Chapter 17

sadācāranirūpaṇaṃ nāma sargaḥ |
saptadaśaḥ sargaḥ |
vasiṣṭhaḥ |
evamāttaviveko yaḥ sa bhavāniva rāghava |
yogyo jñānagiraśśrotuṃ rājeva nayabhāratīḥ || 1 ||
[Analyze grammar]

avadāto'vadātasya vijñānasya mahāśayaḥ |
jaḍasaṅgojjhito yogyaśśaradīndoryathā nabhaḥ || 2 ||
[Analyze grammar]

tvametayākhaṇḍitayā guṇalakṣmyā samāśritaḥ |
manomohaharaṃ vākyaṃ vakṣyamāṇamidaṃ śṛṇu || 3 ||
[Analyze grammar]

puṇyakalpadrumo yasya phalabhārānataḥ sthitaḥ |
muktaye jāyate jantostasyedaṃ śrotumudyamaḥ || 4 ||
[Analyze grammar]

pāvanānāmudārāṇāṃ parabodhaikadāyinām |
vacasāṃ bhājanaṃ bhūtyai bhavyo bhavati nādhamaḥ || 5 ||
[Analyze grammar]

mokṣopāyābhidhāneyaṃ saṃhitā sārasammitā |
triṃśaddve ca sahasrāṇi jñātā nirvāṇadāyinī || 6 ||
[Analyze grammar]

dīpe yathā vinidrasya jvalite sampravartate |
āloko'nicchato'pyevaṃ nirvāṇamanayā bhavet || 7 ||
[Analyze grammar]

svayaṃ jñātā śrutā vāpi bhrāntiśāntyaiva saukhyadā |
āptoktivarṇitā sadyo yathāmṛtataraṅgiṇī || 8 ||
[Analyze grammar]

yathā rajjvāmahibhrāntirvinaśyatyavalokanāt |
tathaitatprekṣaṇācchāntimeti saṃsāraduḥkhitā || 9 ||
[Analyze grammar]

yuktiyuktārthavākyāni kalpitāni pṛthakpṛthak |
dṛṣṭāntasārasūktāni cāsyāṃ prakaraṇāni ṣaṭ || 10 ||
[Analyze grammar]

vairāgyākhyaṃ prakaraṇaṃ prathamaṃ parikīrtitam |
vairāgyaṃ vardhate yena sekeneva marau taruḥ || 11 ||
[Analyze grammar]

sārdhaṃ sahasraṃ granthasya yasmin hṛdi vicārite |
prakāśā śuddhatodeti maṇāviva vimārjite || 12 ||
[Analyze grammar]

mumukṣuvyavahārākhyaṃ tataḥ prakaraṇaṃ kṛtam |
sahasramātraṃ granthasya sūktigranthena sundaram || 13 ||
[Analyze grammar]

svabhāvo hi mumukṣūṇāṃ narāṇāṃ yatra varṇyate |
evaṃsvabhāvo mokṣasya yogya ityavagamyate || 14 ||
[Analyze grammar]

athotpattiprakaraṇaṃ dṛṣṭāntākhyāyikāmayam |
pañcagranthasahasrāṇi vijñānapratipādanam || 15 ||
[Analyze grammar]

jāgatī draṣṭṛdṛśyaśrīrahaṃ tvamitirūpiṇī |
anutthitaivotthiteva yatreti parivarṇyate || 16 ||
[Analyze grammar]

yasmiñchrute jagadidaṃ śrotrāntarbudhyate'khilam |
sāsmadyuṣmatsavistāraṃ salokākāśaparvatam || 17 ||
[Analyze grammar]

piṇḍagrahavinirmuktaṃ nirbhittikamaparvatam |
pṛthvyādibhūtarahitaṃ saṅkalpa iva pattanam || 18 ||
[Analyze grammar]

svapnopalabdhabhāvābhaṃ manorājyavadātatam |
gandharvanagaraprakhyamarthaśūnyopalambhanam || 19 ||
[Analyze grammar]

dvicandravibhramābhāsaṃ mṛgatṛṣṇāmbuvattatam |
nauyānalolaśailābhaṃ satyalābhavivarjitam || 20 ||
[Analyze grammar]

cittabhramapiśācābhaṃ nirbījamapi bhāsvaram |
kathārthapratibhānābhaṃ vyomamuktāvalīnibham || 21 ||
[Analyze grammar]

kaṭakatvaṃ yathā hemni taraṅgatvaṃ yathāmbhasi |
yathā nabhasi nīlatvamasadevotthitaṃ tathā || 22 ||
[Analyze grammar]

abhitti raṅgarahitamupalabdhimanoharam |
svapne vā vyomni vā citramakarma cirabhāsuram || 23 ||
[Analyze grammar]

avahnireva vahnitvaṃ dhatte citrānalo yathā |
tathā dadhajjagacchabdarūpārthamasadātmakam || 24 ||
[Analyze grammar]

taraṅgotpalamālāḍhyadṛṣatpattramivotthitam |
cakraśūtkāracūrṇasya malarāśimivoditam || 25 ||
[Analyze grammar]

