Chapter 81

praśnabhedo nāma sargaḥ |
ekāśītitamaḥ sargaḥ |
rākṣasī |
aho nu paramārthoktiḥ pāvanī tava mantriṇaḥ |
rājā rājīvapattrākṣa idānīmeṣa bhāṣatām || 1 ||
[Analyze grammar]

rājā |
eṣo'ṇuvedanādvāyurvāyuśca bhrāntidṛṣṭitaḥ |
tato na kiñcidvāyvādi kevalaṃ śuddhacetanam || 2 ||
[Analyze grammar]

śabdasaṃvedanācchabdaśśabdaśca bhrāntidarśanam |
tato'tra śabdaśabdārthadṛṣṭirdūrataraṃ gatā || 3 ||
[Analyze grammar]

so'ṇuḥ sarvaṃ nakiñcicca so'haṃ nāhaṃ sa eva ca |
sarvaśaktyātmano'syaiva pratibhaivātra kāraṇam || 4 ||
[Analyze grammar]

ātmā yatnaśataiḥ prāpyo labdhe'sminna ca kiñcana |
labdhaṃ bhavati taccaitatparamaṃ nāma kiñcana || 5 ||
[Analyze grammar]

tāvajjanmavasanteṣu saṃsṛtivratatiściram |
vikasatyudito yāvanna bodho mūlakāṣakṛt || 6 ||
[Analyze grammar]

aṇunānena rūpaṃ svaṃ dṛśyatāmiva gacchatā |
tāpenāmbu dhiyaiveva svasthenaivāpahāritam || 7 ||
[Analyze grammar]

anena saṃvidaṃ nānā merustribhuvanaṃ tṛṇam |
vamitvā bahirantassthaṃ māyātmakamavekṣyate || 8 ||
[Analyze grammar]

cidaṇorantare yad yadasti taddṛśyate bahiḥ |
saṅkalpeṣṭāliṅganādi dṛṣṭānto'tra hi rāgiṇaḥ || 9 ||
[Analyze grammar]

ādisarge sarvaśaktiścid yathā coditātmanā |
tathāśu paśyatyakhilaṃ saṅkalpamativatsvataḥ || 10 ||
[Analyze grammar]

abhijātāśayasyāntaryad yathā pratibhāsate |
tattathā paśyatīvāsau dṛṣṭānto'tra śiśormanaḥ || 11 ||
[Analyze grammar]

paramāṇuta evāpi cinmātreṇāmunāṇunā |
parisūkṣmatamenaiva viśvagviśvaṃ prapūritam || 12 ||
[Analyze grammar]

aṇureva na mātyeṣa yojanānāṃ śateṣvapi |
sarvagatvādanādyantarūpatvādvedanākṛtiḥ || 13 ||
[Analyze grammar]

yathā dhūrtena śiḍgena puṃsā bālaḥ pranāṭyate |
sabhrūvikāranayananirīkṣaṇaviceṣṭitaiḥ || 14 ||
[Analyze grammar]

cidālokena śuddhena saparvatatṛṇaṃ jagat |
nāṭyate'virataṃ tadvadvivṛtyābhinayaṃ sadā || 15 ||
[Analyze grammar]

tenaivānantarūpatvādaṇunā vāsasā yathā |
saṃvidantarbhavedbāhye kṛtvā mervādi veṣṭitam || 16 ||
[Analyze grammar]

dikkālādyanavacchinnarūpatvānmeruto bṛhat |
vālāgraśatabhāgātmāpyeṣa sūkṣmaḥ paro'ṇukaḥ || 17 ||
[Analyze grammar]

śuddhasaṃvedanākāśarūpasya paramāṇunā |
śobhate na hi sāmyoktirmerusarṣapayoriva || 18 ||
[Analyze grammar]

māyākalāparāṇutvaṃ nirmāyā paramātmatā |
hemnīva kaṭakatvena nāto'tra samatā bhavet || 19 ||
[Analyze grammar]

prakaṭo'nena dīpena prakāśo'nubhavātmanā |
svasattānāśapūrvo hi vinānena bhavettu saḥ || 20 ||
[Analyze grammar]

yadi sūryādikaṃ sarvaṃ jagadekajaḍaṃ bhavet |
tataḥ kimātmā kiṃ rūpaṃ prakāśaḥ syātkva vātha kim || 21 ||
[Analyze grammar]

