Chapter 128

vaiśaṃpāyana uvāca |
tattu vākyamanādṛtya so'rthavanmātṛbhāṣitam |
punaḥ pratasthe saṃrambhātsakāśamakṛtātmanām || 1 ||
[Analyze grammar]

tataḥ sabhāyā nirgamya mantrayāmāsa kauravaḥ |
saubalena matākṣeṇa rājñā śakuninā saha || 2 ||
[Analyze grammar]

duryodhanasya karṇasya śakuneḥ saubalasya ca |
duḥśāsanacaturthānāmidamāsīdviceṣṭitam || 3 ||
[Analyze grammar]

purāyamasmāngṛhṇāti kṣiprakārī janārdanaḥ |
sahito dhṛtarāṣṭreṇa rājñā śāṃtanavena ca || 4 ||
[Analyze grammar]

vayameva hṛṣīkeśaṃ nigṛhṇīma balādiva |
prasahya puruṣavyāghramindro vairocaniṃ yathā || 5 ||
[Analyze grammar]

śrutvā gṛhītaṃ vārṣṇeyaṃ pāṇḍavā hatacetasaḥ |
nirutsāhā bhaviṣyanti bhagnadaṃṣṭrā ivoragāḥ || 6 ||
[Analyze grammar]

ayaṃ hyeṣāṃ mahābāhuḥ sarveṣāṃ śarma varma ca |
asmingṛhīte varade ṛṣabhe sarvasātvatām |
nirudyamā bhaviṣyanti pāṇḍavāḥ somakaiḥ saha || 7 ||
[Analyze grammar]

tasmādvayamihaivainaṃ keśavaṃ kṣiprakāriṇam |
krośato dhṛtarāṣṭrasya baddhvā yotsyāmahe ripūn || 8 ||
[Analyze grammar]

teṣāṃ pāpamabhiprāyaṃ pāpānāṃ duṣṭacetasām |
iṅgitajñaḥ kaviḥ kṣipramanvabudhyata sātyakiḥ || 9 ||
[Analyze grammar]

tadarthamabhiniṣkramya hārdikyena sahāsthitaḥ |
abravītkṛtavarmāṇaṃ kṣipraṃ yojaya vāhinīm || 10 ||
[Analyze grammar]

vyūḍhānīkaḥ sabhādvāramupatiṣṭhasva daṃśitaḥ |
yāvadākhyāmyahaṃ caitatkṛṣṇāyākliṣṭakarmaṇe || 11 ||
[Analyze grammar]

sa praviśya sabhāṃ vīraḥ siṃho giriguhāmiva |
ācaṣṭa tamabhiprāyaṃ keśavāya mahātmane || 12 ||
[Analyze grammar]

dhṛtarāṣṭraṃ tataścaiva viduraṃ cānvabhāṣata |
teṣāmetamabhiprāyamācacakṣe smayanniva || 13 ||
[Analyze grammar]

dharmādapetamarthācca karma sādhuvigarhitam |
mandāḥ kartumihecchanti na cāvāpyaṃ kathaṃcana || 14 ||
[Analyze grammar]

purā vikurvate mūḍhāḥ pāpātmānaḥ samāgatāḥ |
dharṣitāḥ kāmamanyubhyāṃ krodhalobhavaśānugāḥ || 15 ||
[Analyze grammar]

imaṃ hi puṇḍarīkākṣaṃ jighṛkṣantyalpacetasaḥ |
paṭenāgniṃ prajvalitaṃ yathā bālā yathā jaḍāḥ || 16 ||
[Analyze grammar]

sātyakestadvacaḥ śrutvā viduro dīrghadarśivān |
dhṛtarāṣṭraṃ mahābāhumabravītkurusaṃsadi || 17 ||
[Analyze grammar]

rājanparītakālāste putrāḥ sarve paraṃtapa |
ayaśasyamaśakyaṃ ca karma kartuṃ samudyatāḥ || 18 ||
[Analyze grammar]

imaṃ hi puṇḍarīkākṣamabhibhūya prasahya ca |
nigrahītuṃ kilecchanti sahitā vāsavānujam || 19 ||
[Analyze grammar]

imaṃ puruṣaśārdūlamapradhṛṣyaṃ durāsadam |
āsādya na bhaviṣyanti pataṃgā iva pāvakam || 20 ||
[Analyze grammar]

ayamicchanhi tānsarvānyatamānāñjanārdanaḥ |
siṃho mṛgāniva kruddho gamayedyamasādanam || 21 ||
[Analyze grammar]

na tvayaṃ ninditaṃ karma kuryātkṛṣṇaḥ kathaṃcana |
na ca dharmādapakrāmedacyutaḥ puruṣottamaḥ || 22 ||
[Analyze grammar]

vidureṇaivamukte tu keśavo vākyamabravīt |
dhṛtarāṣṭramabhiprekṣya suhṛdāṃ śṛṇvatāṃ mithaḥ || 23 ||
[Analyze grammar]

rājannete yadi kruddhā māṃ nigṛhṇīyurojasā |
ete vā māmahaṃ vainānanujānīhi pārthiva || 24 ||
[Analyze grammar]

etānhi sarvānsaṃrabdhānniyantumahamutsahe |
na tvahaṃ ninditaṃ karma kuryāṃ pāpaṃ kathaṃcana || 25 ||
[Analyze grammar]

pāṇḍavārthe hi lubhyantaḥ svārthāddhāsyanti te sutāḥ |
ete cedevamicchanti kṛtakāryo yudhiṣṭhiraḥ || 26 ||
[Analyze grammar]

