Chapter 16

saṃjaya uvāca |
tvadyukto'yamanupraśno mahārāja yathārhasi |
na tu duryodhane doṣamimamāsaktumarhasi || 1 ||
[Analyze grammar]

ya ātmano duścaritādaśubhaṃ prāpnuyānnaraḥ |
enasā tena nānyaṃ sa upāśaṅkitumarhati || 2 ||
[Analyze grammar]

mahārāja manuṣyeṣu nindyaṃ yaḥ sarvamācaret |
sa vadhyaḥ sarvalokasya ninditāni samācaran || 3 ||
[Analyze grammar]

nikāro nikṛtiprajñaiḥ pāṇḍavaistvatpratīkṣayā |
anubhūtaḥ sahāmātyaiḥ kṣāntaṃ ca suciraṃ vane || 4 ||
[Analyze grammar]

hayānāṃ ca gajānāṃ ca śūrāṇāṃ cāmitaujasām |
pratyakṣaṃ yanmayā dṛṣṭaṃ dṛṣṭaṃ yogabalena ca || 5 ||
[Analyze grammar]

śṛṇu tatpṛthivīpāla mā ca śoke manaḥ kṛthāḥ |
diṣṭametatpurā nūnamevaṃbhāvi narādhipa || 6 ||
[Analyze grammar]

namaskṛtvā pituste'haṃ pārāśaryāya dhīmate |
yasya prasādāddivyaṃ me prāptaṃ jñānamanuttamam || 7 ||
[Analyze grammar]

dṛṣṭiścātīndriyā rājandūrācchravaṇameva ca |
paracittasya vijñānamatītānāgatasya ca || 8 ||
[Analyze grammar]

vyutthitotpattivijñānamākāśe ca gatiḥ sadā |
śastrairasaṅgo yuddheṣu varadānānmahātmanaḥ || 9 ||
[Analyze grammar]

śṛṇu me vistareṇedaṃ vicitraṃ paramādbhutam |
bhāratānāṃ mahadyuddhaṃ yathābhūllomaharṣaṇam || 10 ||
[Analyze grammar]

teṣvanīkeṣu yatteṣu vyūḍheṣu ca vidhānataḥ |
duryodhano mahārāja duḥśāsanamathābravīt || 11 ||
[Analyze grammar]

duḥśāsana rathāstūrṇaṃ yujyantāṃ bhīṣmarakṣiṇaḥ |
anīkāni ca sarvāṇi śīghraṃ tvamanucodaya || 12 ||
[Analyze grammar]

ayaṃ mā samanuprāpto varṣapūgābhicintitaḥ |
pāṇḍavānāṃ sasainyānāṃ kurūṇāṃ ca samāgamaḥ || 13 ||
[Analyze grammar]

nātaḥ kāryatamaṃ manye raṇe bhīṣmasya rakṣaṇāt |
hanyādgupto hyasau pārthānsomakāṃśca sasṛñjayān || 14 ||
[Analyze grammar]

abravīcca viśuddhātmā nāhaṃ hanyāṃ śikhaṇḍinam |
śrūyate strī hyasau pūrvaṃ tasmādvarjyo raṇe mama || 15 ||
[Analyze grammar]

tasmādbhīṣmo rakṣitavyo viśeṣeṇeti me matiḥ |
śikhaṇḍino vadhe yattāḥ sarve tiṣṭhantu māmakāḥ || 16 ||
[Analyze grammar]

tathā prācyāḥ pratīcyāśca dākṣiṇātyottarāpathāḥ |
sarvaśastrāstrakuśalāste rakṣantu pitāmaham || 17 ||
[Analyze grammar]

arakṣyamāṇaṃ hi vṛko hanyātsiṃhaṃ mahābalam |
mā siṃhaṃ jambukeneva ghātayāmaḥ śikhaṇḍinā || 18 ||
[Analyze grammar]

vāmaṃ cakraṃ yudhāmanyuruttamaujāśca dakṣiṇam |
goptārau phalgunasyaitau phalguno'pi śikhaṇḍinaḥ || 19 ||
[Analyze grammar]

saṃrakṣyamāṇaḥ pārthena bhīṣmeṇa ca vivarjitaḥ |
yathā na hanyādgāṅgeyaṃ duḥśāsana tathā kuru || 20 ||
[Analyze grammar]

tato rajanyāṃ vyuṣṭāyāṃ śabdaḥ samabhavanmahān |
krośatāṃ bhūmipālānāṃ yujyatāṃ yujyatāmiti || 21 ||
[Analyze grammar]

