Chapter 18

prakaraṇavarṇanaṃ nāma sargaḥ |
aṣṭādaśaḥ sargaḥ |
vasiṣṭhaḥ |
asyāṃ vā citimātrāyāṃ paro bodhaḥ pravartate |
bījādiva yato vyuptādavaśyambhāvi satphalam || 1 ||
[Analyze grammar]

api pauruṣamādeyaṃ śāstraṃ ced yuktibodhakam |
anyatrārṣamapi tyājyaṃ bhāvyaṃ nyāyaikasevinā || 2 ||
[Analyze grammar]

yuktiyuktamupādeyaṃ vacanaṃ bālakādapi |
anyattṛṇamiva tyājyamapyuktaṃ padmajanmanā || 3 ||
[Analyze grammar]

yo'mbhastātasya kūpo'yamiti kaupaṃ pibetkaṭu |
tyaktvā gāṅgaṃ purassthaṃ taṃ ko'nuśāsati rāgiṇam || 4 ||
[Analyze grammar]

yathoṣasi pravṛttāyāmāloko'vaśyameṣyati |
asyāṃ vā citimātrāyāṃ svavivekastathaiṣyati || 5 ||
[Analyze grammar]

śrutāyāṃ prājñavadanādbuddhāyāṃ svayameva vā |
śanaiśśanairvicāreṇa buddhau saṃskāra āgate || 6 ||
[Analyze grammar]

pūrvaṃ tāvadudetyantarbhṛśaṃ saṃskṛtavākyatā |
śuddhā muktālatevoccairyā sabhāsthānabhūṣaṇam || 7 ||
[Analyze grammar]

parā virāgatodeti mahattvaguṇaśālinī |
sā yayā snehamāyānti rājāno'jagarā api || 8 ||
[Analyze grammar]

pūrvāparajñaḥ sarvatra naro bhavati buddhimān |
padārthānāṃ yathā dīpahasto niśi sulocanaḥ || 9 ||
[Analyze grammar]

lobhamohādayo doṣāstānavaṃ yāntyalaṃ śanaiḥ |
dhiyo diśaḥ samāsannaśarado mihikā yathā || 10 ||
[Analyze grammar]

kevalaṃ samapekṣante vivekābhyasanaṃ dhiyaḥ |
na kācana phalaṃ dhatte svabhyāsena vinā kriyā || 11 ||
[Analyze grammar]

manaḥ prasādamāyāti śaradīva mahatsaraḥ |
paraṃ sāmyamupādatte nirmandara ivārṇavaḥ || 12 ||
[Analyze grammar]

nirantaḥkālimā vajraśikhevāstatamaḥpaṭā |
parijvalatyalaṃ prajñā padārthapravibhāginī || 13 ||
[Analyze grammar]

dainyadāridryaduḥkhādyā dṛṣṭayo darśitāntarāḥ |
na nikṛntanti marmāṇi sasannāhamiveṣavaḥ || 14 ||
[Analyze grammar]

hṛdayaṃ nāvalumpanti bhīmāḥ saṃsṛtibhītayaḥ |
purassthitamapi prājñaṃ mahopalamivākhavaḥ || 15 ||
[Analyze grammar]

kathaṃ syādāditā janmakarmaṇordaivapuṃstvayoḥ |
ityādisaṃśayagaṇaśśāmyatyahni yathā tamaḥ || 16 ||
[Analyze grammar]

sarvathā sarvabhāveṣu saṅgatirhyupaśāmyati |
yāminyāmiva yātāyāṃ prajñāloka upāgate || 17 ||
[Analyze grammar]

samudrasyeva gāmbhīryaṃ sthairyaṃ meroriva sthiram |
antaśśītalatā cendorivodeti vicāriṇaḥ || 18 ||
[Analyze grammar]

sā jīvanmuktatā tasya śanaiḥ pariṇatiṃ gatā |
śāntāśeṣavikalpasya bhavatyāviśya yoginaḥ || 19 ||
[Analyze grammar]

sarvārthaśītalā śuddhā paramālokadā sudhīḥ |
paraṃ prakāśamāyāti jyotsneva sakalaindavī || 20 ||
[Analyze grammar]

hṛdyākāśe vivekārke śamālokini nirmale |
anarthasārthakartāro nodyanti kaliketavaḥ || 21 ||
[Analyze grammar]

