Chapter 4

bhīṣma uvāca |
śrūyatāṃ pārtha tattvena viśvāmitro yathā purā |
brāhmaṇatvaṃ gatastāta brahmarṣitvaṃ tathaiva ca || 1 ||
[Analyze grammar]

bharatasyānvaye caivājamīḍho nāma pārthivaḥ |
babhūva bharataśreṣṭha yajvā dharmabhṛtāṃ varaḥ || 2 ||
[Analyze grammar]

tasya putro mahānāsījjahnurnāma nareśvaraḥ |
duhitṛtvamanuprāptā gaṅgā yasya mahātmanaḥ || 3 ||
[Analyze grammar]

tasyātmajastulyaguṇaḥ sindhudvīpo mahāyaśāḥ |
sindhudvīpācca rājarṣirbalākāśvo mahābalaḥ || 4 ||
[Analyze grammar]

vallabhastasya tanayaḥ sākṣāddharma ivāparaḥ |
kuśikastasya tanayaḥ sahasrākṣasamadyutiḥ || 5 ||
[Analyze grammar]

kuśikasyātmajaḥ śrīmāngādhirnāma janeśvaraḥ |
aputraḥ sa mahābāhurvanavāsamudāvasat || 6 ||
[Analyze grammar]

kanyā jajñe sutā tasya vane nivasataḥ sataḥ |
nāmnā satyavatī nāma rūpeṇāpratimā bhuvi || 7 ||
[Analyze grammar]

tāṃ vavre bhārgavaḥ śrīmāṃścyavanasyātmajaḥ prabhuḥ |
ṛcīka iti vikhyāto vipule tapasi sthitaḥ || 8 ||
[Analyze grammar]

sa tāṃ na pradadau tasmai ṛcīkāya mahātmane |
daridra iti matvā vai gādhiḥ śatrunibarhaṇaḥ || 9 ||
[Analyze grammar]

pratyākhyāya punaryāntamabravīdrājasattamaḥ |
śulkaṃ pradīyatāṃ mahyaṃ tato vetsyasi me sutām || 10 ||
[Analyze grammar]

ṛcīka uvāca |
kiṃ prayacchāmi rājendra tubhyaṃ śulkamahaṃ nṛpa |
duhiturbrūhyasaṃsakto mātrābhūtte vicāraṇā || 11 ||
[Analyze grammar]

gādhiruvāca |
candraraśmiprakāśānāṃ hayānāṃ vātaraṃhasām |
ekataḥ śyāmakarṇānāṃ sahasraṃ dehi bhārgava || 12 ||
[Analyze grammar]

bhīṣma uvāca |
tataḥ sa bhṛguśārdūlaścyavanasyātmajaḥ prabhuḥ |
abravīdvaruṇaṃ devamādityaṃ patimambhasām || 13 ||
[Analyze grammar]

ekataḥ śyāmakarṇānāṃ hayānāṃ candravarcasām |
sahasraṃ vātavegānāṃ bhikṣe tvāṃ devasattama || 14 ||
[Analyze grammar]

tatheti varuṇo deva ādityo bhṛgusattamam |
uvāca yatra te chandastatrotthāsyanti vājinaḥ || 15 ||
[Analyze grammar]

dhyātamātre ṛcīkena hayānāṃ candravarcasām |
gaṅgājalātsamuttasthau sahasraṃ vipulaujasām || 16 ||
[Analyze grammar]

adūre kanyakubjasya gaṅgāyāstīramuttamam |
aśvatīrthaṃ tadadyāpi mānavāḥ paricakṣate || 17 ||
[Analyze grammar]

tattadā gādhaye tāta sahasraṃ vājināṃ śubham |
ṛcīkaḥ pradadau prītaḥ śulkārthaṃ japatāṃ varaḥ || 18 ||
[Analyze grammar]

tataḥ sa vismito rājā gādhiḥ śāpabhayena ca |
dadau tāṃ samalaṃkṛtya kanyāṃ bhṛgusutāya vai || 19 ||
[Analyze grammar]

jagrāha pāṇiṃ vidhinā tasya brahmarṣisattamaḥ |
sā ca taṃ patimāsādya paraṃ harṣamavāpa ha || 20 ||
[Analyze grammar]

