Chapter 153

vaiśaṃpāyana uvāca |
tataḥ kuntīsuto rājā paurajānapadaṃ janam |
pūjayitvā yathānyāyamanujajñe gṛhānprati || 1 ||
[Analyze grammar]

sāntvayāmāsa nārīśca hatavīrā hateśvarāḥ |
vipulairarthadānaiśca tadā pāṇḍusuto nṛpaḥ || 2 ||
[Analyze grammar]

so'bhiṣikto mahāprājñaḥ prāpya rājyaṃ yudhiṣṭhiraḥ |
avasthāpya naraśreṣṭhaḥ sarvāḥ svaprakṛtīstadā || 3 ||
[Analyze grammar]

dvijebhyo balamukhyebhyo naigamebhyaśca sarvaśaḥ |
pratigṛhyāśiṣo mukhyāstadā dharmabhṛtāṃ varaḥ || 4 ||
[Analyze grammar]

uṣitvā śarvarīḥ śrīmānpañcāśannagarottame |
samayaṃ kauravāgryasya sasmāra puruṣarṣabhaḥ || 5 ||
[Analyze grammar]

sa niryayau gajapurādyājakaiḥ parivāritaḥ |
dṛṣṭvā nivṛttamādityaṃ pravṛttaṃ cottarāyaṇam || 6 ||
[Analyze grammar]

ghṛtaṃ mālyaṃ ca gandhāṃśca kṣaumāṇi ca yudhiṣṭhiraḥ |
candanāgarumukhyāni tathā kālāgarūṇi ca || 7 ||
[Analyze grammar]

prasthāpya pūrvaṃ kaunteyo bhīṣmasaṃsādhanāya vai |
mālyāni ca mahārhāṇi ratnāni vividhāni ca || 8 ||
[Analyze grammar]

dhṛtarāṣṭraṃ puraskṛtya gāndhārīṃ ca yaśasvinīm |
mātaraṃ ca pṛthāṃ dhīmānbhrātṝṃśca puruṣarṣabhaḥ || 9 ||
[Analyze grammar]

janārdanenānugato vidureṇa ca dhīmatā |
yuyutsunā ca kauravyo yuyudhānena cābhibho || 10 ||
[Analyze grammar]

mahatā rājabhogyena paribarheṇa saṃvṛtaḥ |
stūyamāno mahārāja bhīṣmasyāgnīnanuvrajan || 11 ||
[Analyze grammar]

niścakrāma purāttasmādyathā devapatistathā |
āsasāda kurukṣetre tataḥ śāṃtanavaṃ nṛpam || 12 ||
[Analyze grammar]

upāsyamānaṃ vyāsena pārāśaryeṇa dhīmatā |
nāradena ca rājarṣe devalenāsitena ca || 13 ||
[Analyze grammar]

hataśiṣṭairnṛpaiścānyairnānādeśasamāgataiḥ |
rakṣibhiśca mahātmānaṃ rakṣyamāṇaṃ samantataḥ || 14 ||
[Analyze grammar]

śayānaṃ vīraśayane dadarśa nṛpatistataḥ |
tato rathādavārohadbhrātṛbhiḥ saha dharmarāṭ || 15 ||
[Analyze grammar]

abhivādyātha kaunteyaḥ pitāmahamariṃdamam |
dvaipāyanādīnviprāṃśca taiśca pratyabhinanditaḥ || 16 ||
[Analyze grammar]

ṛtvigbhirbrahmakalpaiśca bhrātṛbhiśca sahācyutaḥ |
āsādya śaratalpasthamṛṣibhiḥ parivāritam || 17 ||
[Analyze grammar]

abravīdbharataśreṣṭhaṃ dharmarājo yudhiṣṭhiraḥ |
bhrātṛbhiḥ saha kauravya śayānaṃ nimnagāsutam || 18 ||
[Analyze grammar]

yudhiṣṭhiro'haṃ nṛpate namaste jāhnavīsuta |
śṛṇoṣi cenmahābāho brūhi kiṃ karavāṇi te || 19 ||
[Analyze grammar]

prāpto'smi samaye rājannagnīnādāya te vibho |
ācāryā brāhmaṇāścaiva ṛtvijo bhrātaraśca me || 20 ||
[Analyze grammar]

putraśca te mahātejā dhṛtarāṣṭro janeśvaraḥ |
upasthitaḥ sahāmātyo vāsudevaśca vīryavān || 21 ||
[Analyze grammar]

hataśiṣṭāśca rājānaḥ sarve ca kurujāṅgalāḥ |
tānpaśya kuruśārdūla samunmīlaya locane || 22 ||
[Analyze grammar]

yacceha kiṃcitkartavyaṃ tatsarvaṃ prāpitaṃ mayā |
yathoktaṃ bhavatā kāle sarvameva ca tatkṛtam || 23 ||
[Analyze grammar]

evamuktastu gāṅgeyaḥ kuntīputreṇa dhīmatā |
dadarśa bhāratānsarvānsthitānsaṃparivārya tam || 24 ||
[Analyze grammar]

tataścalavalirbhīṣmaḥ pragṛhya vipulaṃ bhujam |
oghameghasvano vāgmī kāle vacanamabravīt || 25 ||
[Analyze grammar]

