Chapter 54

līlopākhyāne saṃsṛtivicāropadeśo nāma sargaḥ |
catuṣpañcāśattamaḥ sargaḥ |
devī |
tasmād ye vedyavettāro ye vā dharmaṃ paraṃ śritāḥ |
ātivāhikadehatvaṃ prāpnuvantyeva netare || 1 ||
[Analyze grammar]

ādhibhautikadehatvaṃ mithyā bhramamayātmakam |
kathamanye sthitiṃ yātu cchāyāste kathamātape || 2 ||
[Analyze grammar]

līlā viditavedyā no paramaṃ dharmamāśritā |
kevalaṃ tena sā bhartṛkalpitaṃ nagaraṃ gatā || 3 ||
[Analyze grammar]

līlā |
evameṣā prayātā tu bhartā paśya mamāmbike |
pravṛttaḥ prāṇasantyāge kartavyaṃ kimihādhunā || 4 ||
[Analyze grammar]

bhāvābhāveṣu bhāvānāṃ kathaṃ niyatirāgatā |
kathaṃ bhūyo'pyaniyatirmṛtijanmādiṣūcitā || 5 ||
[Analyze grammar]

kathaṃ svabhāvasaṃsiddhiḥ kathaṃ sattā padārthagā |
kathamagnyādiṣūṣṇatvaṃ pṛthvyādau sthiratā katham || 6 ||
[Analyze grammar]

himādiṣu kathaṃ śaityaṃ kā sattā kālakhādiṣu |
bhāvābhāvagrahotsargaḥ sthūlasūkṣmadṛśaḥ katham || 7 ||
[Analyze grammar]

kathamatyantamucchrāyaṃ tṛṇagulmāṅkurādikam |
vastunāyātyanaṣṭe'pi sthite svocchrāyakāraṇe || 8 ||
[Analyze grammar]

devī |
mahāpralayasaṃpattau sargāsthāstamaye sati |
anantākāśamāśāntaṃ sadbrahmaivāvatiṣṭhate || 9 ||
[Analyze grammar]

taccidrūpatayā tejaḥkaṇo'hamiti cetati |
svapne saṃvid yathā hi tvamākāśagamanādi vā || 10 ||
[Analyze grammar]

tejaḥkaṇo sausthūlatvamātmanātmani vindati |
asatyameva satyābhaṃ brahmāṇḍaṃ tadidaṃ smṛtam || 11 ||
[Analyze grammar]

tatrāntarbrahma tadvetti brahmāhamayamityatha |
manorājyaṃ sa kurute khātmaiva tadidaṃ jagat || 12 ||
[Analyze grammar]

tasminprathamataḥ sarge yā yathā yatra saṃvidaḥ |
kathitāstāstathā tatra sthitā adyāpi niścalāḥ || 13 ||
[Analyze grammar]

yad yathā sphuritaṃ cittvaṃ tattathānyatma cidbhavet |
svayamevāniyamitastataḥ syānneha kiñcana || 14 ||
[Analyze grammar]

na ca nāma nakiñcittvaṃ yujyate citsvarūpiṇaḥ |
tyaktvā samastasaṃsthānaṃ hi saṃtiṣṭhatu vai katham || 15 ||
[Analyze grammar]

sargādau svayamevāntaścid yathā kacitātmani |
himāgnyāditayādyāpi sā tathāste svasattayā || 16 ||
[Analyze grammar]

tasmātsvasattāsantyāgaḥ sataḥ kartuṃ na yujyate |
yadā cidādesteneyaṃ niyatirna vinaśyati || 17 ||
[Analyze grammar]

yad yathā kacitaṃ yatra vyomarūpyapi pārthivam |
sargādau tasya calitumadya yāvanna yujyate || 18 ||
[Analyze grammar]

yā yathā citprakacitā pratipakṣavidaṃ vinā |
na sā tataḥ pracalati vedanābhyāsataḥ svayam || 19 ||
[Analyze grammar]

jagadādāvanutpannaṃ yaccedamanubhūyate |
tatsaṃvidvyomakacanaṃ svapnastrīsurataṃ yathā || 20 ||
[Analyze grammar]

asatyameva satyābhaṃ pratibhānamiti sthitam |
iti svabhāvasaṃvittiritthaṃ bhūtānubhūtayaḥ || 21 ||
[Analyze grammar]

sargādau yā yathā rūḍhā saṃvitkacanasantatiḥ |
sādyāpi cālitānyena sthitā niyatirdṛśyate || 22 ||
[Analyze grammar]

gṛhītavyomatāsaṃviccidvyoma vyomatāṃ gatam |
gṛhītakālatāsaṃviccinnabhaḥ kālatāṃ gatam || 23 ||
[Analyze grammar]

gṛhītajalasaṃvid cidvyoma vāri vyavasthitam |
svapne tathā hi puruṣaḥ paśyatyātmani vāritām || 24 ||
[Analyze grammar]

