Chapter 250

nārada uvāca |
vinīya duḥkhamabalā sā tvatīvāyatekṣaṇā |
uvāca prāñjalirbhūtvā latevāvarjitā tadā || 1 ||
[Analyze grammar]

tvayā sṛṣṭā kathaṃ nārī mādṛśī vadatāṃ vara |
raudrakarmābhijāyeta sarvaprāṇibhayaṃkarī || 2 ||
[Analyze grammar]

bibhemyahamadharmasya dharmyamādiśa karma me |
tvaṃ māṃ bhītāmavekṣasva śiveneśvara cakṣuṣā || 3 ||
[Analyze grammar]

bālānvṛddhānvayaḥsthāṃśca na hareyamanāgasaḥ |
prāṇinaḥ prāṇināmīśa namaste'bhiprasīda me || 4 ||
[Analyze grammar]

priyānputrānvayasyāṃśca bhrātṝnmātṝḥ pitṝnapi |
apadhyāsyanti yaddeva mṛtāṃsteṣāṃ bibhemyaham || 5 ||
[Analyze grammar]

kṛpaṇāśruparikledo dahenmāṃ śāśvatīḥ samāḥ |
tebhyo'haṃ balavadbhītā śaraṇaṃ tvāmupāgatā || 6 ||
[Analyze grammar]

yamasya bhavane deva yātyante pāpakarmiṇaḥ |
prasādaye tvā varada prasādaṃ kuru me prabho || 7 ||
[Analyze grammar]

etamicchāmyahaṃ kāmaṃ tvatto lokapitāmaha |
iccheyaṃ tvatprasādācca tapastaptuṃ sureśvara || 8 ||
[Analyze grammar]

pitāmaha uvāca |
mṛtyo saṃkalpitā me tvaṃ prajāsaṃhārahetunā |
gaccha saṃhara sarvāstvaṃ prajā mā ca vicāraya || 9 ||
[Analyze grammar]

etadevamavaśyaṃ hi bhavitā naitadanyathā |
kriyatāmanavadyāṅgi yathoktaṃ madvaco'naghe || 10 ||
[Analyze grammar]

nārada uvāca |
evamuktā mahābāho mṛtyuḥ parapuraṃjaya |
na vyājahāra tasthau ca prahvā bhagavadunmukhī || 11 ||
[Analyze grammar]

punaḥ punarathoktā sā gatasattveva bhāminī |
tūṣṇīmāsīttato devo devānāmīśvareśvaraḥ || 12 ||
[Analyze grammar]

prasasāda kila brahmā svayamevātmanātmavān |
smayamānaśca lokeśo lokānsarvānavaikṣata || 13 ||
[Analyze grammar]

nivṛttaroṣe tasmiṃstu bhagavatyaparājite |
sā kanyāpajagāmāsya samīpāditi naḥ śrutam || 14 ||
[Analyze grammar]

apasṛtyāpratiśrutya prajāsaṃharaṇaṃ tadā |
tvaramāṇeva rājendra mṛtyurdhenukamabhyayāt || 15 ||
[Analyze grammar]

sā tatra paramaṃ devī tapo'carata duścaram |
samā hyekapade tasthau daśa padmāni pañca ca || 16 ||
[Analyze grammar]

tāṃ tathā kurvatīṃ tatra tapaḥ paramaduścaram |
punareva mahātejā brahmā vacanamabravīt || 17 ||
[Analyze grammar]

kuruṣva me vaco mṛtyo tadanādṛtya satvarā |
tathaivaikapade tāta punaranyāni sapta sā || 18 ||
[Analyze grammar]

tasthau padmāni ṣaṭcaiva pañca dve caiva mānada |
bhūyaḥ padmāyutaṃ tāta mṛgaiḥ saha cacāra sā || 19 ||
[Analyze grammar]

punargatvā tato rājanmaunamātiṣṭhaduttamam |
apsu varṣasahasrāṇi sapta caikaṃ ca pārthiva || 20 ||
[Analyze grammar]

tato jagāma sā kanyā kauśikīṃ bharatarṣabha |
tatra vāyujalāhārā cacāra niyamaṃ punaḥ || 21 ||
[Analyze grammar]

tato yayau mahābhāgā gaṅgāṃ meruṃ ca kevalam |
tasthau dārviva niśceṣṭā bhūtānāṃ hitakāmyayā || 22 ||
[Analyze grammar]

