Chapter 17

dāmādyupākhyānaṃ samāptaṃ nāma sargaḥ |
saptadaśaḥ sargaḥ |
vasiṣṭhaḥ |
jayanti te sadā śūrāḥ sādhavo yairvinirjitam |
avidyāmadirollāsi svamano viṣayonmukham || 1 ||
[Analyze grammar]

saṃsārasyāsya duḥkhasya sarvopadravadāyinaḥ |
upāya eka evāsti manasaḥ svasya nigrahaḥ || 2 ||
[Analyze grammar]

śrūyatāṃ dharmasarvasvaṃ śrutvā caivāvadhāryatām |
bhogecchāmātrako bandhastattyāgo mokṣa ucyate || 3 ||
[Analyze grammar]

kimanyaiśśāstrasandarbhaiḥ śrūyatāmidameva tat |
yad yatsvādvaṅga tatsarvaṃ dṛśyatāṃ viṣavahnivat || 4 ||
[Analyze grammar]

viṣayā viṣamābhogāḥ pravicāryāḥ punaḥ punaḥ |
te hyaniṣṭāḥ parityājyāḥ sevyamānāḥ sukhāvahāḥ || 5 ||
[Analyze grammar]

doṣānprasūte sasphārānvāsanāvāsitā matiḥ |
kīrṇakaṇṭakabījā bhūḥ kaṇṭakaprasaraṃ yathā || 6 ||
[Analyze grammar]

alagnavāsanāgarbhā matiḥ prasaravarjitā |
adṛṣṭarāgadveṣā sā śamameti śanaiḥ param || 7 ||
[Analyze grammar]

śubhavāsanāgarbhā dhīḥ prasūte suguṇān sadā |
phaladānaṅkurān kāle śreṣṭhabījavatīva bhūḥ || 8 ||
[Analyze grammar]

śubhabhāvānusandhānātprasanne manasi sthite |
śanaiśśanaiḥ praśānte ca mithyājñānaghanāmbude || 9 ||
[Analyze grammar]

vṛddhiṃ gate ca saujanye śuklapakṣa ivoḍupe |
viveke prasṛte puṇye jagatīvārkatejasi || 10 ||
[Analyze grammar]

dhṛtāvantarvivṛddhāyāṃ muktāyāmiva kīcake |
sthitāvantaḥ kṛtāsthāyāṃ rucāviva niśākare || 11 ||
[Analyze grammar]

phalite śītalacchāye satsaṅgasaphaladrume |
sravatyānandasurasaṃ samādhisaraladrume || 12 ||
[Analyze grammar]

mano bhavati nirdvandvaṃ niṣkāmamanupadravam |
praśāntacāpalānarthalobhamohabhayāmayam || 13 ||
[Analyze grammar]

kṣīṇaśāstrārthasandehaṃ vigatāśeṣakautukam |
nirastakalpanājālaṃ jīvanmuktamalepakam || 14 ||
[Analyze grammar]

nirīhaṃ nirupākrośaṃ nirapekṣaṃ nirādhi ca |
saṃśāntaśokanīhāramasaktaṃ granthivarjitam || 15 ||
[Analyze grammar]

svendriyograsutaṃ sūtaṃ satṛṣṇādārapañjaram |
nāśayitvā svamātmānaṃ sādhayatyarthamaiśvaram || 16 ||
[Analyze grammar]

ātmapīvaratāhetūnvikalpān svayamujjhati |
sadbhṛtyaḥ prabhukṛtyeṣu jahāti tṛṇavattanum || 17 ||
[Analyze grammar]

manaso'bhyudayo nāśo manonāśo mahodayaḥ |
jñamano nāśamabhyeti mano'jñasya vivardhate || 18 ||
[Analyze grammar]

manomātraṃ jagaccakraṃ manaḥ parvatamaṇḍalam |
mano vyoma mano deho mano mitraṃ mano ripuḥ || 19 ||
[Analyze grammar]

vikalpakaluṣā yā syāccittattvasyātmavismṛtiḥ |
mana ityucyate seyaṃ vāsanā bhavabhāginī || 20 ||
[Analyze grammar]

cetyānupātakalitaṃ cinmātretikṣatābhidham |
manāgvikalpakaluṣaṃ cittattvaṃ jīva ucyate || 21 ||
[Analyze grammar]

cetyaprapatitaṃ rūḍhasañjñamajñatvamāgataṃ |
tadevādhikavistāraṃ kalpyate tanmanastayā || 22 ||
[Analyze grammar]

nātmā saṃsārapuruṣo na śarīraṃ na śoṇitam |
jaḍaṃ sarvaṃ śarīrādi dehī khavadalepakaḥ || 23 ||
[Analyze grammar]

