Chapter 320

bhīṣma uvāca |
ityevamuktvā vacanaṃ brahmarṣiḥ sumahātapāḥ |
prātiṣṭhata śukaḥ siddhiṃ hitvā lokāṃścaturvidhān || 1 ||
[Analyze grammar]

tamo hyaṣṭavidhaṃ hitvā jahau pañcavidhaṃ rajaḥ |
tataḥ sattvaṃ jahau dhīmāṃstadadbhutamivābhavat || 2 ||
[Analyze grammar]

tatastasminpade nitye nirguṇe liṅgavarjite |
brahmaṇi pratyatiṣṭhatsa vidhūmo'gniriva jvalan || 3 ||
[Analyze grammar]

ulkāpātā diśāṃ dāhā bhūmikampāstathaiva ca |
prādurbhūtāḥ kṣaṇe tasmiṃstadadbhutamivābhavat || 4 ||
[Analyze grammar]

drumāḥ śākhāśca mumucuḥ śikharāṇi ca parvatāḥ |
nirghātaśabdaiśca girirhimavāndīryatīva ha || 5 ||
[Analyze grammar]

na babhāse sahasrāṃśurna jajvāla ca pāvakaḥ |
hradāśca saritaścaiva cukṣubhuḥ sāgarāstathā || 6 ||
[Analyze grammar]

vavarṣa vāsavastoyaṃ rasavacca sugandhi ca |
vavau samīraṇaścāpi divyagandhavahaḥ śuciḥ || 7 ||
[Analyze grammar]

sa śṛṅge'pratime divye himavanmerusaṃbhave |
saṃśliṣṭe śvetapīte dve rukmarūpyamaye śubhe || 8 ||
[Analyze grammar]

śatayojanavistāre tiryagūrdhvaṃ ca bhārata |
udīcīṃ diśamāśritya rucire saṃdadarśa ha || 9 ||
[Analyze grammar]

so'viśaṅkena manasā tathaivābhyapatacchukaḥ |
tataḥ parvataśṛṅge dve sahasaiva dvidhākṛte |
adṛśyetāṃ mahārāja tadadbhutamivābhavat || 10 ||
[Analyze grammar]

tataḥ parvataśṛṅgābhyāṃ sahasaiva viniḥsṛtaḥ |
na ca pratijaghānāsya sa gatiṃ parvatottamaḥ || 11 ||
[Analyze grammar]

tato mahānabhūcchabdo divi sarvadivaukasām |
gandharvāṇāmṛṣīṇāṃ ca ye ca śailanivāsinaḥ || 12 ||
[Analyze grammar]

dṛṣṭvā śukamatikrāntaṃ parvataṃ ca dvidhākṛtam |
sādhu sādhviti tatrāsīnnādaḥ sarvatra bhārata || 13 ||
[Analyze grammar]

sa pūjyamāno devaiśca gandharvairṛṣibhistathā |
yakṣarākṣasasaṃghaiśca vidyādharagaṇaistathā || 14 ||
[Analyze grammar]

divyaiḥ puṣpaiḥ samākīrṇamantarikṣaṃ samantataḥ |
āsītkila mahārāja śukābhipatane tadā || 15 ||
[Analyze grammar]

tato mandākinīṃ ramyāmupariṣṭādabhivrajan |
śuko dadarśa dharmātmā puṣpitadrumakānanām || 16 ||
[Analyze grammar]

tasyāṃ krīḍantyabhiratāḥ snānti caivāpsarogaṇāḥ |
śūnyākāraṃ nirākārāḥ śukaṃ dṛṣṭvā vivāsasaḥ || 17 ||
[Analyze grammar]

taṃ prakramantamājñāya pitā snehasamanvitaḥ |
uttamāṃ gatimāsthāya pṛṣṭhato'nusasāra ha || 18 ||
[Analyze grammar]

śukastu mārutādūrdhvaṃ gatiṃ kṛtvāntarikṣagām |
darśayitvā prabhāvaṃ svaṃ sarvabhūto'bhavattadā || 19 ||
[Analyze grammar]

mahāyogagatiṃ tvagryāṃ vyāsotthāya mahātapāḥ |
nimeṣāntaramātreṇa śukābhipatanaṃ yayau || 20 ||
[Analyze grammar]

sa dadarśa dvidhā kṛtvā parvatāgraṃ śukaṃ gatam |
śaśaṃsurṛṣayastasmai karma putrasya tattadā || 21 ||
[Analyze grammar]

tataḥ śuketi dīrgheṇa śaikṣeṇākranditastadā |
svayaṃ pitrā svareṇoccaistrīṃllokānanunādya vai || 22 ||
[Analyze grammar]

