Chapter 41

kacagāthā nāma sargaḥ |
ekacatvāriṃśaḥ sargaḥ |
vasiṣṭhaḥ |
annapānāṅganāsaṅgādṛte nāstīha kiñcana |
śubhaṃ vastvavisaṃvādi mahān kimabhivāñchatu || 1 ||
[Analyze grammar]

tiryañcaḥ paśavo mūḍhā yena tuṣyantyasādhavaḥ |
bhogādinā kathaṃ tena ratimāyānti sādhavaḥ || 2 ||
[Analyze grammar]

bhogaiḥ kṛpaṇasarvasvairādimadhyāntapelavaiḥ |
viśvāsaṃ yānti ye loke tairalaṃ naragardabhaiḥ || 3 ||
[Analyze grammar]

itaḥ keśā ito raktamitīyaṃ pramadātanuḥ |
etayā toṣamāyānti sārameyā na mānavāḥ || 4 ||
[Analyze grammar]

mṛnmahī dāru taravo deho māṃsaṃ dṛṣadgiriḥ |
adho bhūrambaraṃ pṛṣṭhe kimapūrvaṃ sukhāya yat || 5 ||
[Analyze grammar]

mātrāsparśānusāriṇyo vivekapadabhaṅgurāḥ |
mohāyaiva parāmṛṣṭāḥ sakalā lokasaṃvidaḥ || 6 ||
[Analyze grammar]

sarvasyā eva paryante śubhāyā api saṃsthiteḥ |
malinaṃ duḥkhamastyeva jvālāyā iva kajjalam || 7 ||
[Analyze grammar]

āgamāpāyato'nityā manaṣṣaṣṭhendriyakriyāḥ |
latā nāgendramiva tā dhārayanti na satpadam || 8 ||
[Analyze grammar]

putrikā raktamāṃsasya kānteyamiti sādaram |
svadehanāmnyasthicaye śliṣyate seti kaḥ kramaḥ || 9 ||
[Analyze grammar]

sarvaṃ satyamidam rāma sthiramajñasya tuṣṭaye |
jñasyāsthiramasatyaṃ ca jagad rāma na tuṣṭaye || 10 ||
[Analyze grammar]

abhukte'pi viṣe yaiṣā viṣamūrchāṃ prayacchati |
tāṃ parityajya bhāvāsthāmātmaikatvājjñatāṃ vraja || 11 ||
[Analyze grammar]

anātmanyātmabhāvena cittaṃ sthitimupāgatam |
yadā tadedamāyātaṃ jagajjālamasanmayam || 12 ||
[Analyze grammar]

vāsanāvaśato brahmamanasā kalpitaṃ vapuḥ |
tejasāśritakuḍyena hemābhatvamivātmanaḥ || 13 ||
[Analyze grammar]

rāmaḥ |
vairiñcapadamāsādya mano brahmanmahāmate |
idaṃ jagatsughanatāṃ kathamānayati kramāt || 14 ||
[Analyze grammar]

vasiṣṭhaḥ |
garbhatalpātsamutthāya padmajaḥ prathamaṃ śiśuḥ |
brahmeti śabdamakarodbrahmā tena sa ucyate || 15 ||
[Analyze grammar]

saṅkalpajālarūpasya manasaḥ kalpitākṛteḥ |
akarottasya saṅkalpalakṣmīḥ padamathāntare || 16 ||
[Analyze grammar]

tataḥ saṅkalpayāmāsa pūrvaṃ tejo mahāprabham |
lasadagnilatācakravakrīkṛtadigantaram || 17 ||
[Analyze grammar]

