Chapter 241

janamejaya uvāca |
vasamāneṣu pārtheṣu vane tasminmahātmasu |
dhārtarāṣṭrā maheṣvāsāḥ kimakurvanta sattama || 1 ||
[Analyze grammar]

karṇo vaikartanaścāpi śakuniśca mahābalaḥ |
bhīṣmadroṇakṛpāścaiva tanme śaṃsitumarhasi || 2 ||
[Analyze grammar]

vaiśaṃpāyana uvāca |
evaṃ gateṣu pārtheṣu visṛṣṭe ca suyodhane |
āgate hāstinapuraṃ mokṣite pāṇḍunandanaiḥ |
bhīṣmo'bravīnmahārāja dhārtarāṣṭramidaṃ vacaḥ || 3 ||
[Analyze grammar]

uktaṃ tāta mayā pūrvaṃ gacchataste tapovanam |
gamanaṃ me na rucitaṃ tava tanna kṛtaṃ ca te || 4 ||
[Analyze grammar]

tataḥ prāptaṃ tvayā vīra grahaṇaṃ śatrubhirbalāt |
mokṣitaścāsi dharmajñaiḥ pāṇḍavairna ca lajjase || 5 ||
[Analyze grammar]

pratyakṣaṃ tava gāndhāre sasainyasya viśāṃ pate |
sūtaputro'payādbhīto gandharvāṇāṃ tadā raṇāt |
krośatastava rājendra sasainyasya nṛpātmaja || 6 ||
[Analyze grammar]

dṛṣṭaste vikramaścaiva pāṇḍavānāṃ mahātmanām |
karṇasya ca mahābāho sūtaputrasya durmateḥ || 7 ||
[Analyze grammar]

na cāpi pādabhākkarṇaḥ pāṇḍavānāṃ nṛpottama |
dhanurvede ca śaurye ca dharme vā dharmavatsala || 8 ||
[Analyze grammar]

tasya te'haṃ kṣamaṃ manye pāṇḍavaistairmahātmabhiḥ |
saṃdhiṃ saṃdhividāṃ śreṣṭha kulasyāsya vivṛddhaye || 9 ||
[Analyze grammar]

evamuktastu bhīṣmeṇa dhārtarāṣṭro janeśvaraḥ |
prahasya sahasā rājanvipratasthe sasaubalaḥ || 10 ||
[Analyze grammar]

taṃ tu prasthitamājñāya karṇaduḥśāsanādayaḥ |
anujagmurmaheṣvāsā dhārtarāṣṭraṃ mahābalam || 11 ||
[Analyze grammar]

tāṃstu saṃprasthitāndṛṣṭvā bhīṣmaḥ kurupitāmahaḥ |
lajjayā vrīḍito rājañjagāma svaṃ niveśanam || 12 ||
[Analyze grammar]

gate bhīṣme mahārāja dhārtarāṣṭro janādhipaḥ |
punarāgamya taṃ deśamamantrayata mantribhiḥ || 13 ||
[Analyze grammar]

kimasmākaṃ bhavecchreyaḥ kiṃ kāryamavaśiṣyate |
kathaṃ nu sukṛtaṃ ca syānmantrayāmāsa bhārata || 14 ||
[Analyze grammar]

karṇa uvāca |
duryodhana nibodhedaṃ yattvā vakṣyāmi kaurava |
śrutvā ca tattathā sarvaṃ kartumarhasyariṃdama || 15 ||
[Analyze grammar]

tavādya pṛthivī vīra niḥsapatnā nṛpottama |
tāṃ pālaya yathā śakro hataśatrurmahāmanāḥ || 16 ||
[Analyze grammar]

vaiśaṃpāyana uvāca |
evamuktastu karṇena karṇaṃ rājābravītpunaḥ |
na kiṃciddurlabhaṃ tasya yasya tvaṃ puruṣarṣabha || 17 ||
[Analyze grammar]

sahāyaścānuraktaśca madarthaṃ ca samudyataḥ |
abhiprāyastu me kaścittaṃ vai śṛṇu yathātatham || 18 ||
[Analyze grammar]

rājasūyaṃ pāṇḍavasya dṛṣṭvā kratuvaraṃ tadā |
mama spṛhā samutpannā tāṃ saṃpādaya sūtaja || 19 ||
[Analyze grammar]

evamuktastataḥ karṇo rājānamidamabravīt |
tavādya pṛthivīpālā vaśyāḥ sarve nṛpottama || 20 ||
[Analyze grammar]