sa tutoṣa ca viprarṣistasyā vṛttena bhārata |
chandayāmāsa caivaināṃ vareṇa varavarṇinīm || 21 ||
[Analyze grammar]

mātre tatsarvamācakhyau sā kanyā rājasattamam |
atha tāmabravīnmātā sutāṃ kiṃcidavāṅmukhīm || 22 ||
[Analyze grammar]

mamāpi putri bhartā te prasādaṃ kartumarhati |
apatyasya pradānena samarthaḥ sa mahātapāḥ || 23 ||
[Analyze grammar]

tataḥ sā tvaritaṃ gatvā tatsarvaṃ pratyavedayat |
mātuścikīrṣitaṃ rājannṛcīkastāmathābravīt || 24 ||
[Analyze grammar]

guṇavantamapatyaṃ vai tvaṃ ca sā janayiṣyathaḥ |
jananyāstava kalyāṇi mā bhūdvai praṇayo'nyathā || 25 ||
[Analyze grammar]

tava caiva guṇaślāghī putra utpatsyate śubhe |
asmadvaṃśakaraḥ śrīmāṃstava bhrātā ca vaṃśakṛt || 26 ||
[Analyze grammar]

ṛtusnātā ca sāśvatthaṃ tvaṃ ca vṛkṣamudumbaram |
pariṣvajethāḥ kalyāṇi tata iṣṭamavāpsyathaḥ || 27 ||
[Analyze grammar]

carudvayamidaṃ caiva mantrapūtaṃ śucismite |
tvaṃ ca sā copayuñjīthāṃ tataḥ putrāvavāpsyathaḥ || 28 ||
[Analyze grammar]

tataḥ satyavatī hṛṣṭā mātaraṃ pratyabhāṣata |
yadṛcīkena kathitaṃ taccācakhyau carudvayam || 29 ||
[Analyze grammar]

tāmuvāca tato mātā sutāṃ satyavatīṃ tadā |
putri mūrdhnā prapannāyāḥ kuruṣva vacanaṃ mama || 30 ||
[Analyze grammar]

bhartrā ya eṣa dattaste carurmantrapuraskṛtaḥ |
etaṃ prayaccha mahyaṃ tvaṃ madīyaṃ tvaṃ gṛhāṇa ca || 31 ||
[Analyze grammar]

vyatyāsaṃ vṛkṣayoścāpi karavāva śucismite |
yadi pramāṇaṃ vacanaṃ mama māturanindite || 32 ||
[Analyze grammar]

vyaktaṃ bhagavatā cātra kṛtamevaṃ bhaviṣyati |
tato me tvaccarau bhāvaḥ pādape ca sumadhyame |
kathaṃ viśiṣṭo bhrātā te bhavedityeva cintaya || 33 ||
[Analyze grammar]

tathā ca kṛtavatyau te mātā satyavatī ca sā |
atha garbhāvanuprāpte ubhe te vai yudhiṣṭhira || 34 ||
[Analyze grammar]

dṛṣṭvā garbhamanuprāptāṃ bhāryāṃ sa ca mahānṛṣiḥ |
uvāca tāṃ satyavatīṃ durmanā bhṛgusattamaḥ || 35 ||
[Analyze grammar]

vyatyāsenopayuktaste carurvyaktaṃ bhaviṣyati |
vyatyāsaḥ pādape cāpi suvyaktaṃ te kṛtaḥ śubhe || 36 ||
[Analyze grammar]

mayā hi viśvaṃ yadbrahma tvaccarau saṃniveśitam |
kṣatravīryaṃ ca sakalaṃ carau tasyā niveśitam || 37 ||
[Analyze grammar]

trilokavikhyātaguṇaṃ tvaṃ vipraṃ janayiṣyasi |
sā ca kṣatraṃ viśiṣṭaṃ vai tata etatkṛtaṃ mayā || 38 ||
[Analyze grammar]

vyatyāsastu kṛto yasmāttvayā mātrā tathaiva ca |
tasmātsā brāhmaṇaśreṣṭhaṃ mātā te janayiṣyati || 39 ||
[Analyze grammar]

kṣatriyaṃ tūgrakarmāṇaṃ tvaṃ bhadre janayiṣyasi |
na hi te tatkṛtaṃ sādhu mātṛsnehena bhāmini || 40 ||
[Analyze grammar]

