Chapter 164

arjuna uvāca |
tatastāmavasaṃ prīto rajanīṃ tatra bhārata |
prasādāddevadevasya tryambakasya mahātmanaḥ || 1 ||
[Analyze grammar]

vyuṣito rajanīṃ cāhaṃ kṛtvā pūrvāhṇikakriyām |
apaśyaṃ taṃ dvijaśreṣṭhaṃ dṛṣṭavānasmi yaṃ purā || 2 ||
[Analyze grammar]

tasmai cāhaṃ yathāvṛttaṃ sarvameva nyavedayam |
bhagavantaṃ mahādevaṃ sameto'smīti bhārata || 3 ||
[Analyze grammar]

sa māmuvāca rājendra prīyamāṇo dvijottamaḥ |
dṛṣṭastvayā mahādevo yathā nānyena kenacit || 4 ||
[Analyze grammar]

sametya lokapālaistu sarvairvaivasvatādibhiḥ |
draṣṭāsyanagha devendraṃ sa ca te'strāṇi dāsyati || 5 ||
[Analyze grammar]

evamuktvā sa māṃ rājannāśliṣya ca punaḥ punaḥ |
agacchatsa yathākāmaṃ brāhmaṇaḥ sūryasaṃnibhaḥ || 6 ||
[Analyze grammar]

athāparāhṇe tasyāhnaḥ prāvātpuṇyaḥ samīraṇaḥ |
punarnavamimaṃ lokaṃ kurvanniva sapatnahan || 7 ||
[Analyze grammar]

divyāni caiva mālyāni sugandhīni navāni ca |
śaiśirasya gireḥ pāde prādurāsansamīpataḥ || 8 ||
[Analyze grammar]

vāditrāṇi ca divyāni sughoṣāṇi samantataḥ |
stutayaścendrasaṃyuktā aśrūyanta manoharāḥ || 9 ||
[Analyze grammar]

gaṇāścāpsarasāṃ tatra gandharvāṇāṃ tathaiva ca |
purastāddevadevasya jagurgītāni sarvaśaḥ || 10 ||
[Analyze grammar]

marutāṃ ca gaṇāstatra devayānairupāgaman |
mahendrānucarā ye ca devasadmanivāsinaḥ || 11 ||
[Analyze grammar]

tato marutvānharibhiryuktairvāhaiḥ svalaṃkṛtaiḥ |
śacīsahāyastatrāyātsaha sarvaistadāmaraiḥ || 12 ||
[Analyze grammar]

etasminneva kāle tu kubero naravāhanaḥ |
darśayāmāsa māṃ rājaṃllakṣmyā paramayā yutaḥ || 13 ||
[Analyze grammar]

dakṣiṇasyāṃ diśi yamaṃ pratyapaśyaṃ vyavasthitam |
varuṇaṃ devarājaṃ ca yathāsthānamavasthitam || 14 ||
[Analyze grammar]

te māmūcurmahārāja sāntvayitvā surarṣabhāḥ |
savyasācinsamīkṣasva lokapālānavasthitān || 15 ||
[Analyze grammar]

surakāryārthasiddhyarthaṃ dṛṣṭavānasi śaṃkaram |
asmatto'pi gṛhāṇa tvamastrāṇīti samantataḥ || 16 ||
[Analyze grammar]

tato'haṃ prayato bhūtvā praṇipatya surarṣabhān |
pratyagṛhṇaṃ tadāstrāṇi mahānti vidhivatprabho || 17 ||
[Analyze grammar]

gṛhītāstrastato devairanujñāto'smi bhārata |
atha devā yayuḥ sarve yathāgatamariṃdama || 18 ||
[Analyze grammar]

maghavānapi deveśo rathamāruhya suprabham |
uvāca bhagavānvākyaṃ smayanniva surārihā || 19 ||
[Analyze grammar]

puraivāgamanādasmādvedāhaṃ tvāṃ dhanaṃjaya |
ataḥ paraṃ tvahaṃ vai tvāṃ darśaye bharatarṣabha || 20 ||
[Analyze grammar]