āhūyantāṃ dvijavarāḥ saṃbhārāśca yathāvidhi |
saṃbhriyantāṃ kuruśreṣṭha yajñopakaraṇāni ca || 21 ||
[Analyze grammar]

ṛtvijaśca samāhūtā yathoktaṃ vedapāragāḥ |
kriyāṃ kurvantu te rājanyathāśāstramariṃdama || 22 ||
[Analyze grammar]

bahvannapānasaṃyuktaḥ susamṛddhaguṇānvitaḥ |
pravartatāṃ mahāyajñastavāpi bharatarṣabha || 23 ||
[Analyze grammar]

evamuktastu karṇena dhārtarāṣṭro viśāṃ pate |
purohitaṃ samānāyya idaṃ vacanamabravīt || 24 ||
[Analyze grammar]

rājasūyaṃ kratuśreṣṭhaṃ samāptavaradakṣiṇam |
āhara tvaṃ mama kṛte yathānyāyaṃ yathākramam || 25 ||
[Analyze grammar]

sa evamukto nṛpatimuvāca dvijapuṃgavaḥ |
na sa śakyaḥ kratuśreṣṭho jīvamāne yudhiṣṭhire |
āhartuṃ kauravaśreṣṭha kule tava nṛpottama || 26 ||
[Analyze grammar]

dīrghāyurjīvati ca vai dhṛtarāṣṭraḥ pitā tava |
ataścāpi viruddhaste kratureṣa nṛpottama || 27 ||
[Analyze grammar]

asti tvanyanmahatsatraṃ rājasūyasamaṃ prabho |
tena tvaṃ yaja rājendra śṛṇu cedaṃ vaco mama || 28 ||
[Analyze grammar]

ya ime pṛthivīpālāḥ karadāstava pārthiva |
te karānsaṃprayacchantu suvarṇaṃ ca kṛtākṛtam || 29 ||
[Analyze grammar]

tena te kriyatāmadya lāṅgalaṃ nṛpasattama |
yajñavāṭasya te bhūmiḥ kṛṣyatāṃ tena bhārata || 30 ||
[Analyze grammar]

tatra yajño nṛpaśreṣṭha prabhūtānnaḥ susaṃskṛtaḥ |
pravartatāṃ yathānyāyaṃ sarvato hyanivāritaḥ || 31 ||
[Analyze grammar]

eṣa te vaiṣṇavo nāma yajñaḥ satpuruṣocitaḥ |
etena neṣṭavānkaścidṛte viṣṇuṃ purātanam || 32 ||
[Analyze grammar]

rājasūyaṃ kratuśreṣṭhaṃ spardhatyeṣa mahākratuḥ |
asmākaṃ rocate caiva śreyaśca tava bhārata |
avighnaśca bhavedeṣa saphalā syātspṛhā tava || 33 ||
[Analyze grammar]

evamuktastu tairviprairdhārtarāṣṭro mahīpatiḥ |
karṇaṃ ca saubalaṃ caiva bhrātṝṃścaivedamabravīt || 34 ||
[Analyze grammar]

rocate me vacaḥ kṛtsnaṃ brāhmaṇānāṃ na saṃśayaḥ |
rocate yadi yuṣmākaṃ tanmā prabrūta māciram || 35 ||
[Analyze grammar]

evamuktāstu te sarve tathetyūcurnarādhipam |
saṃdideśa tato rājā vyāpārasthānyathākramam || 36 ||
[Analyze grammar]

halasya karaṇe cāpi vyādiṣṭāḥ sarvaśilpinaḥ |
yathoktaṃ ca nṛpaśreṣṭha kṛtaṃ sarvaṃ yathākramam || 37 ||
[Analyze grammar]