śuddhacinmātrasattvaṃ yatsvataḥ svātmani saṃsthitam |
tadetadaṇunā tejo dṛṣṭaṃ bahiriva sthitam || 22 ||
[Analyze grammar]

tejāṃsyarkenduvahnīnāmabhinnāni tamoghanāt |
etāvānatra bhedo'sti yadvarṇe śauklyakṛṣṇate || 23 ||
[Analyze grammar]

yādṛkkajjalanīhārameghanīhārayorbhavet |
tādṛkprakāśatamasorbhedaśceti tayoḥ sthitaḥ || 24 ||
[Analyze grammar]

jaḍayorupalambhāya cidādityaḥ kilaitayoḥ |
yadā tapati tenaite labdhasattaikatāṃ gate || 25 ||
[Analyze grammar]

tapatyekaścidādityo rātrindivamatandritaḥ |
antarbahiśśilādyantarapyanastamayodayaḥ || 26 ||
[Analyze grammar]

trilokī bhāti teneyaṃ jīvasya prathitātmanaḥ |
nānopalambhabhāṇḍāḍhyā kuṭī kaṭhinakoṭarā || 27 ||
[Analyze grammar]

tamastvaṃ tamaso dehamavināśayatāmunā |
tapyate bhāsayā bhāsā sarvamābhāsyate tamaḥ || 28 ||
[Analyze grammar]

padmotpalau yathārkeṇa tapatā prakaṭīkṛtau |
prakāśatamasoḥ satte citaivaṃ prakaṭīkṛte || 29 ||
[Analyze grammar]

arkaḥ kurvannahorātraṃ darśayatyākṛtiṃ yathā |
citiḥ sadasatī kṛtvā darśayatyākṛtiṃ tathā || 30 ||
[Analyze grammar]

cidaṇorantare santi vicitrānubhavāṇavaḥ |
yathā madhurasasyāntaḥ pattrapuṣpaphalaśriyaḥ || 31 ||
[Analyze grammar]

udyanti cidaṇorete samagrānubhavāṇavaḥ |
madhumāsarasāccitrā iva ṣaṇḍaparamparāḥ || 32 ||
[Analyze grammar]

paramātmāṇuratyantaṃ nissvādaḥ sūkṣmatāvaśāt |
samagrasvādasattaikajanakaḥ svadate svayam || 33 ||
[Analyze grammar]

yo yo nāma rasaḥ kaścitsvasattāyāṃ kṛtasthitiḥ |
pratibimbamivādarśe tāṃ vinā nāstyasau svataḥ || 34 ||
[Analyze grammar]

tyajatā saṃśritaṃ sarvaṃ cinmātraparamāṇunā |
tyaktaṃ jagadasaṃvittyā saṃvittyā sarvamāśritam || 35 ||
[Analyze grammar]

aśaktayāpyātmaguptau sarvamācchāditaṃ jagat |
citāṇutāmeva parāṃ samprasārya vitānavat || 36 ||
[Analyze grammar]

ātmaguptiṃ na śaknoti paramātmāmbarākṛtiḥ |
manāgapi kṣaṇamapi gajo dūrvāvane yathā || 37 ||
[Analyze grammar]

tathāpyākrāntavānviśvaṃ jñatāṃ gopayati kṣaṇāt |
jagaddhānāṃ kaṇaṃ bāla ivāho ghanamāyitā || 38 ||
[Analyze grammar]

cinmātrāṇunayenedaṃ jagatsamabhijīvati |
vasantarasavedhena vicitreva vanāvalī || 39 ||
[Analyze grammar]

citsattaiveyamakhilaṃ svato jagadivoditā |
madhumāsarasollāsī citro hi vanaṣaṇḍakaḥ || 40 ||
[Analyze grammar]

satyaṃ cinmayamevedaṃ jagadityeva viddhyalam |
vasantarasamevedaṃ viddhi pallavagulmakam || 41 ||
[Analyze grammar]

sarvāvayavisāratvātsahasrakaralocanaḥ |
paraṃāṇurasāveva nityānavayavodayaḥ || 42 ||
[Analyze grammar]

