Chapter 62

jagattākacanavarṇanaṃ nāma sargaḥ |
dviṣaṣṭitamaḥ sargaḥ |
vasiṣṭhaḥ |
paramāṇunimeṣāṇāṃ lakṣāṃśakalanāsvapi |
jagatkalpasahasrāṇi satyānīva vibhāntyalam || 1 ||
[Analyze grammar]

teṣvapyantastathaivāntaḥ paramāṇukaṇaṃ prati |
bhrāntirevamanantāho iyamityavabhāsate || 2 ||
[Analyze grammar]

vahantīmāḥ parā sattā śāntāḥ sargaparamparāḥ |
saliladravatevāntarasphuṭāvartavartikāḥ || 3 ||
[Analyze grammar]

mithyātmikaiva sargaśrīrvahatīha mahāmarau |
tīradrumalatonmuktapuṣpāṇīva taraṅgiṇī || 4 ||
[Analyze grammar]

svapnendrajālapuravatsaṅkathehāpurādrivat |
saṅkalpavadasatyaiva bhāti sargānubhūtibhūḥ || 5 ||
[Analyze grammar]

rāmaḥ |
aikātmyaikatayaivaṃ hi jāte samyagvicāraṇāt |
nirvikalpātmani jñāne parijñānavatāṃ vara || 6 ||
[Analyze grammar]

kimarthamiha tiṣṭhanti dehāstattvavidāmapi |
daiveneva samākrāntā daivamatra ca kiṃ bhavet || 7 ||
[Analyze grammar]

vasiṣṭhaḥ |
astīha niyatirbrāhmī cicchaktisparśarūpiṇī |
avaśyambhavitavyaikasattā sakalakalpagā || 8 ||
[Analyze grammar]

ādisarge hi niyatirbhāvavaicitryamakṣayam |
anenetthaṃ sadā bhāvyamiti sampadyate param || 9 ||
[Analyze grammar]

mahāsatteti kathitā mahācitiriti smṛtā |
mahāśaktiriti khyātā mahādṛṣṭiriti sthitā || 10 ||
[Analyze grammar]

mahākriyeti gaditā mahodbhava iti śrutā |
mahāspanda iti prauḍhā mahātmaikatayoditā || 11 ||
[Analyze grammar]

tṛṇānīti jagantīti daityā iti surā iti |
iti nāgā iti nagā ityākalpamiti sthitiḥ || 12 ||
[Analyze grammar]

kadācidbrahmasattāyā vyabhicāro'numīyate |
citramākāśakośe vā nānyathā niyateḥ sthitiḥ || 13 ||
[Analyze grammar]

viriñcādyātmabhirbuddhairbodhāyāviditātmanām |
bṛṃhaṇātsaiva niyatiḥ sargo'yamiti kathyate || 14 ||
[Analyze grammar]

acalaṃ calavaddṛṣṭaṃ brahmaṇyāryavyavasthitam |
anādimadhyaparyantaṃ śāstro vṛkṣa ivāmbaram || 15 ||
[Analyze grammar]

pāṣāṇodaralekhaughanyāyenātmani tiṣṭhatā |
brahmaṇā niyatiḥ sargo buddho bodhayateva kham || 16 ||
[Analyze grammar]

dehe yathāṅgināṅgādi spṛśyate citsvabhāvataḥ |
brahmaṇā padmajatvena niyatyādyaṅgakaṃ tathā || 17 ||
[Analyze grammar]

eṣā daivamiti proktā sarvaṃ sakalakālagam |
padārthamalamākramya śuddhā ciditi saṃsthitā || 18 ||
[Analyze grammar]

spanditavyaṃ padārthena bhāvyaṃ vā bhoktṛtāpadam |
anenetthamanenetthamavaśyamiti daivadhīḥ || 19 ||
[Analyze grammar]

eṣaiva puruṣaspandatṛṇagulmādi cākhilam |
eṣaiva sarvabhūtādi jagatkālakriyādi ca || 20 ||
[Analyze grammar]

anayā pauruṣī sattā sattāsyāḥ pauruṣeṇa ca |
lakṣyete bhavanaṃ yāte dve ekātmatayeti hi || 21 ||
[Analyze grammar]

nareṇa pauruṣeṇaiva kārye sattātmike ubhe |
īdṛśyeva hi niyatirevaṃ niyatipauruṣam || 22 ||
[Analyze grammar]

praṣṭavyo'haṃ tvayā rāma daivapauruṣanirṇayam |
maduktaṃ pauruṣaṃ pālyaṃ tvayeti niyatiḥ sthitā || 23 ||
[Analyze grammar]

bhojayiṣyati māṃ daivamiti daivaparāyaṇaḥ |
yattiṣṭhatyakriyo maunaṃ niyatereṣa niścayaḥ || 24 ||
[Analyze grammar]

pauruṣeṇa samāhṛtya bhogānbhuṅkte naraśca yat |
rājyādīnmokṣaparyantānniyatereṣa niścayaḥ || 25 ||
[Analyze grammar]

muktirbhavati saṃsārānna kalpanicayairapi |
bhramatāṃ yaccharīraughairniyatereṣa niścayaḥ || 26 ||
[Analyze grammar]

nāsyā buddhirna karmāṇi na vikārādi nākṛtiḥ |
kevalaṃ tvitthamākalpaṃ sthityā bhāvyamiti sthitam || 27 ||
[Analyze grammar]

avaśyaṃ bhavitā hyevamidamitthamiti sthitiḥ |
na śakyate laṅghayitumapi rudrādibuddhibhiḥ || 28 ||
[Analyze grammar]

pauruṣaṃ na parityājyamenāmāśritya dhīmatā |
pauruṣeṇaiva rūpeṇa niyatirhi niyāmikā || 29 ||
[Analyze grammar]

apauruṣaṃ hi niyatiḥ pauruṣaṃ saiva sargagā |
niṣphalāpauruṣākārā saphalā pauruṣātmikā || 30 ||
[Analyze grammar]

niyatyā mūkatāhetuniṣpauruṣatayākriyaḥ |
yastiṣṭhati prāṇamarutspandastasya kva gacchati || 31 ||
[Analyze grammar]

atha prāṇakriyārodhamapi kṛtvā virāmadam |
yadi tiṣṭhati tatsādhurmukta eva kimucyate || 32 ||
[Analyze grammar]

pauruṣaikātmatā śreyo mokṣo'tyantamakarmatā |
ābhyāṃ tu śabalaḥ pakṣo duḥkhāyaiva mahātmanām || 33 ||
[Analyze grammar]

niyatirbrahmatattvābhā tasyāṃ cetpariṇamyate |
nūnaṃ paramaśuddhāyāṃ tatprāptaiva parā gatiḥ || 34 ||
[Analyze grammar]

etairniyatyādimahāvilāsairbrahmaiva visphūrjati sarvagātma |
tṛṇādivallītarugulmajālaiḥ satteva toyasya dharāntarasthā || 35 ||
[Analyze grammar]