Chapter 126

vaiśaṃpāyana uvāca |
tataḥ prahasya dāśārhaḥ krodhaparyākulekṣaṇaḥ |
duryodhanamidaṃ vākyamabravītkurusaṃsadi || 1 ||
[Analyze grammar]

lapsyase vīraśayanaṃ kāmametadavāpsyasi |
sthiro bhava sahāmātyo vimardo bhavitā mahān || 2 ||
[Analyze grammar]

yaccaivaṃ manyase mūḍha na me kaścidvyatikramaḥ |
pāṇḍaveṣviti tatsarvaṃ nibodhata narādhipāḥ || 3 ||
[Analyze grammar]

śriyā saṃtapyamānena pāṇḍavānāṃ mahātmanām |
tvayā durmantritaṃ dyūtaṃ saubalena ca bhārata || 4 ||
[Analyze grammar]

kathaṃ ca jñātayastāta śreyāṃsaḥ sādhusaṃmatāḥ |
tathānyāyyamupasthātuṃ jihmenājihmacāriṇaḥ || 5 ||
[Analyze grammar]

akṣadyūtaṃ mahāprājña satāmaratināśanam |
asatāṃ tatra jāyante bhedāśca vyasanāni ca || 6 ||
[Analyze grammar]

tadidaṃ vyasanaṃ ghoraṃ tvayā dyūtamukhaṃ kṛtam |
asamīkṣya sadācāraiḥ sārdhaṃ pāpānubandhanaiḥ || 7 ||
[Analyze grammar]

kaścānyo jñātibhāryāṃ vai viprakartuṃ tathārhati |
ānīya ca sabhāṃ vaktuṃ yathoktā draupadī tvayā || 8 ||
[Analyze grammar]

kulīnā śīlasaṃpannā prāṇebhyo'pi garīyasī |
mahiṣī pāṇḍuputrāṇāṃ tathā vinikṛtā tvayā || 9 ||
[Analyze grammar]

jānanti kuravaḥ sarve yathoktāḥ kurusaṃsadi |
duḥśāsanena kaunteyāḥ pravrajantaḥ paraṃtapāḥ || 10 ||
[Analyze grammar]

samyagvṛtteṣvalubdheṣu satataṃ dharmacāriṣu |
sveṣu bandhuṣu kaḥ sādhuścaredevamasāṃpratam || 11 ||
[Analyze grammar]

nṛśaṃsānāmanāryāṇāṃ paruṣāṇāṃ ca bhāṣaṇam |
karṇaduḥśāsanābhyāṃ ca tvayā ca bahuśaḥ kṛtam || 12 ||
[Analyze grammar]

saha mātrā pradagdhuṃ tānbālakānvāraṇāvate |
āsthitaḥ paramaṃ yatnaṃ na samṛddhaṃ ca tattava || 13 ||
[Analyze grammar]

ūṣuśca suciraṃ kālaṃ pracchannāḥ pāṇḍavāstadā |
mātrā sahaikacakrāyāṃ brāhmaṇasya niveśane || 14 ||
[Analyze grammar]

viṣeṇa sarpabandhaiśca yatitāḥ pāṇḍavāstvayā |
sarvopāyairvināśāya na samṛddhaṃ ca tattava || 15 ||
[Analyze grammar]

evaṃbuddhiḥ pāṇḍaveṣu mithyāvṛttiḥ sadā bhavān |
kathaṃ te nāparādho'sti pāṇḍaveṣu mahātmasu || 16 ||
[Analyze grammar]

kṛtvā bahūnyakāryāṇi pāṇḍaveṣu nṛśaṃsavat |
mithyāvṛttiranāryaḥ sannadya vipratipadyase || 17 ||
[Analyze grammar]

mātāpitṛbhyāṃ bhīṣmeṇa droṇena vidureṇa ca |
śāmyeti muhurukto'si na ca śāmyasi pārthiva || 18 ||
[Analyze grammar]

śame hi sumahānarthastava pārthasya cobhayoḥ |
na ca rocayase rājankimanyadbuddhilāghavāt || 19 ||
[Analyze grammar]

na śarma prāpsyase rājannutkramya suhṛdāṃ vacaḥ |
adharmyamayaśasyaṃ ca kriyate pārthiva tvayā || 20 ||
[Analyze grammar]

evaṃ bruvati dāśārhe duryodhanamamarṣaṇam |
duḥśāsana idaṃ vākyamabravītkurusaṃsadi || 21 ||
[Analyze grammar]

na cetsaṃdhāsyase rājansvena kāmena pāṇḍavaiḥ |
baddhvā kila tvāṃ dāsyanti kuntīputrāya kauravāḥ || 22 ||
[Analyze grammar]

vaikartanaṃ tvāṃ ca māṃ ca trīnetānmanujarṣabha |
pāṇḍavebhyaḥ pradāsyanti bhīṣmo droṇaḥ pitā ca te || 23 ||
[Analyze grammar]

bhrāturetadvacaḥ śrutvā dhārtarāṣṭraḥ suyodhanaḥ |
kruddhaḥ prātiṣṭhatotthāya mahānāga iva śvasan || 24 ||
[Analyze grammar]

