Chapter 82

jagatparamārthapiṇḍīkaraṇaṃ nāma sargaḥ |
dvyaśītitamaḥ sargaḥ |
vasiṣṭhaḥ |
iti rājamukhācchrutvā karkaṭī vanamarkaṭī |
avabuddhapadāntassthaṃ jahau mātsaryacāpalam || 1 ||
[Analyze grammar]

antaśśītalatāṃ toṣaṃ viśrāntimapatāpatām |
prāptā prāvṛṇmayūrīva sajyotsneva kumudvatī || 2 ||
[Analyze grammar]

tayā rājagirā tasyā ānanda udabhūdbhṛśam |
garbho'ntaḥ khe balākāyā raveṇeva payomucaḥ || 3 ||
[Analyze grammar]

rākṣasī |
aho bata pavitreyaṃ bhavatorbhāti śemuṣī |
anastamitasāreṇa prabodhārkeṇa bhāsitā || 4 ||
[Analyze grammar]

sitā samarasā śuddhā jyotsneva śaśimaṇḍalāt |
vivekakaṇikā dṛṣṭā bhavatorhṛdayādiyam || 5 ||
[Analyze grammar]

vivekino jagatpūjyāḥ sevyā manye bhavādṛśāḥ |
tvatsaṅgātsavikāsāsmi candreṇeva kumudvatī || 6 ||
[Analyze grammar]

saurabhaṃ kusumāsaṅgādiva satsaṅgamācchubham |
pravartate'rkasamparkādvikāso'mburuhāmiva || 7 ||
[Analyze grammar]

mahatāmeva saṃsargātpunarduḥkhaṃ na bādhate |
ko hi dīpaśikhāhastastamasā paribhūyate || 8 ||
[Analyze grammar]

mayemau jaṅgale prāptau bhavantau bhūmibhāskarau |
pūjanīyāvataśśīghramīhitaṃ kathyatāṃ śubham || 9 ||
[Analyze grammar]

rājā |
asmajjanapade rakṣaḥkulakānanamañjari |
janasya bādhate'tyarthaṃ sadā hṛdayaśūlanam || 10 ||
[Analyze grammar]

yadā sarvaiva janatā sadā dṛḍhaviṣūcikā |
manmaṇḍale'dya tenāhaṃ nirgato rātricaryayā || 11 ||
[Analyze grammar]

śūlāni hṛdaye nṝṇāṃ na śāmyanti yadauṣadhaiḥ |
tadāhaṃ tvadvidhaproktamantrādyarthena nirgataḥ || 12 ||
[Analyze grammar]

tvādṛśasya ca lokasya mugdhalokābhighātinaḥ |
nigrahārthaṃ pravṛttirme sā ca sampattimetvalam || 13 ||
[Analyze grammar]

etāvadeva ca śubhe nanvaṅgīkriyatāṃ tvayā |
bhūyo bhavatyā yatprāṇā hiṃsanīyā na kasyacit || 14 ||
[Analyze grammar]

rākṣasī |
bāḍhamevaṃ karomyadyaprabhṛtyavitathaṃ prabho |
satyamevaṃ na kiñciddhi hiṃsanīyaṃ mayādhunā || 15 ||
[Analyze grammar]

rājā |
yadyevaṃ phullapadmākṣi paradehaikabhojane |
kiṃ syāccharīravṛttyā te sthitāyā matsamīhite || 16 ||
[Analyze grammar]

rākṣasī |
ṣaḍbhirvarṣaśatai rājanprabuddhāyāḥ samādhitaḥ |
jātabhojanasaṅkalpā bhojaneccheyamadya me || 17 ||
[Analyze grammar]

idānīṃ śikharaṃ gatvā tadeva dhyānaniścalā |
yāvadicchaṃ sukhenāse sajīvā sālabhañjikā || 18 ||
[Analyze grammar]

āmṛtīṃ dhāraṇāṃ baddhvā dhārayāmi śarīrakam |
yathecchamatha kālena tyakṣyāmīti matirmama || 19 ||
[Analyze grammar]

