Chapter 73

sūcītapaḥprabhāvo nāma sargaḥ |
trisaptatitamaḥ sargaḥ |
vasiṣṭhaḥ |
karkaṭīkaṭuvṛttāntaṃ sarvamākarṇya vāsavaḥ |
nāradaṃ paripapraccha punarjātakutūhalaḥ || 1 ||
[Analyze grammar]

śakraḥ |
sūcīvṛttapiśācītvaṃ tapasopārjya tattayā |
karkaṭyā himavatkukṣyāṃ ke bhuktā vibhavā mune || 2 ||
[Analyze grammar]

nāradaḥ |
jīvasūcī piśācītvaṃ gatā yā śūkapelavam |
asītkārṣṇāyasī sūcistasyāḥ svamavalambanam || 3 ||
[Analyze grammar]

tatsvamālambanaṃ tyaktvā vyomavātarathasthayā |
prāṇamārutamārgeṇa tayā dehapraviṣṭayā || 4 ||
[Analyze grammar]

sarvāsāmantratantrīṇāṃ snāyumedovasāsṛjām |
randhreṣu pakṣiṇyevāntarnilīnaṃ malināṅgayā || 5 ||
[Analyze grammar]

yasyāṃ nāḍyāṃ na yo vāyurmāti tattāmupetayā |
tatra śūlaṃ kṛtaṃ mūlaṃ nyagrodhāgra ivotkaṭam || 6 ||
[Analyze grammar]

taccharīrendriyaistāni tathānyāni bahūni ca |
bhuktāni naramāṃsāni bhojanānyucitāni ca || 7 ||
[Analyze grammar]

suptaṃ vivalitānalpamālayā mugdhabālayā |
kāntavakṣassthalasyūtamliṣṭapattrakapolayā || 8 ||
[Analyze grammar]

vihṛtaṃ vītaśokāsu vihaṅgyā vanavīthiṣu |
kalpadrumotthapuṣpābhradviguṇāmbhodapaṅktiṣu || 9 ||
[Analyze grammar]

pīta āmodimandāramakarandakaṇāsavaḥ |
vaneṣvamaraśailānāmalinyālinilīnayā || 10 ||
[Analyze grammar]

carvitāni śavāṅgāni gṛdhragarvātivṛddhayā |
khaḍgayaṣṭyeva saṅgrāme vīrāṅgāni javeddhayā || 11 ||
[Analyze grammar]

sarvāṅgakośanāḍīṣu dikṣvivānilalekhayā |
uḍḍīnamavaḍīnaṃ ca kākyeva vyomavīthiṣu || 12 ||
[Analyze grammar]

virāḍātmahṛdi prāṇā vātaskandhāḥ sphuranti khe |
yathā tathā prasphuritaṃ prati dehagṛhaṃ tayā || 13 ||
[Analyze grammar]

sarvaprāṇiśarīreṣu bhrāntaṃ cicchaktiduṣṭayā |
dīpaprabhābhāsitayā gṛhiṇyeva svasadmasu || 14 ||
[Analyze grammar]

vihṛtaṃ rudhireṣvantardravaśaktyeva vāriṣu |
abdhiṣvāvartavṛttyeva jaṭhareṣu vivalgitam || 15 ||
[Analyze grammar]

suptaṃ medassu śubhreṣu śeṣāṅgeṣviva śauriṇā |
svāditaḥ svāmagandho'ntarvātaśaktyāmṛtaṃ yathā || 16 ||
[Analyze grammar]

tarugulmauṣadhādīnāṃ hṛtsthāraṇyānilaśriyā |
paribhuktānyaśaktāni hiṃsayā vīkṣitāni ca || 17 ||
[Analyze grammar]

ahaṃ jīvamayī sūcī syāmitīcchāvareṇa sā |
sampannā mānasī sūciścetanī pāvanī śitā || 18 ||
[Analyze grammar]

adṛśyayā tayā tena mārutograturaṅgayā |
ayassūcīnilayayā vihṛtaṃ dikṣu ruddhayā || 19 ||
[Analyze grammar]

pītaṃ bhuktaṃ vilasitaṃ hasitaṃ dattamāhṛtam |
nartitaṃ gītamuṣitamanantaiḥ prāṇidehakaiḥ || 20 ||
[Analyze grammar]

adṛśyayā śarīriṇyā manaḥ pavanadehayā |
kṛtamākāśarūpiṇyā na tadasti na yattayā || 21 ||
[Analyze grammar]

mattayāśaktayā svādurasāṃścarvitumetayā |
bālayālānamāśritya kariṇyeva vivalgitam || 22 ||
[Analyze grammar]

