Chapter 118

ajñānabhumikāvarṇanaṃ nāma sargaḥ |
aṣṭādaśottaraśatatamaḥ sargaḥ |
vasiṣṭhaḥ |
imāṃ saptapadāṃ jñānabhūmimākarṇayānagha |
na yayā jñātayā mohapaṅke bhūyo nimajjasi || 1 ||
[Analyze grammar]

vadanti bahubhedena vādino yogabhūmikāḥ |
mama tvabhimatā nūnamimā eva śubhapradāḥ || 2 ||
[Analyze grammar]

avabodhaṃ vidurjñānaṃ tadidaṃ sāptabhūmikam |
muktistajjñeyamityuktā bhūmikā saptakātparam || 3 ||
[Analyze grammar]

satyāvabodho mokṣaścaiveti paryāyanāmanī |
satyabodhena jīvo'yaṃ neha bhūyaḥ prarohati || 4 ||
[Analyze grammar]

jñānabhūmiśśubhecchākhyā prathamā samudāhṛtā |
vicāraṇā dvitīyātra tṛtīyā tanumānasā || 5 ||
[Analyze grammar]

sattvāpattiścaturthī syāttato'saṃsaktināmikā |
padārthābhāvanī ṣaṣṭhī saptamī turyagā smṛtā || 6 ||
[Analyze grammar]

āsāmante sthitā muktistasyāṃ bhūyo na śocate |
etāsāṃ bhūmikānāṃ tvamidaṃ nirvacanaṃ śṛṇu || 7 ||
[Analyze grammar]

sthitaḥ kiṃ mūḍha evāsmi prekṣe'haṃ śāstrasajjanam |
vairāgyapūrvamiccheti śubhecchetyucyate budhaiḥ || 8 ||
[Analyze grammar]

śāstrasajjanasamparkavairāgyābhyāsapūrvakam |
sadācārapravṛttiryā procyate sā vicāraṇā || 9 ||
[Analyze grammar]

vicāraṇāśubhecchābhyāmindriyārtheṣvaraktatā |
yatrāśātanutābhāvātprocyate tanumānasā || 10 ||
[Analyze grammar]

bhūmikātritayābhyāsāccitte'rthaviratervaśāt |
sattvātmani sthite śuddhe sattvāpattirudāhṛtā || 11 ||
[Analyze grammar]

daśācatuṣṭayābhyāsādasaṃsaṅgaphalena vai |
rūḍhasattvacamatkārā proktāsaṃsaktināmikā || 12 ||
[Analyze grammar]

bhūmikāpāñcakābhyāsātsvātmārāmatayā dṛḍham |
ābhyantarāṇāṃ bāhyānāṃ padārthānāmabhāvanāt || 13 ||
[Analyze grammar]

paraprayuktena ciraṃ prayatnenārthabodhanāt |
padārthābhāvanānāmnī ṣaṣṭhī sañjāyate gatiḥ || 14 ||
[Analyze grammar]

bhūmiṣaṭkacirābhyāsādbhedasyānupalambhataḥ |
yatsvabhāvaikaniṣṭhatvaṃ sā jñeyā turyagā gatiḥ || 15 ||
[Analyze grammar]

eṣā hi jīvanmukteṣu turyāvastheha vidyate |
videhamuktaviṣayaṃ turyātītamataḥ param || 16 ||
[Analyze grammar]

ye hi nāma mahābhāgāḥ saptamīṃ bhūmikāmitāḥ |
ātmārāmā mahātmānaste mahatpadamāgatāḥ || 17 ||
[Analyze grammar]

jīvanmuktā na majjanti sukhaduḥkharasasthitau |
prākṛtenāryakāryeṇa kiṃcitkurvanti vā na vā || 18 ||
[Analyze grammar]

pārśvasthā bodhitāḥ santaḥ sarvācāre kramāgatam |
ācāramācarantyeva suptabuddhavadakṣatāḥ || 19 ||
[Analyze grammar]

ātmārāmatayā tāṃstāḥ sukhayanti na kāścana |
jagatkriyāḥ susaṃsuptān rūpālokaśriyo yathā || 20 ||
[Analyze grammar]

bhūmikāsaptakaṃ tvetaddhīmatāmeva gocaram |
na paśusthāvarādīnāṃ na ca mlecchādicetasām || 21 ||
[Analyze grammar]

prāptā jñānadaśāmetāṃ paśumlecchādayo'pi ye |
sadehā vāpyadehā vā te muktā nātra saṃśayaḥ || 22 ||
[Analyze grammar]

jñaptirhi granthivicchedastasmin sati vimuktatā |
mṛgatṛṣṇāmbubuddhyādiśāntimātrātmakastvasau || 23 ||
[Analyze grammar]

ye tu mohādghanāttīrṇā na prāptāḥ pāvanaṃ padam |
te sthitā bhūmikāsvāsu svātmalābhaparāyaṇāḥ || 24 ||
[Analyze grammar]

sarvabhūmigatāḥ kecitkecidāntaikabhūmikāḥ |
bhūmitrayagatāḥ kecitkecitpañcamabhūgatāḥ || 25 ||
[Analyze grammar]

bhūmiṣaṭkagatāḥ kecitkecitsārdhaikabhūmikāḥ |
bhūcatuṣṭayagāḥ kecitkecidbhūmidvaye sthitāḥ || 26 ||
[Analyze grammar]

bhūmyaṃśabhājanāḥ kecitkecitsārdhatribhūmikāḥ |
kecitsārdhacaturbhūkāḥ sārdhaṣaḍbhūmikāḥ pare || 27 ||
[Analyze grammar]

vivekino narā loke caranta iti bhūmiṣu |
gṛhāyatanatāpasya daśāveśeṣu saṃsthitāḥ || 28 ||
[Analyze grammar]

te hi dhīrāḥ surājāno daśāsvāsu jayanti te |
tṛṇāyate tu digdantighaṭābhaṭaparājayaḥ || 29 ||
[Analyze grammar]

etāsu bhūmiṣu jayanti hi ye mahānto vandyāsta eva hi jitendriyaśātravāste |
samrāḍvirāḍapi ca yatra tṛṇāyate tatsphāraṃ padaṃ jhagiti te samavāpnuvanti || 30 ||
[Analyze grammar]