sā śrutvā śokasaṃtaptā papāta varavarṇinī |
bhūmau satyavatī rājaṃśchinneva rucirā latā || 41 ||
[Analyze grammar]

pratilabhya ca sā saṃjñāṃ śirasā praṇipatya ca |
uvāca bhāryā bhartāraṃ gādheyī brāhmaṇarṣabham || 42 ||
[Analyze grammar]

prasādayantyāṃ bhāryāyāṃ mayi brahmavidāṃ vara |
prasādaṃ kuru viprarṣe na me syātkṣatriyaḥ sutaḥ || 43 ||
[Analyze grammar]

kāmaṃ mamograkarmā vai pautro bhavitumarhati |
na tu me syātsuto brahmanneṣa me dīyatāṃ varaḥ || 44 ||
[Analyze grammar]

evamastviti hovāca svāṃ bhāryāṃ sumahātapāḥ |
tataḥ sā janayāmāsa jamadagniṃ sutaṃ śubham || 45 ||
[Analyze grammar]

viśvāmitraṃ cājanayadgādherbhāryā yaśasvinī |
ṛṣeḥ prabhāvādrājendra brahmarṣiṃ brahmavādinam || 46 ||
[Analyze grammar]

tato brāhmaṇatāṃ yāto viśvāmitro mahātapāḥ |
kṣatriyaḥ so'pyatha tathā brahmavaṃśasya kārakaḥ || 47 ||
[Analyze grammar]

tasya putrā mahātmāno brahmavaṃśavivardhanāḥ |
tapasvino brahmavido gotrakartāra eva ca || 48 ||
[Analyze grammar]

madhucchandaśca bhagavāndevarātaśca vīryavān |
akṣīṇaśca śakuntaśca babhruḥ kālapathastathā || 49 ||
[Analyze grammar]

yājñavalkyaśca vikhyātastathā sthūṇo mahāvrataḥ |
ulūko yamadūtaśca tatharṣiḥ saindhavāyanaḥ || 50 ||
[Analyze grammar]

karṇajaṅghaśca bhagavāngālavaśca mahānṛṣiḥ |
ṛṣirvajrastathākhyātaḥ śālaṅkāyana eva ca || 51 ||
[Analyze grammar]

lālāṭyo nāradaścaiva tathā kūrcamukhaḥ smṛtaḥ |
vādulirmusalaścaiva rakṣogrīvastathaiva ca || 52 ||
[Analyze grammar]

aṅghriko naikabhṛccaiva śilāyūpaḥ sitaḥ śuciḥ |
cakrako mārutantavyo vātaghno'thāśvalāyanaḥ || 53 ||
[Analyze grammar]

śyāmāyano'tha gārgyaśca jābāliḥ suśrutastathā |
kārīṣiratha saṃśrutyaḥ parapauravatantavaḥ || 54 ||
[Analyze grammar]

mahānṛṣiśca kapilastatharṣistārakāyanaḥ |
tathaiva copagahanastatharṣiścārjunāyanaḥ || 55 ||
[Analyze grammar]

mārgamitrirhiraṇyākṣo jaṅghārirbabhruvāhanaḥ |
sūtirvibhūtiḥ sūtaśca suraṅgaśca tathaiva hi || 56 ||
[Analyze grammar]

ārāddhirnāmayaścaiva cāmpeyojjayanau tathā |
navatanturbakanakhaḥ śayonaratireva ca || 57 ||
[Analyze grammar]

śayoruhaścārumatsyaḥ śirīṣī cātha gārdabhiḥ |
ujjayoniradāpekṣī nāradī ca mahānṛṣiḥ |
viśvāmitrātmajāḥ sarve munayo brahmavādinaḥ || 58 ||
[Analyze grammar]

tannaiṣa kṣatriyo rājanviśvāmitro mahātapāḥ |
ṛcīkenāhitaṃ brahma parametadyudhiṣṭhira || 59 ||
[Analyze grammar]

etatte sarvamākhyātaṃ tattvena bharatarṣabha |
viśvāmitrasya vai janma somasūryāgnitejasaḥ || 60 ||
[Analyze grammar]

yatra yatra ca saṃdeho bhūyaste rājasattama |
tatra tatra ca māṃ brūhi cchettāsmi tava saṃśayān || 61 ||
[Analyze grammar]