Chapter 240

dānavā ūcuḥ |
bhoḥ suyodhana rājendra bharatānāṃ kulodvaha |
śūraiḥ parivṛto nityaṃ tathaiva ca mahātmabhiḥ || 1 ||
[Analyze grammar]

akārṣīḥ sāhasamidaṃ kasmātprāyopaveśanam |
ātmatyāgī hyavāgyāti vācyatāṃ cāyaśaskarīm || 2 ||
[Analyze grammar]

na hi kāryaviruddheṣu bahvapāyeṣu karmasu |
mūlaghātiṣu sajjante buddhimanto bhavadvidhāḥ || 3 ||
[Analyze grammar]

niyacchaitāṃ matiṃ rājandharmārthasukhanāśinīm |
yaśaḥpratāpadhairyaghnīṃ śatrūṇāṃ harṣavardhanīm || 4 ||
[Analyze grammar]

śrūyatāṃ ca prabho tattvaṃ divyatāṃ cātmano nṛpa |
nirmāṇaṃ ca śarīrasya tato dhairyamavāpnuhi || 5 ||
[Analyze grammar]

purā tvaṃ tapasāsmābhirlabdho devānmaheśvarāt |
pūrvakāyaśca sarvaste nirmito vajrasaṃcayaiḥ || 6 ||
[Analyze grammar]

astrairabhedyaḥ śastraiścāpyadhaḥkāyaśca te'nagha |
kṛtaḥ puṣpamayo devyā rūpataḥ strīmanoharaḥ || 7 ||
[Analyze grammar]

evamīśvarasaṃyuktastava deho nṛpottama |
devyā ca rājaśārdūla divyastvaṃ hi na mānuṣaḥ || 8 ||
[Analyze grammar]

kṣatriyāśca mahāvīryā bhagadattapurogamāḥ |
divyāstraviduṣaḥ śūrāḥ kṣapayiṣyanti te ripūn || 9 ||
[Analyze grammar]

tadalaṃ te viṣādena bhayaṃ tava na vidyate |
sāhyārthaṃ ca hi te vīrāḥ saṃbhūtā bhuvi dānavāḥ || 10 ||
[Analyze grammar]

bhīṣmadroṇakṛpādīṃśca pravekṣyantyapare'surāḥ |
yairāviṣṭā ghṛṇāṃ tyaktvā yotsyante tava vairibhiḥ || 11 ||
[Analyze grammar]

naiva putrānna ca bhrātṝnna pitṝnna ca bāndhavān |
naiva śiṣyānna ca jñātīnna bālānsthavirānna ca || 12 ||
[Analyze grammar]

yudhi saṃprahariṣyanto mokṣyanti kurusattama |
niḥsnehā dānavāviṣṭāḥ samākrānte'ntarātmani || 13 ||
[Analyze grammar]

prahariṣyanti bandhubhyaḥ snehamutsṛjya dūrataḥ |
hṛṣṭāḥ puruṣaśārdūlāḥ kaluṣīkṛtamānasāḥ |
avijñānavimūḍhāśca daivācca vidhinirmitāt || 14 ||
[Analyze grammar]

vyābhāṣamāṇāścānyonyaṃ na me jīvanvimokṣyase |
sarvaśastrāstramokṣeṇa pauruṣe samavasthitāḥ |
ślāghamānāḥ kuruśreṣṭha kariṣyanti janakṣayam || 15 ||
[Analyze grammar]

te'pi śaktyā mahātmānaḥ pratiyotsyanti pāṇḍavāḥ |
vadhaṃ caiṣāṃ kariṣyanti daivayuktā mahābalāḥ || 16 ||
[Analyze grammar]

daityarakṣogaṇāścāpi saṃbhūtāḥ kṣatrayoniṣu |
yotsyanti yudhi vikramya śatrubhistava pārthiva |
gadābhirmusalaiḥ khaḍgaiḥ śastrairuccāvacaistathā || 17 ||
[Analyze grammar]

yacca te'ntargataṃ vīra bhayamarjunasaṃbhavam |
tatrāpi vihito'smābhirvadhopāyo'rjunasya vai || 18 ||
[Analyze grammar]

hatasya narakasyātmā karṇamūrtimupāśritaḥ |
tadvairaṃ saṃsmaranvīra yotsyate keśavārjunau || 19 ||
[Analyze grammar]

sa te vikramaśauṇḍīro raṇe pārthaṃ vijeṣyati |
karṇaḥ praharatāṃ śreṣṭhaḥ sarvāṃścārīnmahārathaḥ || 20 ||
[Analyze grammar]

jñātvaitacchadmanā vajrī rakṣārthaṃ savyasācinaḥ |
kuṇḍale kavacaṃ caiva karṇasyāpahariṣyati || 21 ||
[Analyze grammar]

tasmādasmābhirapyatra daityāḥ śatasahasraśaḥ |
niyuktā rākṣasāścaiva ye te saṃśaptakā iti |
prakhyātāste'rjunaṃ vīraṃ nihaniṣyanti mā śucaḥ || 22 ||
[Analyze grammar]

asapatnā tvayā hīyaṃ bhoktavyā vasudhā nṛpa |
mā viṣādaṃ nayasvāsmānnaitattvayyupapadyate |
vinaṣṭe tvayi cāsmākaṃ pakṣo hīyeta kaurava || 23 ||
[Analyze grammar]

