthitaḥ || 3 ||
[Analyze grammar]

anāratavivekena tena tanmanasā tataḥ |
punaḥ kalaṅkaṃ naivāttamambareṇeva rājasam || 4 ||
[Analyze grammar]

svavivekānusandhānāditi tasya mahīpateḥ |
samyagjñānamanantābhaṃ mano nirmalatāṃ yayau || 5 ||
[Analyze grammar]

anāmṛṣṭavikalpāṃśaścidātmā vigatāmayaḥ |
udiyāya hṛdākāśe tasya vyomnīva bhāskaraḥ || 6 ||
[Analyze grammar]

sa dadarśākhilānbhāvāṃścittantau maṇivattatān |
ātmabhūtānanantātmā sarvabhūtātmakovidaḥ || 7 ||
[Analyze grammar]

prahṛṣṭo na babhūvāsau kadācinna ca duḥkhitaḥ |
prakṛtavyavahāritvātsadaiva samamānasaḥ || 8 ||
[Analyze grammar]

jīvanmukto babhūvāsau tataḥ prabhṛti mānada |
janako jaraḍhajñāno jñātalokaparāvaraḥ || 9 ||
[Analyze grammar]

rājyaṃ kurvanvidehānāṃ janako janajīvitam |
naiva harṣaviṣādābhyāṃ so'vaśaḥ paryatapyata || 10 ||
[Analyze grammar]

nāstameti na codeti guṇadoṣavivarjitaḥ |
arthānarthaiḥ svarājyotthairna glāyati na hṛṣyati || 11 ||
[Analyze grammar]

kurvannapi karotyeṣa na kiñcidapi kutracit |
santiṣṭhatyeva satataṃ jīvanmuktavapuryataḥ || 12 ||
[Analyze grammar]

suṣuptāvasthitasyeva janakasya mahīpateḥ |
bhāvanāḥ sarvabhāvebhyaḥ sarvathaivāstamāgatāḥ || 13 ||
[Analyze grammar]

bhaviṣyannānusandhatte nātītaṃ cintayatyasau |
vartamānaṃ nimeṣaṃ tu hasannevāvatiṣṭhate || 14 ||
[Analyze grammar]

svavicāravaśenaiva tena tāmarasekṣaṇa |
prāptaṃ prāpyamaśeṣeṇa rāma netarayecchayā || 15 ||
[Analyze grammar]

tāvattāvatsvakenaiva cetasā pravicāryate |
yāvad yāvadvicārāṇāṃ sīmāntaḥ samavāpyate || 16 ||
[Analyze grammar]

na tadgurorna śāstrārthānna puṇyātprāpyate padam |
yatsatprasaṅgāduditavicāraviśadāddhṛdaḥ || 17 ||
[Analyze grammar]

snigdhayā nijayā ṛjvyā prajñayaiva vayasyayā |
padamāsādyate rāma na nāma kriyayānyayā || 18 ||
[Analyze grammar]

yasya jvalati tīkṣṇāgrā pūrvāparavicāriṇī |
prajñādīpaśikhā jātu tamāndhyaṃ nānudhāvati || 19 ||
[Analyze grammar]

duruttarā yā vipado duḥkhakallolasaṅkulāḥ |
tīryate prajñayā tābhyo nāvevādbhyo mahāmate || 20 ||
[Analyze grammar]

prajñāvirahitaṃ mūḍhamāpadalpaiva bādhate |
pelavaivānilakalā sārahīnamivolapam || 21 ||
[Analyze grammar]

prajñāvānasahāyo'pi viśāstro'pi visajjanaḥ |
uttaratyeva saṃsārasāgarād rāma potavat || 22 ||
[Analyze grammar]

prajñāvānasahāyo'pi kāryāntamadhigacchati |
duṣprajñaḥ kāryamāsādya pradhānamapi naśyati || 23 ||
[Analyze grammar]

śāstrasajjanasaṃsargaiḥ prajñāṃ pūrvaṃ vivardhayet |
sekasaṃrakṣaṇārambhaiḥ phalaprāptyai latāmiva || 24 ||
[Analyze grammar]

prajñābalabṛhanmūlaḥ kāle satkāryapādapaḥ |
phalaṃ phalatyatisvādu māso bimbamivaindavam || 25 ||
[Analyze grammar]

ya eva yatnaḥ kriyate bāhyārthopārjane naraiḥ |
sa eva yatnaḥ kartavyaḥ pūrvaṃ prajñāvivardhane || 26 ||
[Analyze grammar]

sīmāntaṃ sarvaduḥkhānāmāpadāṃ kośamuttamam |
bījaṃ saṃsāravṛkṣāṇāṃ prajñāmāndyaṃ vivarjayet || 27 ||
[Analyze grammar]

yatsvargād yacca pātālād yad rājyātsamavāpyate |
tatsamāsādyate sarvaṃ prajñākośānmahāmate || 28 ||
[Analyze grammar]

prajñayottīryate ghorādasmātsaṃsārasāgarāt |
nācārairna ca vā tīrthaistapasā ca na rāghava || 29 ||
[Analyze grammar]

yatprāptāḥ sampadaṃ daivīmapi bhūmicarā narāḥ |
prajñāpuṣpalatāyāstatphalaṃ svādu samutthitam || 30 ||
[Analyze grammar]

prajñayā nakharālūnavanavāraṇaraktapāḥ |
jambukairvijitāḥ siṃhāḥ siṃhairhariṇakā iva || 31 ||
[Analyze grammar]

pāmarairapi bhūpatvaṃ prāptaṃ prajñāvaśānnaraiḥ |
svargāpavargayogyatvaṃ prājñasyaiveha dṛśyate || 32 ||
[Analyze grammar]

prajñayā vādinaḥ sarve svavikalpavilāsinaḥ |
jayanti sugataprakhyā ravānabdhiravā iva || 33 ||
[Analyze grammar]

cintāmaṇiriyaṃ prajñā hṛtkośasthā vivekinaḥ |
phalaṃ kalpalatevaiṣā cintitaṃ samprayacchati || 34 ||
[Analyze grammar]

bhavyastarati saṃsāraṃ prajñayā prohyate'dhamaḥ |
śikṣitaḥ pāramāpnoti nāvā naśyatyaśikṣitaḥ || 35 ||
[Analyze grammar]

dhīḥ samyagyojitā pāramasamyagyojitāpadam |
naraṃ nayati saṃsāre vahantī naurivārṇave || 36 ||
[Analyze grammar]

vivekinamasammūḍhaṃ prājñamāśāgaṇotthitāḥ |
doṣā na paribādhante sannaddhamiva sāyakāḥ || 37 ||
[Analyze grammar]

prajñayedaṃ jagatsarvaṃ samyagevāṅga dṛśyate |
samyagdarśinamāyānti nāpado na ca sampadaḥ || 38 ||
[Analyze grammar]

pidhānaṃ paramārkasya jaḍātmā vitato'sitaḥ |
ahaṅkārāmbudo mattaḥ prajñāvātena pāṭyate || 39 ||
[Analyze grammar]

padamatulamupaitumicchatā svaṃ prathamamiyaṃ matireva lālanīyā |
phalamabhipatatā kṛṣīvalena prathamataraṃ nanu kṛṣyate dharaiva || 40 ||
[Analyze grammar]