Chapter 15

dhṛtarāṣṭra uvāca |
kathaṃ kurūṇāmṛṣabho hato bhīṣmaḥ śikhaṇḍinā |
kathaṃ rathātsa nyapatatpitā me vāsavopamaḥ || 1 ||
[Analyze grammar]

kathamāsaṃśca me putrā hīnā bhīṣmeṇa saṃjaya |
balinā devakalpena gurvarthe brahmacāriṇā || 2 ||
[Analyze grammar]

tasminhate mahāsattve maheṣvāse mahābale |
mahārathe naravyāghre kimu āsīnmanastadā || 3 ||
[Analyze grammar]

ārtiḥ parā māviśati yataḥ śaṃsasi me hatam |
kurūṇāmṛṣabhaṃ vīramakampyaṃ puruṣarṣabham || 4 ||
[Analyze grammar]

ke taṃ yāntamanupreyuḥ ke cāsyāsanpurogamāḥ |
ke'tiṣṭhanke nyavartanta ke'bhyavartanta saṃjaya || 5 ||
[Analyze grammar]

ke śūrā rathaśārdūlamacyutaṃ kṣatriyarṣabham |
rathānīkaṃ gāhamānaṃ sahasā pṛṣṭhato'nvayuḥ || 6 ||
[Analyze grammar]

yastamo'rka ivāpohanparasainyamamitrahā |
sahasraraśmipratimaḥ pareṣāṃ bhayamādadhat |
akarodduṣkaraṃ karma raṇe kauravaśāsanāt || 7 ||
[Analyze grammar]

grasamānamanīkāni ya enaṃ paryavārayan |
kṛtinaṃ taṃ durādharṣaṃ samyagyāsyantamantike |
kathaṃ śāṃtanavaṃ yuddhe pāṇḍavāḥ pratyavārayan || 8 ||
[Analyze grammar]

nikṛntantamanīkāni śaradaṃṣṭraṃ tarasvinam |
cāpavyāttānanaṃ ghoramasijihvaṃ durāsadam || 9 ||
[Analyze grammar]

atyanyānpuruṣavyāghrānhrīmantamaparājitam |
pātayāmāsa kaunteyaḥ kathaṃ tamajitaṃ yudhi || 10 ||
[Analyze grammar]

ugradhanvānamugreṣuṃ vartamānaṃ rathottame |
pareṣāmuttamāṅgāni pracinvantaṃ śiteṣubhiḥ || 11 ||
[Analyze grammar]

pāṇḍavānāṃ mahatsainyaṃ yaṃ dṛṣṭvodyantamāhave |
kālāgnimiva durdharṣaṃ samaveṣṭata nityaśaḥ || 12 ||
[Analyze grammar]

parikṛṣya sa senāṃ me daśarātramanīkahā |
jagāmāstamivādityaḥ kṛtvā karma suduṣkaram || 13 ||
[Analyze grammar]

yaḥ sa śakra ivākṣayyaṃ varṣaṃ śaramayaṃ sṛjan |
jaghāna yudhi yodhānāmarbudaṃ daśabhirdinaiḥ || 14 ||
[Analyze grammar]

sa śete niṣṭananbhūmau vātarugṇa iva drumaḥ |
mama durmantritenāsau yathā nārhaḥ sa bhārataḥ || 15 ||
[Analyze grammar]

kathaṃ śāṃtanavaṃ dṛṣṭvā pāṇḍavānāmanīkinī |
prahartumaśakattatra bhīṣmaṃ bhīmaparākramam || 16 ||
[Analyze grammar]

kathaṃ bhīṣmeṇa saṃgrāmamakurvanpāṇḍunandanāḥ |
kathaṃ ca nājayadbhīṣmo droṇe jīvati saṃjaya || 17 ||
[Analyze grammar]

kṛpe saṃnihite tatra bharadvājātmaje tathā |
bhīṣmaḥ praharatāṃ śreṣṭhaḥ kathaṃ sa nidhanaṃ gataḥ || 18 ||
[Analyze grammar]

