Chapter 123

vaiśaṃpāyana uvāca |
arjunastu paraṃ yatnamātasthe gurupūjane |
astre ca paramaṃ yogaṃ priyo droṇasya cābhavat || 1 ||
[Analyze grammar]

droṇena tu tadāhūya rahasyukto'nnasādhakaḥ |
andhakāre'rjunāyānnaṃ na deyaṃ te kathaṃcana || 2 ||
[Analyze grammar]

tataḥ kadācidbhuñjāne pravavau vāyurarjune |
tena tatra pradīpaḥ sa dīpyamāno nivāpitaḥ || 3 ||
[Analyze grammar]

bhuṅkta evārjuno bhaktaṃ na cāsyāsyādvyamuhyata |
hastastejasvino nityamannagrahaṇakāraṇāt |
tadabhyāsakṛtaṃ matvā rātrāvabhyasta pāṇḍavaḥ || 4 ||
[Analyze grammar]

tasya jyātalanirghoṣaṃ droṇaḥ śuśrāva bhārata |
upetya cainamutthāya pariṣvajyedamabravīt || 5 ||
[Analyze grammar]

prayatiṣye tathā kartuṃ yathā nānyo dhanurdharaḥ |
tvatsamo bhavitā loke satyametadbravīmi te || 6 ||
[Analyze grammar]

tato droṇo'rjunaṃ bhūyo ratheṣu ca gajeṣu ca |
aśveṣu bhūmāvapi ca raṇaśikṣāmaśikṣayat || 7 ||
[Analyze grammar]

gadāyuddhe'sicaryāyāṃ tomaraprāsaśaktiṣu |
droṇaḥ saṃkīrṇayuddheṣu śikṣayāmāsa pāṇḍavam || 8 ||
[Analyze grammar]

tasya tatkauśalaṃ dṛṣṭvā dhanurvedajighṛkṣavaḥ |
rājāno rājaputrāśca samājagmuḥ sahasraśaḥ || 9 ||
[Analyze grammar]

tato niṣādarājasya hiraṇyadhanuṣaḥ sutaḥ |
ekalavyo mahārāja droṇamabhyājagāma ha || 10 ||
[Analyze grammar]

na sa taṃ pratijagrāha naiṣādiriti cintayan |
śiṣyaṃ dhanuṣi dharmajñasteṣāmevānvavekṣayā || 11 ||
[Analyze grammar]

sa tu droṇasya śirasā pādau gṛhya paraṃtapaḥ |
araṇyamanusaṃprāptaḥ kṛtvā droṇaṃ mahīmayam || 12 ||
[Analyze grammar]

tasminnācāryavṛttiṃ ca paramāmāsthitastadā |
iṣvastre yogamātasthe paraṃ niyamamāsthitaḥ || 13 ||
[Analyze grammar]

parayā śraddhayā yukto yogena parameṇa ca |
vimokṣādānasaṃdhāne laghutvaṃ paramāpa saḥ || 14 ||
[Analyze grammar]

atha droṇābhyanujñātāḥ kadācitkurupāṇḍavāḥ |
rathairviniryayuḥ sarve mṛgayāmarimardanāḥ || 15 ||
[Analyze grammar]

tatropakaraṇaṃ gṛhya naraḥ kaścidyadṛcchayā |
rājannanujagāmaikaḥ śvānamādāya pāṇḍavān || 16 ||
[Analyze grammar]

teṣāṃ vicaratāṃ tatra tattatkarma cikīrṣatām |
śvā caransa vane mūḍho naiṣādiṃ prati jagmivān || 17 ||
[Analyze grammar]

sa kṛṣṇaṃ maladigdhāṅgaṃ kṛṣṇājinadharaṃ vane |
naiṣādiṃ śvā samālakṣya bhaṣaṃstasthau tadantike || 18 ||
[Analyze grammar]

tadā tasyātha bhaṣataḥ śunaḥ sapta śarānmukhe |
lāghavaṃ darśayannastre mumoca yugapadyathā || 19 ||
[Analyze grammar]

sa tu śvā śarapūrṇāsyaḥ pāṇḍavānājagāma ha |
taṃ dṛṣṭvā pāṇḍavā vīrā vismayaṃ paramaṃ yayuḥ || 20 ||
[Analyze grammar]

