Chapter 42

kamalajavyavahāro nāma sargaḥ |
dvācatvāriṃśaḥ sargaḥ |
vasiṣṭhaḥ |
asminbhagavati brahmaṇyamalaṃ padamāsthite |
pitāmahe mahābāho kṛtasargavyavasthitau || 1 ||
[Analyze grammar]

jagajjīrṇāraghaṭṭe'sminvahati svavyavasthayā |
viprotabhūtaghaṭayā rajjvā jīvitatṛṣṇayā || 2 ||
[Analyze grammar]

brahmottheṣu ca jīveṣu viśatsu bhavapañjaram |
vāsanālūnaśīrṇeṣu payorāśiṃ payassviva || 3 ||
[Analyze grammar]

āgateṣvīśvarādvyomavātamadhyavivartiṣu |
manassvanyeṣu vātāntāl lolālātātkaṇeṣviva || 4 ||
[Analyze grammar]

anārataṃ viniryānti viśantyanye tathābhitaḥ |
rāma brahmaṇi jīvaughāstaraṅgā iva vāridhau || 5 ||
[Analyze grammar]

anādyantapadotpannāḥ kalanāpadamāgatāḥ |
bhūtākāśaṃ viśantyanye dhūmaśriya ivāmbudam || 6 ||
[Analyze grammar]

ekatāṃ tatra gacchanti bhūtatanmātramaṇḍalaiḥ |
mandārakusumāmodā yathā madhuramārutaiḥ || 7 ||
[Analyze grammar]

te tu tanmātravātena tatprāṇatvamupeyuṣā |
ākramyante pracaṇḍena daityaughenāmarā iva || 8 ||
[Analyze grammar]

bhūtaprāṇānilotthena tena gandhavahena te |
niveśyante śarīreṣu gandhā ghrāṇavraṇeṣviva || 9 ||
[Analyze grammar]

teṣu bhūtaśarīreṣu jīvā gacchanti vīryatām |
tato jagati jāyante bhavanti prāṇinaḥ sphuṭāḥ || 10 ||
[Analyze grammar]

anye dhūmādimārgeṇa garbhatāmetya dehinām |
prāṇitāmupagacchanti ciraṃ sthāvaratāṃ ca vā || 11 ||
[Analyze grammar]

kecitpavanamārgeṇa śālikoṭaraśāyinaḥ |
vīryatāmetya jāyante vividhāḥ prāṇadharmiṇaḥ || 12 ||
[Analyze grammar]

kācidutpannamātraiva rāma jīvaparamparā |
tanmātravalitā tāvattiṣṭhatyambarakoṭare || 13 ||
[Analyze grammar]

udeti yāvadbhagavāninduruddāmamaṇḍalaḥ |
kṣīrāmbubhirivālolaiḥ plāvayan raśmibhirjagat || 14 ||
[Analyze grammar]

tatasteṣvatiramyeṣu candraraśmiṣu sā padam |
karoti vihagī lolā vṛkṣādvṛkṣāntareṣviva || 15 ||
[Analyze grammar]

tebhyo'pi candraraśmibhyo viśatyoṣadhipallavān |
navaṃ kumudinīṣaṇḍaṃ padminībhya ivālinī || 16 ||
[Analyze grammar]

tayauṣadhiphalānyantaḥ svādavanti bhavantyalam |
ikṣunālyo raseneva yānti pīvaratāmapi || 17 ||
[Analyze grammar]

phaleṣu teṣu badhnāti padamindukaracyutā |
jīvālī kṣīrapūrṇeṣu mātṛstanabhareṣviva || 18 ||
[Analyze grammar]

tāḥ phalāvalayaḥ pakvā bhakṣyante yaiśśarīribhiḥ |
teṣveva vīryamāgatya tiṣṭhantyapravibodhitāḥ || 19 ||
[Analyze grammar]

prasuptavāsanājālā jīvaśrīrgarbhapañjaram |
adhitiṣṭhati bījaśrīḥ suptapattrā yathā ghaṭam || 20 ||
[Analyze grammar]

yathā kāṣṭhe sthito vahniryathā mṛdi ghaṭaḥ sthitaḥ |
yathā kṣīre sthitaṃ sarpirvīrye jīvastathā sthitaḥ || 21 ||
[Analyze grammar]

anena kramayogena parāgatya maheśvarāt |
adṛṣṭānyaśarīraśrīrjāyate yo naro bhuvi || 22 ||
[Analyze grammar]

sa hi sāttvikajātiḥ syādudāravyavahāravān |
tenaiva mokṣabhāgī cejjanmanā tatsa sāttvikaḥ || 23 ||
[Analyze grammar]

athetthaṃ yonimāsādya bhuktvā janmaparamparām |
mokṣārthaṃ prāptajanmā cettatsa rājasasāttvikaḥ || 24 ||
[Analyze grammar]

pāścātyajanmanaḥ puṃsaḥ kramaṃ vakṣyāmi te'dhunā |
rāma rājasasattvasya mokṣamāyātyasau yathā || 25 ||
[Analyze grammar]

prāthamyena ya āyātaḥ saṃsāramatisāttvikaḥ |
sa kadācitkvacitkaścitsambhavatyanaghākṛte || 26 ||
[Analyze grammar]

sambhavantīha puruṣā rāma rājasasāttvikāḥ |
pravicāryāsta evāto gantavyaṃ ceha taddṛśā || 27 ||
[Analyze grammar]

prāthamyena samāyātā ye padātparamātmanaḥ |
durlabhāḥ puruṣā rāma te mahāguṇaśālinaḥ || 28 ||
[Analyze grammar]

ye cānye vividhā mūkā mūḍhāstāmasajātayaḥ |
teṣāṃ sthāvaratulyānāṃ kiṃ tad rāma vicāryate || 29 ||
[Analyze grammar]

katipayādhigatātmabhavāntaraḥ prakṛtajanmani labhyamahāpadaḥ |
ayamiha pravicāraṇayogyatāmanugato nanu rājasasāttvikaḥ || 30 ||
[Analyze grammar]