Chapter 112

manaśśaktisvarūpapratipādanaṃ nāma sargaḥ |
dvādaśottaraśatatamaḥ sargaḥ |
vasiṣṭhaḥ |
yasminyasminpadārthe hi yena yena yathā tathā |
tīvrasaṃvegasampannaṃ manaḥ paśyati vāñchitam || 1 ||
[Analyze grammar]

jāyate mriyate caiṣā manasastīvravegitā |
saumyāmbubudbudālīva nirnimittā svabhāvataḥ || 2 ||
[Analyze grammar]

śītatā tuhinasyeva kajjalasyeva kṛṣṇatā |
lolatā manaso rūpaṃ tīvrātīvraikarūpiṇaḥ || 3 ||
[Analyze grammar]

rāmaḥ |
kathamasyātilolasya vegāvegaikakāraṇam |
calatā manaso brahmanbalato vinivāryate || 4 ||
[Analyze grammar]

vasiṣṭhaḥ |
neha cañcalatāhīnaṃ manaḥ kvacana dṛśyate |
cañcalatvaṃ manodharmo vahnidharmo yathoṣṇatā || 5 ||
[Analyze grammar]

yaiṣā hi cañcalā spandaśaktiścittatvasaṃsthitā |
tāṃ viddhi mānasīṃ śaktiṃ jagadāḍambarātmikām || 6 ||
[Analyze grammar]

spandasparśādṛte vāyoryathā sattaiva nohyate |
tathāsti cittasattā no cañcalaspandanādṛte || 7 ||
[Analyze grammar]

yattu cañcalatāhīnaṃ tanmano mṛtamucyate |
sa eva ca tapaśśāstraprasiddho mokṣa ucyate || 8 ||
[Analyze grammar]

manovilayamātreṇa duḥkhaśāntiravāpyate |
manojananamātreṇa duḥkhaṃ paramavāpyate || 9 ||
[Analyze grammar]

duḥkhamutpādayatyuccairutthitaścittarākṣasaḥ |
sukhāyānantabhogyāya taṃ prayatnena pātaya || 10 ||
[Analyze grammar]

tasya cañcalatā yaiṣā hyavidyā nāma socyate |
vāsanāparanāmnī tāṃ vicāreṇa vināśaya || 11 ||
[Analyze grammar]

avidyayā vāsanayā tayāntaścittaśāntayā |
vilīnayā tyāgavaśātparaṃ śreyo'dhigamyate || 12 ||
[Analyze grammar]

yattatsadasatormadhyaṃ yanmadhyaṃ cittvajāḍyayoḥ |
tanmanaḥ procyate rāma dvayadolāyitākṛti || 13 ||
[Analyze grammar]

jāḍyānusandhānahṛtaṃ jāḍyātmakatayeddhayā |
ceto jaḍatvamāyāti dṛḍhābhyāsavaśena hi || 14 ||
[Analyze grammar]

vivekaikānusandhānāccidaṃśātmatayā manaḥ |
citaikatāmupāyāti dṛḍhābhyāsavaśātsthiram || 15 ||
[Analyze grammar]

pauruṣeṇa prayatnena yasminneva pade manaḥ |
pātyate tatpadaṃ prāpya bhavatyabhyāsalohitam || 16 ||
[Analyze grammar]

ataḥ pauruṣamāśritya cittamākramya cetasā |
viśokaṃ padamāśritya nirāśaṅkaḥ sthiro bhava || 17 ||
[Analyze grammar]

bhavabhāvanayā bhagnaṃ manasaiva na cenmanaḥ |
balāduttāryate rāma tadupāyo'sti netaraḥ || 18 ||
[Analyze grammar]

mana eva samarthaṃ vai manaso dṛḍhanigrahe |
arājā kaḥ samarthaḥ syād rājño rāghava nigrahe || 19 ||
[Analyze grammar]

tṛṣṇāgrāhagṛhītānāṃ saṃsārārṇavaraṃhasi |
āvartairuhyamānānāṃ dūraṃ svamana eva nauḥ || 20 ||
[Analyze grammar]

manasaiva manaśchittvā pāśaṃ paramabandhanam |
unmocito na yenātmā nāsāvanyena mokṣyate || 21 ||
[Analyze grammar]

yā yodeti manonāmnī vāsanā vāsitāntarā |
tāṃ tāṃ pariharetprājñastato'vidyākṣayo bhavet || 22 ||
[Analyze grammar]

bhogaughavāsanāṃ tyaktvā tyaja tvaṃ khedavāsanām |
bhāvābhāvau tatastyaktvā nirvikalpaḥ sukhī bhava || 23 ||
[Analyze grammar]

abhāvanaṃ bhāvanāyāstvetāvānbhāvanākṣayaḥ |
eṣa eva manonāśastvavidyānāśa ucyate || 24 ||
[Analyze grammar]

yad yatsaṃvedyate kiñcittatrāsaṃvedanaṃ varam |
asaṃvittistu nirvāṇaṃ duḥkhaṃ saṃvedanādbhavet || 25 ||
[Analyze grammar]

svenaiva tatprayatnena puṃsaḥ sampadyate kṣaṇāt |
bhāvasyābhāvanaṃ bhūtyai tattasmānnityamāharet || 26 ||
[Analyze grammar]

rāgādayo ye manasepsitāste buddhvaiva tāṃstāṃstvamavastubhūtān |
tyaktvā tadāsthāṅkuramastabījaṃ mā harṣaśokau samupaiṣi tṛptaḥ || 27 ||
[Analyze grammar]