Chapter 24

kālavilāso nāma sargaḥ |
caturviṃśaḥ sargaḥ |
rāmaḥ |
atraiva durvilāsānāṃ cūḍāmaṇirivāparaḥ |
karotyastīti lokena daivaṃ kālaśca kathyate || 1 ||
[Analyze grammar]

kriyāmātrādṛte yasya svaparispandarūpiṇaḥ |
nānyadālakṣyate rūpaṃ karmaṇo na samīhitam || 2 ||
[Analyze grammar]

teneyamakhilā bhūtasantatirnityapelavā |
tāpena himamāleva nītā vidhuratāṃ bhṛśam || 3 ||
[Analyze grammar]

yadidaṃ dṛśyate kiñcijjagadābhogimaṇḍalam |
tattasya nartanāgāramihāsāvabhinṛtyati || 4 ||
[Analyze grammar]

tṛtīyaṃ ca kṛtānteti nāma bibhratsudāruṇam |
kāpālikavapurmattaṃ daivaṃ jagati nṛtyati || 5 ||
[Analyze grammar]

nṛtyato hi kṛtāntasya nitāntamavirāmiṇaḥ |
nityaṃ niyatikāntāyā mune paramakāminaḥ || 6 ||
[Analyze grammar]

śeṣaśśaśikalāśubhro gaṅgāvāhaśca tau tridhā |
upavīte avītābhe ubhe saṃsāravakṣasi || 7 ||
[Analyze grammar]

candrārkamaṇḍale hemakaṭake karamūlayoḥ |
līlāsarasijaṃ haste brāhmaṃ brahmāṇḍakarṇikam || 8 ||
[Analyze grammar]

tārābinducitaṃ lolapuṣkarāvartapallavam |
ekārṇavapayodhautamekamambaramambaram || 9 ||
[Analyze grammar]

evaṃrūpasya tasyāgre niyatirnityakāminī |
anastamitasaṃrambhamārambhaiḥ parinṛtyati || 10 ||
[Analyze grammar]

tasyā nartanalolāyā jaganmaṇḍapakoṭare |
aruddhaspandarūpāyā āgamāpāyacañcure || 11 ||
[Analyze grammar]

cārubhūṣaṇamaṅgeṣu devalokāntarāvalī |
āpātālaṃ nabho lambaṃ kavarīmaṇḍalaṃ bṛhat || 12 ||
[Analyze grammar]

narakālī ca mañjīramālā kalakalākulā |
protā duṣkṛtasūtreṇa pātālacaraṇe calā || 13 ||
[Analyze grammar]

kastūrikātilakakaṃ kriyāsakhyopakalpitam |
citritaṃ citraguptena yāme vadanapaṭṭake || 14 ||
[Analyze grammar]

kālīrūpamupasthāya kalpānteṣu kriyākulam |
nṛtyatyeṣā punardevī sphuṭacchailaghanāravam || 15 ||
[Analyze grammar]

paścātpralambavibhrāntakaumārarathabarhibhiḥ |
netratrayabṛhadrandhrabhūribhāṅkārabhīṣaṇaiḥ || 16 ||
[Analyze grammar]

lambalolaśaraccandravitīrṇaharamūrdhajaiḥ |
uccaraccārumandāragaurīkavaricāmaraiḥ || 17 ||
[Analyze grammar]

uttāṇḍavācalākārabhairavodaratumbakaiḥ |
raṇatsahasrarandhrendradehabhikṣākapālakaiḥ || 18 ||
[Analyze grammar]

śuṣkā śarīrakhaṭvāṅgabhaṅgairāpūritāmbaram |
bhāyayatyātmanātmānamapi kṛṣṇairghanāsitam || 19 ||
[Analyze grammar]

viśvarūpaśiraścakracārupuṣkaramālayā |
tāṇḍaveṣu vivalgantī mahākalpeṣu rājate || 20 ||
[Analyze grammar]

pramattapuṣkarāvartaḍamarūḍḍāmarāravaiḥ |
tasyāḥ kila palāyante kalpānte tumburādayaḥ || 21 ||
[Analyze grammar]

nṛtyato'nte kṛtāntasya candramaṇḍalahāsinaḥ |
tārakācandrikācāruvyomapiñchāvacūlinaḥ || 22 ||
[Analyze grammar]

ekasmiñchravaṇe dīrghā himavānasti mudrikā |
apare'pi mahāmeruḥ kāntā kāñcanakarṇikā || 23 ||
[Analyze grammar]

atraiva kuṇḍale lole candrārkau gaṇḍamaṇḍale |
lokālokācalaśreṇī sarvataḥ kaṭimekhalā || 24 ||
[Analyze grammar]

itaścetaśca gacchantī vidyudvalayavarṇikā |
anilāndolitā bhāti nīradāṃśukapaṭṭikā || 25 ||
[Analyze grammar]

musulaiḥ paṭṭisaiśśūlaiḥ prāsaistomaramudgaraiḥ |
tīkṣṇaiḥ kṣīṇajagadvrātakṛtāntairiva sambhṛtaiḥ || 26 ||
[Analyze grammar]

saṃsārabandhanādīrghe pāśe kālakaracyute |
śeṣabhogamahāsūtre protairmālāsya śobhate || 27 ||
[Analyze grammar]

jīvollasanmakarikāratnatejobhirujjvalā |
saptābdhikaṅkaṇaśreṇī bhujayorasya bhūṣaṇam || 28 ||
[Analyze grammar]

vyavahāramahāvartā sukhaduḥkhaparamparā |
rajaḥpūrṇā tamaśśyāmā romālī tasya rājate || 29 ||
[Analyze grammar]

evamprāyāṃ sa kalpānte kṛtāntastāṇḍavodbhaṭām |
upasaṃhṛtya nṛttehāṃ sṛṣṭyā saha maheśvaraḥ || 30 ||
[Analyze grammar]

punarhāsyamayīṃ nṛttalīlāṃ sarvasvarūpiṇīm |
tanotīmāṃ jarāduḥkhaśokābhinayabhūṣitām || 31 ||
[Analyze grammar]

bhūyaḥ karoti bhuvanāni vanāntarāṇi lokāntarāṇi janajālakakalpanāṃ ca |
ācāracārukalanāṃ ca calācalāṃ ca paṅkād yathārbhakajano racanāmakhinnaḥ || 32 ||
[Analyze grammar]