Chapter 324

yudhiṣṭhira uvāca |
yadā bhakto bhagavata āsīdrājā mahāvasuḥ |
kimarthaṃ sa paribhraṣṭo viveśa vivaraṃ bhuvaḥ || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
ṛṣīṇāṃ caiva saṃvādaṃ tridaśānāṃ ca bhārata || 2 ||
[Analyze grammar]

ajena yaṣṭavyamiti devāḥ prāhurdvijottamān |
sa ca chāgo hyajo jñeyo nānyaḥ paśuriti sthitiḥ || 3 ||
[Analyze grammar]

ṛṣaya ūcuḥ |
bījairyajñeṣu yaṣṭavyamiti vai vaidikī śrutiḥ |
ajasaṃjñāni bījāni chāgaṃ na ghnantumarhatha || 4 ||
[Analyze grammar]

naiṣa dharmaḥ satāṃ devā yatra vadhyeta vai paśuḥ |
idaṃ kṛtayugaṃ śreṣṭhaṃ kathaṃ vadhyeta vai paśuḥ || 5 ||
[Analyze grammar]

bhīṣma uvāca |
teṣāṃ saṃvadatāmevamṛṣīṇāṃ vibudhaiḥ saha |
mārgāgato nṛpaśreṣṭhastaṃ deśaṃ prāptavānvasuḥ |
antarikṣacaraḥ śrīmānsamagrabalavāhanaḥ || 6 ||
[Analyze grammar]

taṃ dṛṣṭvā sahasāyāntaṃ vasuṃ te tvantarikṣagam |
ūcurdvijātayo devāneṣa chetsyati saṃśayam || 7 ||
[Analyze grammar]

yajvā dānapatiḥ śreṣṭhaḥ sarvabhūtahitapriyaḥ |
kathaṃ svidanyathā brūyādvākyameṣa mahānvasuḥ || 8 ||
[Analyze grammar]

evaṃ te saṃvidaṃ kṛtvā vibudhā ṛṣayastathā |
apṛcchansahasābhyetya vasuṃ rājānamantikāt || 9 ||
[Analyze grammar]

bho rājankena yaṣṭavyamajenāhosvidauṣadhaiḥ |
etannaḥ saṃśayaṃ chindhi pramāṇaṃ no bhavānmataḥ || 10 ||
[Analyze grammar]

sa tānkṛtāñjalirbhūtvā paripapraccha vai vasuḥ |
kasya vaḥ ko mataḥ pakṣo brūta satyaṃ samāgatāḥ || 11 ||
[Analyze grammar]

ṛṣaya ūcuḥ |
dhānyairyaṣṭavyamityeṣa pakṣo'smākaṃ narādhipa |
devānāṃ tu paśuḥ pakṣo mato rājanvadasva naḥ || 12 ||
[Analyze grammar]

bhīṣma uvāca |
devānāṃ tu mataṃ jñātvā vasunā pakṣasaṃśrayāt |
chāgenājena yaṣṭavyamevamuktaṃ vacastadā || 13 ||
[Analyze grammar]

kupitāste tataḥ sarve munayaḥ sūryavarcasaḥ |
ūcurvasuṃ vimānasthaṃ devapakṣārthavādinam || 14 ||
[Analyze grammar]

surapakṣo gṛhītaste yasmāttasmāddivaḥ pata |
adya prabhṛti te rājannākāśe vihatā gatiḥ |
asmacchāpābhighātena mahīṃ bhittvā pravekṣyasi || 15 ||
[Analyze grammar]

tatastasminmuhūrte'tha rājoparicarastadā |
adho vai saṃbabhūvāśu bhūmervivarago nṛpaḥ |
smṛtistvenaṃ na prajahau tadā nārāyaṇājñayā || 16 ||
[Analyze grammar]

devāstu sahitāḥ sarve vasoḥ śāpavimokṣaṇam |
cintayāmāsuravyagrāḥ sukṛtaṃ hi nṛpasya tat || 17 ||
[Analyze grammar]

anenāsmatkṛte rājñā śāpaḥ prāpto mahātmanā |
asya pratipriyaṃ kāryaṃ sahitairno divaukasaḥ || 18 ||
[Analyze grammar]

iti buddhyā vyavasyāśu gatvā niścayamīśvarāḥ |
ūcustaṃ hṛṣṭamanaso rājoparicaraṃ tadā || 19 ||
[Analyze grammar]