nimeṣāṃśāvabodhe'pi cidaṇoḥ pratibhāsate |
yataḥ kalpasahasraughaḥ svapnavārddhakabālyavat || 43 ||
[Analyze grammar]

tataḥ so'py nimeṣāṇuḥ kalpakoṭiśatānyalam |
sarvasattāvilāsena pratibhaikā hi jṛmbhate || 44 ||
[Analyze grammar]

abhuktavatyeva yathā bhuktavānahamityalam |
jāyate pratyayastadvannimeṣe kalpaniścayaḥ || 45 ||
[Analyze grammar]

abhuktvā bhuktavānasmītyevaṃ pratyayaśālinaḥ |
dṛśyante vāsanāviṣṭāḥ svapne svamaraṇam yathā || 46 ||
[Analyze grammar]

jaganti paritiṣṭhanti paramāṇau cidātmani |
pratibhāsāḥ pravartante tata eva hi jāgatāḥ || 47 ||
[Analyze grammar]

yadasti yatra tattasmātsamudeti tadeva tat |
ākāriṇi vikārādi dṛṣṭaṃ na gagane'male || 48 ||
[Analyze grammar]

citi bhūtāni bhūtāni vartamānāni samprati |
bhaviṣyanti bhaviṣyanti śaktibīje drumā iva || 49 ||
[Analyze grammar]

nimeṣakalpāvetena tuṣeṇānnakaṇāviva |
valitau naiṣa caitābhyāmaṇuḥ svāṅgātmakaścitaḥ || 50 ||
[Analyze grammar]

udāsīnavadāsīno na saṃspṛṣṭo manāgapi |
eṣa bhoktṛtvakartṛtvaiḥ khātmā kurvañjagantyapi || 51 ||
[Analyze grammar]

jagatsattoditeyaṃ hi śuddhacitparamāṇutaḥ |
parāmaṇośca bhoktṛtvakartṛtve kveva saṃsthite || 52 ||
[Analyze grammar]

jaganna kiñcitkriyate sarvadaiva na kenacit |
vilīyate ca no kiñcinmātrasyādyasya khaṇḍanam || 53 ||
[Analyze grammar]

sarvaṃ samarasābhāsamidamākāśakośagam |
jagatparyāyaśabdākhyaṃ viddhyanākhyaṃ ca rākṣasi || 54 ||
[Analyze grammar]

cidaṇurdṛśyasiddhyarthamāntarīṃ ciccamatkṛtim |
bahīrūpatayā dhatte svātmanātmani saṃsthitām || 55 ||
[Analyze grammar]

etadbahissthamantassthamasti śabde na vastuni |
upadeśāya sattvānāṃ cidrūpatvājjagattraye || 56 ||
[Analyze grammar]

draṣṭā dṛśyapadaṃ gacchannātmānaṃ samprapaśyati |
netraṃ dṛśyābhipātīva sadevāsadiva sthitam || 57 ||
[Analyze grammar]

na ca gacchati dṛśyatvaṃ draṣṭā hyasadavāstavam |
ātmanyeva na yatkiñcittattāmeti kathaṃ puraḥ || 58 ||
[Analyze grammar]

dṛgeva locane sā ca vāsanā tannijaṃ vapuḥ |
bahurūpatayā dṛśyaṃ kṛtvā draṣṭṛtayoditā || 59 ||
[Analyze grammar]

na vinā draṣṭṛtāmasti dṛśyasattā kathañcana |
pitṛteva vinā putraṃ dvitevaikyapadaṃ vinā || 60 ||
[Analyze grammar]

draṣṭaiva dṛśyatāmeti na draṣṭṛtvaṃ vināsti tat |
vinā pitreva tanayo vinā bhoktreva bhogyatā || 61 ||
[Analyze grammar]

draṣṭurhi dṛśyanirmāṇe cittvādastyeva śaktatā |
kanakasyāvadātasya kaṭakatvakṛtāviva || 62 ||
[Analyze grammar]

dṛśyasya draṣṭṛnirmāṇe jaḍatvānnāsti śaktatā |
kaṭakatvasya mohasya yathā kanakanirmitau || 63 ||
[Analyze grammar]

