Chapter 163

vaiśaṃpāyana uvāca |
yathāgataṃ gate śakre bhrātṛbhiḥ saha saṃgataḥ |
kṛṣṇayā caiva bībhatsurdharmaputramapūjayat || 1 ||
[Analyze grammar]

abhivādayamānaṃ tu mūrdhnyupāghrāya pāṇḍavam |
harṣagadgadayā vācā prahṛṣṭo'rjunamabravīt || 2 ||
[Analyze grammar]

kathamarjuna kālo'yaṃ svarge vyatigatastava |
kathaṃ cāstrāṇyavāptāni devarājaśca toṣitaḥ || 3 ||
[Analyze grammar]

samyagvā te gṛhītāni kaccidastrāṇi bhārata |
kaccitsurādhipaḥ prīto rudraścāstrāṇyadāttava || 4 ||
[Analyze grammar]

yathā dṛṣṭaśca te śakro bhagavānvā pinākadhṛk |
yathā cāstrāṇyavāptāni yathā cārādhitaśca te || 5 ||
[Analyze grammar]

yathoktavāṃstvāṃ bhagavāñśatakraturariṃdama |
kṛtapriyastvayāsmīti tacca te kiṃ priyaṃ kṛtam |
etadicchāmyahaṃ śrotuṃ vistareṇa mahādyute || 6 ||
[Analyze grammar]

yathā tuṣṭo mahādevo devarājaśca te'nagha |
yaccāpi vajrapāṇeste priyaṃ kṛtamariṃdama |
etadākhyāhi me sarvamakhilena dhanaṃjaya || 7 ||
[Analyze grammar]

arjuna uvāca |
śṛṇu hanta mahārāja vidhinā yena dṛṣṭavān |
śatakratumahaṃ devaṃ bhagavantaṃ ca śaṃkaram || 8 ||
[Analyze grammar]

vidyāmadhītya tāṃ rājaṃstvayoktāmarimardana |
bhavatā ca samādiṣṭastapase prasthito vanam || 9 ||
[Analyze grammar]

bhṛgutuṅgamatho gatvā kāmyakādāsthitastapaḥ |
ekarātroṣitaḥ kaṃcidapaśyaṃ brāhmaṇaṃ pathi || 10 ||
[Analyze grammar]

sa māmapṛcchatkaunteya kvāsi gantā bravīhi me |
tasmā avitathaṃ sarvamabruvaṃ kurunandana || 11 ||
[Analyze grammar]

sa tathyaṃ mama tacchrutvā brāhmaṇo rājasattama |
apūjayata māṃ rājanprītimāṃścābhavanmayi || 12 ||
[Analyze grammar]

tato māmabravītprītastapa ātiṣṭha bhārata |
tapasvī nacireṇa tvaṃ drakṣyase vibudhādhipam || 13 ||
[Analyze grammar]

tato'haṃ vacanāttasya girimāruhya śaiśiram |
tapo'tapyaṃ mahārāja māsaṃ mūlaphalāśanaḥ || 14 ||
[Analyze grammar]

dvitīyaścāpi me māso jalaṃ bhakṣayato gataḥ |
nirāhārastṛtīye'tha māse pāṇḍavanandana || 15 ||
[Analyze grammar]

ūrdhvabāhuścaturthaṃ tu māsamasmi sthitastadā |
na ca me hīyate prāṇastadadbhutamivābhavat || 16 ||
[Analyze grammar]

caturthe samabhikrānte prathame divase gate |
varāhasaṃsthitaṃ bhūtaṃ matsamīpamupāgamat || 17 ||
[Analyze grammar]

nighnanprothena pṛthivīṃ vilikhaṃścaraṇairapi |
saṃmārjañjaṭhareṇorvīṃ vivartaṃśca muhurmuhuḥ || 18 ||
[Analyze grammar]

anu tasyāparaṃ bhūtaṃ mahatkairātasaṃsthitam |
dhanurbāṇāsimatprāptaṃ strīgaṇānugataṃ tadā || 19 ||
[Analyze grammar]

tato'haṃ dhanurādāya tathākṣayyau maheṣudhī |
atāḍayaṃ śareṇātha tadbhūtaṃ lomaharṣaṇam || 20 ||
[Analyze grammar]

yugapattatkirātaśca vikṛṣya balavaddhanuḥ |
abhyājaghne dṛḍhataraṃ kampayanniva me manaḥ || 21 ||
[Analyze grammar]

sa tu māmabravīdrājanmama pūrvaparigrahaḥ |
mṛgayādharmamutsṛjya kimarthaṃ tāḍitastvayā || 22 ||
[Analyze grammar]

eṣa te niśitairbāṇairdarpaṃ hanmi sthiro bhava |
sa varṣmavānmahākāyastato māmabhyadhāvata || 23 ||
[Analyze grammar]

tato girimivātyarthamāvṛṇonmāṃ mahāśaraiḥ |
taṃ cāhaṃ śaravarṣeṇa mahatā samavākiram || 24 ||
[Analyze grammar]

tataḥ śarairdīptamukhaiḥ patritairanumantritaiḥ |
pratyavidhyamahaṃ taṃ tu vajrairiva śiloccayam || 25 ||
[Analyze grammar]

tasya tacchatadhā rūpamabhavacca sahasradhā |
tāni cāsya śarīrāṇi śarairahamatāḍayam || 26 ||
[Analyze grammar]

punastāni śarīrāṇi ekībhūtāni bhārata |
adṛśyanta mahārāja tānyahaṃ vyadhamaṃ punaḥ || 27 ||
[Analyze grammar]

