Chapter 19

bālyajugupsā nāma sargaḥ |
ekonaviṃśaḥ sargaḥ |
rāmaḥ |
bālyānarthamatha tyaktvā pumānabhihatāśayaḥ |
ārohati nipātāya yauvanaśvabhrasambhramam || 1 ||
[Analyze grammar]

tatrānantavilāsasya lolasya svasya cetasaḥ |
vṛttīranusaranyāti duḥkhādduḥkhataraṃ jaḍaḥ || 2 ||
[Analyze grammar]

svacittabilasaṃsthena nānāsambhramakāriṇā |
balātkāmapiśācena vivaśaḥ paribhūyate || 3 ||
[Analyze grammar]

cintānāṃ lolavṛttīnāṃ lalanānāmivābhitaḥ |
arpayatyavaśaśceto jvālānāmātmajaṃ yathā || 4 ||
[Analyze grammar]

te te doṣā durārambhāstatra taṃ tādṛśāśayam |
taruṇaṃ pravilumpanti dṛśyāste naiva ye mune || 5 ||
[Analyze grammar]

mahānarakabījena santatabhramadāyinā |
yauvanena na ye naṣṭā naṣṭā nānyena te janāḥ || 6 ||
[Analyze grammar]

nānārasamayī citrā vṛttāntanicayombhitā |
bhīmā yauvanabhūryena tīrṇā dhīraḥ sa ucyate || 7 ||
[Analyze grammar]

nimeṣabhāsurākāramālolaghanagarjitam |
vidyutprakāśamaniśaṃ yauvanaṃ me na rocate || 8 ||
[Analyze grammar]

vividhāvartabahulaṃ paṅkalagnaṃ jaḍāśayam |
taraṅgabhaṅguraṃ bhīmaṃ yauvanaṃ me na rocate || 9 ||
[Analyze grammar]

sarvasyāgresaraṃ puṃsaḥ kṣaṇamātramanoharam |
gandharvanagaraprakhyaṃ yauvanaṃ me na rocate || 10 ||
[Analyze grammar]

iṣuprapātamātraṃ hi sukhadaṃ duḥkhabhāsuram |
dāhadoṣapradaṃ nityaṃ yauvanaṃ me na rocate || 11 ||
[Analyze grammar]

madhuraṃ svādu tiktaṃ ca dūṣaṇaṃ doṣabhūṣaṇam |
surākallolasadṛśaṃ yauvanaṃ me na rocate || 12 ||
[Analyze grammar]

asatyaṃ satyasaṅkāśamacirādvipralambhadam |
svapnāṅganāsaṅgasamaṃ yauvanaṃ me na rocate || 13 ||
[Analyze grammar]

kṣaṇaprakāśataralaṃ mithyāracitacakrikam |
alātacakrapratimaṃ yauvanaṃ me na rocate || 14 ||
[Analyze grammar]

mṛdusphāratarodāramantaśśūnyaṃ kṣaṇakṣatam |
śaradambudasaṅkāśaṃ yauvanaṃ me na rocate || 15 ||
[Analyze grammar]

āpātamātraramaṇaṃ sadbhāvarahitāntaram |
veśyāstrīsaṅgamaprakhyaṃ yauvanaṃ me na rocate || 16 ||
[Analyze grammar]

ye kecana durārambhāste sarve sarvaduḥkhadāḥ |
tāruṇye sannidhiṃ yānti mahotpātā iva kṣaye || 17 ||
[Analyze grammar]

hārdāndhakārakāriṇyā bhairavākāravānapi |
yauvanājñānayāminyā bibheti bhagavānapi || 18 ||
[Analyze grammar]

suvismṛtaśubhācāraṃ buddhivaidhuryadāyinam |
dadātyatitarāmeṣa bhramaṃ yauvanavibhramaḥ || 19 ||
[Analyze grammar]

kāntāviyogajātena hṛdi durdharṣavahninā |
yauvane dahyate jantustarurdāvāgninā yathā || 20 ||
[Analyze grammar]

vistīrṇāpi prasannāpi pāvanyapi hi yauvane |
matiḥ kaluṣatāmeti prāvṛṣīva taraṅgiṇī || 21 ||
[Analyze grammar]