śaṅkhadundubhinirghoṣaiḥ siṃhanādaiśca bhārata |
hayaheṣitaśabdaiśca rathanemisvanaistathā || 22 ||
[Analyze grammar]

gajānāṃ bṛṃhatāṃ caiva yodhānāṃ cābhigarjatām |
kṣveḍitāsphoṭitotkruṣṭaistumulaṃ sarvato'bhavat || 23 ||
[Analyze grammar]

udatiṣṭhanmahārāja sarvaṃ yuktamaśeṣataḥ |
sūryodaye mahatsainyaṃ kurupāṇḍavasenayoḥ |
tava rājendra putrāṇāṃ pāṇḍavānāṃ tathaiva ca || 24 ||
[Analyze grammar]

tatra nāgā rathāścaiva jāmbūnadapariṣkṛtāḥ |
vibhrājamānā dṛśyante meghā iva savidyutaḥ || 25 ||
[Analyze grammar]

rathānīkānyadṛśyanta nagarāṇīva bhūriśaḥ |
atīva śuśubhe tatra pitā te pūrṇacandravat || 26 ||
[Analyze grammar]

dhanurbhirṛṣṭibhiḥ khaḍgairgadābhiḥ śaktitomaraiḥ |
yodhāḥ praharaṇaiḥ śubhraiḥ sveṣvanīkeṣvavasthitāḥ || 27 ||
[Analyze grammar]

gajā rathāḥ padātāśca turagāśca viśāṃ pate |
vyatiṣṭhanvāgurākārāḥ śataśo'tha sahasraśaḥ || 28 ||
[Analyze grammar]

dhvajā bahuvidhākārā vyadṛśyanta samucchritāḥ |
sveṣāṃ caiva pareṣāṃ ca dyutimantaḥ sahasraśaḥ || 29 ||
[Analyze grammar]

kāñcanā maṇicitrāṅgā jvalanta iva pāvakāḥ |
arciṣmanto vyarocanta dhvajā rājñāṃ sahasraśaḥ || 30 ||
[Analyze grammar]

mahendraketavaḥ śubhrā mahendrasadaneṣviva |
saṃnaddhāsteṣu te vīrā dadṛśuryuddhakāṅkṣiṇaḥ || 31 ||
[Analyze grammar]

udyatairāyudhaiścitrāstalabaddhāḥ kalāpinaḥ |
ṛṣabhākṣā manuṣyendrāścamūmukhagatā babhuḥ || 32 ||
[Analyze grammar]

śakuniḥ saubalaḥ śalyaḥ saindhavo'tha jayadrathaḥ |
vindānuvindāvāvantyau kāmbojaśca sudakṣiṇaḥ || 33 ||
[Analyze grammar]

śrutāyudhaśca kāliṅgo jayatsenaśca pārthivaḥ |
bṛhadbalaśca kauśalyaḥ kṛtavarmā ca sātvataḥ || 34 ||
[Analyze grammar]

daśaite puruṣavyāghrāḥ śūrāḥ parighabāhavaḥ |
akṣauhiṇīnāṃ patayo yajvāno bhūridakṣiṇāḥ || 35 ||
[Analyze grammar]

ete cānye ca bahavo duryodhanavaśānugāḥ |
rājāno rājaputrāśca nītimanto mahābalāḥ || 36 ||
[Analyze grammar]

saṃnaddhāḥ samadṛśyanta sveṣvanīkeṣvavasthitāḥ |
baddhakṛṣṇājināḥ sarve dhvajino muñjamālinaḥ || 37 ||
[Analyze grammar]

sṛṣṭā duryodhanasyārthe brahmalokāya dīkṣitāḥ |
samṛddhā daśa vāhinyaḥ parigṛhya vyavasthitāḥ || 38 ||
[Analyze grammar]

ekādaśī dhārtarāṣṭrī kauravāṇāṃ mahācamūḥ |
agrataḥ sarvasainyānāṃ yatra śāṃtanavo'graṇīḥ || 39 ||
[Analyze grammar]

śvetoṣṇīṣaṃ śvetahayaṃ śvetavarmāṇamacyutam |
apaśyāma mahārāja bhīṣmaṃ candramivoditam || 40 ||
[Analyze grammar]

hematāladhvajaṃ bhīṣmaṃ rājate syandane sthitam |
śvetābhra iva tīkṣṇāṃśuṃ dadṛśuḥ kurupāṇḍavāḥ || 41 ||
[Analyze grammar]

dṛṣṭvā camūmukhe bhīṣmaṃ samakampanta pāṇḍavāḥ |
sṛñjayāśca maheṣvāsā dhṛṣṭadyumnapurogamāḥ || 42 ||
[Analyze grammar]

jṛmbhamāṇaṃ mahāsiṃhaṃ dṛṣṭvā kṣudramṛgā yathā |
dhṛṣṭadyumnamukhāḥ sarve samudvivijire muhuḥ || 43 ||
[Analyze grammar]

ekādaśaitāḥ śrījuṣṭā vāhinyastava bhārata |
pāṇḍavānāṃ tathā sapta mahāpuruṣapālitāḥ || 44 ||
[Analyze grammar]

unmattamakarāvartau mahāgrāhasamākulau |
yugānte samupetau dvau dṛśyete sāgarāviva || 45 ||
[Analyze grammar]

naiva nastādṛśo rājandṛṣṭapūrvo na ca śrutaḥ |
anīkānāṃ sametānāṃ samavāyastathāvidhaḥ || 46 ||
[Analyze grammar]