lāghavaṃ śabdavedhitvaṃ dṛṣṭvā tatparamaṃ tadā |
prekṣya taṃ vrīḍitāścāsanpraśaśaṃsuśca sarvaśaḥ || 21 ||
[Analyze grammar]

taṃ tato'nveṣamāṇāste vane vananivāsinam |
dadṛśuḥ pāṇḍavā rājannasyantamaniśaṃ śarān || 22 ||
[Analyze grammar]

na cainamabhyajānaṃste tadā vikṛtadarśanam |
athainaṃ paripapracchuḥ ko bhavānkasya vetyuta || 23 ||
[Analyze grammar]

ekalavya uvāca |
niṣādādhipatervīrā hiraṇyadhanuṣaḥ sutam |
droṇaśiṣyaṃ ca māṃ vitta dhanurvedakṛtaśramam || 24 ||
[Analyze grammar]

vaiśaṃpāyana uvāca |
te tamājñāya tattvena punarāgamya pāṇḍavāḥ |
yathāvṛttaṃ ca te sarvaṃ droṇāyācakhyuradbhutam || 25 ||
[Analyze grammar]

kaunteyastvarjuno rājannekalavyamanusmaran |
raho droṇaṃ samāgamya praṇayādidamabravīt || 26 ||
[Analyze grammar]

nanvahaṃ parirabhyaikaḥ prītipūrvamidaṃ vacaḥ |
bhavatokto na me śiṣyastvadviśiṣṭo bhaviṣyati || 27 ||
[Analyze grammar]

atha kasmānmadviśiṣṭo lokādapi ca vīryavān |
astyanyo bhavataḥ śiṣyo niṣādādhipateḥ sutaḥ || 28 ||
[Analyze grammar]

muhūrtamiva taṃ droṇaścintayitvā viniścayam |
savyasācinamādāya naiṣādiṃ prati jagmivān || 29 ||
[Analyze grammar]

dadarśa maladigdhāṅgaṃ jaṭilaṃ cīravāsasam |
ekalavyaṃ dhanuṣpāṇimasyantamaniśaṃ śarān || 30 ||
[Analyze grammar]

ekalavyastu taṃ dṛṣṭvā droṇamāyāntamantikāt |
abhigamyopasaṃgṛhya jagāma śirasā mahīm || 31 ||
[Analyze grammar]

pūjayitvā tato droṇaṃ vidhivatsa niṣādajaḥ |
nivedya śiṣyamātmānaṃ tasthau prāñjaliragrataḥ || 32 ||
[Analyze grammar]

tato droṇo'bravīdrājannekalavyamidaṃ vacaḥ |
yadi śiṣyo'si me tūrṇaṃ vetanaṃ saṃpradīyatām || 33 ||
[Analyze grammar]

ekalavyastu tacchrutvā prīyamāṇo'bravīdidam |
kiṃ prayacchāmi bhagavannājñāpayatu māṃ guruḥ || 34 ||
[Analyze grammar]

na hi kiṃcidadeyaṃ me gurave brahmavittama |
tamabravīttvayāṅguṣṭho dakṣiṇo dīyatāṃ mama || 35 ||
[Analyze grammar]

ekalavyastu tacchrutvā vaco droṇasya dāruṇam |
pratijñāmātmano rakṣansatye ca nirataḥ sadā || 36 ||
[Analyze grammar]

tathaiva hṛṣṭavadanastathaivādīnamānasaḥ |
chittvāvicārya taṃ prādāddroṇāyāṅguṣṭhamātmanaḥ || 37 ||
[Analyze grammar]

tataḥ paraṃ tu naiṣādiraṅgulībhirvyakarṣata |
na tathā sa tu śīghro'bhūdyathā pūrvaṃ narādhipa || 38 ||
[Analyze grammar]

tato'rjunaḥ prītamanā babhūva vigatajvaraḥ |
droṇaśca satyavāgāsīnnānyo'bhyabhavadarjunam || 39 ||
[Analyze grammar]

droṇasya tu tadā śiṣyau gadāyogyāṃ viśeṣataḥ |
duryodhanaśca bhīmaśca kurūṇāmabhyagacchatām || 40 ||
[Analyze grammar]

