Chapter 119

jñānabhūmikopadeśo nāma sargaḥ |
ekonaviṃśottaraśatatamaḥ sargaḥ |
vasiṣṭhaḥ |
ūrmikāsaṃvidā hema yathā vismṛtya hematām |
virauti nāhaṃ hemeti vṛthātmāhantayā tathā || 1 ||
[Analyze grammar]

rāmaḥ |
ūrmikāsaṃvidudayaḥ kathaṃ hemno mahāmune |
ahambhāvātmaka iti yathāvadbrūhi me prabho || 2 ||
[Analyze grammar]

vasiṣṭhaḥ |
sata evāgamāpāyau praṣṭavyau nāsataḥ sadā |
ahantvamūrmikātvaṃ ca satī tu na kadācana || 3 ||
[Analyze grammar]

hema dehyūrmikātvaṃ tvaṃ gṛhāṇetyudite yadi |
taddīyate sormikeṇa tattadasti na saṃśayaḥ || 4 ||
[Analyze grammar]

rāmaḥ |
evaṃ cettatprabho'tra syādūrmikātvaṃ tu kīdṛśam |
anayaivārthavicchittyā jñāsyāmi brahmaṇo vapuḥ || 5 ||
[Analyze grammar]

vasiṣṭhaḥ |
rūpaṃ rāghava nīrūpamasataścennirūpyate |
tadvandhyātanayākāraguṇānme tvamudāhara || 6 ||
[Analyze grammar]

ūrmikātvaṃ mudhā bhrāntirmāyevāsatsvarūpiṇī |
rūpaṃ tadetadevāsyāḥ prekṣitā yanna dṛśyate || 7 ||
[Analyze grammar]

mṛgatṛṣṇāmbhasi dvīndāvahantārucakādiṣu |
etāvadeva rūpaṃ yatprekṣyamāṇaṃ na lakṣyate || 8 ||
[Analyze grammar]

yaśśuktau rajatākāraṃ prekṣate rajatasya saḥ |
na samprāpnotyaṇumapi kaṇaṃ kṣīṇamapi kvacit || 9 ||
[Analyze grammar]

aparyālocanenaiva sadivāsadvirājate |
yathā śuktau rajatatā jalaṃ marumarīciṣu || 10 ||
[Analyze grammar]

yannāsti tasya nāstitvaṃ prekṣyamāṇaṃ prakāśate |
aprekṣyamāṇaṃ sphurati mṛgatṛṣṇāsvivāmbudhīḥ || 11 ||
[Analyze grammar]

asadeva ca tatkāryakaraṃ bhavati ca sthiram |
bālānāṃ maraṇāyaiva vetālabhrāntisaṅgamaḥ || 12 ||
[Analyze grammar]

hematāṃ varjayitvaikāṃ vartate hemni netarat |
ūrmikākaṭakāditvaṃ tailādi sikatāsviva || 13 ||
[Analyze grammar]

nehāsti satyaṃ no mithyā yad yathā pratibhāsate |
tattathārthakriyākāri bālayakṣavikāravat || 14 ||
[Analyze grammar]

sadvā bhavatvasadvāpi sudṛḍhaṃ hṛdaye tu yat |
tattadarthakriyākāri viṣasyevāmṛtakriyā || 15 ||
[Analyze grammar]

paramaiva hi sāvidyā māyaiṣā saṃsṛtirhyasau |
asato niṣpratiṣṭhasya yadāhantvasya bhāvanam || 16 ||
[Analyze grammar]

hemnyasti normikāditvamahantādyasti nātmani |
ahantvābhāvatastvevaṃ svacche śānte same pare || 17 ||
[Analyze grammar]

na sanātanatā kācinna ca kācidviriñcatā |
na ca brahmāṇḍatā kācinna ca kācitsurāditā || 18 ||
[Analyze grammar]

na lokāntaratā kācinna ca sargāditā kvacit |
na merutā nāmbaratā na manastā na dehatā || 19 ||
[Analyze grammar]

na mahābhūtatā kācinna ca kāraṇatā kvacit |
na cartukālakalanā na bhāvābhāvavastutā || 20 ||
[Analyze grammar]