śakyate ghanakallolabhīmā rodhayituṃ nadī |
na tu tāruṇyataralā tṛṣṇātaralitāntarā || 22 ||
[Analyze grammar]

sā kāntā tau stanau pīnau te vilāsāstadānanam |
tāruṇya iti cintābhiryāti jarjaratāṃ janaḥ || 23 ||
[Analyze grammar]

tarattaralatṛṣṇārtaṃ yuvānamiha sādhavaḥ |
pūjayanti na tucchehaṃ jarattṛṇalavaṃ yathā || 24 ||
[Analyze grammar]

nāśāyaiva madāndhasya doṣamauktikadhāriṇaḥ |
abhimānamahebhasya nityālānaṃ hi yauvanam || 25 ||
[Analyze grammar]

manovipulamūlānāṃ doṣāśīviṣadhāriṇām |
roṣarodanavṛkṣāṇāṃ yauvanaṃ navakānanam || 26 ||
[Analyze grammar]

rasakesarasambādhaṃ kuvikalpadalākulam |
duścintācañcarīkāṇāṃ puṣkaraṃ viddhi yauvanam || 27 ||
[Analyze grammar]

kṛtākṛtakupakṣāṇāṃ hṛtsarastīracāriṇām |
ādhivyādhivihaṅgānāmālayo navayauvanam || 28 ||
[Analyze grammar]

jaḍānāṃ gatasaṅkhyānāṃ kallolānāṃ vilāsinām |
anapekṣitamaryādo vāridhiḥ pūrṇayauvanam || 29 ||
[Analyze grammar]

sarveṣāṃ guṇaparṇānāmapanetuṃ rajastataḥ |
apanetuṃ sthito dakṣo viṣamo yauvanānilaḥ || 30 ||
[Analyze grammar]

nayanti pāṇḍutāṃ vaktramākulāvakarotkaṭāḥ |
ārohanti parāṃ koṭiṃ rūkṣā yauvanapāṃsavaḥ || 31 ||
[Analyze grammar]

udbodhayati doṣālīṃ nikṛntati guṇāvalīm |
narāṇāṃ yauvanollāso vilāso duṣkṛtaśriyaḥ || 32 ||
[Analyze grammar]

śarīrapaṅkajarajaścañcalāṃ matiṣaṭpadīm |
nibadhya mohayatyeṣa naraṃ yauvanacandramāḥ || 33 ||
[Analyze grammar]

śarīraṣaṇḍakodbhūtā ramyā yauvanavallarī |
lagnameva manobhṛṅgaṃ madayatyunnatiṃ gatā || 34 ||
[Analyze grammar]

śarīramarutāpotthāṃ yuvatāmṛgatṛṣṇikām |
manomṛgāḥ pradhāvantaḥ patanti viṣamāvaṭe || 35 ||
[Analyze grammar]

śarīraśarvarījyotsnā cittakesariṇaḥ saṭā |
laharī jīvitāmbhodheryuvatā me na rocate || 36 ||
[Analyze grammar]

dināni katicid yeyaṃ phalitā dehajaṅgale |
yuvatāśaradasyāṃ hi na samāśvāsamarhatha || 37 ||
[Analyze grammar]

jhagityeva prayātyeṣa śarīrād yuvatākhagaḥ |
kṣaṇenaivālpabhāgyasya hastāccintāmaṇiryathā || 38 ||
[Analyze grammar]

yadā yadā parāṃ koṭimabhyārohati yauvanam |
valganti sarasāḥ kāmāstadā nāśāya kevalam || 39 ||
[Analyze grammar]

tāvadeva vivalganti rāgadveṣapiśācikāḥ |
nāstameti samastaiṣā yāvad yauvanayāminī || 40 ||
[Analyze grammar]

nānādhikārabahule varāke kṣaṇanāśini |
kāruṇyaṃ kuru tāruṇye mriyamāṇe sute yathā || 41 ||
[Analyze grammar]

harṣamāyāti yo mohātpuruṣaḥ kṣaṇabhaṅginā |
yauvanena mahāmugdhaḥ sa vai naramṛgaḥ smṛtaḥ || 42 ||
[Analyze grammar]

mānamohamadonmattaṃ yauvanaṃ yo'bhilaṣyati |
acireṇa sa durbuddhiḥ paścāttāpena yujyate || 43 ||
[Analyze grammar]

te dharmyāste mahātmānasta eva puruṣā bhuvi |
ye sukhena samuttīrṇāḥ sādho yauvanasaṅkaṭāt || 44 ||
[Analyze grammar]

sukhena tīryate'mbhodhirutkṛṣṭamakarākaraḥ |
na kallolavanollāsi sadoṣaṃ hatayauvanam || 45 ||
[Analyze grammar]

vinayabhūṣitamāryajanāspadaṃ karuṇayojjvalamāvalitaṃ guṇaiḥ |
iha hi durlabhamaṅga suyauvanaṃ jagati kānanamambaragaṃ yathā || 46 ||
[Analyze grammar]