Chapter 5

yudhiṣṭhira uvāca |
ānṛśaṃsasya dharmasya guṇānbhaktajanasya ca |
śrotumicchāmi kārtsnyena tanme brūhi pitāmaha || 1 ||
[Analyze grammar]

bhīṣma uvāca |
viṣaye kāśirājasya grāmānniṣkramya lubdhakaḥ |
saviṣaṃ kāṇḍamādāya mṛgayāmāsa vai mṛgam || 2 ||
[Analyze grammar]

tatra cāmiṣalubdhena lubdhakena mahāvane |
avidūre mṛgaṃ dṛṣṭvā bāṇaḥ pratisamāhitaḥ || 3 ||
[Analyze grammar]

tena durvāritāstreṇa nimittacapaleṣuṇā |
mahānvanatarurviddho mṛgaṃ tatra jighāṃsatā || 4 ||
[Analyze grammar]

sa tīkṣṇaviṣadigdhena śareṇātibalātkṛtaḥ |
utsṛjya phalapatrāṇi pādapaḥ śoṣamāgataḥ || 5 ||
[Analyze grammar]

tasminvṛkṣe tathābhūte koṭareṣu ciroṣitaḥ |
na jahāti śuko vāsaṃ tasya bhaktyā vanaspateḥ || 6 ||
[Analyze grammar]

niṣpracāro nirāhāro glānaḥ śithilavāgapi |
kṛtajñaḥ saha vṛkṣeṇa dharmātmā sa vyaśuṣyata || 7 ||
[Analyze grammar]

tamudāraṃ mahāsattvamatimānuṣaceṣṭitam |
samaduḥkhasukhaṃ jñātvā vismitaḥ pākaśāsanaḥ || 8 ||
[Analyze grammar]

tataścintāmupagataḥ śakraḥ kathamayaṃ dvijaḥ |
tiryagyonāvasaṃbhāvyamānṛśaṃsyaṃ samāsthitaḥ || 9 ||
[Analyze grammar]

atha vā nātra citraṃ hītyabhavadvāsavasya tu |
prāṇināmiha sarveṣāṃ sarvaṃ sarvatra dṛśyate || 10 ||
[Analyze grammar]

tato brāhmaṇaveṣeṇa mānuṣaṃ rūpamāsthitaḥ |
avatīrya mahīṃ śakrastaṃ pakṣiṇamuvāca ha || 11 ||
[Analyze grammar]

śuka bhoḥ pakṣiṇāṃ śreṣṭha dākṣeyī suprajāstvayā |
pṛcche tvā śuṣkametaṃ vai kasmānna tyajasi drumam || 12 ||
[Analyze grammar]

atha pṛṣṭaḥ śukaḥ prāha mūrdhnā samabhivādya tam |
svāgataṃ devarājāya vijñātastapasā mayā || 13 ||
[Analyze grammar]

tato daśaśatākṣeṇa sādhu sādhviti bhāṣitam |
aho vijñānamityevaṃ tapasā pūjitastataḥ || 14 ||
[Analyze grammar]

tamevaṃ śubhakarmāṇaṃ śukaṃ paramadhārmikam |
vijānannapi tāṃ prāptiṃ papraccha balasūdanaḥ || 15 ||
[Analyze grammar]

niṣpatramaphalaṃ śuṣkamaśaraṇyaṃ patatriṇām |
kimarthaṃ sevase vṛkṣaṃ yadā mahadidaṃ vanam || 16 ||
[Analyze grammar]

anye'pi bahavo vṛkṣāḥ patrasaṃchannakoṭarāḥ |
śubhāḥ paryāptasaṃcārā vidyante'sminmahāvane || 17 ||
[Analyze grammar]

gatāyuṣamasāmarthyaṃ kṣīṇasāraṃ hataśriyam |
vimṛśya prajñayā dhīra jahīmaṃ hyasthiraṃ drumam || 18 ||
[Analyze grammar]

tadupaśrutya dharmātmā śukaḥ śakreṇa bhāṣitam |
sudīrghamabhiniḥśvasya dīno vākyamuvāca ha || 19 ||
[Analyze grammar]

anatikramaṇīyāni daivatāni śacīpate |
yatrābhavastatra bhavastannibodha surādhipa || 20 ||
[Analyze grammar]

asminnahaṃ drume jātaḥ sādhubhiśca guṇairyutaḥ |
bālabhāve ca saṃguptaḥ śatrubhiśca na dharṣitaḥ || 21 ||
[Analyze grammar]

kimanukrośavaiphalyamutpādayasi me'nagha |
ānṛśaṃsye'nuraktasya bhaktasyānugatasya ca || 22 ||
[Analyze grammar]

anukrośo hi sādhūnāṃ sumahaddharmalakṣaṇam |
anukrośaśca sādhūnāṃ sadā prītiṃ prayacchati || 23 ||
[Analyze grammar]

tvameva daivataiḥ sarvaiḥ pṛcchyase dharmasaṃśayān |
atastvaṃ deva devānāmādhipatye pratiṣṭhitaḥ || 24 ||
[Analyze grammar]

nārhasi tvaṃ sahasrākṣa tyājayitveha bhaktitaḥ |
samarthamupajīvyemaṃ tyajeyaṃ kathamadya vai || 25 ||
[Analyze grammar]

tasya vākyena saumyena harṣitaḥ pākaśāsanaḥ |
śukaṃ provāca dharmajñamānṛśaṃsyena toṣitaḥ || 26 ||
[Analyze grammar]

varaṃ vṛṇīṣveti tadā sa ca vavre varaṃ śukaḥ |
ānṛśaṃsyaparo nityaṃ tasya vṛkṣasya saṃbhavam || 27 ||
[Analyze grammar]

viditvā ca dṛḍhāṃ śakrastāṃ śuke śīlasaṃpadam |
prītaḥ kṣipramatho vṛkṣamamṛtenāvasiktavān || 28 ||
[Analyze grammar]

tataḥ phalāni patrāṇi śākhāścāpi manoramāḥ |
śukasya dṛḍhabhaktitvācchrīmattvaṃ cāpa sa drumaḥ || 29 ||
[Analyze grammar]

śukaśca karmaṇā tena ānṛśaṃsyakṛtena ha |
āyuṣo'nte mahārāja prāpa śakrasalokatām || 30 ||
[Analyze grammar]

evameva manuṣyendra bhaktimantaṃ samāśritaḥ |
sarvārthasiddhiṃ labhate śukaṃ prāpya yathā drumaḥ || 31 ||
[Analyze grammar]