Chapter 122

vaiśaṃpāyana uvāca |
tato drupadamāsādya bhāradvājaḥ pratāpavān |
abravītpārṣataṃ rājansakhāyaṃ viddhi māmiti || 1 ||
[Analyze grammar]

drupada uvāca |
akṛteyaṃ tava prajñā brahmannātisamañjasī |
yanmāṃ bravīṣi prasabhaṃ sakhā te'hamiti dvija || 2 ||
[Analyze grammar]

na hi rājñāmudīrṇānāmevaṃbhūtairnaraiḥ kvacit |
sakhyaṃ bhavati mandātmañśriyā hīnairdhanacyutaiḥ || 3 ||
[Analyze grammar]

sauhṛdānyapi jīryante kālena parijīryatām |
sauhṛdaṃ me tvayā hyāsītpūrvaṃ sāmarthyabandhanam || 4 ||
[Analyze grammar]

na sakhyamajaraṃ loke jātu dṛśyeta karhicit |
kāmo vainaṃ viharati krodhaścainaṃ pravṛścati || 5 ||
[Analyze grammar]

maivaṃ jīrṇamupāsiṣṭhāḥ sakhyaṃ navamupākuru |
āsītsakhyaṃ dvijaśreṣṭha tvayā me'rthanibandhanam || 6 ||
[Analyze grammar]

na daridro vasumato nāvidvānviduṣaḥ sakhā |
śūrasya na sakhā klībaḥ sakhipūrvaṃ kimiṣyate || 7 ||
[Analyze grammar]

yayoreva samaṃ vittaṃ yayoreva samaṃ kulam |
tayoḥ sakhyaṃ vivāhaśca na tu puṣṭavipuṣṭayoḥ || 8 ||
[Analyze grammar]

nāśrotriyaḥ śrotriyasya nārathī rathinaḥ sakhā |
nārājñā saṃgataṃ rājñaḥ sakhipūrvaṃ kimiṣyate || 9 ||
[Analyze grammar]

vaiśaṃpāyana uvāca |
drupadenaivamuktastu bhāradvājaḥ pratāpavān |
muhūrtaṃ cintayāmāsa manyunābhipariplutaḥ || 10 ||
[Analyze grammar]

sa viniścitya manasā pāñcālaṃ prati buddhimān |
jagāma kurumukhyānāṃ nagaraṃ nāgasāhvayam || 11 ||
[Analyze grammar]

kumārāstvatha niṣkramya sametā gajasāhvayāt |
krīḍanto vīṭayā tatra vīrāḥ paryacaranmudā || 12 ||
[Analyze grammar]

papāta kūpe sā vīṭā teṣāṃ vai krīḍatāṃ tadā |
na ca te pratyapadyanta karma vīṭopalabdhaye || 13 ||
[Analyze grammar]

atha droṇaḥ kumārāṃstāndṛṣṭvā kṛtyavatastadā |
prahasya mandaṃ paiśalyādabhyabhāṣata vīryavān || 14 ||
[Analyze grammar]

aho nu dhigbalaṃ kṣātraṃ dhigetāṃ vaḥ kṛtāstratām |
bharatasyānvaye jātā ye vīṭāṃ nādhigacchata || 15 ||
[Analyze grammar]

eṣa muṣṭiriṣīkāṇāṃ mayāstreṇābhimantritaḥ |
asya vīryaṃ nirīkṣadhvaṃ yadanyasya na vidyate || 16 ||
[Analyze grammar]

vetsyāmīṣīkayā vīṭāṃ tāmiṣīkāmathānyayā |
tāmanyayā samāyogo vīṭāyā grahaṇe mama || 17 ||
[Analyze grammar]

tadapaśyankumārāste vismayotphullalocanāḥ |
aveṣkya coddhṛtāṃ vīṭāṃ vīṭāveddhāramabruvan || 18 ||
[Analyze grammar]

abhivādayāmahe brahmannaitadanyeṣu vidyate |
ko'si kaṃ tvābhijānīmo vayaṃ kiṃ karavāmahe || 19 ||
[Analyze grammar]

droṇa uvāca |
ācakṣadhvaṃ ca bhīṣmāya rūpeṇa ca guṇaiśca mām |
sa eva sumahābuddhiḥ sāṃprataṃ pratipatsyate || 20 ||
[Analyze grammar]

vaiśaṃpāyana uvāca |
tathetyuktvā tu te sarve bhīṣmamūcuḥ pitāmaham |
brāhmaṇasya vacastathyaṃ tacca karmaviśeṣavat || 21 ||
[Analyze grammar]

bhīṣmaḥ śrutvā kumārāṇāṃ droṇaṃ taṃ pratyajānata |
yuktarūpaḥ sa hi gururityevamanucintya ca || 22 ||
[Analyze grammar]

athainamānīya tadā svayameva susatkṛtam |
paripapraccha nipuṇaṃ bhīṣmaḥ śastrabhṛtāṃ varaḥ |
hetumāgamane tasya droṇaḥ sarvaṃ nyavedayat || 23 ||
[Analyze grammar]