śāmyanti śuddhimāyānti saumyāstiṣṭhanti sūnnate |
acañcale jaḍāstṛṣṇāśśaradīvābhramālikāḥ || 22 ||
[Analyze grammar]

yatkiñcanakarī krūrā grāmyatā vinivartate |
dīnānanā piśācānāṃ līleva divasāgame || 23 ||
[Analyze grammar]

dharmabhittau bhṛśaṃ lagnāṃ dhiyaṃ dhairyadhuraṃ gatām |
ādhayo na vilumpanti vātāścitralatāmiva || 24 ||
[Analyze grammar]

na patatyavaṭe janturviṣayāsaṅgarūpiṇi |
kaḥ kila jñātasaraṇiśśvabhre samanudhāvati || 25 ||
[Analyze grammar]

sacchāstrasādhuvṛttānāmavirodhini karmaṇi |
ramate dhīryathāprāpte sādhvīvāntaḥpurājire || 26 ||
[Analyze grammar]

jagatāṃ koṭilakṣyeṣu yāvantaḥ paramāṇavaḥ |
teṣāmekaikaśo'ntassthān sargānpaśyatyasargadhīḥ || 27 ||
[Analyze grammar]

mokṣopāyāvabodhena śuddhāntaḥkaraṇaṃ janam |
na khedayati bhogaugho na cānandayati kvacit || 28 ||
[Analyze grammar]

paramāṇau paramāṇau sargavargā nirargalam |
ye patantyutpatantyambuvīcivattān sa paśyati || 29 ||
[Analyze grammar]

na dveṣṭi sampravṛttāni na nivṛttāni kāṅkṣati |
kāryāṇyeṣa prabuddho'pi niṣprabuddha iva drumaḥ || 30 ||
[Analyze grammar]

dṛśyate lokasāmānyo yathāprāptānuvṛttimān |
iṣṭāniṣṭaphalaprāptau hṛdayenāparājitaḥ || 31 ||
[Analyze grammar]

buddhvedamakhilaṃ śāstraṃ vācayitvā vivecya vā |
anubhūyata evaitanna tūktaṃ varaśāpavat || 32 ||
[Analyze grammar]

śāstraṃ subodhamevedaṃ nānālaṅkārabhūṣitam |
kāvyaṃ rasaghanaṃ cāru dṛṣṭāntaiḥ pratipādakam || 33 ||
[Analyze grammar]

budhyate svayamevedaṃ kiñcitpadapadārthavit |
svayaṃ yastu na vettīdaṃ śrotavyaṃ tena paṇḍitāt || 34 ||
[Analyze grammar]

asmiñchrute mate jñāte tapodhyānajapādikam |
mokṣaprāptau tu tasyeha na kiñcidupayujyate || 35 ||
[Analyze grammar]

etacchāstraghanābhyāsātpaunaḥpunyena vīkṣitāt |
jantoḥ pāṇḍityapūrvaṃ hi cittasaṃskārapūrvakam || 36 ||
[Analyze grammar]

ahaṃ jagaditi prauḍho draṣṭṛdṛśyapiśācakaḥ |
piśāco'rkodayeneva svayaṃ śāmyatyavighnataḥ || 37 ||
[Analyze grammar]

bhramo jagadahaṃ ceti sthita evopaśāmyati |
svapnamohaḥ parijñāta iva no ramayatyalam || 38 ||
[Analyze grammar]

yathā saṅkalpanagare puṃso harṣaviṣāditā |
na bādhate tathaivāntaḥ parijñāte jagadbhrame || 39 ||
[Analyze grammar]

citrasarpaḥ parijñāto na sarpabhayado yathā |
dṛśyasarpaḥ parijñātastathā na sukhaduḥkhadaḥ || 40 ||
[Analyze grammar]

parijñānena sarpatvaṃ citrasarpasya naśyati |
yathā tathaiva saṃsāraḥ sthita evopaśāmyati || 41 ||
[Analyze grammar]

sumanaḥpallavāmarṣe kiñcidvyatikaro bhavet |
paramārthapadaprāptau na tu vyatikaro'sti naḥ || 42 ||
[Analyze grammar]

gacchatyavayavaspandaḥ sumanaḥpatramardane |
iha dhīmātrabodhastu nāṅgāvayavabodhanam || 43 ||
[Analyze grammar]

sukhāsanopaviṣṭena yathāsambhavamaśnatā |
bhogajālaṃ sadācāraviruddheṣu na tiṣṭhatā || 44 ||
[Analyze grammar]

yathākṣaṇaṃ yathādeśaṃ pravicārayatā sukham |
yathāsambhavasatsaṅgamidaṃ śāstramathetarat || 45 ||
[Analyze grammar]

āsādyate mahājñānabodhaḥ saṃsāraśāntidaḥ |
sa bhūyo yena nāyāti yoniyantraprapīḍanam || 46 ||
[Analyze grammar]

etāvatyeva ye bhūtā bhogānprāpya rase sthitāḥ |
svamātṛviṣṭhākrimayaḥ kīrtanīyā na te'dhamāḥ || 47 ||
[Analyze grammar]