cetanāddṛśyanirmāṇaṃ citkacatyasadeva yat |
akāraṇaṃ mohaheturhemaiva kaṭakabhramaḥ || 64 ||
[Analyze grammar]

kaṭakatvāvabhāse hi yathā hemno na hematā |
satyaiva prakacatyevaṃ draṣṭurdṛśyasthitau vapuḥ || 65 ||
[Analyze grammar]

draṣṭā dṛśyatayā tiṣṭhandraṣṭṛtāmujjhatīva hi |
satyāṃ kaṭakasaṃvittau hema kāñcanatāmiva || 66 ||
[Analyze grammar]

ekasminpratibhāse'sti na sattā draṣṭṛdṛśyayoḥ |
pumpratyayaprakacane kva paśupratyayodayaḥ || 67 ||
[Analyze grammar]

dṛśyaṃ paśyan svamātmānaṃ na draṣṭā svaṃ prapaśyati |
draṣṭurhi dṛśyatāpattau sattāsatteva tiṣṭhati || 68 ||
[Analyze grammar]

bodhādgalitadṛśyasya draṣṭuḥ sattaiva bhāsate |
abuddhakaṭakatvasya hemnaḥ kanakatā yathā || 69 ||
[Analyze grammar]

dṛśye'satyasti na draṣṭā dṛśyaṃ draṣṭari nāsati |
dvayena ca vinā naikyaṃ naikyamapyasti cānayoḥ || 70 ||
[Analyze grammar]

sarvaṃ yathāvadvijñāya śuddhasaṃvinmayātmanaḥ |
vācāmaviṣayaḥ svāsthyaṃ kiñcidevāvaśiṣyate || 71 ||
[Analyze grammar]

ātmātha darśanaṃ dṛśyaṃ dīpenevāvabhāsitam |
kṛtaṃ ca sarvametena cinmātraparamāṇunā || 72 ||
[Analyze grammar]

mātṛmeyapramāṇākhyaṃ buddhau nigirati trayam |
hemeva kaṭakāditvamasanmayamupasthitam || 73 ||
[Analyze grammar]

yathā na jalamūrmyādeḥ pṛthakkiñcinmanāgapi |
tathaitasmātsvabhāvāṇorna kiñcitpṛthageva hi || 74 ||
[Analyze grammar]

sarvagānubhavātmatvātsarvānubhavarūpataḥ |
ekatvānubhave nyāyye rūḍhe sarvaikatāsya hi || 75 ||
[Analyze grammar]

asyecchayā pṛthaktāsti vīciteva mahāmbhasaḥ |
icchānurūpasampatterbhāvitārthaikalābhinaḥ || 76 ||
[Analyze grammar]

dikkālādyanavacchinnaḥ paramātmāsti kevalaḥ |
sarvātmatvātsa sarvātmā sarvānubhavataḥ svataḥ || 77 ||
[Analyze grammar]

sanneṣa cetanātmatvādasannanavabodhataḥ |
dvaitaikye nātra vidyete satyarūpe mahātmani || 78 ||
[Analyze grammar]

yadi kaściddvitīyaḥ syāttadekasyaikatā bhavet |
dvitvaikyayormithaḥ siddhirātapacchāyayoriva || 79 ||
[Analyze grammar]

yatra nāsti dvitīyo hi tatraikasyaikatā katham |
ekatāyāmasiddhāyāṃ dvayameva na vidyate || 80 ||
[Analyze grammar]

evaṃ sthite tu yacchiṣṭaṃ tatsyād riktamihāsthiteḥ |
tasmānna vyatiriktaṃ tadrūpaṃ drava ivāmbhasaḥ || 81 ||
[Analyze grammar]

nānārambhaviśālaṃ ca sāmyenākṣubdharūpi ca |
bījasyāntastaruriva brahmaṇo'ntaḥ sthitaṃ jagat || 82 ||
[Analyze grammar]

dvaitamapyapṛthaktasmāddhemnaḥ kaṭakatā yathā |
sāmyabuddhāvabodhe hi dvaitaṃ sacca nasanmayam || 83 ||
[Analyze grammar]

