Chapter 127

vaiśaṃpāyana uvāca |
kṛṣṇasya vacanaṃ śrutvā dhṛtarāṣṭro janeśvaraḥ |
viduraṃ sarvadharmajñaṃ tvaramāṇo'bhyabhāṣata || 1 ||
[Analyze grammar]

gaccha tāta mahāprājñāṃ gāndhārīṃ dīrghadarśinīm |
ānayeha tayā sārdhamanuneṣyāmi durmatim || 2 ||
[Analyze grammar]

yadi sāpi durātmānaṃ śamayedduṣṭacetasam |
api kṛṣṇasya suhṛdastiṣṭhema vacane vayam || 3 ||
[Analyze grammar]

api lobhābhibhūtasya panthānamanudarśayet |
durbuddherduḥsahāyasya samarthaṃ bruvatī vacaḥ || 4 ||
[Analyze grammar]

api no vyasanaṃ ghoraṃ duryodhanakṛtaṃ mahat |
śamayeccirarātrāya yogakṣemavadavyayam || 5 ||
[Analyze grammar]

rājñastu vacanaṃ śrutvā viduro dīrghadarśinīm |
ānayāmāsa gāndhārīṃ dhṛtarāṣṭrasya śāsanāt || 6 ||
[Analyze grammar]

dhṛtarāṣṭra uvāca |
eṣa gāndhāri putraste durātmā śāsanātigaḥ |
aiśvaryalobhādaiśvaryaṃ jīvitaṃ ca prahāsyati || 7 ||
[Analyze grammar]

aśiṣṭavadamaryādaḥ pāpaiḥ saha durātmabhiḥ |
sabhāyā nirgato mūḍho vyatikramya suhṛdvacaḥ || 8 ||
[Analyze grammar]

vaiśaṃpāyana uvāca |
sā bharturvacanaṃ śrutvā rājaputrī yaśasvinī |
anvicchantī mahacchreyo gāndhārī vākyamabravīt || 9 ||
[Analyze grammar]

ānayeha sutaṃ kṣipraṃ rājyakāmukamāturam |
na hi rājyamaśiṣṭena śakyaṃ dharmārthalopinā || 10 ||
[Analyze grammar]

tvaṃ hyevātra bhṛśaṃ garhyo dhṛtarāṣṭra sutapriyaḥ |
yo jānanpāpatāmasya tatprajñāmanuvartase || 11 ||
[Analyze grammar]

sa eṣa kāmamanyubhyāṃ pralabdho mohamāsthitaḥ |
aśakyo'dya tvayā rājanvinivartayituṃ balāt || 12 ||
[Analyze grammar]

rājyapradāne mūḍhasya bāliśasya durātmanaḥ |
duḥsahāyasya lubdhasya dhṛtarāṣṭro'śnute phalam || 13 ||
[Analyze grammar]

kathaṃ hi svajane bhedamupekṣeta mahāmatiḥ |
bhinnaṃ hi svajanena tvāṃ prasahiṣyanti śatravaḥ || 14 ||
[Analyze grammar]

yā hi śakyā mahārāja sāmnā dānena vā punaḥ |
nistartumāpadaḥ sveṣu daṇḍaṃ kastatra pātayet || 15 ||
[Analyze grammar]

śāsanāddhṛtarāṣṭrasya duryodhanamamarṣaṇam |
mātuśca vacanātkṣattā sabhāṃ prāveśayatpunaḥ || 16 ||
[Analyze grammar]

sa māturvacanākāṅkṣī praviveśa sabhāṃ punaḥ |
abhitāmrekṣaṇaḥ krodhānniḥśvasanniva pannagaḥ || 17 ||
[Analyze grammar]

taṃ praviṣṭamabhiprekṣya putramutpathamāsthitam |
vigarhamāṇā gāndhārī samarthaṃ vākyamabravīt || 18 ||
[Analyze grammar]

duryodhana nibodhedaṃ vacanaṃ mama putraka |
hitaṃ te sānubandhasya tathāyatyāṃ sukhodayam || 19 ||
[Analyze grammar]

bhīṣmasya tu pituścaiva mama cāpacitiḥ kṛtā |
bhaveddroṇamukhānāṃ ca suhṛdāṃ śāmyatā tvayā || 20 ||
[Analyze grammar]

na hi rājyaṃ mahāprājña svena kāmena śakyate |
avāptuṃ rakṣituṃ vāpi bhoktuṃ vā bharatarṣabha || 21 ||
[Analyze grammar]

na hyavaśyendriyo rājyamaśnīyāddīrghamantaram |
vijitātmā tu medhāvī sa rājyamabhipālayet || 22 ||
[Analyze grammar]

kāmakrodhau hi puruṣamarthebhyo vyapakarṣataḥ |
tau tu śatrū vinirjitya rājā vijayate mahīm || 23 ||
[Analyze grammar]

lokeśvaraprabhutvaṃ hi mahadetaddurātmabhiḥ |
rājyaṃ nāmepsitaṃ sthānaṃ na śakyamabhirakṣitum || 24 ||
[Analyze grammar]

indriyāṇi mahatprepsurniyacchedarthadharmayoḥ |
indriyairniyatairbuddhirvardhate'gnirivendhanaiḥ || 25 ||
[Analyze grammar]

avidheyāni hīmāni vyāpādayitumapyalam |
avidheyā ivādāntā hayāḥ pathi kusārathim || 26 ||
[Analyze grammar]

avijitya ya ātmānamamātyānvijigīṣate |
ajitātmājitāmātyaḥ so'vaśaḥ parihīyate || 27 ||
[Analyze grammar]

