Chapter 258

yudhiṣṭhira uvāca |
kathaṃ kāryaṃ parīkṣeta śīghraṃ vātha cireṇa vā |
sarvathā kāryadurge'sminbhavānnaḥ paramo guruḥ || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
cirakārestu yatpūrvaṃ vṛttamāṅgirase kule || 2 ||
[Analyze grammar]

cirakārika bhadraṃ te bhadraṃ te cirakārika |
cirakārī hi medhāvī nāparādhyati karmasu || 3 ||
[Analyze grammar]

cirakārī mahāprājño gautamasyābhavatsutaḥ |
ciraṃ hi sarvakāryāṇi samekṣāvānprapadyate || 4 ||
[Analyze grammar]

ciraṃ saṃcintayannarthāṃściraṃ jāgracciraṃ svapan |
cirakāryābhisaṃpatteścirakārī tathocyate || 5 ||
[Analyze grammar]

alasagrahaṇaṃ prāpto durmedhāvī tathocyate |
buddhilāghavayuktena janenādīrghadarśinā || 6 ||
[Analyze grammar]

vyabhicāre tu kasmiṃścidvyatikramyāparānsutān |
pitroktaḥ kupitenātha jahīmāṃ jananīmiti || 7 ||
[Analyze grammar]

sa tatheti cireṇoktvā svabhāvāccirakārikaḥ |
vimṛśya cirakāritvāccintayāmāsa vai ciram || 8 ||
[Analyze grammar]

piturājñāṃ kathaṃ kuryāṃ na hanyāṃ mātaraṃ katham |
kathaṃ dharmacchale nāsminnimajjeyamasādhuvat || 9 ||
[Analyze grammar]

piturājñā paro dharmaḥ svadharmo mātṛrakṣaṇam |
asvatantraṃ ca putratvaṃ kiṃ nu māṃ nātra pīḍayet || 10 ||
[Analyze grammar]

striyaṃ hatvā mātaraṃ ca ko hi jātu sukhī bhavet |
pitaraṃ cāpyavajñāya kaḥ pratiṣṭhāmavāpnuyāt || 11 ||
[Analyze grammar]

anavajñā pituryuktā dhāraṇaṃ mātṛrakṣaṇam |
yuktakṣamāvubhāvetau nātivartetamāṃ katham || 12 ||
[Analyze grammar]

pitā hyātmānamādhatte jāyāyāṃ jajñiyāmiti |
śīlacāritragotrasya dhāraṇārthaṃ kulasya ca || 13 ||
[Analyze grammar]

so'hamātmā svayaṃ pitrā putratve prakṛtaḥ punaḥ |
vijñānaṃ me kathaṃ na syādbubudhe cātmasaṃbhavam || 14 ||
[Analyze grammar]

jātakarmaṇi yatprāha pitā yaccopakarmaṇi |
paryāptaḥ sa dṛḍhīkāraḥ piturgauravaniścaye || 15 ||
[Analyze grammar]

gururagryaḥ paro dharmaḥ poṣaṇādhyayanāddhitaḥ |
pitā yadāha dharmaḥ sa vedeṣvapi suniścitaḥ || 16 ||
[Analyze grammar]

prītimātraṃ pituḥ putraḥ sarvaṃ putrasya vai pitā |
śarīrādīni deyāni pitā tvekaḥ prayacchati || 17 ||
[Analyze grammar]

tasmātpiturvacaḥ kāryaṃ na vicāryaṃ kathaṃcana |
pātakānyapi pūyante piturvacanakāriṇaḥ || 18 ||
[Analyze grammar]

bhoge bhāgye prasavane sarvalokanidarśane |
bhartrā caiva samāyoge sīmantonnayane tathā || 19 ||
[Analyze grammar]

pitā svargaḥ pitā dharmaḥ pitā paramakaṃ tapaḥ |
pitari prītimāpanne sarvāḥ prīyanti devatāḥ || 20 ||
[Analyze grammar]

āśiṣastā bhajantyenaṃ puruṣaṃ prāha yāḥ pitā |
niṣkṛtiḥ sarvapāpānāṃ pitā yadabhinandati || 21 ||
[Analyze grammar]

mucyate bandhanātpuṣpaṃ phalaṃ vṛntātpramucyate |
kliśyannapi sutasnehaiḥ pitā snehaṃ na muñcati || 22 ||
[Analyze grammar]

etadvicintitaṃ tāvatputrasya pitṛgauravam |
pitā hyalpataraṃ sthānaṃ cintayiṣyāmi mātaram || 23 ||
[Analyze grammar]

yo hyayaṃ mayi saṃghāto martyatve pāñcabhautikaḥ |
asya me jananī hetuḥ pāvakasya yathāraṇiḥ |
mātā dehāraṇiḥ puṃsāṃ sarvasyārtasya nirvṛtiḥ || 24 ||
[Analyze grammar]

na ca śocati nāpyenaṃ sthāviryamapakarṣati |
śriyā hīno'pi yo gehe ambeti pratipadyate || 25 ||
[Analyze grammar]