kathaṃ cātirathastena pāñcālyena śikhaṇḍinā |
bhīṣmo vinihato yuddhe devairapi durutsahaḥ || 19 ||
[Analyze grammar]

yaḥ spardhate raṇe nityaṃ jāmadagnyaṃ mahābalam |
ajitaṃ jāmadagnyena śakratulyaparākramam || 20 ||
[Analyze grammar]

taṃ hataṃ samare bhīṣmaṃ mahārathabalocitam |
saṃjayācakṣva me vīraṃ yena śarma na vidmahe || 21 ||
[Analyze grammar]

māmakāḥ ke maheṣvāsā nājahuḥ saṃjayācyutam |
duryodhanasamādiṣṭāḥ ke vīrāḥ paryavārayan || 22 ||
[Analyze grammar]

yacchikhaṇḍimukhāḥ sarve pāṇḍavā bhīṣmamabhyayuḥ |
kaccinna kuravo bhītāstatyajuḥ saṃjayācyutam || 23 ||
[Analyze grammar]

maurvīghoṣastanayitnuḥ pṛṣatkapṛṣato mahān |
dhanurhrādamahāśabdo mahāmegha ivonnataḥ || 24 ||
[Analyze grammar]

yadabhyavarṣatkaunteyānsapāñcālānsasṛñjayān |
nighnanpararathānvīro dānavāniva vajrabhṛt || 25 ||
[Analyze grammar]

iṣvastrasāgaraṃ ghoraṃ bāṇagrāhaṃ durāsadam |
kārmukormiṇamakṣayyamadvīpaṃ samare'plavam |
gadāsimakarāvartaṃ hayagrāhaṃ gajākulam || 26 ||
[Analyze grammar]

hayāngajānpadātāṃśca rathāṃśca tarasā bahūn |
nimajjayantaṃ samare paravīrāpahāriṇam || 27 ||
[Analyze grammar]

vidahyamānaṃ kopena tejasā ca paraṃtapam |
veleva makarāvāsaṃ ke vīrāḥ paryavārayan || 28 ||
[Analyze grammar]

bhīṣmo yadakarotkarma samare saṃjayārihā |
duryodhanahitārthāya ke tadāsya puro'bhavan || 29 ||
[Analyze grammar]

ke'rakṣandakṣiṇaṃ cakraṃ bhīṣmasyāmitatejasaḥ |
pṛṣṭhataḥ ke parānvīrā upāsedhanyatavratāḥ || 30 ||
[Analyze grammar]

ke purastādavartanta rakṣanto bhīṣmamantike |
ke'rakṣannuttaraṃ cakraṃ vīrā vīrasya yudhyataḥ || 31 ||
[Analyze grammar]

vāme cakre vartamānāḥ ke'ghnansaṃjaya sṛñjayān |
sametāgramanīkeṣu ke'bhyarakṣandurāsadam || 32 ||
[Analyze grammar]

pārśvataḥ ke'bhyavartanta gacchanto durgamāṃ gatim |
samūhe ke parānvīrānpratyayudhyanta saṃjaya || 33 ||
[Analyze grammar]

rakṣyamāṇaḥ kathaṃ vīrairgopyamānāśca tena te |
durjayānāmanīkāni nājayaṃstarasā yudhi || 34 ||
[Analyze grammar]

sarvalokeśvarasyeva parameṣṭhiprajāpateḥ |
kathaṃ prahartumapi te śekuḥ saṃjaya pāṇḍavāḥ || 35 ||
[Analyze grammar]

yasmindvīpe samāśritya yudhyanti kuravaḥ paraiḥ |
taṃ nimagnaṃ naravyāghraṃ bhīṣmaṃ śaṃsasi saṃjaya || 36 ||
[Analyze grammar]

yasya vīrye samāśvasya mama putro bṛhadbalaḥ |
na pāṇḍavānagaṇayatkathaṃ sa nihataḥ paraiḥ || 37 ||
[Analyze grammar]

yaḥ purā vibudhaiḥ sendraiḥ sāhāyye yuddhadurmadaḥ |
kāṅkṣito dānavānghnadbhiḥ pitā mama mahāvrataḥ || 38 ||
[Analyze grammar]