maharṣeragniveśyasya sakāśamahamacyuta |
astrārthamagamaṃ pūrvaṃ dhanurvedajighṛkṣayā || 24 ||
[Analyze grammar]

brahmacārī vinītātmā jaṭilo bahulāḥ samāḥ |
avasaṃ tatra suciraṃ dhanurvedacikīrṣayā || 25 ||
[Analyze grammar]

pāñcālarājaputrastu yajñaseno mahābalaḥ |
mayā sahākarodvidyāṃ guroḥ śrāmyansamāhitaḥ || 26 ||
[Analyze grammar]

sa me tatra sakhā cāsīdupakārī priyaśca me |
tenāhaṃ saha saṃgamya ratavānsuciraṃ bata |
bālyātprabhṛti kauravya sahādhyayanameva ca || 27 ||
[Analyze grammar]

sa samāsādya māṃ tatra priyakārī priyaṃvadaḥ |
abravīditi māṃ bhīṣma vacanaṃ prītivardhanam || 28 ||
[Analyze grammar]

ahaṃ priyatamaḥ putraḥ piturdroṇa mahātmanaḥ |
abhiṣekṣyati māṃ rājye sa pāñcālyo yadā tadā || 29 ||
[Analyze grammar]

tvadbhojyaṃ bhavitā rājyaṃ sakhe satyena te śape |
mama bhogāśca vittaṃ ca tvadadhīnaṃ sukhāni ca || 30 ||
[Analyze grammar]

evamuktaḥ pravavrāja kṛtāstro'haṃ dhanepsayā |
abhiṣiktaṃ ca śrutvainaṃ kṛtārtho'smīti cintayan || 31 ||
[Analyze grammar]

priyaṃ sakhāyaṃ suprīto rājyasthaṃ punarāvrajam |
saṃsmaransaṃgamaṃ caiva vacanaṃ caiva tasya tat || 32 ||
[Analyze grammar]

tato drupadamāgamya sakhipūrvamahaṃ prabho |
abruvaṃ puruṣavyāghra sakhāyaṃ viddhi māmiti || 33 ||
[Analyze grammar]

upasthitaṃ tu drupadaḥ sakhivaccābhisaṃgatam |
sa māṃ nirākāramiva prahasannidamabravīt || 34 ||
[Analyze grammar]

akṛteyaṃ tava prajñā brahmannātisamañjasī |
yadāttha māṃ tvaṃ prasabhaṃ sakhā te'hamiti dvija || 35 ||
[Analyze grammar]

na hi rājñāmudīrṇānāmevaṃbhūtairnaraiḥ kvacit |
sakhyaṃ bhavati mandātmañśriyā hīnairdhanacyutaiḥ || 36 ||
[Analyze grammar]

nāśrotriyaḥ śrotriyasya nārathī rathinaḥ sakhā |
nārājā pārthivasyāpi sakhipūrvaṃ kimiṣyate || 37 ||
[Analyze grammar]

drupadenaivamukto'haṃ manyunābhipariplutaḥ |
abhyāgacchaṃ kurūnbhīṣma śiṣyairarthī guṇānvitaiḥ || 38 ||
[Analyze grammar]

pratijagrāha taṃ bhīṣmo guruṃ pāṇḍusutaiḥ saha |
pautrānādāya tānsarvānvasūni vividhāni ca || 39 ||
[Analyze grammar]

śiṣyā iti dadau rājandroṇāya vidhipūrvakam |
sa ca śiṣyānmaheṣvāsaḥ pratijagrāha kauravān || 40 ||
[Analyze grammar]

pratigṛhya ca tānsarvāndroṇo vacanamabravīt |
rahasyekaḥ pratītātmā kṛtopasadanāṃstadā || 41 ||
[Analyze grammar]

kāryaṃ me kāṅkṣitaṃ kiṃciddhṛdi saṃparivartate |
kṛtāstraistatpradeyaṃ me tadṛtaṃ vadatānaghāḥ || 42 ||
[Analyze grammar]

tacchrutvā kauraveyāste tūṣṇīmāsanviśāṃ pate |
arjunastu tataḥ sarvaṃ pratijajñe paraṃtapaḥ || 43 ||
[Analyze grammar]

tato'rjunaṃ mūrdhni tadā samāghrāya punaḥ punaḥ |
prītipūrvaṃ pariṣvajya praruroda mudā tadā || 44 ||
[Analyze grammar]

tato droṇaḥ pāṇḍuputrānastrāṇi vividhāni ca |
grāhayāmāsa divyāni mānuṣāṇi ca vīryavān || 45 ||
[Analyze grammar]

rājaputrāstathaivānye sametya bharatarṣabha |
abhijagmustato droṇamastrārthe dvijasattamam |
vṛṣṇayaścāndhakāścaiva nānādeśyāśca pārthivāḥ || 46 ||
[Analyze grammar]

sūtaputraśca rādheyo guruṃ droṇamiyāttadā |
spardhamānastu pārthena sūtaputro'tyamarṣaṇaḥ |
duryodhanamupāśritya pāṇḍavānatyamanyata || 47 ||
[Analyze grammar]