ātmānameva prathamaṃ deśarūpeṇa yo jayet |
tato'mātyānamitrāṃśca na moghaṃ vijigīṣate || 28 ||
[Analyze grammar]

vaśyendriyaṃ jitāmātyaṃ dhṛtadaṇḍaṃ vikāriṣu |
parīkṣyakāriṇaṃ dhīramatyantaṃ śrīrniṣevate || 29 ||
[Analyze grammar]

kṣudrākṣeṇeva jālena jhaṣāvapihitāvubhau |
kāmakrodhau śarīrasthau prajñānaṃ tau vilumpataḥ || 30 ||
[Analyze grammar]

yābhyāṃ hi devāḥ svaryātuḥ svargasyāpidadhurmukham |
bibhyato'nuparāgasya kāmakrodhau sma vardhitau || 31 ||
[Analyze grammar]

kāmaṃ krodhaṃ ca lobhaṃ ca dambhaṃ darpaṃ ca bhūmipaḥ |
samyagvijetuṃ yo veda sa mahīmabhijāyate || 32 ||
[Analyze grammar]

satataṃ nigrahe yukta indriyāṇāṃ bhavennṛpaḥ |
īpsannarthaṃ ca dharmaṃ ca dviṣatāṃ ca parābhavam || 33 ||
[Analyze grammar]

kāmābhibhūtaḥ krodhādvā yo mithyā pratipadyate |
sveṣu cānyeṣu vā tasya na sahāyā bhavantyuta || 34 ||
[Analyze grammar]

ekībhūtairmahāprājñaiḥ śūrairarinibarhaṇaiḥ |
pāṇḍavaiḥ pṛthivīṃ tāta bhokṣyase sahitaḥ sukhī || 35 ||
[Analyze grammar]

yathā bhīṣmaḥ śāṃtanavo droṇaścāpi mahārathaḥ |
āhatustāta tatsatyamajeyau kṛṣṇapāṇḍavau || 36 ||
[Analyze grammar]

prapadyasva mahābāhuṃ kṛṣṇamakliṣṭakāriṇam |
prasanno hi sukhāya syādubhayoreva keśavaḥ || 37 ||
[Analyze grammar]

suhṛdāmarthakāmānāṃ yo na tiṣṭhati śāsane |
prājñānāṃ kṛtavidyānāṃ sa naraḥ śatrunandanaḥ || 38 ||
[Analyze grammar]

na yuddhe tāta kalyāṇaṃ na dharmārthau kutaḥ sukham |
na cāpi vijayo nityaṃ mā yuddhe ceta ādhithāḥ || 39 ||
[Analyze grammar]

bhīṣmeṇa hi mahāprājña pitrā te bāhlikena ca |
dattoṃ'śaḥ pāṇḍuputrāṇāṃ bhedādbhītairariṃdama || 40 ||
[Analyze grammar]

tasya caitatpradānasya phalamadyānupaśyasi |
yadbhuṅkṣe pṛthivīṃ sarvāṃ śūrairnihatakaṇṭakām || 41 ||
[Analyze grammar]

prayaccha pāṇḍuputrāṇāṃ yathocitamariṃdama |
yadīcchasi sahāmātyo bhoktumardhaṃ mahīkṣitām || 42 ||
[Analyze grammar]

alamardhaṃ pṛthivyāste sahāmātyasya jīvanam |
suhṛdāṃ vacane tiṣṭhanyaśaḥ prāpsyasi bhārata || 43 ||
[Analyze grammar]

śrīmadbhirātmavadbhirhi buddhimadbhirjitendriyaiḥ |
pāṇḍavairvigrahastāta bhraṃśayenmahataḥ sukhāt || 44 ||
[Analyze grammar]

nigṛhya suhṛdāṃ manyuṃ śādhi rājyaṃ yathocitam |
svamaṃśaṃ pāṇḍuputrebhyaḥ pradāya bharatarṣabha || 45 ||
[Analyze grammar]

alamahnā nikāro'yaṃ trayodaśa samāḥ kṛtaḥ |
śamayainaṃ mahāprājña kāmakrodhasamedhitam || 46 ||
[Analyze grammar]

na caiṣa śaktaḥ pārthānāṃ yastvadarthamabhīpsati |
sūtaputro dṛḍhakrodho bhrātā duḥśāsanaśca te || 47 ||
[Analyze grammar]

bhīṣme droṇe kṛpe karṇe bhīmasene dhanaṃjaye |
dhṛṣṭadyumne ca saṃkruddhe na syuḥ sarvāḥ prajā dhruvam || 48 ||
[Analyze grammar]

amarṣavaśamāpanno mā kurūṃstāta jīghanaḥ |
sarvā hi pṛthivī spṛṣṭā tvatpāṇḍavakṛte vadham || 49 ||
[Analyze grammar]

yacca tvaṃ manyase mūḍha bhīṣmadroṇakṛpādayaḥ |
yotsyante sarvaśaktyeti naitadadyopapadyate || 50 ||
[Analyze grammar]

samaṃ hi rājyaṃ prītiśca sthānaṃ ca vijitātmanām |
pāṇḍaveṣvatha yuṣmāsu dharmastvabhyadhikastataḥ || 51 ||
[Analyze grammar]

rājapiṇḍabhayādete yadi hāsyanti jīvitam |
na hi śakṣyanti rājānaṃ yudhiṣṭhiramudīkṣitum || 52 ||
[Analyze grammar]

na lobhādarthasaṃpattirnarāṇāmiha dṛśyate |
tadalaṃ tāta lobhena praśāmya bharatarṣabha || 53 ||
[Analyze grammar]