aśvatthāmā rahasyeṣu sarveṣvabhyadhiko'bhavat |
tathāti puruṣānanyāntsārukau yamajāvubhau |
yudhiṣṭhiro rathaśreṣṭhaḥ sarvatra tu dhanaṃjayaḥ || 41 ||
[Analyze grammar]

prathitaḥ sāgarāntāyāṃ rathayūthapayūthapaḥ |
buddhiyogabalotsāhaiḥ sarvāstreṣu ca pāṇḍavaḥ || 42 ||
[Analyze grammar]

astre gurvanurāge ca viśiṣṭo'bhavadarjunaḥ |
tulyeṣvastropadeśeṣu sauṣṭhavena ca vīryavān |
ekaḥ sarvakumārāṇāṃ babhūvātiratho'rjunaḥ || 43 ||
[Analyze grammar]

prāṇādhikaṃ bhīmasenaṃ kṛtavidyaṃ dhanaṃjayam |
dhārtarāṣṭrā durātmāno nāmṛṣyanta narādhipa || 44 ||
[Analyze grammar]

tāṃstu sarvānsamānīya sarvavidyāsu niṣṭhitān |
droṇaḥ praharaṇajñāne jijñāsuḥ puruṣarṣabha || 45 ||
[Analyze grammar]

kṛtrimaṃ bhāsamāropya vṛkṣāgre śilpibhiḥ kṛtam |
avijñātaṃ kumārāṇāṃ lakṣyabhūtamupādiśat || 46 ||
[Analyze grammar]

droṇa uvāca |
śīghraṃ bhavantaḥ sarve vai dhanūṃṣyādāya satvarāḥ |
bhāsametaṃ samuddiśya tiṣṭhantāṃ saṃhiteṣavaḥ || 47 ||
[Analyze grammar]

madvākyasamakālaṃ ca śiro'sya vinipātyatām |
ekaikaśo niyokṣyāmi tathā kuruta putrakāḥ || 48 ||
[Analyze grammar]

vaiśaṃpāyana uvāca |
tato yudhiṣṭhiraṃ pūrvamuvācāṅgirasāṃ varaḥ |
saṃdhatsva bāṇaṃ durdharṣa madvākyānte vimuñca ca || 49 ||
[Analyze grammar]

tato yudhiṣṭhiraḥ pūrvaṃ dhanurgṛhya mahāravam |
tasthau bhāsaṃ samuddiśya guruvākyapracoditaḥ || 50 ||
[Analyze grammar]

tato vitatadhanvānaṃ droṇastaṃ kurunandanam |
sa muhūrtāduvācedaṃ vacanaṃ bharatarṣabha || 51 ||
[Analyze grammar]

paśyasyenaṃ drumāgrasthaṃ bhāsaṃ naravarātmaja |
paśyāmītyevamācāryaṃ pratyuvāca yudhiṣṭhiraḥ || 52 ||
[Analyze grammar]

sa muhūrtādiva punardroṇastaṃ pratyabhāṣata |
atha vṛkṣamimaṃ māṃ vā bhrātṝnvāpi prapaśyasi || 53 ||
[Analyze grammar]

tamuvāca sa kaunteyaḥ paśyāmyenaṃ vanaspatim |
bhavantaṃ ca tathā bhrātṝnbhāsaṃ ceti punaḥ punaḥ || 54 ||
[Analyze grammar]

tamuvācāpasarpeti droṇo'prītamanā iva |
naitacchakyaṃ tvayā veddhuṃ lakṣyamityeva kutsayan || 55 ||
[Analyze grammar]

tato duryodhanādīṃstāndhārtarāṣṭrānmahāyaśāḥ |
tenaiva kramayogena jijñāsuḥ paryapṛcchata || 56 ||
[Analyze grammar]

anyāṃśca śiṣyānbhīmādīnrājñaścaivānyadeśajān |
tathā ca sarve sarvaṃ tatpaśyāma iti kutsitāḥ || 57 ||
[Analyze grammar]

tato dhanaṃjayaṃ droṇaḥ smayamāno'bhyabhāṣata |
tvayedānīṃ prahartavyametallakṣyaṃ niśamyatām || 58 ||
[Analyze grammar]

madvākyasamakālaṃ te moktavyo'tra bhaveccharaḥ |
vitatya kārmukaṃ putra tiṣṭha tāvanmuhūrtakam || 59 ||
[Analyze grammar]