diṣṭyā prāpto'si kaunteya sahāmātyo yudhiṣṭhira |
parivṛtto hi bhagavānsahasrāṃśurdivākaraḥ || 26 ||
[Analyze grammar]

aṣṭapañcāśataṃ rātryaḥ śayānasyādya me gatāḥ |
śareṣu niśitāgreṣu yathā varṣaśataṃ tathā || 27 ||
[Analyze grammar]

māgho'yaṃ samanuprāpto māsaḥ puṇyo yudhiṣṭhira |
tribhāgaśeṣaḥ pakṣo'yaṃ śuklo bhavitumarhati || 28 ||
[Analyze grammar]

evamuktvā tu gāṅgeyo dharmaputraṃ yudhiṣṭhiram |
dhṛtarāṣṭramathāmantrya kāle vacanamabravīt || 29 ||
[Analyze grammar]

rājanviditadharmo'si sunirṇītārthasaṃśayaḥ |
bahuśrutā hi te viprā bahavaḥ paryupāsitāḥ || 30 ||
[Analyze grammar]

vedaśāstrāṇi sarvāṇi dharmāṃśca manujeśvara |
vedāṃśca caturaḥ sāṅgānnikhilenāvabudhyase || 31 ||
[Analyze grammar]

na śocitavyaṃ kauravya bhavitavyaṃ hi tattathā |
śrutaṃ devarahasyaṃ te kṛṣṇadvaipāyanādapi || 32 ||
[Analyze grammar]

yathā pāṇḍoḥ sutā rājaṃstathaiva tava dharmataḥ |
tānpālaya sthito dharme guruśuśrūṣaṇe ratān || 33 ||
[Analyze grammar]

dharmarājo hi śuddhātmā nideśe sthāsyate tava |
ānṛśaṃsyaparaṃ hyenaṃ jānāmi guruvatsalam || 34 ||
[Analyze grammar]

tava putrā durātmānaḥ krodhalobhaparāyaṇāḥ |
īrṣyābhibhūtā durvṛttāstānna śocitumarhasi || 35 ||
[Analyze grammar]

vaiśaṃpāyana uvāca |
etāvaduktvā vacanaṃ dhṛtarāṣṭraṃ manīṣiṇam |
vāsudevaṃ mahābāhumabhyabhāṣata kauravaḥ || 36 ||
[Analyze grammar]

bhagavandevadeveśa surāsuranamaskṛta |
trivikrama namaste'stu śaṅkhacakragadādhara || 37 ||
[Analyze grammar]

anujānīhi māṃ kṛṣṇa vaikuṇṭha puruṣottama |
rakṣyāśca te pāṇḍaveyā bhavānhyeṣāṃ parāyaṇam || 38 ||
[Analyze grammar]

uktavānasmi durbuddhiṃ mandaṃ duryodhanaṃ purā |
yataḥ kṛṣṇastato dharmo yato dharmastato jayaḥ || 39 ||
[Analyze grammar]

vāsudevena tīrthena putra saṃśāmya pāṇḍavaiḥ |
saṃdhānasya paraḥ kālastaveti ca punaḥ punaḥ || 40 ||
[Analyze grammar]

na ca me tadvaco mūḍhaḥ kṛtavānsa sumandadhīḥ |
ghātayitveha pṛthivīṃ tataḥ sa nidhanaṃ gataḥ || 41 ||
[Analyze grammar]

tvāṃ ca jānāmyahaṃ vīra purāṇamṛṣisattamam |
nareṇa sahitaṃ devaṃ badaryāṃ suciroṣitam || 42 ||
[Analyze grammar]

tathā me nāradaḥ prāha vyāsaśca sumahātapāḥ |
naranārāyaṇāvetau saṃbhūtau manujeṣviti || 43 ||
[Analyze grammar]

vāsudeva uvāca |
anujānāmi bhīṣma tvāṃ vasūnāpnuhi pārthiva |
na te'sti vṛjinaṃ kiṃcinmayā dṛṣṭaṃ mahādyute || 44 ||
[Analyze grammar]

pitṛbhakto'si rājarṣe mārkaṇḍeya ivāparaḥ |
tena mṛtyustava vaśe sthito bhṛtya ivānataḥ || 45 ||
[Analyze grammar]

vaiśaṃpāyana uvāca |
evamuktastu gāṅgeyaḥ pāṇḍavānidamabravīt |
dhṛtarāṣṭramukhāṃścāpi sarvānsasuhṛdastathā || 46 ||
[Analyze grammar]

prāṇānutsraṣṭumicchāmi tanmānujñātumarhatha |
satye prayatitavyaṃ vaḥ satyaṃ hi paramaṃ balam || 47 ||
[Analyze grammar]

ānṛśaṃsyaparairbhāvyaṃ sadaiva niyatātmabhiḥ |
brahmaṇyairdharmaśīlaiśca taponītyaiśca bhārata || 48 ||
[Analyze grammar]

ityuktvā suhṛdaḥ sarvānsaṃpariṣvajya caiva ha |
punarevābravīddhīmānyudhiṣṭhiramidaṃ vacaḥ || 49 ||
[Analyze grammar]

brāhmaṇāścaiva te nityaṃ prājñāścaiva viśeṣataḥ |
ācāryā ṛtvijaścaiva pūjanīyā narādhipa || 50 ||
[Analyze grammar]