putrapautrasamākīrṇo jananīṃ yaḥ samāśritaḥ |
api varṣaśatasyānte sa dvihāyanavaccaret || 26 ||
[Analyze grammar]

samarthaṃ vāsamarthaṃ vā kṛśaṃ vāpyakṛśaṃ tathā |
rakṣatyeva sutaṃ mātā nānyaḥ poṣṭā vidhānataḥ || 27 ||
[Analyze grammar]

tadā sa vṛddho bhavati yadā bhavati duḥkhitaḥ |
tadā śūnyaṃ jagattasya yadā mātrā viyujyate || 28 ||
[Analyze grammar]

nāsti mātṛsamā chāyā nāsti mātṛsamā gatiḥ |
nāsti mātṛsamaṃ trāṇaṃ nāsti mātṛsamā prapā || 29 ||
[Analyze grammar]

kukṣisaṃdhāraṇāddhātrī jananājjananī smṛtā |
aṅgānāṃ vardhanādambā vīrasūtvena vīrasūḥ || 30 ||
[Analyze grammar]

śiśoḥ śuśrūṣaṇācchuśrūrmātā dehamanantaram |
cetanāvānnaro hanyādyasya nāsuṣiraṃ śiraḥ || 31 ||
[Analyze grammar]

dampatyoḥ prāṇasaṃśleṣe yo'bhisaṃdhiḥ kṛtaḥ kila |
taṃ mātā vā pitā veda bhūtārtho mātari sthitaḥ || 32 ||
[Analyze grammar]

mātā jānāti yadgotraṃ mātā jānāti yasya saḥ |
māturbharaṇamātreṇa prītiḥ snehaḥ pituḥ prajāḥ || 33 ||
[Analyze grammar]

pāṇibandhaṃ svayaṃ kṛtvā sahadharmamupetya ca |
yadi yāpyanti puruṣāḥ striyo nārhanti yāpyatām || 34 ||
[Analyze grammar]

bharaṇāddhi striyo bhartā pātyāccaiva striyāḥ patiḥ |
guṇasyāsya nivṛttau tu na bhartā na patiḥ patiḥ || 35 ||
[Analyze grammar]

evaṃ strī nāparādhnoti nara evāparādhyati |
vyuccaraṃśca mahādoṣaṃ nara evāparādhyati || 36 ||
[Analyze grammar]

striyā hi paramo bhartā daivataṃ paramaṃ smṛtam |
tasyātmanā tu sadṛśamātmānaṃ paramaṃ dadau |
sarvakāryāparādhyatvānnāparādhyanti cāṅganāḥ || 37 ||
[Analyze grammar]

yaścanokto hi nirdeśaḥ striyā maithunatṛptaye |
tasya smārayato vyaktamadharmo nātra saṃśayaḥ || 38 ||
[Analyze grammar]

yāvannārīṃ mātaraṃ ca gaurave cādhike sthitām |
avadhyāṃ tu vijānīyuḥ paśavo'pyavicakṣaṇāḥ || 39 ||
[Analyze grammar]

devatānāṃ samāvāyamekasthaṃ pitaraṃ viduḥ |
martyānāṃ devatānāṃ ca snehādabhyeti mātaram || 40 ||
[Analyze grammar]

evaṃ vimṛśatastasya cirakāritayā bahu |
dīrghaḥ kālo vyatikrāntastatastasyāgamatpitā || 41 ||
[Analyze grammar]

medhātithirmahāprājño gautamastapasi sthitaḥ |
vimṛśya tena kālena patnyāḥ saṃsthāvyatikramam || 42 ||
[Analyze grammar]

so'bravīdduḥkhasaṃtapto bhṛśamaśrūṇi vartayan |
śrutadhairyaprasādena paścāttāpamupāgataḥ || 43 ||
[Analyze grammar]

āśramaṃ mama saṃprāptastrilokeśaḥ puraṃdaraḥ |
atithivratamāsthāya brāhmaṇaṃ rūpamāsthitaḥ || 44 ||
[Analyze grammar]

samayā sāntvito vāgbhiḥ svāgatenābhipūjitaḥ |
arghyaṃ pādyaṃ ca nyāyena tayābhipratipāditaḥ || 45 ||
[Analyze grammar]

paravatyasmi cāpyuktaḥ praṇayiṣye nayena ca |
atra cākuśale jāte striyo nāsti vyatikramaḥ || 46 ||
[Analyze grammar]

evaṃ na strī na caivāhaṃ nādhvagastridaśeśvaraḥ |
aparādhyati dharmasya pramādastvaparādhyati || 47 ||
[Analyze grammar]