āśarīraparityāgamidānīṃ na mayā nṛpa |
hiṃsanīyāḥ paraprāṇāstenedaṃ madvacaśśṛṇu || 20 ||
[Analyze grammar]

himavānnāma śailo'sti rucā candrāṃśunirmalaḥ |
ya uttarāśāhṛdaye spṛṣṭapūrvāparārṇavaḥ || 21 ||
[Analyze grammar]

tatrāhaṃ nivasāmyugre hemaśṛṅgadarīgṛhe |
āyasī stambhalekheva karkaṭī nāma rākṣasī || 22 ||
[Analyze grammar]

tapasā prārthito brahmā janatāmāraṇecchayā |
viṣūcikā prāṇaharā syāṃ sūkṣmāsmīti vai mayā || 23 ||
[Analyze grammar]

tasmātsamprāptavarayā bahūnvarṣagaṇānmayā |
bhuktā viṣūcikātvena janatā jīvavedhanaiḥ || 24 ||
[Analyze grammar]

tvayā na guṇino hiṃsyā iti me brahmaṇā kṛtaḥ |
niyamārthaṃ mahāmantrastadāyattāsmi saṃsthitā || 25 ||
[Analyze grammar]

so'yaṃ pragṛhyatāṃ tena sarvaṃ hṛdayaśūlanam |
śamameṣyati loke'smin kā kathā matkṛte bhrame || 26 ||
[Analyze grammar]

virataivāsmi hiṃsāto yatpurā hiṃsitaṃ mayā |
janasya hṛdayaṃ tena nāḍyo vaidhuryamāgatāḥ || 27 ||
[Analyze grammar]

hiṃsitvā raktamāṃsāni santyaktā ye mayā janāḥ |
tebhyo vidhuranāḍibhyo ye jātāste'pi tādṛśāḥ || 28 ||
[Analyze grammar]

rājanviṣūcikāmantraḥ so'yaṃ sampanna eva te |
na hi sattvavatāmasti dussādhyamiha kiñcana || 29 ||
[Analyze grammar]

ato durnāḍikośeṣu śūlānāṃ pariśāntaye |
mantro yo brāhmaṇā prokto rājañchīghraṃ gṛhāṇa tam || 30 ||
[Analyze grammar]

āgaccha nikaṭaṃ nadyā gacchāmastatra bhūpate |
svācāntābhyāṃ saṃyatābhyāṃ bhavadbhyāṃ suvratā dade || 31 ||
[Analyze grammar]

vasiṣṭhaḥ |
iti tasyāṃ tadā rātryāṃ rākṣasīmantribhūbhṛtaḥ |
jagmuste saritastīraṃ mithassañjātasauhṛdāḥ || 32 ||
[Analyze grammar]

anvayavyatirekābhyāṃ rākṣasyāḥ sauhṛdaṃ tathā |
jñātvā sthitau tau svācāntāv ubhāvante nivāsinau || 33 ||
[Analyze grammar]

tayā brahmopadiṣṭo'sau tatastābhyāṃ yathākramam |
snehādviṣūcikāmantraḥ pradatto japasiddhidaḥ || 34 ||
[Analyze grammar]

tataḥ sañjātasauhārdau tau visṛjya niśācarī |
yadā gantuṃ pravṛttāsau tadā rājābravīdvacaḥ || 35 ||
[Analyze grammar]

rājā |
gurustvaṃ nau mahādevi vayasyā ca sunirvṛtā |
nimantrayāvahe yatnāttvāmambhoruhasundari || 36 ||
[Analyze grammar]

na prārthanāṃ tathāsmākaṃ vitathīkartumarhasi |
sauhārdaṃ sujanānāṃ hi darśanādeva vardhate || 37 ||
[Analyze grammar]

laghusaubhāgyasaṃyuktaṃ kṛtvākāraṃ manoharam |
āgacchāsmadgṛhaṃ bhavyā tatra tiṣṭha yathāsukham || 38 ||
[Analyze grammar]

rākṣasī |
mugdhastrīrūpadhāriṇyai dātuṃ śaknoṣi bhojanam |
santarpayasi māṃ kena rākṣasīrūpadhāriṇīm || 39 ||
[Analyze grammar]

rakṣo'nnameva me tuṣṭyai na sāmānyajanāśanam |
pūrvasiddhaḥ svabhāvo'yamā sargāntādvivardhate || 40 ||
[Analyze grammar]