yasmiñjāte mahāvīrye śaṃtanurlokaśaṃkare |
śokaṃ duḥkhaṃ ca dainyaṃ ca prājahātputralakṣmaṇi || 39 ||
[Analyze grammar]

prajñā parāyaṇaṃ tajjñaṃ saddharmanirataṃ śucim |
vedavedāṅgatattvajñaṃ kathaṃ śaṃsasi me hatam || 40 ||
[Analyze grammar]

sarvāstravinayopetaṃ dāntaṃ śāntaṃ manasvinam |
hataṃ śāṃtanavaṃ śrutvā manye śeṣaṃ balaṃ hatam || 41 ||
[Analyze grammar]

dharmādadharmo balavānsaṃprāpta iti me matiḥ |
yatra vṛddhaṃ guruṃ hatvā rājyamicchanti pāṇḍavāḥ || 42 ||
[Analyze grammar]

jāmadagnyaḥ purā rāmaḥ sarvāstravidanuttamaḥ |
ambārthamudyataḥ saṃkhye bhīṣmeṇa yudhi nirjitaḥ || 43 ||
[Analyze grammar]

tamindrasamakarmāṇaṃ kakudaṃ sarvadhanvinām |
hataṃ śaṃsasi bhīṣmaṃ me kiṃ nu duḥkhamataḥ param || 44 ||
[Analyze grammar]

asakṛtkṣatriyavrātāḥ saṃkhye yena vinirjitāḥ |
jāmadagnyastathā rāmaḥ paravīranighātinā || 45 ||
[Analyze grammar]

tasmānnūnaṃ mahāvīryādbhārgavādyuddhadurmadāt |
tejovīryabalairbhūyāñśikhaṇḍī drupadātmajaḥ || 46 ||
[Analyze grammar]

yaḥ śūraṃ kṛtinaṃ yuddhe sarvaśāstraviśāradam |
paramāstravidaṃ vīraṃ jaghāna bharatarṣabham || 47 ||
[Analyze grammar]

ke vīrāstamamitraghnamanvayuḥ śatrusaṃsadi |
śaṃsa me tadyathā vṛttaṃ yuddhaṃ bhīṣmasya pāṇḍavaiḥ || 48 ||
[Analyze grammar]

yoṣeva hatavīrā me senā putrasya saṃjaya |
agopamiva codbhrāntaṃ gokulaṃ tadbalaṃ mama || 49 ||
[Analyze grammar]

pauruṣaṃ sarvalokasya paraṃ yasya mahāhave |
parāsikte ca vastasminkathamāsīnmanastadā || 50 ||
[Analyze grammar]

jīvite'pyadya sāmarthyaṃ kimivāsmāsu saṃjaya |
ghātayitvā mahāvīryaṃ pitaraṃ lokadhārmikam || 51 ||
[Analyze grammar]

agādhe salile magnāṃ nāvaṃ dṛṣṭveva pāragāḥ |
bhīṣme hate bhṛśaṃ duḥkhānmanye śocanti putrakāḥ || 52 ||
[Analyze grammar]

adrisāramayaṃ nūnaṃ sudṛḍhaṃ hṛdayaṃ mama |
yacchrutvā puruṣavyāghraṃ hataṃ bhīṣmaṃ na dīryate || 53 ||
[Analyze grammar]

yasminnastraṃ ca medhā ca nītiśca bharatarṣabhe |
aprameyāṇi durdharṣe kathaṃ sa nihato yudhi || 54 ||
[Analyze grammar]

na cāstreṇa na śauryeṇa tapasā medhayā na ca |
na dhṛtyā na punastyāgānmṛtyoḥ kaścidvimucyate || 55 ||
[Analyze grammar]

kālo nūnaṃ mahāvīryaḥ sarvalokaduratyayaḥ |
yatra śāṃtanavaṃ bhīṣmaṃ hataṃ śaṃsasi saṃjaya || 56 ||
[Analyze grammar]