śukaḥ sarvagato bhūtvā sarvātmā sarvatomukhaḥ |
pratyabhāṣata dharmātmā bhoḥśabdenānunādayan || 23 ||
[Analyze grammar]

tata ekākṣaraṃ nādaṃ bho ityeva samīrayan |
pratyāharajjagatsarvamuccaiḥ sthāvarajaṅgamam || 24 ||
[Analyze grammar]

tataḥ prabhṛti cādyāpi śabdānuccāritānpṛthak |
girigahvarapṛṣṭheṣu vyājahāra śukaṃ prati || 25 ||
[Analyze grammar]

antarhitaḥ prabhāvaṃ tu darśayitvā śukastadā |
guṇānsaṃtyajya śabdādīnpadamadhyagamatparam || 26 ||
[Analyze grammar]

mahimānaṃ tu taṃ dṛṣṭvā putrasyāmitatejasaḥ |
niṣasāda giriprasthe putramevānucintayan || 27 ||
[Analyze grammar]

tato mandākinītīre krīḍanto'psarasāṃ gaṇāḥ |
āsādya tamṛṣiṃ sarvāḥ saṃbhrāntā gatacetasaḥ || 28 ||
[Analyze grammar]

jale nililyire kāścitkāścidgulmānprapedire |
vasanānyādaduḥ kāściddṛṣṭvā taṃ munisattamam || 29 ||
[Analyze grammar]

tāṃ muktatāṃ tu vijñāya muniḥ putrasya vai tadā |
saktatāmātmanaścaiva prīto'bhūdvrīḍitaśca ha || 30 ||
[Analyze grammar]

taṃ devagandharvavṛto maharṣigaṇapūjitaḥ |
pinākahasto bhagavānabhyāgacchata śaṃkaraḥ || 31 ||
[Analyze grammar]

tamuvāca mahādevaḥ sāntvapūrvamidaṃ vacaḥ |
putraśokābhisaṃtaptaṃ kṛṣṇadvaipāyanaṃ tadā || 32 ||
[Analyze grammar]

agnerbhūmerapāṃ vāyorantarikṣasya caiva ha |
vīryeṇa sadṛśaḥ putrastvayā mattaḥ purā vṛtaḥ || 33 ||
[Analyze grammar]

sa tathālakṣaṇo jātastapasā tava saṃbhṛtaḥ |
mama caiva prabhāvena brahmatejomayaḥ śuciḥ || 34 ||
[Analyze grammar]

sa gatiṃ paramāṃ prāpto duṣprāpāmajitendriyaiḥ |
daivatairapi viprarṣe taṃ tvaṃ kimanuśocasi || 35 ||
[Analyze grammar]

yāvatsthāsyanti girayo yāvatsthāsyanti sāgarāḥ |
tāvattavākṣayā kīrtiḥ saputrasya bhaviṣyati || 36 ||
[Analyze grammar]

chāyāṃ svaputrasadṛśīṃ sarvato'napagāṃ sadā |
drakṣyase tvaṃ ca loke'sminmatprasādānmahāmune || 37 ||
[Analyze grammar]

so'nunīto bhagavatā svayaṃ rudreṇa bhārata |
chāyāṃ paśyansamāvṛttaḥ sa muniḥ parayā mudā || 38 ||
[Analyze grammar]

iti janma gatiścaiva śukasya bharatarṣabha |
vistareṇa mayākhyātaṃ yanmāṃ tvaṃ paripṛcchasi || 39 ||
[Analyze grammar]

etadācaṣṭa me rājandevarṣirnāradaḥ purā |
vyāsaścaiva mahāyogī saṃjalpeṣu pade pade || 40 ||
[Analyze grammar]

itihāsamimaṃ puṇyaṃ mokṣadharmārthasaṃhitam |
dhārayedyaḥ śamaparaḥ sa gacchetparamāṃ gatim || 41 ||
[Analyze grammar]