Chapter 34

dāśūrasutāvabodhanaṃ nāma sargaḥ |
catustriṃśaḥ sargaḥ |
vasiṣṭhaḥ |
kadācidatha mārgeṇa tena kailāsavāhinīm |
ahaṃ snātumadṛśyātmā vyomavīthigato'gamam || 1 ||
[Analyze grammar]

nirgatya nabhasaḥ saptamunimaṇḍalakoṭarāt |
rātrau prāpto'smi sumate dāśūratarupṛṣṭhakham || 2 ||
[Analyze grammar]

yāvacchṛṇomi viṭapakuharātkānane vacaḥ |
kuṭmalāmbhojabaddhasya ṣaṭpadasyeva nissvanam || 3 ||
[Analyze grammar]

śṛṇu putra mahābuddhe vastuno'sya samāmimām |
varṇayāmi mahāścaryāmekāmākhyāyikāṃ tava || 4 ||
[Analyze grammar]

asti rājā mahāvīryo vikhyāto bhuvanatraye |
nāmnā svottha iti śrīmāñjagadākramaṇe kṣamaḥ || 5 ||
[Analyze grammar]

yasyānuśāsanaṃ sarve bhuvaneṣvapi nāyakāḥ |
śirobhirdhārayantyuccaiścūḍāmaṇimivottamam || 6 ||
[Analyze grammar]

yaḥ sāhasaikarasiko nānāścaryavihāravān |
kenacittriṣu lokeṣu na mahātmā vaśīkṛtaḥ || 7 ||
[Analyze grammar]

yasyārambhasahasrāṇi sukhaduḥkhapradānyalam |
saṅkhyātuṃ naiva śakyante kallolā jaladheriva || 8 ||
[Analyze grammar]

yasya vīryaṃ suvīryasya na śastrāstrairna pāvakaiḥ |
kenacidbhuvane krāntamākāśamiva muṣṭinā || 9 ||
[Analyze grammar]

yadīyāṃ vitatārambhāṃ līlāṃ nirmāṇabhāsurām |
na manāganukurvanti śakropendraharā api || 10 ||
[Analyze grammar]

trayastasya mahābāho dehā digbharaṇakṣamāḥ |
jagadākṛṣya tiṣṭhanti uttamādhamamadhyamāḥ || 11 ||
[Analyze grammar]

vyomanyevātivitate jāto'sau triśarīrakaḥ |
tatraiva ca sthitiṃ yātaśśabdavātakhapakṣivat || 12 ||
[Analyze grammar]

tatraivāpāragagane nagaraṃ tena nirmitam |
caturdaśamahārathyaṃ vibhāgatrayabhūṣitam || 13 ||
[Analyze grammar]

vanopavanamālāḍhyaṃ krīḍāśikharisundaram |
muktālatāvivalitaṃ vāpīsaptakabhūṣitam || 14 ||
[Analyze grammar]

śītaloṣṇātmakākṣīṇadīpadvayavirājitam |
ūrdhvādhogatirūpeṇa vaṇiṅmārgeṇa saṅkulam || 15 ||
[Analyze grammar]

tasminnevātivipule pattane tena bhūbhṛtā |
sañcāriṇo viracitā mugdhāvavarakā gaṇāḥ || 16 ||
[Analyze grammar]

ūrdhve kecidadhaḥ kecinmadhye kecinniyojitāḥ |
keciccireṇa naśyantaḥ kecicchīghravināśinaḥ || 17 ||
[Analyze grammar]

asitacchādanācchannā navadvāravibhūṣitāḥ |
anāratavahadvātā bahuvātāyanānvitāḥ || 18 ||
[Analyze grammar]

dīpapañcakasālokāstristhūṇāśśukladāravaḥ |
masṛṇālepamṛdavaḥ pratolīkulasaṅkulāḥ || 19 ||
[Analyze grammar]

māyayā racitāstena rājñā teṣu mahāmate |
rakṣitāro mahāyakṣā nityamālokabhīravaḥ || 20 ||
[Analyze grammar]

athāvavarakaugheṣu calatsu sa mahīpatiḥ |
karoti vividhāḥ krīḍā nīḍeṣviva vihaṅgamaḥ || 21 ||
[Analyze grammar]

triśarīraḥ sa teṣvantastairyakṣaiḥ saha putraka |
līlālasamuṣitvāśu punarniṣkramya gacchati || 22 ||
[Analyze grammar]

tasyecchā jāyate vatsa kadāciccalacetasaḥ |
puraṃ bhaviṣyannirmāṇaṃ kiñcid yāmīti niścalā || 23 ||
[Analyze grammar]

bhūtāviṣṭa ivāvegāttata utthāya dhāvati |
puraṃ tadapyavāpnoti gandharvairiva nirmitam || 24 ||
[Analyze grammar]

tasyecchā jāyate nāma kadācijjaḍacetasaḥ |
vināśaṃ samprayāmīti tenāśu sa vinaśyati || 25 ||
[Analyze grammar]

punarutpadyate tūrṇaṃ khānmahormirivāmbhasaḥ |
vyavahāraṃ tanotyuccaiḥ punarārambhamantharam || 26 ||
[Analyze grammar]

svayaiva vyavahṛtyātha kadācitparidūyate |
kiṃ karomīdamajño'smi duḥkhito'smīti śocati || 27 ||
[Analyze grammar]

mudametya kadācicca svayamāyāti pīnatām |
prāvṛḍvarṣajalollāsapūrādiva nadīrayaḥ || 28 ||
[Analyze grammar]

pibati valgati gacchati jṛmbhate sphurati bhāti na bhāti ca bhāsuraḥ |
suta mahāmahimā sa mahīpatiḥ patirapāmiva vātarayākulaḥ || 29 ||
[Analyze grammar]