īrṣyājaṃ vyasanaṃ prāhustena caivordhvaretasaḥ |
īrṣyayā tvahamākṣipto magno duṣkṛtasāgare || 48 ||
[Analyze grammar]

hatvā sādhvīṃ ca nārīṃ ca vyasanitvācca śāsitām |
bhartavyatvena bhāryāṃ ca ko nu māṃ tārayiṣyati || 49 ||
[Analyze grammar]

antareṇa mayājñaptaścirakārī hyudāradhīḥ |
yadyadya cirakārī syātsa māṃ trāyeta pātakāt || 50 ||
[Analyze grammar]

cirakārika bhadraṃ te bhadraṃ te cirakārika |
yadyadya cirakārī tvaṃ tato'si cirakārikaḥ || 51 ||
[Analyze grammar]

trāhi māṃ mātaraṃ caiva tapo yaccārjitaṃ mayā |
ātmānaṃ pātakebhyaśca bhavādya cirakārikaḥ || 52 ||
[Analyze grammar]

sahajaṃ cirakāritvaṃ ciraprājñatayā tava |
saphalaṃ tattavādyāstu bhavādya cirakārikaḥ || 53 ||
[Analyze grammar]

ciramāśaṃsito mātrā ciraṃ garbheṇa dhāritaḥ |
saphalaṃ cirakāritvaṃ kuru tvaṃ cirakārika || 54 ||
[Analyze grammar]

cirāyate ca saṃtāpācciraṃ svapiti vāritaḥ |
āvayościrasaṃtāpādavekṣya cirakārika || 55 ||
[Analyze grammar]

evaṃ sa duḥkhito rājanmaharṣirgautamastadā |
cirakāriṃ dadarśātha putraṃ sthitamathāntike || 56 ||
[Analyze grammar]

cirakārī tu pitaraṃ dṛṣṭvā paramaduḥkhitaḥ |
śastraṃ tyaktvā tato mūrdhnā prasādāyopacakrame || 57 ||
[Analyze grammar]

gautamastu sutaṃ dṛṣṭvā śirasā patitaṃ bhuvi |
patnīṃ caiva nirākārāṃ parāmabhyagamanmudam || 58 ||
[Analyze grammar]

na hi sā tena saṃbhedaṃ patnī nītā mahātmanā |
vijane cāśramasthena putraścāpi samāhitaḥ || 59 ||
[Analyze grammar]

hanyāttvanapavādena śastrapāṇau sute sthite |
vinītaṃ praśnayitvā ca vyavasyedātmakarmasu || 60 ||
[Analyze grammar]

buddhiścāsītsutaṃ dṛṣṭvā pituścaraṇayornatam |
śastragrahaṇacāpalyaṃ saṃvṛṇoti bhayāditi || 61 ||
[Analyze grammar]

tataḥ pitrā ciraṃ stutvā ciraṃ cāghrāya mūrdhani |
ciraṃ dorbhyāṃ pariṣvajya ciraṃ jīvetyudāhṛtaḥ || 62 ||
[Analyze grammar]

evaṃ sa gautamaḥ putraṃ prītiharṣasamanvitaḥ |
abhinandya mahāprājña idaṃ vacanamabravīt || 63 ||
[Analyze grammar]

cirakārika bhadraṃ te cirakārī ciraṃ bhava |
cirāyamāṇe tvayi ca ciramasmi suduḥkhitaḥ || 64 ||
[Analyze grammar]

gāthāścāpyabravīdvidvāngautamo munisattamaḥ |
cirakāriṣu dhīreṣu guṇoddeśasamāśrayāt || 65 ||
[Analyze grammar]

cireṇa mitraṃ badhnīyāccireṇa ca kṛtaṃ tyajet |
cireṇa hi kṛtaṃ mitraṃ ciraṃ dhāraṇamarhati || 66 ||
[Analyze grammar]

rāge darpe ca māne ca drohe pāpe ca karmaṇi |
apriye caiva kartavye cirakārī praśasyate || 67 ||
[Analyze grammar]

bandhūnāṃ suhṛdāṃ caiva bhṛtyānāṃ strījanasya ca |
avyakteṣvaparādheṣu cirakārī praśasyate || 68 ||
[Analyze grammar]

evaṃ sa gautamastasya prītaḥ putrasya bhārata |
karmaṇā tena kauravya cirakāritayā tayā || 69 ||
[Analyze grammar]

evaṃ sarveṣu kāryeṣu vimṛśya puruṣastataḥ |
cireṇa niścayaṃ kṛtvā ciraṃ na paritapyate || 70 ||
[Analyze grammar]

ciraṃ dhārayate roṣaṃ ciraṃ karma niyacchati |
paścāttāpakaraṃ karma na kiṃcidupapadyate || 71 ||
[Analyze grammar]

ciraṃ vṛddhānupāsīta ciramanvāsya pūjayet |
ciraṃ dharmānniṣeveta kuryāccānveṣaṇaṃ ciram || 72 ||
[Analyze grammar]

ciramanvāsya viduṣaściraṃ śiṣṭānniṣevya ca |
ciraṃ vinīya cātmānaṃ ciraṃ yātyanavajñatām || 73 ||
[Analyze grammar]

bruvataśca parasyāpi vākyaṃ dharmopasaṃhitam |
ciraṃ pṛcchecciraṃ brūyācciraṃ na paribhūyate || 74 ||
[Analyze grammar]

upāsya bahulāstasminnāśrame sumahātapāḥ |
samāḥ svargaṃ gato vipraḥ putreṇa sahitastadā || 75 ||
[Analyze grammar]