svamarutsaṃvidā bhāti bhavatyeṣā yathāsthitā |
ciccamatkāracāturyamasadetatsamūhate || 25 ||
[Analyze grammar]

khatvaṃ maruttvamurvītvamaptvamagnitvamapyasat |
vettyantaḥ svapnasaṅkalpadhyāneṣviva citiḥ svayam || 26 ||
[Analyze grammar]

maraṇānantaraṃ karmaphalānubhavanakramam |
sarvakarmehaśāntyarthaṃ śrutaṃ śreyaskaraṃ śṛṇu || 27 ||
[Analyze grammar]

rūḍhādisarge niyatiryaikadvitricaturmitā |
puṣṭyādiṣvāyuṣaḥ puṃsāṃ tasyātha niyatiṃ śṛṇu || 28 ||
[Analyze grammar]

deśakālakriyādravyaśuddhyaśuddhī svakarmaṇām |
ūnatve cādhikatve ca nṛṇāṃ kāraṇamāyuṣaḥ || 29 ||
[Analyze grammar]

svakarmadharme hrasati hrasatyāyurnṛṇāmiha |
vṛddhe vṛddhimupāyāti samameva bhavetsame || 30 ||
[Analyze grammar]

bālamṛtyupradairbālo yuvā yauvanamṛtyudaiḥ |
vṛddhamṛtyupradairvṛddhaḥ karmabhirmṛtimṛcchati || 31 ||
[Analyze grammar]

yo yathā śāstramārabdhaṃ svadharmamanutiṣṭhati |
bhājanaṃ bhavati śrīmān sa yathāśāstramāyuṣaḥ || 32 ||
[Analyze grammar]

evaṃ karmānusāreṇa janturantyāṃ daśāmitaḥ |
bhavatyastaṅgatavaco dṛṅmarmacchedivedanaḥ || 33 ||
[Analyze grammar]

līlā |
maraṇaṃ me samāsena kathayendusamānane |
kiṃ sukhaṃ maraṇaṃ kiṃ vā duḥkhaṃ mṛtvā ca kiṃ bhavet || 34 ||
[Analyze grammar]

devī |
trividhāḥ puruṣāḥ santi dehasyānte mumūrṣavaḥ |
mūrkho'tha dhāraṇābhyāsī yuktimānpuruṣastathā || 35 ||
[Analyze grammar]

abhyasya dhāraṇāśceṣṭā dehaṃ tyaktvā yathāsukham |
prayāti dhāraṇābhyāsī yuktiyuktastathaiva ca || 36 ||
[Analyze grammar]

dhāraṇā yasya nābhyāsaṃ prāptā naiva sa muktibhāk |
mūrkhaḥ svamṛtikāle'sau duḥkhametyavaśāśayaḥ || 37 ||
[Analyze grammar]

vāsanāveśavaivaśyaṃ bhāvayanviṣayāśayaḥ |
dīnatāṃ paramāmeti parilūnamivāmbujam || 38 ||
[Analyze grammar]

aśāstrasaṃskṛtamatirasajjanaparāyaṇaḥ |
mṛtāvanubhavatyantardāhamagnāviva cyutaḥ || 39 ||
[Analyze grammar]

yadā ghargharakaṇṭhatvaṃ vairūpyaṃ dṛṣṭivarṇajam |
gacchatyeṣa vināśātmā tadā bhavati dīnadhīḥ || 40 ||
[Analyze grammar]

paramaśyāmalāloko divābhyuditarātrikaḥ |
bhramaddiṅmaṇḍalābhogo ghanamecakitāmbaraḥ || 41 ||
[Analyze grammar]

marmavyathāvidhuritaḥ prabhramadvṛkṣamaṇḍalaḥ |
ākāśībhūtavasudho vasudhībhūtakhāntaraḥ || 42 ||
[Analyze grammar]

parivṛttakakupcakra uhyamāna ivārṇave |
nīyamāna ivākāśe ghananidronmukhāśayaḥ || 43 ||
[Analyze grammar]

andhakūpamivāpannaśśilāntariva yojitaḥ |
svayaṃ jaḍībhavajjihvo vikartita ivāśaye || 44 ||
[Analyze grammar]

patatīva nabhomārgādghuṇāvarta ivārpitaḥ |
rathadruta ivārūḍho himavadgalanonmukhaḥ || 45 ||
[Analyze grammar]

jyotkurvanniva saṃsāraṃ vahnimadhyaṃ spṛśanniva |
bhramitaḥ kṣepaṇeṇeva vātayantra iva sthitaḥ || 46 ||
[Analyze grammar]

bhramito vā bhrama iva kṛṣṭo raśanayeva vā |
bhramanniva jalāvarte śastrayantra ivārpitaḥ || 47 ||
[Analyze grammar]

prohyamānastṛṇamiva mahatyarṇavamārute |
dūroḍho vāripūreṇa nipatanniva vāḍave || 48 ||
[Analyze grammar]

anantagagane śvabhre cakrāvarte patanniva |
adridyūrvīviparyāsadaśāmanubhavan sthitaḥ || 49 ||
[Analyze grammar]