kallolabahalādyūnadehaduṣṭanadīṣvalam |
vegairvaidhuryakāriṇyā mattayā makarāyitam || 23 ||
[Analyze grammar]

aśaktayā nigirituṃ medomāṃsaṃ tayā hṛdi |
dūnaṃ suciramarthāḍhyavṛddhāturadhiyā yathā || 24 ||
[Analyze grammar]

gajoṣṭramṛgahastyaśvasiṃhādihṛdi nartitam |
nartakyeva ciraṃ raṅge vellayantyāṅgamaṅgake || 25 ||
[Analyze grammar]

bahirantaśca vāyūnāmekatvamanuyātayā |
gandhalekhikayevāntassthitaṃ durlakṣyayānayā || 26 ||
[Analyze grammar]

mantrauṣadhatapodānadevapūjādibhirhitā |
valgadgirinadītuṅgataraṅgavadapadrutā || 27 ||
[Analyze grammar]

dīpaprabhevāvijñātagatirgatvāśu līyate |
ayassūcyāṃ mātarīva tatra nivṛtimeti sā || 28 ||
[Analyze grammar]

svavāsanānusāreṇa sarva āspadamīhate |
sūcitvameva rākṣasyā sūcitvenāspadīkṛtam || 29 ||
[Analyze grammar]

sarvo vihṛtyāpi diśaḥ svamevāspadamāpadi |
jīvasūcī lohasūcīmivāyāti jaḍo janaḥ || 30 ||
[Analyze grammar]

evaṃ prayatamānā sā viharantī diśo daśa |
mānasīṃ tṛptimāyāti na śārīrīṃ kadācana || 31 ||
[Analyze grammar]

sati dharmiṇi dharmā hi sambhavantīha nāsati |
śarīraṃ dṛśyate yasya tasya tatkila tṛpyati || 32 ||
[Analyze grammar]

atha tṛptasya dehasya smaraṇātprāktanasya sā |
babhūva duḥkhitā svādupūrṇodarasukhārthinī || 33 ||
[Analyze grammar]

tataḥ prāktanadehārthaṃ karomi vipulaṃ tapaḥ |
iti sañcintya tapase deśaṃ nirṇīya cātmanā || 34 ||
[Analyze grammar]

viveśākāśagṛdhrasya hṛdayaṃ taruṇasya sā |
prāṇamārutamārgeṇa khaṃ mṛgeva khakhelagā || 35 ||
[Analyze grammar]

sa gṛdhrastāmayassūcīṃ kāñcidevaṃsamāśritām |
citā tayeritaścañcvā vṛttiṃ mana ivādadhe || 36 ||
[Analyze grammar]

sūcīmādāya gṛdhro'sau yayau taccintitaṃ girim |
antaḥ sūcīpiśācyāśu nunno'bda iva vāyunā || 37 ||
[Analyze grammar]

tatrājane mahāraṇye sthāpayāmāsa tāmasau |
sarvasaṅkalparahite pade yogīva cetanām || 38 ||
[Analyze grammar]

ekenaivāṇunā tena pādaprāntena mūrchitā |
sā pratiṣṭhāpitevādrermūrdhni gṛdhreṇa devatā || 39 ||
[Analyze grammar]

rajaḥkaṇabṛhacchṛṅgaśirasyekena sāṇunā |
pādenātiṣṭhadudgrīvaṃ śikheva girimūrdhani || 40 ||
[Analyze grammar]

utthitāṃ sthāpitāṃ sūcīṃ gṛdhrāntarjīvasūcikā |
dṛṣṭvā bahirvinirgantuṃ khagadehātpracakrame || 41 ||
[Analyze grammar]

gṛdhraprāṇānnirjagāma sūcī pronmukhacetanā |
pavanādgandhalekheva ghrāṇavātalavonmukhī || 42 ||
[Analyze grammar]

jagāma gṛdhraḥ svaṃ deśaṃ bhāraṃ tyaktveva bhārikaḥ |
nivṛttavyādhiriva sa babhūvāntaranākulaḥ || 43 ||
[Analyze grammar]

ayassūcitayādhārastapase parikalpitaḥ |
dṛḍhasya sadṛśo'rthānāṃ viniyogo hi rājate || 44 ||
[Analyze grammar]

na hyamūrtasya sidhyanti vinādhāraṃ kila kriyāḥ |
ityādhāraikaniṣṭhatvamāśrityāsau tapassthitā || 45 ||
[Analyze grammar]

