Chapter 101

cittacikitsāpūrvakaṃ cittotpattivarṇanaṃ nāma sargaḥ |
ekādhikaśatatamaḥ sargaḥ |
rāmaḥ |
kimucyate muniśreṣṭha bālakākhyāyikākramaḥ |
krameṇa kathayaitanme manovarṇanakāraṇam || 1 ||
[Analyze grammar]

vasiṣṭhaḥ |
mugdhamugdhamatirbālo dhātrīṃ pṛcchati rāghava |
kāñcitkarṇapathāyātāṃ varṇayākhyāyikāmiti || 2 ||
[Analyze grammar]

sā bālasya vinodāya dhātrī tasya mahāmate |
ākhyāyikāṃ kathayati prasannamadhurākṣarām || 3 ||
[Analyze grammar]

kvacitsanti mahātmāno rājaputrāstrayaśśubhāḥ |
vistīrṇe śūnyanagare vyomnīvojjvalatārakāḥ || 4 ||
[Analyze grammar]

dvau na jātau tathaikaśca garbha eva hi na sthitaḥ |
śubhācārāśśubhākārā iti bhāntīndavo yathā || 5 ||
[Analyze grammar]

athātyuttamalābhārthamekadā samavāyataḥ |
nirbandhavaḥ khinnamukhāśśokopahatacetasaḥ || 6 ||
[Analyze grammar]

te tasmācchūnyanagarānnirgatā vikṛtānanāḥ |
gaganādiva saṃśliṣṭā budhaśukraśanaiścarāḥ || 7 ||
[Analyze grammar]

śirīṣasukumārāṅgāḥ pṛṣṭhato'rkeṇa tāpitāḥ |
mārge glāniṃ gatā grīṣmatāpārtyā pallavā iva || 8 ||
[Analyze grammar]

santaptamārgasikatādagdhapādasaroruhāḥ |
hā tātāmbeti śocanto mṛgā yūthacyutā iva || 9 ||
[Analyze grammar]

darbhāgrabhinnacaraṇāstāpasvinnāṅgasandhayaḥ |
ullaṅghya dūramadhvānaṃ dhūlidhūsaramūrtayaḥ || 10 ||
[Analyze grammar]

mañjarījālajaṭilaṃ phalapallavitāmbaram |
mṛgapakṣigaṇādhāraṃ prāpurmārge tarutrayam || 11 ||
[Analyze grammar]

tasminvṛkṣatraye vṛkṣau dvau na jātau manāgapi |
bījameva tṛtīyasya svārohasya na vidyate || 12 ||
[Analyze grammar]

viśrāntāste pariśrāntāstatraikasya taroradhaḥ |
pārijātatale svarge śakrānilayamā iva || 13 ||
[Analyze grammar]

phalānyamṛtasṛṣṭāni bhuktvā pītvā ca tadrasam |
kṛtvā gulucchakairmālāściraṃ viśramya te yayuḥ || 14 ||
[Analyze grammar]

punardūrataraṃ gatvā madhyāhne samupasthite |
sarittritayamāsedustaraṅgataralāravam || 15 ||
[Analyze grammar]

tatraikā pariśuṣkaiva manāgapyambu na dvayoḥ |
vidyate saritordṛṣṭirandhalocanayoriva || 16 ||
[Analyze grammar]

pariśuṣkā bhṛśaṃ yāsau tasyāṃ te sasnurādṛtāḥ |
gharmārtā divi gaṅgāyāṃ viṣṇubrahmaharā iva || 17 ||
[Analyze grammar]

ciraṃ kṛtvā jalakrīḍāṃ pītvāmṛtasamaṃ payaḥ |
jagmuste rājatanayāḥ prahṛṣṭamanasaḥ sukham || 18 ||
[Analyze grammar]

athāsedurdinasyānte lambamāne divākare |
bhaviṣyannavanirmāṇaṃ nagaraṃ nagasannibham || 19 ||
[Analyze grammar]

