Chapter 296

vasiṣṭha uvāca |
aprabuddhamathāvyaktamimaṃ guṇavidhiṃ śṛṇu |
guṇāndhārayate hyeṣā sṛjatyākṣipate tathā || 1 ||
[Analyze grammar]

ajasraṃ tviha krīḍārthaṃ vikurvantī narādhipa |
ātmānaṃ bahudhā kṛtvā tānyeva ca vicakṣate || 2 ||
[Analyze grammar]

etadevaṃ vikurvāṇāṃ budhyamāno na budhyate |
avyaktabodhanāccaiva budhyamānaṃ vadantyapi || 3 ||
[Analyze grammar]

na tveva budhyate'vyaktaṃ saguṇaṃ vātha nirguṇam |
kadācittveva khalvetadāhurapratibuddhakam || 4 ||
[Analyze grammar]

budhyate yadi vāvyaktametadvai pañcaviṃśakam |
budhyamāno bhavatyeṣa saṅgātmaka iti śrutiḥ || 5 ||
[Analyze grammar]

anenāpratibuddheti vadantyavyaktamacyutam |
avyaktabodhanāccaiva budhyamānaṃ vadantyuta || 6 ||
[Analyze grammar]

pañcaviṃśaṃ mahātmānaṃ na cāsāvapi budhyate |
ṣaḍviṃśaṃ vimalaṃ buddhamaprameyaṃ sanātanam || 7 ||
[Analyze grammar]

satataṃ pañcaviṃśaṃ ca caturviṃśaṃ ca budhyate |
dṛśyādṛśye hyanugatamubhāveva mahādyutī || 8 ||
[Analyze grammar]

avyaktaṃ na tu tadbrahma budhyate tāta kevalam |
kevalaṃ pañcaviṃśaṃ ca caturviṃśaṃ na paśyati || 9 ||
[Analyze grammar]

budhyamāno yadātmānamanyo'hamiti manyate |
tadā prakṛtimāneṣa bhavatyavyaktalocanaḥ || 10 ||
[Analyze grammar]

budhyate ca parāṃ buddhiṃ viśuddhāmamalāṃ yadā |
ṣaḍviṃśo rājaśārdūla tadā buddhatvamāvrajet || 11 ||
[Analyze grammar]

tatastyajati so'vyaktaṃ sargapralayadharmiṇam |
nirguṇaḥ prakṛtiṃ veda guṇayuktāmacetanām || 12 ||
[Analyze grammar]

tataḥ kevaladharmāsau bhavatyavyaktadarśanāt |
kevalena samāgamya vimukto''tmānamāpnuyāt || 13 ||
[Analyze grammar]

etattattattvamityāhurnistattvamajarāmaram |
tattvasaṃśrayaṇādetattattvavanna ca mānada |
pañcaviṃśatitattvāni pravadanti manīṣiṇaḥ || 14 ||
[Analyze grammar]

na caiṣa tattvavāṃstāta nistattvastveṣa buddhimān |
eṣa muñcati tattvaṃ hi kṣipraṃ buddhasya lakṣaṇam || 15 ||
[Analyze grammar]

ṣaḍviṃśo'hamiti prājño gṛhyamāṇo'jarāmaraḥ |
kevalena balenaiva samatāṃ yātyasaṃśayam || 16 ||
[Analyze grammar]

ṣaḍviṃśena prabuddhena budhyamāno'pyabuddhimān |
etannānātvamityuktaṃ sāṃkhyaśrutinidarśanāt || 17 ||
[Analyze grammar]

cetanena sametasya pañcaviṃśatikasya ca |
ekatvaṃ vai bhavatyasya yadā buddhyā na budhyate || 18 ||
[Analyze grammar]

budhyamāno'prabuddhena samatāṃ yāti maithila |
saṅgadharmā bhavatyeṣa niḥsaṅgātmā narādhipa || 19 ||
[Analyze grammar]

niḥsaṅgātmānamāsādya ṣaḍviṃśakamajaṃ viduḥ |
vibhustyajati cāvyaktaṃ yadā tvetadvibudhyate |
caturviṃśamagādhaṃ ca ṣaḍviṃśasya prabodhanāt || 20 ||
[Analyze grammar]

eṣa hyapratibuddhaśca budhyamānaśca te'nagha |
prokto buddhaśca tattvena yathāśrutinidarśanāt |
nānātvaikatvametāvaddraṣṭavyaṃ śāstradṛṣṭibhiḥ || 21 ||
[Analyze grammar]

maśakodumbare yadvadanyatvaṃ tadvadetayoḥ |
matsyo'mbhasi yathā tadvadanyatvamupalabhyate || 22 ||
[Analyze grammar]

evamevāvagantavyaṃ nānātvaikatvametayoḥ |
etadvimokṣa ityuktamavyaktajñānasaṃhitam || 23 ||
[Analyze grammar]

pañcaviṃśatikasyāsya yo'yaṃ deheṣu vartate |
eṣa mokṣayitavyeti prāhuravyaktagocarāt || 24 ||
[Analyze grammar]

so'yamevaṃ vimucyeta nānyatheti viniścayaḥ |
pareṇa paradharmā ca bhavatyeṣa sametya vai || 25 ||
[Analyze grammar]

viśuddhadharmā śuddhena buddhena ca sa buddhimān |
vimuktadharmā muktena sametya puruṣarṣabha || 26 ||
[Analyze grammar]

niyogadharmiṇā caiva niyogātmā bhavatyapi |
vimokṣiṇā vimokṣaśca sametyeha tathā bhavet || 27 ||
[Analyze grammar]