gaccha vīra na te buddhiranyā kāryā kathaṃcana |
tvamasmākaṃ gatirnityaṃ devatānāṃ ca pāṇḍavāḥ || 24 ||
[Analyze grammar]

vaiśaṃpāyana uvāca |
evamuktvā pariṣvajya daityāstaṃ rājakuñjaram |
samāśvāsya ca durdharṣaṃ putravaddānavarṣabhāḥ || 25 ||
[Analyze grammar]

sthirāṃ kṛtvā buddhimasya priyāṇyuktvā ca bhārata |
gamyatāmityanujñāya jayamāpnuhi cetyatha || 26 ||
[Analyze grammar]

tairvisṛṣṭaṃ mahābāhuṃ kṛtyā saivānayatpunaḥ |
tameva deśaṃ yatrāsau tadā prāyamupāviśat || 27 ||
[Analyze grammar]

pratinikṣipya taṃ vīraṃ kṛtyā samabhipūjya ca |
anujñātā ca rājñā sā tatraivāntaradhīyata || 28 ||
[Analyze grammar]

gatāyāmatha tasyāṃ tu rājā duryodhanastadā |
svapnabhūtamidaṃ sarvamacintayata bhārata |
vijeṣyāmi raṇe pāṇḍūniti tasyābhavanmatiḥ || 29 ||
[Analyze grammar]

karṇaṃ saṃśaptakāṃścaiva pārthasyāmitraghātinaḥ |
amanyata vadhe yuktānsamarthāṃśca suyodhanaḥ || 30 ||
[Analyze grammar]

evamāśā dṛḍhā tasya dhārtarāṣṭrasya durmateḥ |
vinirjaye pāṇḍavānāmabhavadbharatarṣabha || 31 ||
[Analyze grammar]

karṇo'pyāviṣṭacittātmā narakasyāntarātmanā |
arjunasya vadhe krūrāmakarotsa matiṃ tadā || 32 ||
[Analyze grammar]

saṃśaptakāśca te vīrā rākṣasāviṣṭacetasaḥ |
rajastamobhyāmākrāntāḥ phalgunasya vadhaiṣiṇaḥ || 33 ||
[Analyze grammar]

bhīṣmadroṇakṛpādyāśca dānavākrāntacetasaḥ |
na tathā pāṇḍuputrāṇāṃ snehavanto viśāṃ pate |
na cācacakṣe kasmaicidetadrājā suyodhanaḥ || 34 ||
[Analyze grammar]

duryodhanaṃ niśānte ca karṇo vaikartano'bravīt |
smayannivāñjaliṃ kṛtvā pārthivaṃ hetumadvacaḥ || 35 ||
[Analyze grammar]

na mṛto jayate śatrūñjīvanbhadrāṇi paśyati |
mṛtasya bhadrāṇi kutaḥ kauraveya kuto jayaḥ |
na kālo'dya viṣādasya bhayasya maraṇasya vā || 36 ||
[Analyze grammar]

pariṣvajyābravīccainaṃ bhujābhyāṃ sa mahābhujaḥ |
uttiṣṭha rājankiṃ śeṣe kasmācchocasi śatruhan |
śatrūnpratāpya vīryeṇa sa kathaṃ martumicchasi || 37 ||
[Analyze grammar]

atha vā te bhayaṃ jātaṃ dṛṣṭvārjunaparākramam |
satyaṃ te pratijānāmi vadhiṣyāmi raṇe'rjunam || 38 ||
[Analyze grammar]

gate trayodaśe varṣe satyenāyudhamālabhe |
ānayiṣyāmyahaṃ pārthānvaśaṃ tava janādhipa || 39 ||
[Analyze grammar]

evamuktastu karṇena daityānāṃ vacanāttathā |
praṇipātena cānyeṣāmudatiṣṭhatsuyodhanaḥ |
daityānāṃ tadvacaḥ śrutvā hṛdi kṛtvā sthirāṃ matim || 40 ||
[Analyze grammar]

tato manujaśārdūlo yojayāmāsa vāhinīm |
rathanāgāśvakalilāṃ padātijanasaṃkulām || 41 ||
[Analyze grammar]

gaṅgaughapratimā rājanprayātā sā mahācamūḥ |
śvetacchatraiḥ patākābhiścāmaraiśca supāṇḍuraiḥ || 42 ||
[Analyze grammar]

rathairnāgaiḥ padātaiśca śuśubhe'tīva saṃkulā |
vyapetābhraghane kāle dyaurivāvyaktaśāradī || 43 ||
[Analyze grammar]

jayāśīrbhirdvijendraistu stūyamāno'dhirājavat |
gṛhṇannañjalimālāśca dhārtarāṣṭro janādhipaḥ || 44 ||
[Analyze grammar]

suyodhano yayāvagre śriyā paramayā jvalan |
karṇena sārdhaṃ rājendra saubalena ca devinā || 45 ||
[Analyze grammar]

duḥśāsanādayaścāsya bhrātaraḥ sarva eva te |
bhūriśravāḥ somadatto mahārājaśca bāhlikaḥ || 46 ||
[Analyze grammar]

rathairnānāvidhākārairhayairgajavaraistathā |
prayāntaṃ nṛpasiṃhaṃ tamanujagmuḥ kurūdvahāḥ |
kālenālpena rājaṃste viviśuḥ svapuraṃ tadā || 47 ||
[Analyze grammar]