Chapter 18

upaśamasvarūpavarṇanaṃ nāma sargaḥ |
aṣṭādaśaḥ sargaḥ |
rāmaḥ |
yathedaṃ saṃsthitaṃ viśvaṃ viśvātīte cidātmani |
tanme kathaya he brahmanpunarbodhābhivṛddhaye || 1 ||
[Analyze grammar]

vasiṣṭhaḥ |
yathormayo'nabhivyaktā bhāvinaḥ payasi sthitāḥ |
na sthitāścāpyalakṣyatvāccittattve sṛṣṭayastathā || 2 ||
[Analyze grammar]

yathā sarvagataḥ saukṣmyādākāśo nopalabhyate |
tathā niraṃśaścidbhāgaḥ sarvago'pi na lakṣyate || 3 ||
[Analyze grammar]

asthitaiva sthitaivāntaḥ pratimāstrī maṇau yathā |
na satyabhūtā nāsatyā tatheyaṃ sṛṣṭirātmani || 4 ||
[Analyze grammar]

khādhārairambudaiḥ khasthairna spṛṣṭaṃ gaganaṃ yathā |
citsthaiḥ sargaiścidādhārairna spṛṣtā citparā tathā || 5 ||
[Analyze grammar]

jaladhiṣveva no mahyāṃ yathāgniḥ pratibimbati |
tathā puryaṣṭakeṣveva cinna deheṣu lakṣyate || 6 ||
[Analyze grammar]

sarvasaṅkalparahitā sarvasañjñāvivarjitā |
saiṣā cidavināśātmatattvoktyādikṛtābhidhā || 7 ||
[Analyze grammar]

ākāśaśatabhāgācchā jñeṣu niṣkalarūpiṇī |
sakalāmalasaṃsārasvarūpaikātmadarśinī || 8 ||
[Analyze grammar]

taraṅgādimayī sphārā nānātā salilārṇave |
cinmātravyatirekeṇa tathā naiva prakāśate || 9 ||
[Analyze grammar]

ciccinoti citaṃ cetyaṃ tenedaṃ sthitamātmani |
jñe'jñe tvanyatvamāyātamanyadastīti kalpanāt || 10 ||
[Analyze grammar]

ajñeṣvasatsvabhāvograsaṃsāragaṇarūpiṇī |
jñeṣu prakāśarūpaiva sakalaikātmikā satī || 11 ||
[Analyze grammar]

anubhūtivaśānnityamarkādīnāṃ prakāśinī |
svādanī sarvabhāvānāṃ bhāvanī bhavabhāvinām || 12 ||
[Analyze grammar]

nāstameti na codeti nottiṣṭhati na tiṣṭhati |
na ca yāti na cāyāti na ceha na ca neha cit || 13 ||
[Analyze grammar]

saiṣā cidamalākārā svayamātmani saṃsthitā |
rāghavetthaṃ prapañcena jagannāmnā vijṛmbhate || 14 ||
[Analyze grammar]

tejaḥpuñjairyathā tejaḥ payaḥpūrairyathā payaḥ |
parisphurati saspandaistathā citsargasambhramaiḥ || 15 ||
[Analyze grammar]

tatsvabhāvena cinnāmnā sarvagenoditātmanā |
prakāśenāprakāśena niraṃśenāṃśadhāriṇā || 16 ||
[Analyze grammar]

svayaṃ svavalanāyogādanantaṃ padamujjhatā |
ayaṃ so'smīti bhāvena gacchatājñapadaṃ śanaiḥ || 17 ||
[Analyze grammar]

nānātāyāṃ prarūḍhāyāmasyāṃ saṃsṛtipūrvakam |
bhāvābhāvagrahotsargapade sthitimupāgate || 18 ||
[Analyze grammar]

puryaṣṭakaṃ spandaśataiḥ karoti na karoti ca |
utsedhameti bhūkośakoṭarastho'ṅkurotkaraḥ || 19 ||
[Analyze grammar]

vyoma sauṣiryamādatte sarvamūrtyavirodhi yat |
spandaikadharmavānvāto rasarūpi yathā jalam || 20 ||
[Analyze grammar]

dṛḍhorvī prakaṭaṃ tejaḥ sthitimanti jaganti ca |
pratibandhābhyanujñāsu kālaḥ kalanayā sthitaḥ || 21 ||
[Analyze grammar]

puṣpaṃ latāntamāyāti śanaiḥ sañcitakesaram |
mṛtkoṭararasollāsastṛṇatāmeti bhūtale || 22 ||
[Analyze grammar]

mūlasthāḥ phalamāyānti pelavā rasaleśakāḥ |
sanniveśaṃ vrajantyetā rekhāḥ pallavapāliṣu || 23 ||
[Analyze grammar]

racanāmanugṛhṇanti śakrabāṇāsane'ṇavaḥ |
yogo bhavatyavirataṃ saṃsthānena navo navaḥ || 24 ||
[Analyze grammar]

vasantamupatiṣṭhante puṣpapallavarāśayaḥ |
nidāghavidhimāyānti dāvadāhavibhūtayaḥ || 25 ||
[Analyze grammar]

prāvṛṭsamayamīhante nīlā jaladarājayaḥ |
śaradaṃ cānudhāvanti samagrāḥ phalarāśayaḥ || 26 ||
[Analyze grammar]

himantau himahāsinyo bhavanti kakubho daśa |
nayantyupalatāmambu śiśire śītalānilāḥ || 27 ||
[Analyze grammar]

na jahāti svamaryādāṃ kālo yugamayīmimām |
taraṅgiṇītaraṅgaughalīlayā yānti sṛṣṭayaḥ || 28 ||
[Analyze grammar]

niyatiḥ sthitimāyāti sthairyacāturyakāriṇī |
tiṣṭhatyāpralayaṃ dhīrā dharā dharaṇadharmiṇī || 29 ||
[Analyze grammar]

caturdaśavidhānīha bhūtāni bhuvanāntare |
nānācāravihārāṇi nānāviracanāni ca || 30 ||
[Analyze grammar]

punaḥ punarvilīyante jāyante ca punaḥ punaḥ |
dhārāparamparāpātavati vārīva budbudāḥ || 31 ||
[Analyze grammar]

āyāti yāti paritiṣṭhati rāraṭīti svārthānupārjayati dhāvati janmarāśau |
unmattavadvihitabhāvanamāhitehā mugdhā kṛtāntavivaśā janatā varākī || 32 ||
[Analyze grammar]