Chapter 25

kṛtāntavilasitaṃ nāma sargaḥ |
pañcaviṃśaḥ sargaḥ |
rāmaḥ |
vṛtte'sminneva caiteṣāṃ kālādīnāṃ mahāmune |
saṃsāranāmni kaivāsthā mādṛśānāṃ bhavatviha || 1 ||
[Analyze grammar]

vikrītā iva tiṣṭhāma etairdaivādibhirvayam |
dhūrtaiḥ prapañcacaturairmugdhā vanamṛgā iva || 2 ||
[Analyze grammar]

eṣo'nāryasamācāraḥ kālaḥ kavalanonmukhaḥ |
jagatyavirataṃ lokaṃ pātayatyāpadarṇave || 3 ||
[Analyze grammar]

dahatyante durāśābhirdaivo dāruṇaceṣṭayā |
lokaṃ puṣpanikāśābhirjvālābhirdahano yathā || 4 ||
[Analyze grammar]

dhṛtiṃ vidhurayatyekāmayadā rūpavallabhā |
strītvātsvabhāvacapalā niyatirniyamonmukhī || 5 ||
[Analyze grammar]

grasate'virataṃ bhūtajālaṃ sarpa ivānilam |
kṛtāntaḥ karkaśācāro jarāṃ nītvā jagadvapuḥ || 6 ||
[Analyze grammar]

yamanirghṛṇarājendro nārtaṃ nāmānukampate |
sarvabhūtadayācāro jano durlabhatāṃ gataḥ || 7 ||
[Analyze grammar]

sarvā eva mune phalguvibhavā bhūtajātayaḥ |
duḥkhāyaiva durantāya dāruṇā lobhabhūmayaḥ || 8 ||
[Analyze grammar]

āyuratyantataralaṃ mṛtyurekastu niṣṭhuraḥ |
tāruṇyaṃ cātitaralaṃ bālyaṃ jaḍatayā hṛtam || 9 ||
[Analyze grammar]

kalākalaṅkito loko bandhavo bhavabandhanam |
bhogā bhavamahārogāstṛṣṇā ca mṛgatṛṣṇikā || 10 ||
[Analyze grammar]

śatravaścendriyāṇyeva satyaṃ yātamasatyatām |
praharatyātmanaivātmā mana eva manoripuḥ || 11 ||
[Analyze grammar]

ahaṅkāraḥ kalaṅkāya buddhayaḥ paripelavāḥ |
kriyā duṣphaladāyinyo līlāḥ strīniṣṭhatāṃ gatāḥ || 12 ||
[Analyze grammar]

vāñchāviṣayaśālinyaḥ sacamatkṛtayaḥ kṛtāḥ |
nāryo doṣapatākinyo rasā nīrasatāṃ gatāḥ || 13 ||
[Analyze grammar]

vastvavastutayā cāttaṃ dattaṃ cittamahaṅkṛtau |
abhāvarodhitā bhāvā bhavānto nādhigamyate || 14 ||
[Analyze grammar]

tapyate kevalaṃ sādho matirākulitāntarā |
rāgorago vilasati virāgaṃ nopagacchati || 15 ||
[Analyze grammar]

rajoguṇāhatā dṛṣṭistamaḥ samparivardhate |
na cādhigamyate sattvaṃ tattvamatyantadūrataḥ || 16 ||
[Analyze grammar]

sthitirasthiratāṃ yātā mṛtirāgamanonmukhī |
dhṛtirvaidhuryamāyāti ratirnityamavastuni || 17 ||
[Analyze grammar]

matirmāndyena malinā pātaikaparamaṃ vapuḥ |
jvalatīva jarā dehe pravisphūrjati duṣkṛtam || 18 ||
[Analyze grammar]

yatnena yāti yuvatā dūre sajjanasaṅgatiḥ |
gatirna vidyate kācitkvacinnodeti satyatā || 19 ||
[Analyze grammar]

mano vimuhyatīvāntarmuditā dūrato gatā |
nojjvalā karuṇodeti dūrādāyāti nīcatā || 20 ||
[Analyze grammar]

dhīratādhīratāmeti pātotpātaparo janaḥ |
sulabho durjanāśleṣo durlabhaḥ sādhusaṅgamaḥ || 21 ||
[Analyze grammar]