viduraṃ dhṛtarāṣṭraṃ ca mahārājaṃ ca bāhlikam |
kṛpaṃ ca somadattaṃ ca bhīṣmaṃ droṇaṃ janārdanam || 25 ||
[Analyze grammar]

sarvānetānanādṛtya durmatirnirapatrapaḥ |
aśiṣṭavadamaryādo mānī mānyāvamānitā || 26 ||
[Analyze grammar]

taṃ prasthitamabhiprekṣya bhrātaro manujarṣabham |
anujagmuḥ sahāmātyā rājānaścāpi sarvaśaḥ || 27 ||
[Analyze grammar]

sabhāyāmutthitaṃ kruddhaṃ prasthitaṃ bhrātṛbhiḥ saha |
duryodhanamabhiprekṣya bhīṣmaḥ śāṃtanavo'bravīt || 28 ||
[Analyze grammar]

dharmārthāvabhisaṃtyajya saṃrambhaṃ yo'numanyate |
hasanti vyasane tasya durhṛdo nacirādiva || 29 ||
[Analyze grammar]

durātmā rājaputro'yaṃ dhārtarāṣṭro'nupāyavit |
mithyābhimānī rājyasya krodhalobhavaśānugaḥ || 30 ||
[Analyze grammar]

kālapakvamidaṃ manye sarvakṣatraṃ janārdana |
sarve hyanusṛtā mohātpārthivāḥ saha mantribhiḥ || 31 ||
[Analyze grammar]

bhīṣmasyātha vacaḥ śrutvā dāśārhaḥ puṣkarekṣaṇaḥ |
bhīṣmadroṇamukhānsarvānabhyabhāṣata vīryavān || 32 ||
[Analyze grammar]

sarveṣāṃ kuruvṛddhānāṃ mahānayamatikramaḥ |
prasahya mandamaiśvarye na niyacchata yannṛpam || 33 ||
[Analyze grammar]

tatra kāryamahaṃ manye prāptakālamariṃdamāḥ |
kriyamāṇe bhavecchreyastatsarvaṃ śṛṇutānaghāḥ || 34 ||
[Analyze grammar]

pratyakṣametadbhavatāṃ yadvakṣyāmi hitaṃ vacaḥ |
bhavatāmānukūlyena yadi roceta bhāratāḥ || 35 ||
[Analyze grammar]

bhojarājasya vṛddhasya durācāro hyanātmavān |
jīvataḥ pituraiśvaryaṃ hṛtvā manyuvaśaṃ gataḥ || 36 ||
[Analyze grammar]

ugrasenasutaḥ kaṃsaḥ parityaktaḥ sa bāndhavaiḥ |
jñātīnāṃ hitakāmena mayā śasto mahāmṛdhe || 37 ||
[Analyze grammar]

āhukaḥ punarasmābhirjñātibhiścāpi satkṛtaḥ |
ugrasenaḥ kṛto rājā bhojarājanyavardhanaḥ || 38 ||
[Analyze grammar]

kaṃsamekaṃ parityajya kulārthe sarvayādavāḥ |
saṃbhūya sukhamedhante bhāratāndhakavṛṣṇayaḥ || 39 ||
[Analyze grammar]

api cāpyavadadrājanparameṣṭhī prajāpatiḥ |
vyūḍhe devāsure yuddhe'bhyudyateṣvāyudheṣu ca || 40 ||
[Analyze grammar]

dvaidhībhūteṣu lokeṣu vinaśyatsu ca bhārata |
abravītsṛṣṭimāndevo bhagavāṃllokabhāvanaḥ || 41 ||
[Analyze grammar]

parābhaviṣyantyasurā daiteyā dānavaiḥ saha |
ādityā vasavo rudrā bhaviṣyanti divaukasaḥ || 42 ||
[Analyze grammar]

devāsuramanuṣyāśca gandharvoragarākṣasāḥ |
asminyuddhe susaṃyattā haniṣyanti parasparam || 43 ||
[Analyze grammar]

iti matvābravīddharmaṃ parameṣṭhī prajāpatiḥ |
varuṇāya prayacchaitānbaddhvā daiteyadānavān || 44 ||
[Analyze grammar]

evamuktastato dharmo niyogātparameṣṭhinaḥ |
varuṇāya dadau sarvānbaddhvā daiteyadānavān || 45 ||
[Analyze grammar]

tānbaddhvā dharmapāśaiśca svaiśca pāśairjaleśvaraḥ |
varuṇaḥ sāgare yatto nityaṃ rakṣati dānavān || 46 ||
[Analyze grammar]

tathā duryodhanaṃ karṇaṃ śakuniṃ cāpi saubalam |
baddhvā duḥśāsanaṃ cāpi pāṇḍavebhyaḥ prayacchata || 47 ||
[Analyze grammar]

tyajetkulārthe puruṣaṃ grāmasyārthe kulaṃ tyajet |
grāmaṃ janapadasyārthe ātmārthe pṛthivīṃ tyajet || 48 ||
[Analyze grammar]

rājanduryodhanaṃ baddhvā tataḥ saṃśāmya pāṇḍavaiḥ |
tvatkṛte na vinaśyeyuḥ kṣatriyāḥ kṣatriyarṣabha || 49 ||
[Analyze grammar]