śarīre kaṇaśaḥ kṛtte nāstyanyad rudhirādikāt |
nirbhinne kadalīstambhe nāstyanyatpallavādṛte || 24 ||
[Analyze grammar]

mano jīvaṃ naraṃ viddhi tadevākāramāgatam |
ātmanātmānamādatte svavikalpāṃśakalpitam || 25 ||
[Analyze grammar]

svavikalpānnarastantūnprasārya racayatyalam |
jālamātmanibandhāya kośakāraḥ krimiryathā || 26 ||
[Analyze grammar]

imaṃ dehabhramaṃ tyaktvā deśakālāntare punaḥ |
śarīramanyadādatte pallavatvamivāṅkuraḥ || 27 ||
[Analyze grammar]

yādṛgvāsanametatsyānmanastādṛkprajāyate |
janaḥ svapiti yaccittastatsvapne niśi paśyati || 28 ||
[Analyze grammar]

amblamamblarasāsiktaṃ madhuraṃ madhurañjitam |
bījaṃ prativiṣākalkasiktaṃ ca kaṭu jāyate || 29 ||
[Analyze grammar]

śubhavāsanayā ceto mahatyā jāyate mahat |
bhavatīndramanorājyādindratāsvapnabhāṅ naraḥ || 30 ||
[Analyze grammar]

kṣudravāsanayā cetaḥ kṣudratāmeti pelavām |
piśācavibhramātsvasthaḥ piśācānniśi paśyati || 31 ||
[Analyze grammar]

manasi sphāranairmalye kāluṣyaṃ yāti na sthitim |
tathaiva sphārakāluṣye prasādo yāti na sthitim || 32 ||
[Analyze grammar]

manasi sphārakāluṣye tadrūpaṃ jāyate phalam |
tathaiva sphāranairmalye tadrūpaṃ jāyate phalam || 33 ||
[Analyze grammar]

tyajatyudārāṃ na gatiṃ kṣīṇo'pyatyantamuttamaḥ |
udyogavānavirataṃ pūraṇāśāmivoḍupaḥ || 34 ||
[Analyze grammar]

neha bandho na mokṣo'sti na badhyo na ca bandhanam |
mithyotthitaiva māyeyamindrajālalatā yathā || 35 ||
[Analyze grammar]

gandharvanagarākāro mṛgatṛṣṇākramotthitaḥ |
dvicandravibhramābhāsaḥ saṃsāro'yamasanmayaḥ || 36 ||
[Analyze grammar]

nānanto'haṃ varāko'hamiti durniścayoditaḥ |
ananto'smi paro'smīti niścayena vilīyate || 37 ||
[Analyze grammar]

sarvage svātmani svacche yaiṣā pramitibhāvanā |
etattadbandhanaṃ loke svavikalpopakalpitam || 38 ||
[Analyze grammar]

bandhamokṣadaśāhīnā dvitvaikatvavivarjitā |
sarvaiva brahmasatteyamityeṣā paramārthatā || 39 ||
[Analyze grammar]

mano nirmalatāṃ yātamasaktaṃ sarvadṛṣṭiṣu |
amanastāmivāpannaṃ brahma paśyati nānyathā || 40 ||
[Analyze grammar]

mano nirmalatāṃ yātaṃ śubhasantānavāribhiḥ |
brāhmīṃ dṛṣṭimupādatte raṅgaṃ śuklaḥ paṭo yathā || 41 ||
[Analyze grammar]

sarvameva mamātmeti satyabhāvanayānagha |
heyādeyadale kṣīṇe bandhamokṣau kimucyatām || 42 ||
[Analyze grammar]

śuddhasya manasaḥ kāyaśśāstravairāgyabuddhibhiḥ |
abhijātopalasyeva galatyabhyeti ca dyutiḥ || 43 ||
[Analyze grammar]

padārthenaikatāmetya manaso yaikatānatā |
asamyagjñānadṛṣṭiṃ tāṃ viddhi kṣaṇavināśinīm || 44 ||
[Analyze grammar]

sabāhyābhyantaraṃ tyaktvā sarvā dṛśyadṛśo yadā |
manastiṣṭhati saṃlīnaṃ samprāptaṃ tatpadaṃ tadā || 45 ||
[Analyze grammar]

dṛśyadṛṣṭiḥ sphuṭā yeyaṃ sā hyavaśyamasanmayī |
tanmayatvaṃ ca manasaḥ svarūpaṃ viddhi netarat || 46 ||
[Analyze grammar]

