Chapter 102

bālakākhyāyikā nāma sargaḥ |
dvyuttaraśatatamaḥ sargaḥ |
vasiṣṭhaḥ |
svasaṅkalpavaśānmūḍho mohameti na paṇḍitaḥ |
ayakṣe yakṣasaṅkalpānmuhyate śiśunaiva hi || 1 ||
[Analyze grammar]

rāmaḥ |
ko'sau saṅkalpitaḥ kena yakṣo brahmavidāṃ vara |
asataiva mahāmohaṃ yenādatte sadaiva hi || 2 ||
[Analyze grammar]

vasiṣṭhaḥ |
amunā bhūtasaṅgena yakṣo'haṅkārarūpadhṛt |
vetālaśśiśuneveha mithyaiva parikalpitaḥ || 3 ||
[Analyze grammar]

ekasminneva sarvasmin sthite paramavastuni |
kutaḥ ko'yamahaṃ nāma kathaṃ nāma kiloditaḥ || 4 ||
[Analyze grammar]

vastuto nāstyahaṅkāraḥ paramātmanyabhedataḥ |
asamyagdarśanānmārgī sarittīvrātape yathā || 5 ||
[Analyze grammar]

manomaṇirmahārambhaḥ saṃsāra iti lakṣyate |
ātmanātmānamāśritya sphuratyambu yathāmbunā || 6 ||
[Analyze grammar]

asamyagdarśanaṃ tena tyaja rāma nirāśrayam |
sāśrayaṃ satyamānandi samyagdarśanamāśraya || 7 ||
[Analyze grammar]

dhiyā vicāradharmiṇyā mohasaṃrambhahīnayā |
vicārayādhunā satyamasatyaṃ samparityaja || 8 ||
[Analyze grammar]

abaddho baddha ityuktvā kiṃ śocasi mudhaiva hi |
anantasyātmatattvasya kiṃ kathaṃ kena badhyate || 9 ||
[Analyze grammar]

nānānānātvakalanāsvavibhinne mahātmani |
sarvasminbrahmatattve'smin kiṃ baddhaṃ kiṃ vimucyate || 10 ||
[Analyze grammar]

anārto'pyārtisadbhāvācchinne'ṅge kiṃ ca tāmyasi |
bhedābhedavikārārtiḥ kācinnātmani vidyate || 11 ||
[Analyze grammar]

dehe naṣṭe kṣate kṣīṇe kātmanaḥ kṣatirāgatā |
bhastrāyāṃ paridagdhāyāṃ tatsthaṃ hema na naśyati || 12 ||
[Analyze grammar]

dehaḥ patatu vodetu kā naḥ kṣatirupāgatā |
ko naṣṭaḥ prakṣate puṣpe āmodo vyomasaṃśrayaḥ || 13 ||
[Analyze grammar]

āpatantu vapuḥpadmaṃ sukhaduḥkhahimaśriyaḥ |
ākāśoḍḍayane'līnāṃ kā naḥ kṣatirupasthitā || 14 ||
[Analyze grammar]

dehaḥ patatu vodetu yātu vā gaganāntaram |
tadvilakṣaṇarūpasya kāsau bhavati te kṣatiḥ || 15 ||
[Analyze grammar]

yathā payodamarutoryathā ṣaṭpadapadmayoḥ |
tathā rāghava sambandhastvaccharīratvadātmanoḥ || 16 ||
[Analyze grammar]

mano nāma śarīraṃ hi jagataḥ sakalasya ca |
ātmaśaktiścidasyātmā na naśyati kadācana || 17 ||
[Analyze grammar]

yo'sāvātmā mahāprājña naśyatītyavagacchasi |
na naśyati kadācid sa kiṃ mudhā paritapyase || 18 ||
[Analyze grammar]

viśīrṇe'bhre yathā vātaśśuṣke'bje ṣaṭpado yathā |
yātyanantapadaṃ vyoma tathātmā dehasaṅkṣaye || 19 ||
[Analyze grammar]

saṃsāre'sminviharato mano'pi hi na naśyati |
jñānāgninā vinā jantorātmanāśe tu kā kathā || 20 ||
[Analyze grammar]