tvayā hi tīrtheṣu purā samāplāvaḥ kṛto'sakṛt |
tapaścedaṃ purā taptaṃ svargaṃ gantāsi pāṇḍava || 21 ||
[Analyze grammar]

bhūyaścaiva tu taptavyaṃ tapaḥ paramadāruṇam |
uvāca bhagavānsarvaṃ tapasaścopapādanam || 22 ||
[Analyze grammar]

mātalirmanniyogāttvāṃ tridivaṃ prāpayiṣyati |
viditastvaṃ hi devānāmṛṣīṇāṃ ca mahātmanām || 23 ||
[Analyze grammar]

tato'hamabruvaṃ śakraṃ prasīda bhagavanmama |
ācāryaṃ varaye tvāhamastrārthaṃ tridaśeśvara || 24 ||
[Analyze grammar]

indra uvāca |
krūraṃ karmāstravittāta kariṣyasi paraṃtapa |
yadarthamastrāṇīpsustvaṃ taṃ kāmaṃ pāṇḍavāpnuhi || 25 ||
[Analyze grammar]

arjuna uvāca |
tato'hamabruvaṃ nāhaṃ divyānyastrāṇi śatruhan |
mānuṣeṣu prayokṣyāmi vināstrapratighātanam || 26 ||
[Analyze grammar]

tāni divyāni me'strāṇi prayaccha vibudhādhipa |
lokāṃścāstrajitānpaścāllabheyaṃ surapuṃgava || 27 ||
[Analyze grammar]

indra uvāca |
parīkṣārthaṃ mayaitatte vākyamuktaṃ dhanaṃjaya |
mamātmajasya vacanaṃ sūpapannamidaṃ tava || 28 ||
[Analyze grammar]

śikṣa me bhavanaṃ gatvā sarvāṇyastrāṇi bhārata |
vāyoragnervasubhyo'tha varuṇātsamarudgaṇāt || 29 ||
[Analyze grammar]

sādhyaṃ paitāmahaṃ caiva gandharvoragarakṣasām |
vaiṣṇavāni ca sarvāṇi nairṛtāni tathaiva ca |
madgatāni ca yānīha sarvāstrāṇi kurūdvaha || 30 ||
[Analyze grammar]

arjuna uvāca |
evamuktvā tu māṃ śakrastatraivāntaradhīyata |
athāpaśyaṃ hariyujaṃ rathamaindramupasthitam |
divyaṃ māyāmayaṃ puṇyaṃ yattaṃ mātalinā nṛpa || 31 ||
[Analyze grammar]

lokapāleṣu yāteṣu māmuvācātha mātaliḥ |
draṣṭumicchati śakrastvāṃ devarājo mahādyute || 32 ||
[Analyze grammar]

saṃsiddhastvaṃ mahābāho kuru kāryamanuttamam |
paśya puṇyakṛtāṃ lokānsaśarīro divaṃ vraja || 33 ||
[Analyze grammar]

ityukto'haṃ mātalinā girimāmantrya śaiśiram |
pradakṣiṇamupāvṛtya samārohaṃ rathottamam || 34 ||
[Analyze grammar]

codayāmāsa sa hayānmanomārutaraṃhasaḥ |
mātalirhayaśāstrajño yathāvadbhūridakṣiṇaḥ || 35 ||
[Analyze grammar]

avaikṣata ca me vaktraṃ sthitasyātha sa sārathiḥ |
tathā bhrānte rathe rājanvismitaścedamabravīt || 36 ||
[Analyze grammar]

atyadbhutamidaṃ me'dya vicitraṃ pratibhāti mām |
yadāsthito rathaṃ divyaṃ padā na calito bhavān || 37 ||
[Analyze grammar]

devarājo'pi hi mayā nityamatropalakṣitaḥ |
vicalanprathamotpāte hayānāṃ bharatarṣabha || 38 ||
[Analyze grammar]