patākāpadminīvyāptanīlāmbarajalāśayam |
dūraśrutisamullāsagāyannagaramaṇḍalam || 20 ||
[Analyze grammar]

dadṛśustatra ramyāṇi trīṇi sadvibhavāni te |
maṇikāñcanagehāni śṛṅgāṇīva mahāgireḥ || 21 ||
[Analyze grammar]

anirmite dve sadane ekaṃ nirbhitti tatra vai |
abhittimandiraṃ cāru praviṣṭāste narāstrayaḥ || 22 ||
[Analyze grammar]

sampraviśyopaviśyāśu viharanto varānanāḥ |
prāpuḥ sthālītrayaṃ tatra taptakāñcananirmitam || 23 ||
[Analyze grammar]

yatra karparatāṃ yāte dve ekā cūrṇatāṃ gatā |
jagṛhuścūrṇarūpāṃ tāṃ sthālīṃ te dīrghabuddhayaḥ || 24 ||
[Analyze grammar]

droṇairnavanavatyā taistasyāṃ droṇena cāndhasaḥ |
tatra droṇaśataṃ hīnaṃ randhitaṃ bahubhojibhiḥ || 25 ||
[Analyze grammar]

tato bhuktaṃ janaśatairbrāhmaṇānāṃ śataistathā |
tribhistai rājaputraiśca parāṃ nirvṛtimāgataiḥ || 26 ||
[Analyze grammar]

bhaviṣyannagare tasmin rājaputrāstrayo'pi te |
sukhamadya sthitāḥ putra mṛgayāvyavahāriṇaḥ || 27 ||
[Analyze grammar]

ākhyāyikaiṣā kathitā mayā ramyā tavānagha |
etāṃ hṛdi kuru prājña vidagdhastvaṃ bhaviṣyasi || 28 ||
[Analyze grammar]

dhātryeti kathitā rāma bālāyākhyāyikā śubhā |
tuṣṭiṃ jagāma bālaśca śubhākhyāyikayānayā || 29 ||
[Analyze grammar]

eṣā hi kathitā rāma cittākhyānakathāṃ prati |
bālakākhyāyikā tubhyaṃ mayā kamalalocana || 30 ||
[Analyze grammar]

iyaṃ saṃsāraracanā sthitimevamupāgatā |
bālakākhyāyikevograiḥ saṅkalpairvyarthakalpitaiḥ || 31 ||
[Analyze grammar]

vikalpajālikaiveyaṃ pratibhāsātmikānagha |
bandhamokṣādikalanārūpeṇa pravijṛmbhate || 32 ||
[Analyze grammar]

saṅkalpamātrāditaradvidyate neha kiñcana |
saṅkalpavaśataḥ kiñcinnakiñcitkiñcideva vā || 33 ||
[Analyze grammar]

dyauḥ kṣamā vāyurākāśaḥ parvatāḥ sarito diśaḥ |
saṅkalpakalitaṃ sarvametatsvapnavadātmanaḥ || 34 ||
[Analyze grammar]

rājaputrāstrayo nadyo bhaviṣyannagaraṃ tathā |
yathā saṅkalparacanā tatheyaṃ trijagatsthitiḥ || 35 ||
[Analyze grammar]

saṅkalpamātramabhitaḥ parisphurati cañcalam |
payomātrātmako'mbhodhirambhasīvātmanātmani || 36 ||
[Analyze grammar]

saṅkalpamātramutpannaṃ prathamaṃ paramātmani |
tadidaṃ sphāratāṃ yātaṃ vyāpārairdivasaṃ yathā || 37 ||
[Analyze grammar]

saṅkalpajālakalanaiva jagatsamagraṃ saṅkalpameva nanu viddhi vilāsi cetyam |
saṅkalpamātramalamutsṛja nirvikalpamāśritya niścayamavāpnuhi rāma śāntim || 38 ||
[Analyze grammar]