ṛkṣapratimaniṣṭhyūtakarkaśāgnikaṇotkaram |
muñjapiñjaraparyantahemakānanitāmbaram || 18 ||
[Analyze grammar]

jvālāhemalatājālajaṭālanijamaṇḍalam |
kacatprasaraduddāmakarakuṇḍalamaṇḍitam || 19 ||
[Analyze grammar]

taccharīri manastasmiṃstatastejasi bhāsvare |
ātmākārasamākāraṃ bhāskaraṃ samakalpayat || 20 ||
[Analyze grammar]

sa tatastejasastasmādabhyudeti divākaraḥ |
jvālāmaṇḍalamadhyastho jvalatkanakakuṇḍalaḥ || 21 ||
[Analyze grammar]

jvālājaṭābhāradharo vāntavisphārapāvakaḥ |
jvālāvilāsāvayavaḥ pūritākāśamaṇḍalaḥ || 22 ||
[Analyze grammar]

atha brahmā mahābuddhiranyāṃstāṃstejasaḥ kaṇān |
akasmātpratibhātena vimānatvena cāruṇā || 23 ||
[Analyze grammar]

kṣaṇātsaṅkalpayāmāsa dadarśa ca tathaiva tān |
saṅkalpānantaraṃ jātānvidvāñchabdagaṇāniva || 24 ||
[Analyze grammar]

sthitireṣā mahābāho pratisargaṃ svayambhuvaḥ |
pratyahaṃ ca pratijagatsaṅkalpitasurāsurā || 25 ||
[Analyze grammar]

kālaṃ kālavibhaktīśca nakṣatrāṇi grahāṃstathā |
saritaḥ sāgarāndvīpāndiśaśśailāṃstathāvanim || 26 ||
[Analyze grammar]

devāndaityānnarānnāgān gandharvānyakṣarākṣasān |
akalpayadayaṃ brahmā taraṅgāniva sāgaraḥ || 27 ||
[Analyze grammar]

teṣāṃ deśān girīṃścaiva vimānānyuttamāni ca |
karmāṇi pravibhaktāni padmajaḥ samakalpayat || 28 ||
[Analyze grammar]

te'pi saṅkalpasamprāptasiddhayaḥ sarvaśaktayaḥ |
yathāsaṅkalpitaṃ vastu kṣaṇāddadṛśuragrataḥ || 29 ||
[Analyze grammar]

saṅkalpayantyathānyāṃste nānābhūtagaṇānbahūn |
te'pyanyāṃstatra te'pyanyāṃste'pyanyānvividhānapi || 30 ||
[Analyze grammar]

saṃsmṛtya vedāṃstadanu yajñakramaguṇānvitān |
jagadgṛhavadhūṃ brahmā maryādāṃ samakalpayat || 31 ||
[Analyze grammar]

brāhmaṃ rūpamupādāya mano māyi mahadvapuḥ |
tanotītthamimāṃ sṛṣṭiṃ bhūtasantatisaṅkulām || 32 ||
[Analyze grammar]

samudrācalavṛkṣāḍhyāṃ kṛtalokāntarakramām |
merubhūpīṭhadikkuñjajaṭālodaramaṇḍalām || 33 ||
[Analyze grammar]

sukhaduḥkhajarājanmamaraṇavyādhivedhitām |
rāgadveṣabhayāviddhāṃ guṇatrayamayātmikām || 34 ||
[Analyze grammar]

manobhistairviriñcotthairyad yathā kalpitaṃ purā |
tattathaivākhilaṃ dṛṣṭaṃ dṛśyate'dyāpi māyayā || 35 ||
[Analyze grammar]

itthaṃ sarveṣu sargeṣu keṣucittvatha vāpyajaḥ |
saṅkalpayati saṃsāraṃ paripaśyati ca sthiram || 36 ||
[Analyze grammar]

moha evamayaṃ mithyā jāgataḥ sthiratāṃ gataḥ |
saṅkalpanena manasā kalpito'virataṃ svayam || 37 ||
[Analyze grammar]

saṅkalpavaśataḥ sarvāḥ prasaranti jagatkriyāḥ |
saṅkalpavaśato devī niyatirniyatā sthitā || 38 ||
[Analyze grammar]

ropitāyāṃ prajānāthaiḥ sṛṣṭau sa kamalodbhavaḥ |
brahmā sañcintayatyeṣa padmāsanagataḥ prabhuḥ || 39 ||
[Analyze grammar]

manasspandanamātreṇa citraṃ citreyamutthitā |
sṛṣṭirābhoginī sphāravyavahāravikāriṇī || 40 ||
[Analyze grammar]

indropendranarendrāḍhyā śailasāgarasaṅkulā |
pātālarododigvargamārgasaṅkaṭakoṭarā || 41 ||
[Analyze grammar]