yaḥ kuṇḍabadaranyāyo yo ghaṭākāśayoḥ kramaḥ |
sthitirdehātmanoḥ saiva savināśāvināśayoḥ || 21 ||
[Analyze grammar]

badaraṃ hastamāyāti yathā sphuṭati kuṇḍake |
ātmā gaganamāyāti tathā calati dehake || 22 ||
[Analyze grammar]

kumbhe gacchatyakumbhatvaṃ kumbhākāśo yathāmbare |
tiṣṭhatyevamayaṃ dehī dehe kṣīṇe nirāmayaḥ || 23 ||
[Analyze grammar]

mano deho hi jantūnāṃ deśakālatirohitaḥ |
muhurmṛtipaṭācchannaśśete kiṃ paridevanā || 24 ||
[Analyze grammar]

deśakālatirodhāne mūḍho'pi maraṇe naraḥ |
kiṃ bibheti mahābāho neha naśyati kaścana || 25 ||
[Analyze grammar]

atastvaṃ vāsanāṃ rāma mithyaivāhamiti sthitām |
tyaja pakṣīśvaro vyomagamanotka ivāṇḍakam || 26 ||
[Analyze grammar]

yaiṣā hi mānasī śaktiriṣṭāniṣṭānubandhinī |
anayedaṃ mudhā bhrāntyā svapnavatparikalpitam || 27 ||
[Analyze grammar]

avidyaiṣā durantaiṣā duḥkhāyaiṣā hi vardhate |
aparijñāyamānaiṣā tanotīdamasanmayam || 28 ||
[Analyze grammar]

eṣā kuḍyavadākāśaṃ tuṣāramanalaṃ yathā |
paripaśyati vibhrāntā svarūpasya svabhāvataḥ || 29 ||
[Analyze grammar]

asadevedamārambhamantharaṃ sadivotthitam |
kalpitaṃ jagadābhogi dīrghasvapna ivaitayā || 30 ||
[Analyze grammar]

bhāvanāmātramevāsyāḥ svarūpaṃ kartṛtāṃ gatam |
jagatāmākulaṃ cakṣurvyomni piñchakatāmiva || 31 ||
[Analyze grammar]

layamasyāḥ svarūpaṃ tvaṃ naya rāma vicāraṇāt |
yathā himaśilāyāstu tapanāddivasādhipaḥ || 32 ||
[Analyze grammar]

himābhāvārthino'rkasya svodayena hitaṃ yathā |
sidhyatyevaṃ vicāreṇa manonāśārthino'rthitam || 33 ||
[Analyze grammar]

avidyā sampravṛttā hi vitatānarthadurgamā |
nānendrajālakalaṇaṃ śāmbarī hema varṣati || 34 ||
[Analyze grammar]

svavināśakriyāṃ caitāṃ mana eva karotyalam |
mano hyātmavadhaṃ nāma nāṭakaṃ parinṛtyati || 35 ||
[Analyze grammar]

ātmānamīkṣate cetaḥ svavināśāya kevalam |
na hi jānāti durbuddhirvināśaṃ pratyupasthitam || 36 ||
[Analyze grammar]

asaṅkalpanamātreṇa svavikalpadaśāmidam |
manaḥ saṃsādhayatyāśu kleśo nātropayujyate || 37 ||
[Analyze grammar]

svaṃ vikalpya vikalpyāśu vivekopahitaṃ manaḥ |
santyajya rūpamārambhi karotyātmāvabodhanam || 38 ||
[Analyze grammar]

mahodayo manonāśo mahotpāto'sya tūdayaḥ |
manonāśe prayatnaṃ tvaṃ kuru mā manaso jave || 39 ||
[Analyze grammar]

aviralasukhaduḥkhavṛkṣaṣaṇḍe viṣamakṛtāntamahorage vane'smin |
prabhuridamakhile vivekahīnaṃ subhaga mano mahadāpadekahetuḥ || 40 ||
[Analyze grammar]

vālmīkiḥ |
ityuktavatyatha munau divaso jagāma sāyantanāya vidhaye'stamino jagāma |
snātuṃ sabhā kṛtanamaskaraṇā jagāma śyāmākṣaye ravikaraiśca sahājagāma || 41 ||
[Analyze grammar]