Chapter 20

yauvanagarhā nāma sargaḥ |
viṃśaḥ sargaḥ |
rāmaḥ |
māṃsaputtalikāyāśca yantralolāṅgapañjare |
snāyvasthigranthiśālinyāḥ striyāḥ kimiva śobhanam || 1 ||
[Analyze grammar]

tvaṅmāṃsaraktabāṣpāsru pṛthakkṛtvā vilocanam |
samālokaya ramyaṃ cetkiṃ mudhā parimuhyasi || 2 ||
[Analyze grammar]

itaḥ keśā ito raktamitīyaṃ pramadātanuḥ |
kimetayā ninditayā karotu vipulāśayaḥ || 3 ||
[Analyze grammar]

vāsovilepanairyāni lālitāni punaḥ punaḥ |
tānyaṅgānyavalumpanti kravyādāḥ sarvadehinām || 4 ||
[Analyze grammar]

merośśṛṅgataṭollāsigaṅgājalarayopamāḥ |
dṛṣṭā yasmin stane muktā hārasyollāsaśālinaḥ || 5 ||
[Analyze grammar]

śmaśāneṣu diganteṣu sa eva lalanāstanaḥ |
śvabhirāsvādyate kāle laghupiṇḍa ivāndhasaḥ || 6 ||
[Analyze grammar]

raktamāṃsādidigdhāni karabhasya yathā vane |
tathaivāṅgāni kāminyāstatpratyapi hi ko grahaḥ || 7 ||
[Analyze grammar]

āpātaramaṇīyatvaṃ kalpyate kevalaṃ striyāḥ |
manye tadapi nāstyatra mune mohaikakāraṇe || 8 ||
[Analyze grammar]

vipulollāsadāyinyā madonmathanapūrvakam |
ko viśeṣo vikāriṇyā madirāyā iha striyāḥ || 9 ||
[Analyze grammar]

lalanālānasaṃlīnā mune mānavadantinaḥ |
prabodhaṃ nādhigacchanti dīrghairapi śamāṅkuśaiḥ || 10 ||
[Analyze grammar]

keśakajjaladhāriṇyastīkṣṇāḥ prakṛtitaḥ sadā |
duṣkṛtāgniśikhā nāryo dahanti tṛṇavannaram || 11 ||
[Analyze grammar]

te vandyāste mahātmānasta eva puruṣā bhuvi |
ye sukhena samuttīrṇāḥ sādho yauvatasaṅkaṭāt || 12 ||
[Analyze grammar]

jvalatāmapi dūre'pi sarasā api nīrasam |
striyo hi narakāgnīnāṃ dāru cāru ca dāruṇam || 13 ||
[Analyze grammar]

kīrṇāndhakārakavarī tarattārakalocanā |
pūrṇendubimbavadanā kumudotkarahāsinī || 14 ||
[Analyze grammar]

līlāvilolaparuṣā kāryasaṃhārakāriṇī |
paraṃ vimohanaṃ buddheḥ kāminī dīrghayāminī || 15 ||
[Analyze grammar]

puṣpābhirāmamadhurā karapallavalāsinī |
bhramarabhrūvilāsāḍhyā stabakastanadhāriṇī || 16 ||
[Analyze grammar]

puṣpakesaragaurāṅgī naramāraṇatatparā |
dadātyuttamavaivaśyaṃ kāntā viṣamahālatā || 17 ||
[Analyze grammar]

sītkārocchvāsamātreṇa bhujaṅgadalanotkayā |
kāntayoddhriyate jantuḥ karabhyevorago bilāt || 18 ||
[Analyze grammar]

kāmanāmnā kirātena vitīrṇā mugdhacetasām |
nāryo naravihaṅgānāmaṅgabandhanavāgurāḥ || 19 ||
[Analyze grammar]

lalanāvipulālāne manomattamataṅgajaḥ |
ratiśṛṅkhalayā brahmanbaddhastiṣṭhati mūkavat || 20 ||
[Analyze grammar]

janmapalvalamatsyānāṃ karmakoṭaracāriṇām |
puṃsāṃ durvāsanārajjurnārī baḍiśapiṇḍikā || 21 ||
[Analyze grammar]

mandureva turaṅgānāmālānamiva dantinām |
puṃsāmabjamivālīnāṃ bandhanaṃ vāmalocanāḥ || 22 ||
[Analyze grammar]

nānārasamayī citrā bhogabhūmiriyaṃ mune |
striyamāśritya saṃyātā parāmiha hi saṃsthitim || 23 ||
[Analyze grammar]

sarveṣāṃ doṣaratnānāṃ susamudgikayānayā |
duḥkhaśṛṅkhalayā nityamalamastu mama striyā || 24 ||
[Analyze grammar]

kiṃ stanena kimakṣṇā vā kiṃ nitambena kiṃ bhruvā |
māṃsamātraikasāreṇa karomyahamavastunā || 25 ||
[Analyze grammar]

ito māṃsamito raktamito'sthīni ca vāsaraiḥ |
brahman katipayaireva yāti strī viśarārutām || 26 ||
[Analyze grammar]

yāstā niṣparuṣaistūlairlālitāḥ patibhiḥ striyaḥ |
tā mune pravibhaktāṅgyaḥ svapanti pitṛbhūmiṣu || 27 ||
[Analyze grammar]

yasmin ghananavasnehaṃ mukhe pattrāṅkuraśriyaḥ |
kāntena racitā brahmañchīryate tattu jaṅgale || 28 ||
[Analyze grammar]

keśāśśmaśānavṛkṣeṣu yānti cāmaraleśatām |
asthīnyuḍuvadābhānti dinairavanimaṇḍale || 29 ||
[Analyze grammar]

pibanti pāṃsavo raktaṃ kravyādāścāpyanekaśaḥ |
carmānalaśikhā bhuṅkte khaṃ yānti prāṇavāyavaḥ || 30 ||
[Analyze grammar]

ityeṣā lalanāṅgānāmacireṇaiva bhāvinī |
sthitirmayā vaḥ kathitā kiṃ bhrāntimanudhāvatha || 31 ||
[Analyze grammar]

bhūtapañcakasaṅghaṭṭasaṃsthānaṃ lalanābhidham |
rasādabhivahatvetatkathaṃ nāma dhiyānvitaḥ || 32 ||
[Analyze grammar]

śākhāvitānagahanā kaṭvamlaphalaśālinī |
pratānottālatāmeti cintā kāntānusāriṇī || 33 ||
[Analyze grammar]

kvacidbhūtatayā ceto dhanagardhāndhamākulam |
paraṃ mohamupādatte yūthabhraṣṭo mṛgo yathā || 34 ||
[Analyze grammar]

śocyatāṃ paramāmeti taruṇastaruṇīrataḥ |
nibaddhaḥ kariṇīlobhādvindhyakhāte yathā dvipaḥ || 35 ||
[Analyze grammar]

yasya strī tasya bhogecchā nisstrīkasya na bhogabhūḥ |
striyaṃ tyaktvā jagattyaktaṃ jagattyaktvā sukhī bhavet || 36 ||
[Analyze grammar]

āpātamātraramaṇeṣu durantareṣu bhogeṣu nāhamalipakṣatipelaveṣu |
brahman rame maraṇarogajarādibhītyā śāmyāmyahaṃ paramupaimi vanaṃ prayatnāt || 37 ||
[Analyze grammar]