saṅkalpajālamakhilaṃ mayedamahitaṃ tatam |
adhunā viramāmyasmātsaṅkalpollāsanakramāt || 42 ||
[Analyze grammar]

iti niścitya viratas kalpanānarthasaṅkaṭāt |
anādimatparaṃ brahma smaratyātmānamātmanā || 43 ||
[Analyze grammar]

tamāsādya tadābhāse pade galitamānasaḥ |
sukhaṃ tiṣṭhati śāntātmā talpe'dhvaśramavāniva || 44 ||
[Analyze grammar]

nirmamo nirahaṅkāraḥ parāṃ śāntimupāgataḥ |
avikṣubdha ivāmbhodhirātmanātmani tiṣṭhati || 45 ||
[Analyze grammar]

dhyānātkadācidbhagavān svayaṃ viramati prabhuḥ |
cidvaśātsalilaspandātsomyatvādiva vāridhiḥ || 46 ||
[Analyze grammar]

vicārayati saṃsāraṃ sukhaduḥkhasamanvitam |
āśāpāśaśatairbaddhaṃ rāgadveṣabhayāturam || 47 ||
[Analyze grammar]

tataḥ sa karuṇākrāntamanā bhūtavibhūtaye |
karotīha mahārthāni śāstrāṇi vividhāni ca || 48 ||
[Analyze grammar]

adhyātmajñānagarbhāṇi vedavedāntavanti ca |
purāṇādīni cānyāni muktaye sarvadehinām || 49 ||
[Analyze grammar]

punastatparamālambya padamāpadvivarjitam |
svasthastiṣṭhati śāntātmā nirmandara ivārṇavaḥ || 50 ||
[Analyze grammar]

avalokya jagacceṣṭāṃ maryādāyāṃ niyojya ca |
brahmā kamalapīṭhasthaḥ punaḥ svātmani tiṣṭhati || 51 ||
[Analyze grammar]

kevalaṃ janmasaṃskāravaśatastasya tadvapuḥ |
apunarjananāyaiva cakrabhramavadāsthitam || 52 ||
[Analyze grammar]

na rocate'sya santyāgo vapuṣo na ca saṅgrahaḥ |
nātmā na cetarannehā na sthitirnāsthitistathā || 53 ||
[Analyze grammar]

sarvabhāvasamārambhaḥ samaḥ sarvāsu vṛttiṣu |
paripūrṇārṇavākāro mukta evāvatiṣṭhate || 54 ||
[Analyze grammar]

kadācitkevalaṃ sarvasaṅkalpaparihīnayā |
yadṛcchayānugrahārthaṃ lokānāṃ pravibudhyate || 55 ||
[Analyze grammar]

eṣā brāhmī sthitiḥ puṇyā yā mayoktā mahāmate |
jātiṃ viddhi surānīke tāmetāṃ sāttvikīmiti || 56 ||
[Analyze grammar]

visarge paramākāśe brahmaṇo yā manaḥkalā |
udeti prathamaṃ saiṣā brahmatvaṃ samupāśnute || 57 ||
[Analyze grammar]

sarge sthitiṃ gate tvanyā yodeti kalanā parā |
sā vyomānilamāśritya praviṣyauṣadhipallavān || 58 ||
[Analyze grammar]

kācitsuratvamāyāti puruṣatvamathāparā |
kācittiryaktvamāyāti kācidāyāti yakṣatām || 59 ||
[Analyze grammar]

candraraśmipraṇālena gṛhītauṣadhipallavā |
yā yatsattvaṃ samabhyeti sā tadevāśu jāyate || 60 ||
[Analyze grammar]

jātā saṃsargavaśatastasminneva hi janmani |
badhyate mucyate vāsau svacamatkārabhedataḥ || 61 ||
[Analyze grammar]

itthaṃ gatā sthitimiyaṃ kila rāmabhadra sṛṣṭiḥ sphuṭaṃ prakaṭasaṅkaṭakarmabandhā |
āvirbhavadvividhaveṣavihārabhārasaṃrambhagarbhavidhurā kalanāpadena || 62 ||
[Analyze grammar]