āgamāpāyino bhāvā bhāvanā bhavabandhanī |
nīyate kevalaṃ kvāpi nityaṃ bhūtaparamparā || 22 ||
[Analyze grammar]

diśo'pi hi na dṛśyante deśo'pyavyapadeśabhāk |
śailā api hi śīryante kaivāsthā mādṛśe jane || 23 ||
[Analyze grammar]

dravantyapi samudrāśca śīryante tārakā api |
siddhā api na sidhyanti kaivāsthā mādṛśe jane || 24 ||
[Analyze grammar]

adyate'sattayāpi dyaurbhuvanaṃ cāpi bhajyate |
dharāpi yāti vaidhuryaṃ kaivāsthā mādṛśe jane || 25 ||
[Analyze grammar]

dānavā api dīryante dhruvo'pyadhruvajīvitaḥ |
amarā api māryante kaivāsthā mādṛśe jane || 26 ||
[Analyze grammar]

śakro'pyākramyate śakrairyamo'pi hi niyamyate |
vāyorapyastyavāyutvaṃ kaivāsthā mādṛśe jane || 27 ||
[Analyze grammar]

somo'pi vyomatāmeti mārtāṇḍo'pyeti khaṇḍanām |
rugṇatāmagnirapyeti kaivāsthā mādṛśe jane || 28 ||
[Analyze grammar]

parameṣṭhyapyaniṣṭhāvān harate harimapyajaḥ |
bhavo'pyabhavatāṃ yāti kaivāsthā mādṛśe jane || 29 ||
[Analyze grammar]

kālaśśakalatāmeti niyatiścāpi nīyate |
khamapyālīyate'nante kaivāsthā mādṛśe jane || 30 ||
[Analyze grammar]

aśravyāvācyadurdarśatantreṇājñātamūrtinā |
bhuvanāni viḍambyante kenacidbhramadāyinā || 31 ||
[Analyze grammar]

ahaṅkārakalāmetya sarvatrāntaravāsinā |
na so'sti triṣu lokeṣu yasteneha na bādhyate || 32 ||
[Analyze grammar]

śilāśailakaṭapreṣu sāśvasūto divākaraḥ |
vanapāṣāṇavannityamavaśaḥ paridolyate || 33 ||
[Analyze grammar]

dharāgolakamantassthasurāsuragaṇāspadam |
veṣṭyate dhiṣṇyacakreṇa pakvākṣoṭamiva tvacā || 34 ||
[Analyze grammar]

divi devā bhuvi narāḥ pātāle'surabhoginaḥ |
kalpitāḥ kalpamātreṇa nīyante jarjarāṃ daśām || 35 ||
[Analyze grammar]

kāmaśca jagatīśānaraṇalabdhaparākramaḥ |
akrameṇaiva vikrānto lokamākramya valgati || 36 ||
[Analyze grammar]

vasanto mattamātaṅgo madaiḥ kusumavarṣaṇaiḥ |
āmoditakakupcakraśceto nayati vakratām || 37 ||
[Analyze grammar]

anuraktāṅganālokalocanālokitākṛti |
spaṣṭīkartuṃ manaśśakto na viveko mahānapi || 38 ||
[Analyze grammar]

paropakārakāriṇyā parārtyā paritaptayā |
buddha eva sukhī manye svārthaśītalayā dhiyā || 39 ||
[Analyze grammar]

utpannadhvaṃsinaḥ kālavaḍavānalapātinaḥ |
saṅkhyātuṃ kena śakyante kallolā jīvitāmbudheḥ || 40 ||
[Analyze grammar]

sarva eva narā mohāddurāśāpāśapātinaḥ |
doṣagulmakasāraṅgā nigīrṇā janmajaṅgale || 41 ||
[Analyze grammar]

saṅkṣīyate jagati janmaparamparāsu lokasya tairiha kukarmabhirāyuretat |
ākāśapādapalatākṛtapāśakalpaṃ yeṣāṃ phalaṃ na hi vicāravido'pi vidmaḥ || 42 ||
[Analyze grammar]

adyotsavo'yamṛtureṣa tatheha yātrā te bandhavaḥ sukhamidaṃ sa viśeṣabhogaḥ |
itthaṃ mudhaiva kalayan svavikalpajālamālolapelavamatirgalatīha lokaḥ || 43 ||
[Analyze grammar]