evamuktaḥ savyasācī maṇḍalīkṛtakārmukaḥ |
tasthau lakṣyaṃ samuddiśya guruvākyapracoditaḥ || 60 ||
[Analyze grammar]

muhūrtādiva taṃ droṇastathaiva samabhāṣata |
paśyasyenaṃ sthitaṃ bhāsaṃ drumaṃ māmapi vetyuta || 61 ||
[Analyze grammar]

paśyāmyenaṃ bhāsamiti droṇaṃ pārtho'bhyabhāṣata |
na tu vṛkṣaṃ bhavantaṃ vā paśyāmīti ca bhārata || 62 ||
[Analyze grammar]

tataḥ prītamanā droṇo muhūrtādiva taṃ punaḥ |
pratyabhāṣata durdharṣaḥ pāṇḍavānāṃ ratharṣabham || 63 ||
[Analyze grammar]

bhāsaṃ paśyasi yadyenaṃ tathā brūhi punarvacaḥ |
śiraḥ paśyāmi bhāsasya na gātramiti so'bravīt || 64 ||
[Analyze grammar]

arjunenaivamuktastu droṇo hṛṣṭatanūruhaḥ |
muñcasvetyabravītpārthaṃ sa mumocāvicārayan || 65 ||
[Analyze grammar]

tatastasya nagasthasya kṣureṇa niśitena ha |
śira utkṛtya tarasā pātayāmāsa pāṇḍavaḥ || 66 ||
[Analyze grammar]

tasminkarmaṇi saṃsiddhe paryaśvajata phalgunam |
mene ca drupadaṃ saṃkhye sānubandhaṃ parājitam || 67 ||
[Analyze grammar]

kasyacittvatha kālasya saśiṣyo'ṅgirasāṃ varaḥ |
jagāma gaṅgāmabhito majjituṃ bharatarṣabha || 68 ||
[Analyze grammar]

avagāḍhamatho droṇaṃ salile salilecaraḥ |
grāho jagrāha balavāñjaṅghānte kālacoditaḥ || 69 ||
[Analyze grammar]

sa samartho'pi mokṣāya śiṣyānsarvānacodayat |
grāhaṃ hatvā mokṣayadhvaṃ māmiti tvarayanniva || 70 ||
[Analyze grammar]

tadvākyasamakālaṃ tu bībhatsurniśitaiḥ śaraiḥ |
āvāpaiḥ pañcabhirgrāhaṃ magnamambhasyatāḍayat |
itare tu visaṃmūḍhāstatra tatra prapedire || 71 ||
[Analyze grammar]

taṃ ca dṛṣṭvā kriyopetaṃ droṇo'manyata pāṇḍavam |
viśiṣṭaṃ sarvaśiṣyebhyaḥ prītimāṃścābhavattadā || 72 ||
[Analyze grammar]

sa pārthabāṇairbahudhā khaṇḍaśaḥ parikalpitaḥ |
grāhaḥ pañcatvamāpede jaṅghāṃ tyaktvā mahātmanaḥ || 73 ||
[Analyze grammar]

athābravīnmahātmānaṃ bhāradvājo mahāratham |
gṛhāṇedaṃ mahābāho viśiṣṭamatidurdharam |
astraṃ brahmaśiro nāma saprayoganivartanam || 74 ||
[Analyze grammar]

na ca te mānuṣeṣvetatprayoktavyaṃ kathaṃcana |
jagadvinirdahedetadalpatejasi pātitam || 75 ||
[Analyze grammar]

asāmānyamidaṃ tāta lokeṣvastraṃ nigadyate |
taddhārayethāḥ prayataḥ śṛṇu cedaṃ vaco mama || 76 ||
[Analyze grammar]

bādhetāmānuṣaḥ śatruryadā tvāṃ vīra kaścana |
tadvadhāya prayuñjīthāstadāstramidamāhave || 77 ||
[Analyze grammar]

tatheti tatpratiśrutya bībhatsuḥ sa kṛtāñjaliḥ |
jagrāha paramāstraṃ tadāha cainaṃ punarguruḥ |
bhavitā tvatsamo nānyaḥ pumāṃlloke dhanurdharaḥ || 78 ||
[Analyze grammar]