putraśokābhisaṃtapto mahadduḥkhamacintayan |
āśaṃse'haṃ purā trāṇaṃ bhīṣmācchaṃtanunandanāt || 57 ||
[Analyze grammar]

yadādityamivāpaśyatpatitaṃ bhuvi saṃjaya |
duryodhanaḥ śāṃtanavaṃ kiṃ tadā pratyapadyata || 58 ||
[Analyze grammar]

nāhaṃ sveṣāṃ pareṣāṃ vā buddhyā saṃjaya cintayan |
śeṣaṃ kiṃcitprapaśyāmi pratyanīke mahīkṣitām || 59 ||
[Analyze grammar]

dāruṇaḥ kṣatradharmo'yamṛṣibhiḥ saṃpradarśitaḥ |
yatra śāṃtanavaṃ hatvā rājyamicchanti pāṇḍavāḥ || 60 ||
[Analyze grammar]

vayaṃ vā rājyamicchāmo ghātayitvā pitāmaham |
kṣatradharme sthitāḥ pārthā nāparādhyanti putrakāḥ || 61 ||
[Analyze grammar]

etadāryeṇa kartavyaṃ kṛcchrāsvāpatsu saṃjaya |
parākramaḥ paraṃ śaktyā tacca tasminpratiṣṭhitam || 62 ||
[Analyze grammar]

anīkāni vinighnantaṃ hrīmantamaparājitam |
kathaṃ śāṃtanavaṃ tāta pāṇḍuputrā nyapātayan || 63 ||
[Analyze grammar]

kathaṃ yuktānyanīkāni kathaṃ yuddhaṃ mahātmabhiḥ |
kathaṃ vā nihato bhīṣmaḥ pitā saṃjaya me paraiḥ || 64 ||
[Analyze grammar]

duryodhanaśca karṇaśca śakuniścāpi saubalaḥ |
duḥśāsanaśca kitavo hate bhīṣme kimabruvan || 65 ||
[Analyze grammar]

yaccharīrairupastīrṇāṃ naravāraṇavājinām |
śaraśaktigadākhaḍgatomarākṣāṃ bhayāvahām || 66 ||
[Analyze grammar]

prāviśankitavā mandāḥ sabhāṃ yudhi durāsadām |
prāṇadyūte pratibhaye ke'dīvyanta nararṣabhāḥ || 67 ||
[Analyze grammar]

ke'jayanke jitāstatra hṛtalakṣā nipātitāḥ |
anye bhīṣmācchāṃtanavāttanmamācakṣva saṃjaya || 68 ||
[Analyze grammar]

na hi me śāntirastīha yudhi devavrataṃ hatam |
pitaraṃ bhīmakarmāṇaṃ śrutvā me duḥkhamāviśat || 69 ||
[Analyze grammar]

ārtiṃ me hṛdaye rūḍhāṃ mahatīṃ putrakāritām |
tvaṃ siñcansarpiṣevāgnimuddīpayasi saṃjaya || 70 ||
[Analyze grammar]

mahāntaṃ bhāramudyamya viśrutaṃ sārvalaukikam |
dṛṣṭvā vinihataṃ bhīṣmaṃ manye śocanti putrakāḥ || 71 ||
[Analyze grammar]

śroṣyāmi tāni duḥkhāni duryodhanakṛtānyaham |
tasmānme sarvamācakṣva yadvṛttaṃ tatra saṃjaya || 72 ||
[Analyze grammar]

saṃgrāme pṛthivīśānāṃ mandasyābuddhisaṃbhavam |
apanītaṃ sunītaṃ vā tanmamācakṣva saṃjaya || 73 ||
[Analyze grammar]

yatkṛtaṃ tatra bhīṣmeṇa saṃgrāme jayamicchatā |
tejoyuktaṃ kṛtāstreṇa śaṃsa taccāpyaśeṣataḥ || 74 ||
[Analyze grammar]

yathā tadabhavadyuddhaṃ kurupāṇḍavasenayoḥ |
krameṇa yena yasmiṃśca kāle yacca yathā ca tat || 75 ||
[Analyze grammar]