patannivānavarataṃ protpatanniva vābhitaḥ |
ghūtkārākarṇanodbhrāntaḥ pūrṇasarvendriyavrajaḥ || 50 ||
[Analyze grammar]

kramācchyāmalatāṃ yānti tasya sarvārthasaṃvidaḥ |
yathāstaṅgacchanti ravau mandālokatayā diśaḥ || 51 ||
[Analyze grammar]

pūrvāparaṃ na jānāti smṛtistānavamāgatā |
yathā pāścātyasandhyānte naṣṭā dṛṣṭirdigaṣṭake || 52 ||
[Analyze grammar]

manaḥkalpanasāmarthyaṃ jahātyasya vimohitaḥ |
avivekena tenāsau mahāmohe nimajjati || 53 ||
[Analyze grammar]

yadeṣanmohamādatte nādatte pavanastadā |
na tvādatte yathā prāṇānmohamāyātyalaṃ tadā || 54 ||
[Analyze grammar]

anyo'nyaṃ puṣṭatāṃ yātairmohātsaṃvedanabhramaiḥ |
jantuḥ pāṣāṇatāmeti sthitamityādisargataḥ || 55 ||
[Analyze grammar]

līlā |
vyathāṃ vimohaṃ mūrchāṃ ca bhramaṃ vyādhimacetanam |
kimarthamayamāyāti deho khaṇḍāṅgavānapi || 56 ||
[Analyze grammar]

devī |
evaṃ saṃviditaṃ karma sargādau spandanaṃ vidaḥ |
yadyasmin samaye duḥkhaṃ kālenaitāvatedṛśam || 57 ||
[Analyze grammar]

syātkacatyeva viṭapagucchavattatsvabhāvajam |
vetti cittvavijṛmbhotthaṃ nānyadatrāsti kāraṇam || 58 ||
[Analyze grammar]

yadā vyathāvaśānnāḍyaḥ svasaṅkocavikāsane |
tyajanti maruto dehātpariyānti nijāṃ sthitim || 59 ||
[Analyze grammar]

praviṣṭā na viniryānti niryātāḥ praviśanti no |
yadā vātā vināḍitvāttadāspandānmṛtirbhavet || 60 ||
[Analyze grammar]

na viśatyeva vā naiva niryāti pavano yadā |
śarīrānnāḍivaidhurye mṛta ityucyate tadā || 61 ||
[Analyze grammar]

āgantavyaṃ mayā nāśaṃ kālenaitāvateti yā |
pūrvaṃ saṃviditā saṃvid yāti taccoditā mṛtim || 62 ||
[Analyze grammar]

īdṛśena mayehetthaṃ bhāvyamityādisargajā |
saṃvidbījakalānāśaṃ na kadācana gacchati || 63 ||
[Analyze grammar]

saṃvido vedanaṃ nāma svabhāvo'vyatirekavān |
tasmātsvabhāvasaṃvitternānyanmaraṇajanmanī || 64 ||
[Analyze grammar]

kvacidāvartavaddaussthyaṃ kvacinnadyāṃ jalaṃ yathā |
kvacitsaumyaṃ kvacijjīvadharmīdaṃ cetanaṃ tathā || 65 ||
[Analyze grammar]

yathā latāyāḥ parvāṇi dīrghāyā madhyamadhyataḥ |
tathā cetanasattāyā janmāni maraṇāni ca || 66 ||
[Analyze grammar]

na jāyate na mriyate cetanaṃ puruṣaḥ kvacit |
svapnasambhramavadbhrāntametatpaśyati kevalam || 67 ||
[Analyze grammar]

puruṣaścetanāmātraṃ sa kadā kveva naśyati |
cetanavyatiriktaṃ ca vadānyatkiṃ pumānbhavet || 68 ||
[Analyze grammar]

kvādya yāvanmṛtaṃ brūhi cetanaṃ kasya kiṃ katham |
mriyante dehalakṣāṇi cetanaṃ sthitamakṣayam || 69 ||
[Analyze grammar]

amariṣyattu ceccittvamekasminneva tanmṛte |
abhaviṣyan sarva eva mṛtā ekamṛtāviha || 70 ||
[Analyze grammar]

vāsanāmātravaicitryaṃ yajjīvo'nubhavetsvayam |
tasyaiva janmamaraṇe nāmanī parikalpite || 71 ||
[Analyze grammar]

evaṃ na kiñcinmriyate jāyate na ca kaścana |
vāsanāvartagarteṣu jīvo luṭhati kevalam || 72 ||
[Analyze grammar]

atyantāsambhavādeva dṛśyasyāsau ca vāsanā |
nāstyeveti vicāreṇa dṛḍhajñāne vinaśyati || 73 ||
[Analyze grammar]

anuditamuditaṃ jagatprabandhaṃ bhavabhayato vyasanairvilokya samyak |
alamanuditavāsano hi jīvo bhavati vimukta itīha satyamastu || 74 ||
[Analyze grammar]