adyaiva hyahametāṃśca ye caitānanu bhārata |
nigṛhya rājanpārthebhyo dadyāṃ kiṃ duṣkṛtaṃ bhavet || 27 ||
[Analyze grammar]

idaṃ tu na pravarteyaṃ ninditaṃ karma bhārata |
saṃnidhau te mahārāja krodhajaṃ pāpabuddhijam || 28 ||
[Analyze grammar]

eṣa duryodhano rājanyathecchati tathāstu tat |
ahaṃ tu sarvānsamayānanujānāmi bhārata || 29 ||
[Analyze grammar]

etacchrutvā tu viduraṃ dhṛtarāṣṭro'bhyabhāṣata |
kṣipramānaya taṃ pāpaṃ rājyalubdhaṃ suyodhanam || 30 ||
[Analyze grammar]

sahamitraṃ sahāmātyaṃ sasodaryaṃ sahānugam |
śaknuyāṃ yadi panthānamavatārayituṃ punaḥ || 31 ||
[Analyze grammar]

tato duryodhanaṃ kṣattā punaḥ prāveśayatsabhām |
akāmaṃ bhrātṛbhiḥ sārdhaṃ rājabhiḥ parivāritam || 32 ||
[Analyze grammar]

atha duryodhanaṃ rājā dhṛtarāṣṭro'bhyabhāṣata |
karṇaduḥśāsanābhyāṃ ca rājabhiścābhisaṃvṛtam || 33 ||
[Analyze grammar]

nṛśaṃsa pāpabhūyiṣṭha kṣudrakarmasahāyavān |
pāpaiḥ sahāyaiḥ saṃhatya pāpaṃ karma cikīrṣasi || 34 ||
[Analyze grammar]

aśakyamayaśasyaṃ ca sadbhiścāpi vigarhitam |
yathā tvādṛśako mūḍho vyavasyetkulapāṃsanaḥ || 35 ||
[Analyze grammar]

tvamimaṃ puṇḍarīkākṣamapradhṛṣyaṃ durāsadam |
pāpaiḥ sahāyaiḥ saṃhatya nigrahītuṃ kilecchasi || 36 ||
[Analyze grammar]

yo na śakyo balātkartuṃ devairapi savāsavaiḥ |
taṃ tvaṃ prārthayase manda bālaścandramasaṃ yathā || 37 ||
[Analyze grammar]

devairmanuṣyairgandharvairasurairuragaiśca yaḥ |
na soḍhuṃ samare śakyastaṃ na budhyasi keśavam || 38 ||
[Analyze grammar]

durgrahaḥ pāṇinā vāyurduḥsparśaḥ pāṇinā śaśī |
durdharā pṛthivī mūrdhnā durgrahaḥ keśavo balāt || 39 ||
[Analyze grammar]

ityukte dhṛtarāṣṭreṇa kṣattāpi viduro'bravīt |
duryodhanamabhiprekṣya dhārtarāṣṭramamarṣaṇam || 40 ||
[Analyze grammar]

saubhadvāre vānarendro dvivido nāma nāmataḥ |
śilāvarṣeṇa mahatā chādayāmāsa keśavam || 41 ||
[Analyze grammar]

grahītukāmo vikramya sarvayatnena mādhavam |
grahītuṃ nāśakattatra taṃ tvaṃ prārthayase balāt || 42 ||
[Analyze grammar]

nirmocane ṣaṭsahasrāḥ pāśairbaddhvā mahāsurāḥ |
grahītuṃ nāśakaṃścainaṃ taṃ tvaṃ prārthayase balāt || 43 ||
[Analyze grammar]

prāgjyotiṣagataṃ śauriṃ narakaḥ saha dānavaiḥ |
grahītuṃ nāśakattatra taṃ tvaṃ prārthayase balāt || 44 ||
[Analyze grammar]

anena hi hatā bālye pūtanā śiśunā tathā |
govardhano dhāritaśca gavārthe bharatarṣabha || 45 ||
[Analyze grammar]

ariṣṭo dhenukaścaiva cāṇūraśca mahābalaḥ |
aśvarājaśca nihataḥ kaṃsaścāriṣṭamācaran || 46 ||
[Analyze grammar]

jarāsaṃdhaśca vakraśca śiśupālaśca vīryavān |
bāṇaśca nihataḥ saṃkhye rājānaśca niṣūditāḥ || 47 ||
[Analyze grammar]

varuṇo nirjito rājā pāvakaścāmitaujasā |
pārijātaṃ ca haratā jitaḥ sākṣācchacīpatiḥ || 48 ||
[Analyze grammar]

ekārṇave śayānena hatau tau madhukaiṭabhau |
janmāntaramupāgamya hayagrīvastathā hataḥ || 49 ||
[Analyze grammar]

ayaṃ kartā na kriyate kāraṇaṃ cāpi pauruṣe |
yadyadicchedayaṃ śauristattatkuryādayatnataḥ || 50 ||
[Analyze grammar]

taṃ na budhyasi govindaṃ ghoravikramamacyutam |
āśīviṣamiva kruddhaṃ tejorāśimanirjitam || 51 ||
[Analyze grammar]

pradharṣayanmahābāhuṃ kṛṣṇamakliṣṭakāriṇam |
pataṃgo'gnimivāsādya sāmātyo na bhaviṣyasi || 52 ||
[Analyze grammar]