jīvasūcī lohasūcīṃ piśācī śiṃśapāmiva |
sarvato valayāmāsa vātyevāmodalekhikām || 46 ||
[Analyze grammar]

tatastataḥprabhṛtyeṣā sūcī dīrghatapasvinī |
araṇyānyāṃ sthitā śakra tatra varṣagaṇānbahūn || 47 ||
[Analyze grammar]

tasyā varārthaṃ yatnaṃ tvaṃ kuru kartavyakovida |
cireṇa sambhṛtaṃ lokamalaṃ dagdhuṃ hi tattapaḥ || 48 ||
[Analyze grammar]

vasiṣṭhaḥ |
iti nāradataśśrutvā śakraḥ sūcinirīkṣaṇe |
mārutaṃ preṣayāmāsa daśadiṅmaṇḍalānyatha || 49 ||
[Analyze grammar]

jagāmātha marutsaṃvidātmanā tāṃ nirīkṣitum |
avamucya nabhomārgaṃ vicacāra tvarānvitaḥ || 50 ||
[Analyze grammar]

sā vātasaṃvitkṣiprā vai naiva sarvagatā satī |
paramā cidivāvighnaṃ sahasaiva dadarśa ha || 51 ||
[Analyze grammar]

bhūmeḥ saptasamudrānte nibaddhāṃ vipulasthale |
lokālokādriraśanāṃ nānāmaṇimayopalām || 52 ||
[Analyze grammar]

svādūdakābdhivalayaṃ sakoṭarakakubgaṇam |
puṣkaradvīpavalayaṃ tadantargirimaṇḍalam || 53 ||
[Analyze grammar]

madirāmbhodhivalayaṃ tajjalecarasaṃsthitam |
gomedhadvīpakaṭakaṃ tanmadhyaviṣayavrajam || 54 ||
[Analyze grammar]

ikṣūdakābdhiparikhāṃ sāntargirigaṇāntarām |
krauñcadvīporvarāpīṭhaṃ sāntargatagirikramam || 55 ||
[Analyze grammar]

kṣīrābdhimuktāvalayaṃ samadhyagatanāyakam |
śvetākhyadvīpavalayaṃ sabhūtapratibhāgakam || 56 ||
[Analyze grammar]

bhūmerghṛtodavalanaṃ sāntasthāmaramandiram |
kuśadvīpavṛtivyāsaṃ sumahāśailakoṭaram || 57 ||
[Analyze grammar]

dadhyambhorāśiraśanāṃ sāntaścarapurodarām |
śākadvīporvarākāraṃ sāntassthaviṣayāntaram || 58 ||
[Analyze grammar]

kṣārāmbhorāśiparikhāṃ sāntassthapuraparvatām |
jambudvīpamahāmeruṃ kulaparvatasaṅkulam || 59 ||
[Analyze grammar]

vātaskandhebhya evādau patatyanilavellanā |
krameṇānena paryante tenaiva prasṛteha sā || 60 ||
[Analyze grammar]

vāyurālokayannitthaṃ jambudvīpaṃ nirīkṣya ca |
tatprāpa himavacchṛṅgaṃ yatra sūcistapasvinī || 61 ||
[Analyze grammar]

śṛṅgamūrdhni mahatyugre so'raṇyānīmavāpa tām |
dvitīyākāśavitatāṃ varjitāṃ prāṇikarmabhiḥ || 62 ||
[Analyze grammar]

asañjātatṛṇavyūhāṃ nikaṭatvādvivasvataḥ |
rajomayīmeva tatāṃ saṃsāraracanāmiva || 63 ||
[Analyze grammar]

mṛgatṛṣṇānadīsārthapūraṇīyābdhitāṃ gatām |
śakrakodaṇḍasaṅkāśamṛgatṛṣṇāsaricchatām || 64 ||
[Analyze grammar]

amitopāntaparyantāṃ lokapālekṣitairapi |
kevalaṃ pavanaspandapracaladdhūlikuṇḍalām || 65 ||
[Analyze grammar]

sūryāṃśukuṅkumairliptāṃ lagnacandrāṃśucandanām |
vilāsinīmiva vyomno vātaśītkāragāyanām || 66 ||
[Analyze grammar]

saptadvīpasamudramudraṇasamucchūnaikadeśāśrayaṃ bhūpīṭhaṃ parito vihṛtya pavano dīrghādhvanā jarjaraḥ |
tāṃ prāpyāgragiristhalīmalivapurvyomāṅgalagnāmiva vyāttānantadigantapūrakabṛhaddeho viśaśrāma saḥ || 67 ||
[Analyze grammar]