aṇurbṛhacchirā bhūtvā bṛhaccāṇuśirāḥ punaḥ |
ekībhūtastadā rājanso'bhyavartata māṃ yudhi || 28 ||
[Analyze grammar]

yadābhibhavituṃ bāṇairnaiva śaknomi taṃ raṇe |
tato'hamastramātiṣṭhaṃ vāyavyaṃ bharatarṣabha || 29 ||
[Analyze grammar]

na cainamaśakaṃ hantuṃ tadadbhutamivābhavat |
tasminpratihate cāstre vismayo me mahānabhūt || 30 ||
[Analyze grammar]

bhūyaścaiva mahārāja saviśeṣamahaṃ tataḥ |
astrapūgena mahatā raṇe bhūtamavākiram || 31 ||
[Analyze grammar]

sthūṇākarṇamayojālaṃ śaravarṣaṃ śarolbaṇam |
śailāstramaśmavarṣaṃ ca samāsthāyāhamabhyayām |
jagrāsa prahasaṃstāni sarvāṇyastrāṇi me'nagha || 32 ||
[Analyze grammar]

teṣu sarveṣu śānteṣu brahmāstramahamādiśam |
tataḥ prajvalitairbāṇaiḥ sarvataḥ sopacīyata |
upacīyamānaśca mayā mahāstreṇa vyavardhata || 33 ||
[Analyze grammar]

tataḥ saṃtāpito loko matprasūtena tejasā |
kṣaṇena hi diśaḥ khaṃ ca sarvato'bhividīpitam || 34 ||
[Analyze grammar]

tadapyastraṃ mahātejāḥ kṣaṇenaiva vyaśātayat |
brahmāstre tu hate rājanbhayaṃ māṃ mahadāviśat || 35 ||
[Analyze grammar]

tato'haṃ dhanurādāya tathākṣayyau maheṣudhī |
sahasābhyahanaṃ bhūtaṃ tānyapyastrāṇyabhakṣayat || 36 ||
[Analyze grammar]

hateṣvastreṣu sarveṣu bhakṣiteṣvāyudheṣu ca |
mama tasya ca bhūtasya bāhuyuddhamavartata || 37 ||
[Analyze grammar]

vyāyāmaṃ muṣṭibhiḥ kṛtvā talairapi samāhatau |
apātayacca tadbhūtaṃ niśceṣṭo hyagamaṃ mahīm || 38 ||
[Analyze grammar]

tataḥ prahasya tadbhūtaṃ tatraivāntaradhīyata |
saha strībhirmahārāja paśyato me'dbhutopamam || 39 ||
[Analyze grammar]

evaṃ kṛtvā sa bhagavāṃstato'nyadrūpamātmanaḥ |
divyameva mahārāja vasāno'dbhutamambaram || 40 ||
[Analyze grammar]

hitvā kirātarūpaṃ ca bhagavāṃstridaśeśvaraḥ |
svarūpaṃ divyamāsthāya tasthau tatra maheśvaraḥ || 41 ||
[Analyze grammar]

adṛśyata tataḥ sākṣādbhagavāngovṛṣadhvajaḥ |
umāsahāyo haridṛgbahurūpaḥ pinākadhṛk || 42 ||
[Analyze grammar]

sa māmabhyetya samare tathaivābhimukhaṃ sthitam |
śūlapāṇirathovāca tuṣṭo'smīti paraṃtapa || 43 ||
[Analyze grammar]

tatastaddhanurādāya tūṇau cākṣayyasāyakau |
prādānmamaiva bhagavānvarayasveti cābravīt || 44 ||
[Analyze grammar]

tuṣṭo'smi tava kaunteya brūhi kiṃ karavāṇi te |
yatte manogataṃ vīra tadbrūhi vitarāmyaham |
amaratvamapāhāya brūhi yatte manogatam || 45 ||
[Analyze grammar]

tataḥ prāñjalirevāhamastreṣu gatamānasaḥ |
praṇamya śirasā śarvaṃ tato vacanamādade || 46 ||
[Analyze grammar]

bhagavānme prasannaścedīpsito'yaṃ varo mama |
astrāṇīcchāmyahaṃ jñātuṃ yāni deveṣu kānicit |
dadānītyeva bhagavānabravīttryambakaśca mām || 47 ||
[Analyze grammar]

raudramastraṃ madīyaṃ tvāmupasthāsyati pāṇḍava |
pradadau ca mama prītaḥ so'straṃ pāśupataṃ prabhuḥ || 48 ||
[Analyze grammar]

uvāca ca mahādevo dattvā me'straṃ sanātanam |
na prayojyaṃ bhavedetanmānuṣeṣu kathaṃcana || 49 ||
[Analyze grammar]

pīḍyamānena balavatprayojyaṃ te dhanaṃjaya |
astrāṇāṃ pratighāte ca sarvathaiva prayojayeḥ || 50 ||
[Analyze grammar]

tadapratihataṃ divyaṃ sarvāstrapratiṣedhanam |
mūrtimanme sthitaṃ pārśve prasanne govṛṣadhvaje || 51 ||
[Analyze grammar]

utsādanamamitrāṇāṃ parasenānikartanam |
durāsadaṃ duṣprahasaṃ suradānavarākṣasaiḥ || 52 ||
[Analyze grammar]

anujñātastvahaṃ tena tatraiva samupāviśam |
prekṣataścaiva me devastatraivāntaradhīyata || 53 ||
[Analyze grammar]