Chapter 91

yudhiṣṭhira uvāca |
kena saṃkalpitaṃ śrāddhaṃ kasminkāle kimātmakam |
bhṛgvaṅgirasake kāle muninā katareṇa vā || 1 ||
[Analyze grammar]

kāni śrāddheṣu varjyāni tathā mūlaphalāni ca |
dhānyajātiśca kā varjyā tanme brūhi pitāmaha || 2 ||
[Analyze grammar]

bhīṣma uvāca |
yathā śrāddhaṃ saṃpravṛttaṃ yasminkāle yadātmakam |
yena saṃkalpitaṃ caiva tanme śṛṇu janādhipa || 3 ||
[Analyze grammar]

svāyaṃbhuvo'triḥ kauravya paramarṣiḥ pratāpavān |
tasya vaṃśe mahārāja dattātreya iti smṛtaḥ || 4 ||
[Analyze grammar]

dattātreyasya putro'bhūnnimirnāma tapodhanaḥ |
nimeścāpyabhavatputraḥ śrīmānnāma śriyā vṛtaḥ || 5 ||
[Analyze grammar]

pūrṇe varṣasahasrānte sa kṛtvā duṣkaraṃ tapaḥ |
kāladharmaparītātmā nidhanaṃ samupāgataḥ || 6 ||
[Analyze grammar]

nimistu kṛtvā śaucāni vidhidṛṣṭena karmaṇā |
saṃtāpamagamattīvraṃ putraśokaparāyaṇaḥ || 7 ||
[Analyze grammar]

atha kṛtvopahāryāṇi caturdaśyāṃ mahāmatiḥ |
tameva gaṇayañśokaṃ virātre pratyabudhyata || 8 ||
[Analyze grammar]

tasyāsītpratibuddhasya śokena pihitātmanaḥ |
manaḥ saṃhṛtya viṣaye buddhirvistaragāminī || 9 ||
[Analyze grammar]

tataḥ saṃcintayāmāsa śrāddhakalpaṃ samāhitaḥ |
yāni tasyaiva bhojyāni mūlāni ca phalāni ca || 10 ||
[Analyze grammar]

uktāni yāni cānyāni yāni ceṣṭāni tasya ha |
tāni sarvāṇi manasā viniścitya tapodhanaḥ || 11 ||
[Analyze grammar]

amāvāsyāṃ mahāprājña viprānānāyya pūjitān |
dakṣiṇāvartikāḥ sarvā bṛsīḥ svayamathākarot || 12 ||
[Analyze grammar]

sapta viprāṃstato bhojye yugapatsamupānayat |
ṛte ca lavaṇaṃ bhojyaṃ śyāmākānnaṃ dadau prabhuḥ || 13 ||
[Analyze grammar]

dakṣiṇāgrāstato darbhā viṣṭareṣu niveśitāḥ |
pādayoścaiva viprāṇāṃ ye tvannamupabhuñjate || 14 ||
[Analyze grammar]

kṛtvā ca dakṣiṇāgrānvai darbhānsuprayataḥ śuciḥ |
pradadau śrīmate piṇḍaṃ nāmagotramudāharan || 15 ||
[Analyze grammar]

tatkṛtvā sa muniśreṣṭho dharmasaṃkaramātmanaḥ |
paścāttāpena mahatā tapyamāno'bhyacintayat || 16 ||
[Analyze grammar]

akṛtaṃ munibhiḥ pūrvaṃ kiṃ mayaitadanuṣṭhitam |
kathaṃ nu śāpena na māṃ daheyurbrāhmaṇā iti || 17 ||
[Analyze grammar]

tataḥ saṃcintayāmāsa vaṃśakartāramātmanaḥ |
dhyātamātrastathā cātrirājagāma tapodhanaḥ || 18 ||
[Analyze grammar]

athātristaṃ tathā dṛṣṭvā putraśokena karśitam |
bhṛśamāśvāsayāmāsa vāgbhiriṣṭābhiravyayaḥ || 19 ||
[Analyze grammar]

nime saṃkalpitaste'yaṃ pitṛyajñastapodhanaḥ |
mā te bhūdbhīḥ pūrvadṛṣṭo dharmo'yaṃ brahmaṇā svayam || 20 ||
[Analyze grammar]

so'yaṃ svayaṃbhuvihito dharmaḥ saṃkalpitastvayā |
ṛte svayaṃbhuvaḥ ko'nyaḥ śrāddheyaṃ vidhimāharet || 21 ||
[Analyze grammar]

