Chapter 33

dāśūropākhyāne dāśūradigavalokanaṃ nāma sargaḥ |
trayastriṃśaḥ sargaḥ |
vasiṣṭhaḥ |
tataḥ prabhṛti tatrāsau prasiddhastāpasāśrame |
kadambadāśūra iti śūrastapasi dāruṇe || 1 ||
[Analyze grammar]

tasmiṃl latādale sthitvā vilokya kakubhaḥ kṣaṇam |
dṛḍhaṃ padmāsanaṃ baddhvā digbhyaḥ pratyāhṛtātmanā || 2 ||
[Analyze grammar]

ajñātaparamārthena kriyāmātre ca tiṣṭhatā |
phalakārpaṇyayuktena manasā so'karonmakham || 3 ||
[Analyze grammar]

nabhogatalatāpattrasaṃsthitena vanāntare |
sarvāḥ svamanasā tena kṛtā yajñakriyāḥ kramāt || 4 ||
[Analyze grammar]

tatrāsau daśa varṣāṇi manasaivāyajatsurān |
gavāśvanaramedhādyairyajñairvipuladakṣiṇaiḥ || 5 ||
[Analyze grammar]

kālenāmalatāṃ yāte vitate tasya cetasi |
balādavatatārāntarjñānamātmaprasādajam || 6 ||
[Analyze grammar]

tato viśīrṇāvaraṇo vigaladvāsanāmalaḥ |
avasatpallave tasminmunirvigatakalmaṣaḥ || 7 ||
[Analyze grammar]

sa dadarśaikadā tasyāṃ latāyāmagrataḥ sthitām |
vanadevīṃ viśālākṣīmālolakusumāmbarām || 8 ||
[Analyze grammar]

kāminīkāntavadanāṃ madaghūrṇitalocanām |
nīlotpalāmodavatīmatīva sumanoharām || 9 ||
[Analyze grammar]

tāmuvācānavadyāṅgīṃ sa munirvinatānanām |
kokilaḥ kusumāpūranatāṃ vanalatāmiva || 10 ||
[Analyze grammar]

kā tvamutpalapattrākṣi parivikṣobhitasmarā |
vayasyāmiva puṣpāḍhyāṃ latāṃ kimadhitiṣṭhasi || 11 ||
[Analyze grammar]

ityuktā mṛgaśāvākṣī gaurī pīnapayodharā |
munimāha manohāri mugdhākṣaramidaṃ vacaḥ || 12 ||
[Analyze grammar]

yāni yāni durāpāni vāñchitāni mahītale |
prāpyante tāni tānyāśu mahatāmeva yācñayā || 13 ||
[Analyze grammar]

ahamasmiṃl latākīrṇe tvatkadambābhyalaṅkṛte |
latālīlālayā brahmanvipine vanadevatā || 14 ||
[Analyze grammar]

hyaścaitrasitapakṣasya trayodaśyāṃ smarotsave |
babhūva vanadevīnāṃ samājo nandane vane || 15 ||
[Analyze grammar]

sāmodapuṣpabhramare kokilāliparicchadā |
tatrāhamagamaṃ nātha trailokyalalanāsadaḥ || 16 ||
[Analyze grammar]

tato dṛṣṭā mayā sarvā vayasyā madanotsave |
aputrayā putrayutāstenāhaṃ duḥkhitā bhṛśam || 17 ||
[Analyze grammar]

tvayi sarvārthisārthasya bṛhatkalpatarau sthite |
anātheva kathaṃ nātha kila śocyāsmyaputrikā || 18 ||
[Analyze grammar]

dehi me bhagavanputraṃ no ceddehamihāgnaye |
prakaromyāhutiṃ putraduḥkhadāhopaśāntaye || 19 ||
[Analyze grammar]

tāmityuktavatīṃ tanvīṃ vihasya munipuṅgavaḥ |
prāha hastagataṃ puṣpaṃ tasyai dattvā dayānvitaḥ || 20 ||
[Analyze grammar]

gaccha tanvaṅgi māsena pūjārhamalilocanam |
prasoṣyase sutaṃ kāntaṃ prasūnamiva sallatā || 21 ||
[Analyze grammar]

kiṃ tvasau maraṇāveśapāpinyetastvayā yataḥ |
yācitaḥ kṛcchrasamprāpyajñānastena bhaviṣyati || 22 ||
[Analyze grammar]

ityuktvā sa munistanvīṃ prasannamukhamaṇḍalām |
paricaryāṃ karomīti prārthanotkāṃ vyasarjayat || 23 ||
[Analyze grammar]

sā jagāmātmasadanaṃ so'tiṣṭhatsvātmanā saha |
avahatkramaśaḥ kāla ṛtusaṃvatsarāṅkitaḥ || 24 ||
[Analyze grammar]

atha dīrgheṇa kālena saivotpalavilocanā |
dvādaśābdamupādāya sutaṃ munimupāyayau || 25 ||
[Analyze grammar]

sampraṇamyopaviśyāgre munimindusamānanā |
uvāca kalayā vācā cūtadrumamivālinī || 26 ||
[Analyze grammar]

ayaṃ sa bhagavanbhavyaḥ kumāraḥ putra āvayoḥ |
kṛto mayā samagrāṇāṃ kalānāṃ kila kovidaḥ || 27 ||
[Analyze grammar]

prabho kevalametena jñānaṃ nādhigataṃ śubham |
yena saṃsārayantre'sminna punaḥ paripīḍyate || 28 ||
[Analyze grammar]

jñānaṃ tvamevāsya vibho kṛpayopadiśādhunā |
ko hi nāma kule jātaṃ putraṃ maurkhye niyojayet || 29 ||
[Analyze grammar]

evaṃvadantīṃ sa munirmacchiṣyamabale sutam |
ihaiva sthāpayainaṃ tvamityuktvā tāṃ vyasarjayat || 30 ||
[Analyze grammar]

tasyāṃ gatāyāṃ sa piturantevāsitayā tadā |
atiṣṭhatsaṃyato dhīmānarkasyevāruṇaḥ puraḥ || 31 ||
[Analyze grammar]

kadarthaprāpyavijñānaṃ tataścitrābhiruktibhiḥ |
ciraṃ kālamasau tatra muniḥ putraṃ vyabodhayat || 32 ||
[Analyze grammar]

ākhyāyikākhyānaśatairdṛṣṭāntairdṛṣṭakalpitaiḥ |
tathetihāsavṛttāntairvedavedāntaniścayaiḥ || 33 ||
[Analyze grammar]

anudvegitayā nityaṃ vistareṇa kathākramaiḥ |
anubhūtimupārūḍhai rūḍhairatidhiyāṃ dhiyi || 34 ||
[Analyze grammar]

anubhavavaśato rasātiriktairalamucitārthavacogaṇairmahātmā |
jalada iva śikhaṇḍinaṃ purassthaṃ tanayamabodhayadambare maharṣiḥ || 35 ||
[Analyze grammar]