tvaṃ punaḥ sthita evātra rathe bhrānte kurūdvaha |
atiśakramidaṃ sattvaṃ taveti pratibhāti me || 39 ||
[Analyze grammar]

ityuktvākāśamāviśya mātalirvibudhālayān |
darśayāmāsa me rājanvimānāni ca bhārata || 40 ||
[Analyze grammar]

nandanādīni devānāṃ vanāni bahulānyuta |
darśayāmāsa me prītyā mātaliḥ śakrasārathiḥ || 41 ||
[Analyze grammar]

tataḥ śakrasya bhavanamapaśyamamarāvatīm |
divyaiḥ kāmaphalairvṛkṣai ratnaiśca samalaṃkṛtām || 42 ||
[Analyze grammar]

na tāṃ bhāsayate sūryo na śītoṣṇe na ca klamaḥ |
rajaḥ paṅko na ca tamastatrāsti na jarā nṛpa || 43 ||
[Analyze grammar]

na tatra śoko dainyaṃ vā vaivarṇyaṃ copalakṣyate |
divaukasāṃ mahārāja na ca glānirariṃdama || 44 ||
[Analyze grammar]

na krodhalobhau tatrāstāmaśubhaṃ ca viśāṃ pate |
nityatuṣṭāśca hṛṣṭāśca prāṇinaḥ suraveśmani || 45 ||
[Analyze grammar]

nityapuṣpaphalāstatra pādapā haritacchadāḥ |
puṣkariṇyaśca vividhāḥ padmasaugandhikāyutāḥ || 46 ||
[Analyze grammar]

śītastatra vavau vāyuḥ sugandho jīvanaḥ śuciḥ |
sarvaratnavicitrā ca bhūmiḥ puṣpavibhūṣitā || 47 ||
[Analyze grammar]

mṛgadvijāśca bahavo rucirā madhurasvarāḥ |
vimānayāyinaścātra dṛśyante bahavo'marāḥ || 48 ||
[Analyze grammar]

tato'paśyaṃ vasūnrudrānsādhyāṃśca samarudgaṇān |
ādityānaśvinau caiva tānsarvānpratyapūjayam || 49 ||
[Analyze grammar]

te māṃ vīryeṇa yaśasā tejasā ca balena ca |
astraiścāpyanvajānanta saṃgrāmavijayena ca || 50 ||
[Analyze grammar]

praviśya tāṃ purīṃ ramyāṃ devagandharvasevitām |
devarājaṃ sahasrākṣamupātiṣṭhaṃ kṛtāñjaliḥ || 51 ||
[Analyze grammar]

dadāvardhāsanaṃ prītaḥ śakro me dadatāṃ varaḥ |
bahumānācca gātrāṇi pasparśa mama vāsavaḥ || 52 ||
[Analyze grammar]

tatrāhaṃ devagandharvaiḥ sahito bhūridakṣiṇa |
astrārthamavasaṃ svarge kurvāṇo'strāṇi bhārata || 53 ||
[Analyze grammar]

viśvāvasośca me putraścitraseno'bhavatsakhā |
sa ca gāndharvamakhilaṃ grāhayāmāsa māṃ nṛpa || 54 ||
[Analyze grammar]

tato'hamavasaṃ rājangṛhītāstraḥ supūjitaḥ |
sukhaṃ śakrasya bhavane sarvakāmasamanvitaḥ || 55 ||
[Analyze grammar]

śṛṇvanvai gītaśabdaṃ ca tūryaśabdaṃ ca puṣkalam |
paśyaṃścāpsarasaḥ śreṣṭhā nṛtyamānāḥ paraṃtapa || 56 ||
[Analyze grammar]

tatsarvamanavajñāya tathyaṃ vijjñāya bhārata |
atyarthaṃ pratigṛhyāhamastreṣveva vyavasthitaḥ || 57 ||
[Analyze grammar]

tato'tuṣyatsahasrākṣastena kāmena me vibhuḥ |
evaṃ me vasato rājanneṣa kālo'tyagāddivi || 58 ||
[Analyze grammar]