śṛṇu tāvadidānīṃ tvaṃ kathyamānamimaṃ mayā |
rāghava jñānavistāraṃ buddhisāratarāntaram || 48 ||
[Analyze grammar]

yayedaṃ śrūyate śāstraṃ tāṃ tu vistarataśśṛṇu |
vicāryate yathārtho'yaṃ yayā ca paribhāṣayā || 49 ||
[Analyze grammar]

yenehānanubhūte'rthe dṛṣṭenārthāvabodhanam |
bodhopakāraphaladaṃ taṃ dṛṣṭāntaṃ vidurbudhāḥ || 50 ||
[Analyze grammar]

dṛṣṭāntena vinā rāma nāpūrvo'rtho'vabudhyate |
yathā dīpaṃ vinā rātrau bhāṇḍopaskaraṇaṃ gṛhe || 51 ||
[Analyze grammar]

yairyaiḥ kākutstha dṛṣṭāntaistvaṃ mayehāvabodhyase |
sarve sakāraṇāste hi prāpyaṃ tu sadakāraṇam || 52 ||
[Analyze grammar]

upamānopameyānāṃ kāryakāraṇatoditā |
varjayitvā paraṃ brahma sarveṣāmeva vidyate || 53 ||
[Analyze grammar]

brahmopadeśadṛṣṭānto yasya veha hi kathyate |
ekadeśasadharmatvaṃ tatrātaḥ parigṛhyate || 54 ||
[Analyze grammar]

yo yo nāmeha dṛṣṭānto brahmatattvāvabodhane |
dīyate sa sa boddhavyaḥ svapnadṛṣṭajagadgataḥ || 55 ||
[Analyze grammar]

evaṃ sati nirākāre brahmaṇyākāravān katham |
dṛṣṭānta iti nodyanti mūrkhavaikalpikoktayaḥ || 56 ||
[Analyze grammar]

anyā siddhaviruddhādidṛgdṛṣṭāntapradūṣaṇe |
svapnopamatvājjagataḥ samudeti na kācana || 57 ||
[Analyze grammar]

avastu pūrvāparayorvartamānavicāritam |
yathā jāgrattathā svapnaḥ siddha ābālamakṣatam || 58 ||
[Analyze grammar]

svapnasaṅkalpanadhyānavaraśāpauṣadhādibhiḥ |
ye'rthāsta iha dṛṣṭāntāstadrūpatvājjagatsthiteḥ || 59 ||
[Analyze grammar]

mokṣopāyakṛtā granthakāreṇānye'pi ye kṛtāḥ |
granthāsteṣviyamevaikā vyavasthā bodhyabodhane || 60 ||
[Analyze grammar]

svapnābhatvaṃ ca jagataśśrute śāstre'vabhotsyate |
śīghraṃ na pāryate vaktuṃ vākkila kramavartinī || 61 ||
[Analyze grammar]

svapnasaṅkalpasudhyānanagarādyupamaṃ jagat |
yatasta eva dṛṣṭāntāstasmādbhāntīha netare || 62 ||
[Analyze grammar]

akāraṇaṃ kāraṇinā yadbodhāyopamīyate |
na tatra sarvasādharmyaṃ sambhavatyupamābhramaiḥ || 63 ||
[Analyze grammar]

upameyasyopamānādekāṃśena sadharmatā |
aṅgīkāryāvabodhāya dhīmatā nirvivādinā || 64 ||
[Analyze grammar]

arthāvalokane dīpādābhāmātrādṛte kila |
na sthālatailavartyādi kiñcidevopayujyate || 65 ||
[Analyze grammar]

ekadeśasadharmatvādupameyāvabodhanam |
upamānaṃ karotyaṅga dīpo'rthaṃ prabhayā yathā || 66 ||
[Analyze grammar]

dṛṣṭāntasyāṃśamātreṇa bodhyabodhodaye sati |
upādeyatayā grāhyo mahāvākyārthaniścayaḥ || 67 ||
[Analyze grammar]

na kutārkikatāmetya nāśanīyā prabuddhatā |
anubhūtyapalāpāttairapavitrairvikalpitaiḥ || 68 ||
[Analyze grammar]

vicāraṇādanubhavakāri vāṅmayaprasaṅgatāmupagatamasmadādiṣu |
striyoktamapyaparamathāpi vaidikaṃ vaco vacaḥpralapanameva nāgamaḥ || 69 ||
[Analyze grammar]

asmākamasti matiraṅga tayeti sarvaśāstraikavākyakaraṇaṃ phalitaṃ yato'taḥ |
prātītikārthamayaśāstranijāṅgapuṣṭātsaṃvedanāditaradasti na naḥ pramāṇam || 70 ||
[Analyze grammar]