ādyantayorvināśitvānmadhye'pi tadasanmayam |
kujñānamanasastena duḥkhitā hastasaṃsthitā || 47 ||
[Analyze grammar]

ātmaivedaṃ jagaditi vinā bhāvena duḥkhadā |
dṛśyaśrīranyathā tveṣā bhogamokṣaikadāyinī || 48 ||
[Analyze grammar]

jalamanyattaraṅgo'nya iti nānātayājñatā |
jalameva taraṅgo'yamityekatvātkila jñatā || 49 ||
[Analyze grammar]

ajñatvādduḥkhamāyāti heyopādeyarūpi yat |
tadabhāvena tu jñatvādānantyamavaśiṣyate || 50 ||
[Analyze grammar]

saṅkalpakalpitatvācca manorūpamasanmayam |
asanmayavināśe tu kaḥ kleśo vada rāghava || 51 ||
[Analyze grammar]

avatsalo yathā bandhurarāgadveṣayā dhiyā |
dṛśyate paśya tadvattvaṃ dṛśyapañjaramātmanaḥ || 52 ||
[Analyze grammar]

avatsalād yathā bandhoḥ sukhaduḥkhairna lipyate |
paratvasamparijñātāttathā tattvacayātmanaḥ || 53 ||
[Analyze grammar]

tadanādi śivaṃ jñānaṃ yanmadhyaṃ draṣṭṛdṛśyayoḥ |
tasmin satye manaśśāntaṃ pāṃsurvāyukṣaye yathā || 54 ||
[Analyze grammar]

upaśānte manovāyau dehapāṃsuḥ praśāmyati |
punaḥ saṃsāranagare na nīhāraḥ pravartate || 55 ||
[Analyze grammar]

vāsanāprāvṛṣi kṣīṇasaṃsthitau śamamāgate |
jāḍye janitahṛtkampe paṅke śoṣamupāgate || 56 ||
[Analyze grammar]

śuṣkatṛṣṇālateṣvantarmahāhṛdayakānane |
akṣakṣīṇakadambeṣu mithyājñānaghane kṣate || 57 ||
[Analyze grammar]

kṣīyate mohamihikā prabhāta iva śarvarī |
kvāpi gacchati tajjāḍyaṃ viṣaṃ mantrahataṃ yathā || 58 ||
[Analyze grammar]

dehādrau na navacchidrasaritaḥ prasravantyalam |
nollasanti lasatpakṣāḥ saṅkalpograkalāpinaḥ || 59 ||
[Analyze grammar]

parāṃ nirmalatāmeti svacidākāśakoṭaram |
rājate'titarāmaccho jīvādityo mahodayaḥ || 60 ||
[Analyze grammar]

ghanamohabharonmuktā viviktatvaṃ paraṃ gatāḥ |
śamametyātiśobhante dhautā āśāmahādiśaḥ || 61 ||
[Analyze grammar]

bhṛśamābhāti vimalā muditākāśamañjarī |
śītalīkṛtadikcakrā śaradvyomnīva candrikā || 62 ||
[Analyze grammar]

sarvasampatprakāśena paramānandaśālinī |
bhṛśaṃ saphalatāmeti suviviktā vivekabhūḥ || 63 ||
[Analyze grammar]

saparvatavanābhogaṃ paramālokasundaram |
acchācchaṃ śītalacchāyaṃ jāyate bhuvanāntaram || 64 ||
[Analyze grammar]

vistāritāṃ suśamatāṃ sphāritāṃ sphuṭikācchatām |
upaiti hṛtsaraḥ svacchanīrugambhojakoṭaram || 65 ||
[Analyze grammar]

hṛtpadmakośānmalinaḥ svāhaṅkāramadhuvrataḥ |
apunardarśanāyaiva cañcalaḥ kvāpi gacchati || 66 ||
[Analyze grammar]

bhavatyapagatāpekṣaḥ sarvagaḥ sarvanāyakaḥ |
nirvāsanaśśāntamanāḥ svadehanagareśvaraḥ || 67 ||
[Analyze grammar]

vicāraṇāsamadhigatātmadīpake manasyalaṃ vyapagalite ca dhīradhīḥ |
vilokayan kṣayabhayanīrasā gatīrgatajvaro vilasati dehapattane || 68 ||
[Analyze grammar]