śucikarmā śuciścaiva bhavatyamitadīptimān |
vimalātmā ca bhavati sametya vimalātmanā || 28 ||
[Analyze grammar]

kevalātmā tathā caiva kevalena sametya vai |
svatantraśca svatantreṇa svatantratvamavāpnute || 29 ||
[Analyze grammar]

etāvadetatkathitaṃ mayā te tathyaṃ mahārāja yathārthatattvam |
amatsaratvaṃ pratigṛhya cārthaṃ sanātanaṃ brahma viśuddhamādyam || 30 ||
[Analyze grammar]

na vedaniṣṭhasya janasya rājanpradeyametatparamaṃ tvayā bhavet |
vivitsamānāya vibodhakārakaṃ prabodhahetoḥ praṇatasya śāsanam || 31 ||
[Analyze grammar]

na deyametacca tathānṛtātmane śaṭhāya klībāya na jihmabuddhaye |
na paṇḍitajñānaparopatāpine deyaṃ tvayedaṃ vinibodha yādṛśe || 32 ||
[Analyze grammar]

śraddhānvitāyātha guṇānvitāya parāpavādādviratāya nityam |
viśuddhayogāya budhāya caiva kriyāvate'tha kṣamiṇe hitāya || 33 ||
[Analyze grammar]

viviktaśīlāya vidhipriyāya vivādahīnāya bahuśrutāya |
vijānate caiva na cāhitakṣame dame ca śaktāya śame ca dehinām || 34 ||
[Analyze grammar]

etairguṇairhīnatame na deyametatparaṃ brahma viśuddhamāhuḥ |
na śreyasā yokṣyati tādṛśe kṛtaṃ dharmapravaktāramapātradānāt || 35 ||
[Analyze grammar]

pṛthvīmimāṃ yadyapi ratnapūrṇāṃ dadyānnadeyaṃ tvidamavratāya |
jitendriyāyaitadasaṃśayaṃ te bhavetpradeyaṃ paramaṃ narendra || 36 ||
[Analyze grammar]

karāla mā te bhayamastu kiṃcidetacchrutaṃ brahma paraṃ tvayādya |
yathāvaduktaṃ paramaṃ pavitraṃ niḥśokamatyantamanādimadhyam || 37 ||
[Analyze grammar]

agādhajanmāmaraṇaṃ ca rājannirāmayaṃ vītabhayaṃ śivaṃ ca |
samīkṣya mohaṃ tyaja cādya sarvaṃ jñānasya tattvārthamidaṃ viditvā || 38 ||
[Analyze grammar]

avāptametaddhi purā sanātanāddhiraṇyagarbhādgadato narādhipa |
prasādya yatnena tamugratejasaṃ sanātanaṃ brahma yathādya vai tvayā || 39 ||
[Analyze grammar]

pṛṣṭastvayā cāsmi yathā narendra tathā mayedaṃ tvayi coktamadya |
tathāvāptaṃ brahmaṇo me narendra mahajjñānaṃ mokṣavidāṃ purāṇam || 40 ||
[Analyze grammar]

bhīṣma uvāca |
etaduktaṃ paraṃ brahma yasmānnāvartate punaḥ |
pañcaviṃśo mahārāja paramarṣinidarśanāt || 41 ||
[Analyze grammar]

punarāvṛttimāpnoti paraṃ jñānamavāpya ca |
nāvabudhyati tattvena budhyamāno'jarāmaraḥ || 42 ||
[Analyze grammar]

etanniḥśreyasakaraṃ jñānānāṃ te paraṃ mayā |
kathitaṃ tattvatastāta śrutvā devarṣito nṛpa || 43 ||
[Analyze grammar]

hiraṇyagarbhādṛṣiṇā vasiṣṭhena mahātmanā |
vasiṣṭhādṛṣiśārdūlānnārado'vāptavānidam || 44 ||
[Analyze grammar]

nāradādviditaṃ mahyametadbrahma sanātanam |
mā śucaḥ kauravendra tvaṃ śrutvaitatparamaṃ padam || 45 ||
[Analyze grammar]

yena kṣarākṣare vitte na bhayaṃ tasya vidyate |
vidyate tu bhayaṃ tasya yo naitadvetti pārthiva || 46 ||
[Analyze grammar]

avijñānācca mūḍhātmā punaḥ punarupadravan |
pretya jātisahasrāṇi maraṇāntānyupāśnute || 47 ||
[Analyze grammar]

devalokaṃ tathā tiryaṅmānuṣyamapi cāśnute |
yadi śudhyati kālena tasmādajñānasāgarāt || 48 ||
[Analyze grammar]

ajñānasāgaro ghoro hyavyakto'gādha ucyate |
ahanyahani majjanti yatra bhūtāni bhārata || 49 ||
[Analyze grammar]

yasmādagādhādavyaktāduttīrṇastvaṃ sanātanāt |
tasmāttvaṃ virajāścaiva vitamaskaśca pārthiva || 50 ||
[Analyze grammar]