Chapter 21

strījugupsā nāma sargaḥ |
ekaviṃśaḥ sargaḥ |
rāmaḥ |
aparyāptaṃ hi bālatvaṃ bālyaṃ pibati yauvanam |
yauvanaṃ ca jarā paścātpaśya karkaśatāṃ mithaḥ || 1 ||
[Analyze grammar]

himāśanirivāmbhojaṃ vātyeva śaradambudam |
dehaṃ jarā jarayati sarittīrataruṃ yathā || 2 ||
[Analyze grammar]

śithilādīrghasarvāṅgaṃ jarājīrṇakalevaram |
samaṃ paśyanti kāminyaḥ puruṣaṃ karabhaṃ tathā || 3 ||
[Analyze grammar]

śvāsāyāsakadarthinyā gṛhīte jarasā jane |
palāyya gacchati prajñā sapatnyeva hatāṅganā || 4 ||
[Analyze grammar]

dāsāḥ putrāḥ striyaścaiva bāndhavāḥ suhṛdastathā |
hasantyunmattakamiva naraṃ vārddhakakampitam || 5 ||
[Analyze grammar]

duṣprajñaṃ jaraḍhaṃ dīnaṃ hīnaṃ guṇaparākramaiḥ |
gṛdhro vṛkṣamivādīrghaṃ gardho hyabhyeti vṛddhatām || 6 ||
[Analyze grammar]

dainyadoṣamayī dīrghā hṛdi dāhapradāyinī |
sarvāpadāmekasakhī vardhate vārddhake spṛhā || 7 ||
[Analyze grammar]

kartavyaṃ kiṃ mayā kaṣṭaṃ paratretyatidāruṇam |
apratīkārayogyaṃ hi vardhate vārddhake bhayam || 8 ||
[Analyze grammar]

ko'haṃ varākaḥ kimiva karomi kathameva vā |
tiṣṭhāmi maunameveti dīnatodeti vārddhake || 9 ||
[Analyze grammar]

gardho'bhyudeti sollāsamupabhoktuṃ na śakyate |
hṛdayaṃ dahyate nūnaṃ śaktidaussthyena vārddhake || 10 ||
[Analyze grammar]

jarājīrṇabakī yāvatkāsakreṅkārakāriṇī |
rauti rogoragākīrṇā kāyadrumaśirassthitā || 11 ||
[Analyze grammar]

tāvadāgata evāśu kuto'pi paridṛśyate |
ghanāndhatimirākāṅkṣī mune maraṇakauśikaḥ || 12 ||
[Analyze grammar]

sāyaṃsandhyā prajātaiva tamaḥ samanudhāvati |
jarā vapuṣi dṛṣṭaiva mṛtiṃ samanudhāvati || 13 ||
[Analyze grammar]

jarākusumitaṃ dehadrumaṃ dṛṣṭvaiva dūrataḥ |
mṛtibhṛṅgī drutaṃ brahmannarasyāyāti sūtsukā || 14 ||
[Analyze grammar]

śūnyaṃ nagaramābhāti bhāti cchinnalato drumaḥ |
bhātyanāvṛṣṭimāndeśo na jarājarjaraṃ vapuḥ || 15 ||
[Analyze grammar]

kṣaṇānnigiraṇāyaiva kāsakvaṇitakāriṇī |
gṛdhrīvāmiṣamādatte tarasaiva naraṃ jarā || 16 ||
[Analyze grammar]

dṛṣṭvaiva sotsukevāśu pragṛhya śirasi kṣaṇāt |
pralunāti jarā dehaṃ kumārī kairavaṃ yathā || 17 ||
[Analyze grammar]

sītkārakāriṇī pāṃsuparuṣā parijarjaram |
śarīraṃ śātayatyeṣā vātyeva tarupallavam || 18 ||
[Analyze grammar]

jarasopahato deho dhatte jarjaratāṃ gataḥ |
tuṣāranikarākīrṇaparimlānāmbujaśriyam || 19 ||
[Analyze grammar]

jarājyotsnoditaiveyaṃ śiraśśikharipṛṣṭhataḥ |
vikāsayati saṃrabdhavātāṃ kāsakumudvatīm || 20 ||
[Analyze grammar]

paripakvaṃ samālokya jarākṣāravidhūsaram |
śiraḥkuṣmāṇḍakaṃ bhuṅkte puṃsaḥ kālaḥ kileśvaraḥ || 21 ||
[Analyze grammar]

jarājahnusutodyuktā mūlānyasya nikṛntati |
śarīratīravṛkṣasya calasyāyūṃṣi satvaram || 22 ||
[Analyze grammar]

jarāmārjārikā bhuktayauvanākhutayaidhitā |
paramullāsamāyāti śarīrāmiṣagardhinī || 23 ||
[Analyze grammar]

kācidasti jagatyasminnāmaṅgalakarī tathā |
yathā jarākrośakarī dehajaṅgalajambukī || 24 ||
[Analyze grammar]

kāsaśvāsasasītkārā duḥkhadhūmatamomayī |
jarājvālā jvalatyeṣā yayāsau dagdha eva hi || 25 ||
[Analyze grammar]

jarasā vakratāmeti śuklāvayavapallavā |
tāta tanvī tanurnṝṇāṃ latā puṣpānatā yathā || 26 ||
[Analyze grammar]

jarākarpūradhavalaṃ dehakarpūrapādapam |
mune maraṇamātaṅgo nūnamuddharati kṣaṇāt || 27 ||
[Analyze grammar]

maraṇasya mune rājño jarādhavalacāmarā |
āgacchato'gre niryāti svādhivyādhipatākinī || 28 ||
[Analyze grammar]

na jitāśśatrubhiḥ saṅkhye ye niṣpiṣṭādrikoṭayaḥ |
te jarājīrṇarākṣasyā paśyāśu vijitā mune || 29 ||
[Analyze grammar]

jarātuṣāradhavale śarīrasadanāntare |
śaknuvantyakṣaśiśavaḥ spandituṃ na manāgapi || 30 ||
[Analyze grammar]

saṃsārasaṃsṛterasyā gandhakuṭyāśśirogatā |
dehayaṣṭyā jarānāmnī cāmaraśrīrvirājate || 31 ||
[Analyze grammar]

jarācandrodayasite śarīranagare sthite |
kṣaṇādvikāsamāyāti mune maraṇakairavam || 32 ||
[Analyze grammar]

jarāsudhālepasite śarīrāntaḥpurāntare |
aśaktirārtirāpacca tiṣṭhanti sukhamaṅganāḥ || 33 ||
[Analyze grammar]

abhāvāgresarā yatra jarā jayati jantuṣu |
kastatreha samāśvāso mama mandamatermune || 34 ||
[Analyze grammar]

kiṃ tena durjīvitadurgraheṇa jarāṃ gatenāpi hi jīvyate yat |
jarā jagatyāmajitā narāṇāṃ sarvaiṣaṇāstāta tiraskaroti || 35 ||
[Analyze grammar]