śīrṇapattraṃ bhraṣṭanaṣṭaṃ grīṣme vanamivārasam |
maraṇavyagranṛttābhaṃ śilāstrīhāsyahāsadam || 26 ||
[Analyze grammar]

andhakāragṛhaikaikanṛttamunmattaceṣṭitam |
praśāntājñānanīhāraṃ vijñānaśaradambaram || 27 ||
[Analyze grammar]

samutkīrṇamiva stambhe citrabhittāvivehitam |
paṅkādivābhiracitaṃ sacetanamacetanam || 28 ||
[Analyze grammar]

tataḥ sthitiprakaraṇaṃ caturthaṃ parikalpitam |
trīṇi granthasahasrāṇi svākhyānākhyāyikāmayam || 29 ||
[Analyze grammar]

itthaṃ jagadahambhāvarūpaṃ sthitimupāgatam |
draṣṭṛdṛśyakramaprauḍhamityatra parivarṇitam || 30 ||
[Analyze grammar]

daśadiṅmaṇḍalābhogabhāsuro'yaṃ jagadbhramaḥ |
itthamabhyāgato vṛddhimiti tatrocyate ciram || 31 ||
[Analyze grammar]

upaśāntiprakaraṇaṃ tataḥ pañcasahasrikam |
pañcamaṃ pāvanaṃ proktaṃ munisantatisundaram || 32 ||
[Analyze grammar]

idaṃ jagadahaṃ tvaṃ ca sa iti bhrāntirutthitā |
ityasau śāmyatītyasmin kathyate ślokasaṅgrahe || 33 ||
[Analyze grammar]

upaśāntiprakaraṇe śrute śāmyati saṃsṛtiḥ |
praspaṣṭā vibhrameṇaiva kiñcillabhyopalambhanā || 34 ||
[Analyze grammar]

śatāṃśaśiṣṭā bhavati saṃśāntabhrāntirūpiṇī |
anyasaṅkalpacittasthā nagaraśrīrivāsatī || 35 ||
[Analyze grammar]

alabhyaiva svapārśvasthasvapnayuddhavirāvavat |
śāntasaṅkalpamattābhrabhīṣaṇāśaniśabdavat || 36 ||
[Analyze grammar]

vismṛtasvapnasaṅkalpanirmāṇanagaropamā |
bhaviṣyannagarodyānasotsavaśyāmalāṅgikā || 37 ||
[Analyze grammar]

naśyajjihvocyamānograkathārthānubhavopamā |
anullikhitacittasthacitravyāpteva bhittibhūḥ || 38 ||
[Analyze grammar]

parivismaryamāṇācchakalpanānagarīnibhā |
sarvartumadanutpannavaramardāsphuṭākṛtiḥ || 39 ||
[Analyze grammar]

bhāvipuṣpavarākāravasantarasarañjanā |
antarlīnataraṅgaughasaumyavārisaritsamā || 40 ||
[Analyze grammar]

nirvāṇākhyaṃ prakaraṇaṃ tataṣṣaṣṭhamudāhṛtam |
śiṣṭo granthaḥ parīmāṇaṃ tasya jñeyaṃ mahārthadam || 41 ||
[Analyze grammar]

buddhe tasminbhavecchrotā nirvāṇaśśāntakalpanaḥ |
acetyacitprakāśātmā vijñānātmā nirāmayaḥ || 42 ||
[Analyze grammar]

paramākāśakośācchaśśāntasarvabhavabhramaḥ |
nirvāhitajagadyātraḥ kṛtakartavyasusthitaḥ || 43 ||
[Analyze grammar]

samastavitatārambhavajrastambho nabhonibhaḥ |
vinigīrṇayathāsaṃsthajagajjālātitṛptimān || 44 ||
[Analyze grammar]

ākāśībhūtaniśśeṣarūpālokamanaskṛtiḥ |
kāryakāraṇakartṛtvaheyādeyadaśojjhitaḥ || 45 ||
[Analyze grammar]

sadeha eva nirdehaḥ sasaṃsāro'pyasaṃsṛtiḥ |
cinmayo ghanapāṣāṇajaṭharājaṭharopamaḥ || 46 ||
[Analyze grammar]

cidādityastapaṃl loke'pyandhakārodaropamaḥ |
paraprakāśarūpo'pi paramāndhyamivāgataḥ || 47 ||
[Analyze grammar]

ruddhasaṃsṛtidurlīlaḥ prakṣīṇāśāviṣūcikaḥ |
naṣṭāhaṅkāravetālo dehavānakalevaraḥ || 48 ||
[Analyze grammar]

kasmiṃścid romakoṭyagre tasyeyamavatiṣṭhate |
jagallakṣmīrmahāmeroḥ puṣpe kvacidivālinī || 49 ||
[Analyze grammar]

paramāṇau paramāṇau cidākāśasya koṭare |
jagallakṣmīsahasrāṇi dhatte kṛtvā ca paśyati || 50 ||
[Analyze grammar]

pravitatā hṛdayasya mahāmate hariharābjajalakṣaśatairapi |
tulanameti na muktimato bata pravitatāsti na nūnamavastunaḥ || 51 ||
[Analyze grammar]