tvattāhantātmatā tattā sattāsattā na kāścana |
na kvacidbhedakalanā na bhāvābhāvarañjanā || 21 ||
[Analyze grammar]

sarvaṃ śāntaṃ nirālambhaṃ jñamacchaṃ śāśvataṃ śivam |
anāmayamanābhāsamanāmakamakāraṇam || 22 ||
[Analyze grammar]

na sannāsanna madhyāntaṃ na sarvaṃ sarvameva ca |
manovacobhiragrāhyaṃ śūnyāśūnyaṃ suśāśvatam || 23 ||
[Analyze grammar]

rāmaḥ |
avabuddhaṃ mahābrahman sarvametanmayādhunā |
tathāpi bhūyaḥ kathaya sargaḥ kimavalokyate || 24 ||
[Analyze grammar]

vasiṣṭhaḥ |
pare śāntaṃ paraṃ nāma sthitamitthamidantayā |
neha sargo na sargākhyā kācanāsti kadācana || 25 ||
[Analyze grammar]

mahārṇavāmbhasīvāmbu saṃsthitaṃ parame pade |
jalaṃ dravatvātspandīva nisspandaṃ paramaṃ padam || 26 ||
[Analyze grammar]

bhāsvātmanīva kacati na kacaccaiva tatpadam |
bhāsate kacanaṃ bhāsāṃ paraṃ tvakacanaṃ viduḥ || 27 ||
[Analyze grammar]

adha ūrdhvaṃ varjayitvā yathābdherudare payaḥ |
sphuratyevaṃ pare cittvādidaṃ nāneva tatparam || 28 ||
[Analyze grammar]

īṣadvidan svayaṃ cittvādanyatāmiva paśyati |
budhyate sarga ityeva śamācchāmyati śāśvatam || 29 ||
[Analyze grammar]

sargastu paramārthasya sañjñetyeva viniścayaḥ |
na nāsti nāyamastyantarambarasya yathāmbaram || 30 ||
[Analyze grammar]

cittvātsargasamāpattiracittvātsargasaṅkṣayaḥ |
pare paramaṃ saṃśānte hemnīva kaṭakabhramaḥ || 31 ||
[Analyze grammar]

sanneva sargo'sargatvameti vittvaśamodaye |
asatsattāmavāpnoti svataḥ saṃvedanodaye || 32 ||
[Analyze grammar]

saṃvedanamahambhāvasargasambhavasambhramaḥ |
asaṃvedanamāśāntaṃ paraṃ viddhi na tajjaḍam || 33 ||
[Analyze grammar]

nānena sargo nānāyaṃ jñāsyaikātmā śivātmakaḥ |
pustakarmakṛtā senā mṛṇmayī śilpināṃ yathā || 34 ||
[Analyze grammar]

idaṃ pūrṇamanārambhamanantamanavodayam |
pūrṇe pūrṇaṃ parāpūraiḥ pūrvamevāvatiṣṭhate || 35 ||
[Analyze grammar]

yadayaṃ lakṣyate sargastadbrahma brahmaṇi sthitam |
nabho nabhasi viśrāntaṃ śāntaṃ śānte śivaṃ śive || 36 ||
[Analyze grammar]

makurapratibimbasthe nagare nagaraṃ jane |
yathā dūramadūraṃ ca tatheśe tadatatkramaḥ || 37 ||
[Analyze grammar]

asadabhyutthitaṃ viśvaṃ sadapyabhyuditaṃ sadā |
pratibhāsātsadābhāsamavastutvādasanmayam || 38 ||
[Analyze grammar]

ādarśanagarākāre mṛgatṛṣṇāmbubhāsvare |
dvicandravibhramābhāse sarge'smin keva satyatā || 39 ||
[Analyze grammar]

māyācūrṇaparikṣepād yathā vyomni purabhramaḥ |
tathā saṃvidi saṃsāraḥ sāro'sāraśca bhāsate || 40 ||
[Analyze grammar]

yāvadvicāradahanena samūladāhaṃ dagdhā na jarjaralateva balādavidyā |
śākhāpratānagahanā gahanāni tāvannānāvidhāni sukhaduḥkhavanāni sūte || 41 ||
[Analyze grammar]