ākhyāsyāmi ca te bhūyaḥ śrāddheyaṃ vidhimuttamam |
svayaṃbhuvihitaṃ putra tatkuruṣva nibodha me || 22 ||
[Analyze grammar]

kṛtvāgnikaraṇaṃ pūrvaṃ mantrapūrvaṃ tapodhana |
tato'ryamṇe ca somāya varuṇāya ca nityaśaḥ || 23 ||
[Analyze grammar]

viśvedevāśca ye nityaṃ pitṛbhiḥ saha gocarāḥ |
tebhyaḥ saṃkalpitā bhāgāḥ svayameva svayaṃbhuvā || 24 ||
[Analyze grammar]

stotavyā ceha pṛthivī nivāpasyeha dhāriṇī |
vaiṣṇavī kāśyapī ceti tathaivehākṣayeti ca || 25 ||
[Analyze grammar]

udakānayane caiva stotavyo varuṇo vibhuḥ |
tato'gniścaiva somaśca āpyāyyāviha te'nagha || 26 ||
[Analyze grammar]

devāstu pitaro nāma nirmitā vai svayaṃbhuvā |
ūṣmapāḥ sumahābhāgāsteṣāṃ bhāgāḥ prakalpitāḥ || 27 ||
[Analyze grammar]

te śrāddhenārcyamānā vai vimucyante ha kilbiṣāt |
saptakaḥ pitṛvaṃśastu pūrvadṛṣṭaḥ svayaṃbhuvā || 28 ||
[Analyze grammar]

viśve cāgnimukhā devāḥ saṃkhyātāḥ pūrvameva te |
teṣāṃ nāmāni vakṣyāmi bhāgārhāṇāṃ mahātmanām || 29 ||
[Analyze grammar]

sahaḥ kṛtirvipāpmā ca puṇyakṛtpāvanastathā |
grāmniḥ kṣemaḥ samūhaśca divyasānustathaiva ca || 30 ||
[Analyze grammar]

vivasvānvīryavānhrīmānkīrtimānkṛta eva ca |
vipūrvaḥ somapūrvaśca sūryaśrīśceti nāmataḥ || 31 ||
[Analyze grammar]

somapaḥ sūryasāvitro dattātmā puṣkarīyakaḥ |
uṣṇīnābho nabhodaśca viśvāyurdīptireva ca || 32 ||
[Analyze grammar]

camūharaḥ suveṣaśca vyomāriḥ śaṃkaro bhavaḥ |
īśaḥ kartā kṛtirdakṣo bhuvano divyakarmakṛt || 33 ||
[Analyze grammar]

gaṇitaḥ pañcavīryaśca ādityo raśmimāṃstathā |
saptakṛtsomavarcāśca viśvakṛtkavireva ca || 34 ||
[Analyze grammar]

anugoptā sugoptā ca naptā ceśvara eva ca |
jitātmā munivīryaśca dīptalomā bhayaṃkaraḥ || 35 ||
[Analyze grammar]

atikarmā pratītaśca pradātā cāṃśumāṃstathā |
śailābhaḥ paramakrodhī dhīroṣṇī bhūpatistathā || 36 ||
[Analyze grammar]

srajī vajrī varī caiva viśvedevāḥ sanātanāḥ |
kīrtitāste mahābhāgāḥ kālasya gatigocarāḥ || 37 ||
[Analyze grammar]

aśrāddheyāni dhānyāni kodravāḥ pulakāstathā |
hiṅgu dravyeṣu śākeṣu palāṇḍuṃ laśunaṃ tathā || 38 ||
[Analyze grammar]

palāṇḍuḥ saubhañjanakastathā gṛñjanakādayaḥ |
kūṣmāṇḍajātyalābuṃ ca kṛṣṇaṃ lavaṇameva ca || 39 ||
[Analyze grammar]

grāmyaṃ vārāhamāṃsaṃ ca yaccaivāprokṣitaṃ bhavet |
kṛṣṇājājī viḍaścaiva śītapākī tathaiva ca |
aṅkurādyāstathā varjyā iha śṛṅgāṭakāni ca || 40 ||
[Analyze grammar]

varjayellavaṇaṃ sarvaṃ tathā jambūphalāni ca |
avakṣutāvaruditaṃ tathā śrāddheṣu varjayet || 41 ||
[Analyze grammar]

nivāpe havyakavye vā garhitaṃ ca śvadarśanam |
pitaraścaiva devāśca nābhinandanti taddhaviḥ || 42 ||
[Analyze grammar]

caṇḍālaśvapacau varjyau nivāpe samupasthite |
kāṣāyavāsī kuṣṭhī vā patito brahmahāpi vā || 43 ||
[Analyze grammar]

saṃkīrṇayonirvipraśca saṃbandhī patitaśca yaḥ |
varjanīyā budhairete nivāpe samupasthite || 44 ||
[Analyze grammar]

ityevamuktvā bhagavānsvavaṃśajamṛṣiṃ purā |
pitāmahasabhāṃ divyāṃ jagāmātristapodhanaḥ || 45 ||
[Analyze grammar]