tato himavato mūrdhni yatra devāḥ samījire |
tatrāṅguṣṭhena rājendra nikharvamaparaṃ tataḥ |
tasthau pitāmahaṃ caiva toṣayāmāsa yatnataḥ || 23 ||
[Analyze grammar]

tatastāmabravīttatra lokānāṃ prabhavāpyayaḥ |
kimidaṃ vartate putri kriyatāṃ tadvaco mama || 24 ||
[Analyze grammar]

tato'bravītpunarmṛtyurbhagavantaṃ pitāmaham |
na hareyaṃ prajā deva punastvāhaṃ prasādaye || 25 ||
[Analyze grammar]

tāmadharmabhayatrastāṃ punareva ca yācatīm |
tadābravīddevadevo nigṛhyedaṃ vacastataḥ || 26 ||
[Analyze grammar]

adharmo nāsti te mṛtyo saṃyacchemāḥ prajāḥ śubhe |
mayā hyuktaṃ mṛṣā bhadre bhavitā neha kiṃcana || 27 ||
[Analyze grammar]

dharmaḥ sanātanaśca tvāmihaivānupravekṣyate |
ahaṃ ca vibudhāścaiva tvaddhite niratāḥ sadā || 28 ||
[Analyze grammar]

imamanyaṃ ca te kāmaṃ dadāmi manasepsitam |
na tvā doṣeṇa yāsyanti vyādhisaṃpīḍitāḥ prajāḥ || 29 ||
[Analyze grammar]

puruṣeṣu ca rūpeṇa puruṣastvaṃ bhaviṣyasi |
strīṣu strīrūpiṇī caiva tṛtīyeṣu napuṃsakam || 30 ||
[Analyze grammar]

saivamuktā mahārāja kṛtāñjaliruvāca ha |
punareva mahātmānaṃ neti deveśamavyayam || 31 ||
[Analyze grammar]

tāmabravīttadā devo mṛtyo saṃhara mānavān |
adharmaste na bhavitā tathā dhyāsyāmyahaṃ śubhe || 32 ||
[Analyze grammar]

yānaśrubindūnpatitānapaśyaṃ ye pāṇibhyāṃ dhāritāste purastāt |
te vyādhayo mānavānghorarūpāḥ prāpte kāle pīḍayiṣyanti mṛtyo || 33 ||
[Analyze grammar]

sarveṣāṃ tvaṃ prāṇināmantakāle kāmakrodhau sahitau yojayethāḥ |
evaṃ dharmastvāmupaiṣyatyameyo na cādharmaṃ lapsyase tulyavṛttiḥ || 34 ||
[Analyze grammar]

evaṃ dharmaṃ pālayiṣyasyathoktaṃ na cātmānaṃ majjayiṣyasyadharme |
tasmātkāmaṃ rocayābhyāgataṃ tvaṃ saṃyojyātho saṃharasveha jantūn || 35 ||
[Analyze grammar]

sā vai tadā mṛtyusaṃjñāpadeśācchāpādbhītā bāḍhamityabravīttam |
atho prāṇānprāṇināmantakāle kāmakrodhau prāpya nirmohya hanti || 36 ||
[Analyze grammar]

mṛtyorye te vyādhayaścāśrupātā manuṣyāṇāṃ rujyate yaiḥ śarīram |
sarveṣāṃ vai prāṇināṃ prāṇanānte tasmācchokaṃ mā kṛthā budhya buddhyā || 37 ||
[Analyze grammar]

sarve devāḥ prāṇināṃ prāṇanānte gatvā vṛttāḥ saṃnivṛttāstathaiva |
evaṃ sarve mānavāḥ prāṇanānte gatvāvṛttā devavadrājasiṃha || 38 ||
[Analyze grammar]

vāyurbhīmo bhīmanādo mahaujāḥ sarveṣāṃ ca prāṇināṃ prāṇabhūtaḥ |
nānāvṛttirdehināṃ dehabhede tasmādvāyurdevadevo viśiṣṭaḥ || 39 ||
[Analyze grammar]

sarve devā martyasaṃjñāviśiṣṭāḥ sarve martyā devasaṃjñāviśiṣṭāḥ |
tasmātputraṃ mā śuco rājasiṃha putraḥ svargaṃ prāpya te modate ha || 40 ||
[Analyze grammar]

evaṃ mṛtyurdevasṛṣṭā prajānāṃ prāpte kāle saṃharantī yathāvat |
tasyāścaiva vyādhayaste'śrupātāḥ prāpte kāle saṃharantīha jantūn || 41 ||
[Analyze grammar]