rājā |
hemasragdāmavalitā dināni katicidgṛhe |
mama strīrūpiṇī tiṣṭha yāvadicchamanindite || 41 ||
[Analyze grammar]

tato duṣkṛtinaścaurānvadhyāñchatasahasraśaḥ |
maṇḍalebhyaḥ samānīya dade tubhyaṃ subhojane || 42 ||
[Analyze grammar]

kāntārūpaṃ parityajya gṛhītvā rākṣasaṃ vapuḥ |
ādāya vadhyāñchataśaḥ puruṣāṃstān svasañcitān || 43 ||
[Analyze grammar]

nayasva himavacchṛṅgaṃ tatra bhuṅkṣva yathāsukham |
mahāśanānāmekānte bhojanaṃ hi sukhāyate || 44 ||
[Analyze grammar]

suptā nidrāṃ parityajya bhava bhūyaḥ samādhibhāk |
samādhiviratā bhūyo'pyāgatya punaranyadā || 45 ||
[Analyze grammar]

neṣyasyanyānvadhyanarān hiṃsā naiṣā ca dharmataḥ |
svadharmeṇa ca hiṃsaiva mahākaruṇayā samā || 46 ||
[Analyze grammar]

tvaṃ sameṣyasi cāvaśyaṃ māṃ samādhivirāmiṇī |
asatāmapi saṃrūḍhaṃ sauhārdaṃ na nivartate || 47 ||
[Analyze grammar]

rākṣasī |
yuktamuktaṃ tvayā rājan karomyevamahaṃ sakhe |
sauhārdena pravṛttasya ko vākyaṃ nābhinandati || 48 ||
[Analyze grammar]

vasiṣṭhaḥ |
ityuktvā rākṣasī tatra sampannā sā vilāsinī |
hārakeyūrakaṭakapaṭṭasragdāmadhāriṇī || 49 ||
[Analyze grammar]

rājannāgaccha gacchāma ityuktvā nṛpamantriṇau |
agre gantuṃ pravṛttau tau rātrāvanusasāra sā || 50 ||
[Analyze grammar]

atha te pārthivagṛhaṃ prāpya tāṃ rajanīṃ mithaḥ |
kathayaikagṛhe ramye kṣapayāmāsurādṛtāḥ || 51 ||
[Analyze grammar]

prabhāte'ntaḥpure tasthau purandhrijanalīlayā |
rākṣasī mantrirājānau svavyāpārau babhūvatuḥ || 52 ||
[Analyze grammar]

tato divasaṣaṭkena sañcitāni mahībhṛtā |
nṛpāntarapurebhyo'pi svamaṇḍalagaṇāttathā || 53 ||
[Analyze grammar]

trīṇi vadhyasahasrāṇi tāni tasyai tadādadau |
sā babhūva niśākāle saivogrā kṛṣṇā rākṣasī || 54 ||
[Analyze grammar]

tāni vadhyasahasrāṇi jagrāha bhujamaṇḍale |
dhārānikarajālāni meghamāleva koṭare || 55 ||
[Analyze grammar]

yayau rājānamāpṛcchya tadeva himavacchiraḥ |
daridrā labdhahemeva gṛhamugraśarīriṇī || 56 ||
[Analyze grammar]

tatrā tṛpterbhṛśaṃ bhuktvā sukhaṃ suptvā dinadvayam |
āsītprabuddhā susvacchā sā samādhivatī punaḥ || 57 ||
[Analyze grammar]

pañcabhirvā tribhirvāpi varṣaiḥ sā samprabudhyati |
tattato maṇḍalaṃ yāti tena rājñā ca pūjyate || 58 ||
[Analyze grammar]

tatra viśrambhagarbhābhiḥ kathābhiḥ kañcideva sā |
sthitvā kālaṃ gṛhītvā tānvadhyān svāspadametyatha || 59 ||
[Analyze grammar]

jīvanmuktatayaivameva vipine sādyāpi rakṣo'ṅganā |
tasminneva girau sthitā vigalitadhyānaikatānāśayā || 60 ||
[Analyze grammar]

tasmin rājani śāntimāgatavati tyaktaiṣaṇenātmanā |
tadrāṣṭrādhipasauhṛdaiḥ svakavalānāsvādayantī ciram || 61 ||
[Analyze grammar]