brahmaṇyadevaṃ tvaṃ bhaktaḥ surāsuraguruṃ harim |
kāmaṃ sa tava tuṣṭātmā kuryācchāpavimokṣaṇam || 20 ||
[Analyze grammar]

mānanā tu dvijātīnāṃ kartavyā vai mahātmanām |
avaśyaṃ tapasā teṣāṃ phalitavyaṃ nṛpottama || 21 ||
[Analyze grammar]

yatastvaṃ sahasā bhraṣṭa ākāśānmedinītalam |
ekaṃ tvanugrahaṃ tubhyaṃ dadmo vai nṛpasattama || 22 ||
[Analyze grammar]

yāvattvaṃ śāpadoṣeṇa kālamāsiṣyase'nagha |
bhūmervivarago bhūtvā tāvantaṃ kālamāpsyasi |
yajñeṣu suhutāṃ viprairvasordhārāṃ mahātmabhiḥ || 23 ||
[Analyze grammar]

prāpsyase'smadanudhyānānmā ca tvāṃ glānirāspṛśet |
na kṣutpipāse rājendra bhūmeśchidre bhaviṣyataḥ || 24 ||
[Analyze grammar]

vasordhārānupītatvāttejasāpyāyitena ca |
sa devo'smadvarātprīto brahmalokaṃ hi neṣyati || 25 ||
[Analyze grammar]

evaṃ dattvā varaṃ rājñe sarve tatra divaukasaḥ |
gatāḥ svabhavanaṃ devā ṛṣayaśca tapodhanāḥ || 26 ||
[Analyze grammar]

cakre ca satataṃ pūjāṃ viṣvaksenāya bhārata |
japyaṃ jagau ca satataṃ nārāyaṇamukhodgatam || 27 ||
[Analyze grammar]

tatrāpi pañcabhiryajñaiḥ pañcakālānariṃdama |
ayajaddhariṃ surapatiṃ bhūmervivarago'pi san || 28 ||
[Analyze grammar]

tato'sya tuṣṭo bhagavānbhaktyā nārāyaṇo hariḥ |
ananyabhaktasya satastatparasya jitātmanaḥ || 29 ||
[Analyze grammar]

varado bhagavānviṣṇuḥ samīpasthaṃ dvijottamam |
garutmantaṃ mahāvegamābabhāṣe smayanniva || 30 ||
[Analyze grammar]

dvijottama mahābhāga gamyatāṃ vacanānmama |
samrāḍrājā vasurnāma dharmātmā māṃ samāśritaḥ || 31 ||
[Analyze grammar]

brāhmaṇānāṃ prakopena praviṣṭo vasudhātalam |
mānitāste tu viprendrāstvaṃ tu gaccha dvijottama || 32 ||
[Analyze grammar]

bhūmervivarasaṃguptaṃ garuḍeha mamājñayā |
adhaścaraṃ nṛpaśreṣṭhaṃ khecaraṃ kuru māciram || 33 ||
[Analyze grammar]

garutmānatha vikṣipya pakṣau mārutavegavān |
viveśa vivaraṃ bhūmeryatrāste vāgyato vasuḥ || 34 ||
[Analyze grammar]

tata enaṃ samutkṣipya sahasā vinatāsutaḥ |
utpapāta nabhastūrṇaṃ tatra cainamamuñcata || 35 ||
[Analyze grammar]

tasminmuhūrte saṃjajñe rājoparicaraḥ punaḥ |
saśarīro gataścaiva brahmalokaṃ nṛpottamaḥ || 36 ||
[Analyze grammar]

evaṃ tenāpi kaunteya vāgdoṣāddevatājñayā |
prāptā gatirayajvārhā dvijaśāpānmahātmanā || 37 ||
[Analyze grammar]

kevalaṃ puruṣastena sevito harirīśvaraḥ |
tataḥ śīghraṃ jahau śāpaṃ brahmalokamavāpa ca || 38 ||
[Analyze grammar]

etatte sarvamākhyātaṃ te bhūtā mānavā yathā |
nārado'pi yathā śvetaṃ dvīpaṃ sa gatavānṛṣiḥ |
tatte sarvaṃ pravakṣyāmi śṛṇuṣvaikamanā nṛpa || 39 ||
[Analyze grammar]