Chapter 231

bhīṣma uvāca |
ityukto'bhipraśasyaitatparamarṣestu śāsanam |
mokṣadharmārthasaṃyuktamidaṃ praṣṭuṃ pracakrame || 1 ||
[Analyze grammar]

śuka uvāca |
prajāvāñśrotriyo yajvā vṛddhaḥ prajño'nasūyakaḥ |
anāgatamanaitihyaṃ kathaṃ brahmādhigacchati || 2 ||
[Analyze grammar]

tapasā brahmacaryeṇa sarvatyāgena medhayā |
sāṃkhye vā yadi vā yoge etatpṛṣṭo'bhidhatsva me || 3 ||
[Analyze grammar]

manasaścendriyāṇāṃ cāpyaikāgryaṃ samavāpyate |
yenopāyena puruṣaistacca vyākhyātumarhasi || 4 ||
[Analyze grammar]

vyāsa uvāca |
nānyatra vidyātapasornānyatrendriyanigrahāt |
nānyatra sarvasaṃtyāgātsiddhiṃ vindati kaścana || 5 ||
[Analyze grammar]

mahābhūtāni sarvāṇi pūrvasṛṣṭiḥ svayaṃbhuvaḥ |
bhūyiṣṭhaṃ prāṇabhṛdgrāme niviṣṭāni śarīriṣu || 6 ||
[Analyze grammar]

bhūmerdeho jalātsāro jyotiṣaścakṣuṣī smṛte |
prāṇāpānāśrayo vāyuḥ kheṣvākāśaṃ śarīriṇām || 7 ||
[Analyze grammar]

krānte viṣṇurbale śakraḥ koṣṭhe'gnirbhuktamarchati |
karṇayoḥ pradiśaḥ śrotre jihvāyāṃ vāksarasvatī || 8 ||
[Analyze grammar]

karṇau tvakcakṣuṣī jihvā nāsikā caiva pañcamī |
darśanānīndriyoktāni dvārāṇyāhārasiddhaye || 9 ||
[Analyze grammar]

śabdaṃ sparśaṃ tathā rūpaṃ rasaṃ gandhaṃ ca pañcamam |
indriyāṇi pṛthaktvarthānmanaso darśayantyuta || 10 ||
[Analyze grammar]

indriyāṇi mano yuṅkte vaśyānyanteva vājinaḥ |
manaścāpi sadā yuṅkte bhūtātmā hṛdayāśritaḥ || 11 ||
[Analyze grammar]

indriyāṇāṃ tathaiveṣāṃ sarveṣāmīśvaraṃ manaḥ |
niyame ca visarge ca bhūtātmā manasastathā || 12 ||
[Analyze grammar]

indriyāṇīndriyārthāśca svabhāvaścetanā manaḥ |
prāṇāpānau ca jīvaśca nityaṃ deheṣu dehinām || 13 ||
[Analyze grammar]

āśrayo nāsti sattvasya guṇaśabdo na cetanā |
sattvaṃ hi tejaḥ sṛjati na guṇānvai kadācana || 14 ||
[Analyze grammar]

evaṃ saptadaśaṃ dehe vṛtaṃ ṣoḍaśabhirguṇaiḥ |
manīṣī manasā vipraḥ paśyatyātmānamātmani || 15 ||
[Analyze grammar]

na hyayaṃ cakṣuṣā dṛśyo na ca sarvairapīndriyaiḥ |
manasā saṃpradīptena mahānātmā prakāśate || 16 ||
[Analyze grammar]

aśabdasparśarūpaṃ tadarasāgandhamavyayam |
aśarīraṃ śarīre sve nirīkṣeta nirindriyam || 17 ||
[Analyze grammar]

avyaktaṃ vyaktadeheṣu martyeṣvamaramāśritam |
yo'nupaśyati sa pretya kalpate brahmabhūyase || 18 ||
[Analyze grammar]

vidyābhijanasaṃpanne brāhmaṇe gavi hastini |
śuni caiva śvapāke ca paṇḍitāḥ samadarśinaḥ || 19 ||
[Analyze grammar]

sa hi sarveṣu bhūteṣu jaṅgameṣu dhruveṣu ca |
vasatyeko mahānātmā yena sarvamidaṃ tatam || 20 ||
[Analyze grammar]

sarvabhūteṣu cātmānaṃ sarvabhūtāni cātmani |
yadā paśyati bhūtātmā brahma saṃpadyate tadā || 21 ||
[Analyze grammar]

yāvānātmani vedātmā tāvānātmā parātmani |
ya evaṃ satataṃ veda so'mṛtatvāya kalpate || 22 ||
[Analyze grammar]

sarvabhūtātmabhūtasya sarvabhūtahitasya ca |
devāpi mārge muhyanti apadasya padaiṣiṇaḥ || 23 ||
[Analyze grammar]

śakunīnāmivākāśe jale vāricarasya vā |
yathā gatirna dṛśyeta tathaiva sumahātmanaḥ || 24 ||
[Analyze grammar]

kālaḥ pacati bhūtāni sarvāṇyevātmanātmani |
yasmiṃstu pacyate kālastaṃ na vedeha kaścana || 25 ||
[Analyze grammar]

na tadūrdhvaṃ na tiryakca nādho na ca tiraḥ punaḥ |
na madhye pratigṛhṇīte naiva kaścitkutaścana || 26 ||
[Analyze grammar]

sarve'ntaḥsthā ime lokā bāhyameṣāṃ na kiṃcana |
yaḥ sahasraṃ samāgacchedyathā bāṇo guṇacyutaḥ || 27 ||
[Analyze grammar]

naivāntaṃ kāraṇasyeyādyadyapi syānmanojavaḥ |
tasmātsūkṣmātsūkṣmataraṃ nāsti sthūlataraṃ tataḥ || 28 ||
[Analyze grammar]

sarvataḥpāṇipādāntaṃ sarvatokṣiśiromukham |
sarvataḥśrutimalloke sarvamāvṛtya tiṣṭhati || 29 ||
[Analyze grammar]

tadevāṇoraṇutaraṃ tanmahadbhyo mahattaram |
tadantaḥ sarvabhūtānāṃ dhruvaṃ tiṣṭhanna dṛśyate || 30 ||
[Analyze grammar]

akṣaraṃ ca kṣaraṃ caiva dvaidhībhāvo'yamātmanaḥ |
kṣaraḥ sarveṣu bhūteṣu divyaṃ hyamṛtamakṣaram || 31 ||
[Analyze grammar]

navadvāraṃ puraṃ gatvā haṃso hi niyato vaśī |
īśaḥ sarvasya bhūtasya sthāvarasya carasya ca || 32 ||
[Analyze grammar]

hānibhaṅgavikalpānāṃ navānāṃ saṃśrayeṇa ca |
śarīrāṇāmajasyāhurhaṃsatvaṃ pāradarśinaḥ || 33 ||
[Analyze grammar]

haṃsoktaṃ cākṣaraṃ caiva kūṭasthaṃ yattadakṣaram |
tadvidvānakṣaraṃ prāpya jahāti prāṇajanmanī || 34 ||
[Analyze grammar]