yathā dravatvaṃ payasaḥ spandanaṃ mātariśvanaḥ |
vyomnaśśūnyatvamevaṃ hi na pṛthagdvaitamīśvarāt || 84 ||
[Analyze grammar]

dvaitādvaitopalambho hi duḥkhāyaiṣa kṣayātmane |
nipuṇo'nupalambho yastvetayostatparaṃ viduḥ || 85 ||
[Analyze grammar]

mātṛmānaprameyādi draṣṭṛdarśanadṛśyatāḥ |
etāvajjagadetacca paramāṇau citaḥ sthitam || 86 ||
[Analyze grammar]

ayaṃ jagadaṇurnityamanenāṇusumeruṇā |
spandanaṃ pavaneneva svāṅga eva dhṛtaḥ kutaḥ || 87 ||
[Analyze grammar]

aho nu bhīmā māyeyamatha vā māyitā parā |
paramāṇvantarevāsti yattrailokyaparamparā || 88 ||
[Analyze grammar]

athāsambhavamāyitvamevaitatsarvadā sthitam |
cinmātraparamāṇvantamātrameva jagatsthitam || 89 ||
[Analyze grammar]

antargatajagajjālo'pyeṣo'ṇuḥ sāmyamatyajan |
sthito'ntassthabṛhadvṛkṣaṃ bījaṃ bhāṇḍodare yathā || 90 ||
[Analyze grammar]

bīje'ntarvṛkṣavistāraḥ sthitaḥ saphalapallavaḥ |
parayā dṛśyate dṛṣṭyā jagacca cidaṇūdare || 91 ||
[Analyze grammar]

sa śākhāphalavṛkṣatvamajahadbījakoṭare |
yathā taruḥ sthitastadvadvikāsi cidaṇau jagat || 92 ||
[Analyze grammar]

saṃsthitadvaitamadvaitabījakośamiva sthitam |
jagaccitparamāṇvantaryaḥ paśyati sa paśyati || 93 ||
[Analyze grammar]

na dvaitaṃ na ca vādvaitaṃ na bījaṃ na ca vāṅkuraḥ |
na sthūlaṃ na ca vā sūkṣmaṃ nājātaṃ jātameva no || 94 ||
[Analyze grammar]

na cāsti na ca nāstīdaṃ na somyaṃ kṣubhitaṃ na ca |
trijagaccidaṇorantaḥ sattvaṃ vātha na kiñcana || 95 ||
[Analyze grammar]

na jagannājagadvāsti vidyate citparāṇutā |
sarvātmikā yadā yatra yā yathodeti tattathā || 96 ||
[Analyze grammar]

udetyanudito'pyeṣa svasaṃvedanajṛmbhitaḥ |
paramātmāṇurekātmā samagrātmatayeva khe || 97 ||
[Analyze grammar]

drumībhūyeva bījatvamivodetyanudayyapi |
paraṃ tattvaṃ jagadbhaṅgyā jagannāśodayena ca || 98 ||
[Analyze grammar]

drumo bījatayevāśu na santyaktasamasthitiḥ |
tiṣṭhatyapagataspandatyāgātyāgaḥ paro'ṇukaḥ || 99 ||
[Analyze grammar]

bisatanturmahāmeruḥ parātmāṇorapekṣayā |
dṛśyaḥ kila bise tanturadṛśyākṣṇā parātmatā || 100 ||
[Analyze grammar]

bisatanturmahāmeruḥ paramāṇoḥ kilātmanaḥ |
tasyaiva tadghanāccāntassthitā mervādikoṭayaḥ || 101 ||
[Analyze grammar]

etena tena mahatā paramāṇunā ca vyāptaṃ tataṃ viracitaṃ janitaṃ kṛtaṃ ca |
viśvaprapañcaracanaṃ nabhaseva viṣvak śūnyatvamacchamabhitaḥ parilabdhameva || 102 ||
[Analyze grammar]

dvaitena sundarataraṃ svamanujjhateva rūpaṃ suṣuptasadṛśena parāvabodhāt |
aikyaṃ gataṃ sthitagamāgamamuktamevamitthaṃ sthitaṃ nanu jagatparamārthapiṇḍaḥ || 103 ||
[Analyze grammar]