Chapter 203

yudhiṣṭhira uvāca |
yogaṃ me paramaṃ tāta mokṣasya vada bhārata |
tamahaṃ tattvato jñātumicchāmi vadatāṃ vara || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
saṃvādaṃ mokṣasaṃyuktaṃ śiṣyasya guruṇā saha || 2 ||
[Analyze grammar]

kaścidbrāhmaṇamāsīnamācāryamṛṣisattamam |
śiṣyaḥ paramamedhāvī śreyorthī susamāhitaḥ |
caraṇāvupasaṃgṛhya sthitaḥ prāñjalirabravīt || 3 ||
[Analyze grammar]

upāsanātprasanno'si yadi vai bhagavanmama |
saṃśayo me mahānkaścittanme vyākhyātumarhasi || 4 ||
[Analyze grammar]

kutaścāhaṃ kutaśca tvaṃ tatsamyagbrūhi yatparam |
kathaṃ ca sarvabhūteṣu sameṣu dvijasattama |
samyagvṛttā nivartante viparītāḥ kṣayodayāḥ || 5 ||
[Analyze grammar]

vedeṣu cāpi yadvākyaṃ laukikaṃ vyāpakaṃ ca yat |
etadvidvanyathātattvaṃ sarvaṃ vyākhyātumarhasi || 6 ||
[Analyze grammar]

gururuvāca |
śṛṇu śiṣya mahāprājña brahmaguhyamidaṃ param |
adhyātmaṃ sarvabhūtānāmāgamānāṃ ca yadvasu || 7 ||
[Analyze grammar]

vāsudevaḥ sarvamidaṃ viśvasya brahmaṇo mukham |
satyaṃ dānamatho yajñastitikṣā dama ārjavam || 8 ||
[Analyze grammar]

puruṣaṃ sanātanaṃ viṣṇuṃ yattadvedavido viduḥ |
sargapralayakartāramavyaktaṃ brahma śāśvatam |
tadidaṃ brahma vārṣṇeyamitihāsaṃ śṛṇuṣva me || 9 ||
[Analyze grammar]

brāhmaṇo brāhmaṇaiḥ śrāvyo rājanyaḥ kṣatriyaistathā |
māhātmyaṃ devadevasya viṣṇoramitatejasaḥ |
arhastvamasi kalyāṇa vārṣṇeyaṃ śṛṇu yatparam || 10 ||
[Analyze grammar]

kālacakramanādyantaṃ bhāvābhāvasvalakṣaṇam |
trailokyaṃ sarvabhūteṣu cakravatparivartate || 11 ||
[Analyze grammar]

yattadakṣaramavyaktamamṛtaṃ brahma śāśvatam |
vadanti puruṣavyāghraṃ keśavaṃ puruṣarṣabham || 12 ||
[Analyze grammar]

pitṝndevānṛṣīṃścaiva tathā vai yakṣadānavān |
nāgāsuramanuṣyāṃśca sṛjate paramo'vyayaḥ || 13 ||
[Analyze grammar]

tathaiva vedaśāstrāṇi lokadharmāṃśca śāśvatān |
pralaye prakṛtiṃ prāpya yugādau sṛjate prabhuḥ || 14 ||
[Analyze grammar]

yathartuṣvṛtuliṅgāni nānārūpāṇi paryaye |
dṛśyante tāni tānyeva tathā brahmāharātriṣu || 15 ||
[Analyze grammar]

atha yadyadyadā bhāvi kālayogādyugādiṣu |
tattadutpadyate jñānaṃ lokayātrāvidhānajam || 16 ||
[Analyze grammar]

yugānte'ntarhitānvedānsetihāsānmaharṣayaḥ |
lebhire tapasā pūrvamanujñātāḥ svayaṃbhuvā || 17 ||
[Analyze grammar]

vedavidveda bhagavānvedāṅgāni bṛhaspatiḥ |
bhārgavo nītiśāstraṃ ca jagāda jagato hitam || 18 ||
[Analyze grammar]

gāndharvaṃ nārado vedaṃ bharadvājo dhanurgraham |
devarṣicaritaṃ gārgyaḥ kṛṣṇātreyaścikitsitam || 19 ||
[Analyze grammar]

nyāyatantrāṇyanekāni taistairuktāni vādibhiḥ |
hetvāgamasadācārairyaduktaṃ tadupāsyate || 20 ||
[Analyze grammar]

anādyaṃ yatparaṃ brahma na devā narṣayo viduḥ |
ekastadveda bhagavāndhātā nārāyaṇaḥ prabhuḥ || 21 ||
[Analyze grammar]

nārāyaṇādṛṣigaṇāstathā mukhyāḥ surāsurāḥ |
rājarṣayaḥ purāṇāśca paramaṃ duḥkhabheṣajam || 22 ||
[Analyze grammar]

puruṣādhiṣṭhitaṃ bhāvaṃ prakṛtiḥ sūyate sadā |
hetuyuktamataḥ sarvaṃ jagatsaṃparivartate || 23 ||
[Analyze grammar]

dīpādanye yathā dīpāḥ pravartante sahasraśaḥ |
prakṛtiḥ sṛjate tadvadānantyānnāpacīyate || 24 ||
[Analyze grammar]

avyaktakarmajā buddhirahaṃkāraṃ prasūyate |
ākāśaṃ cāpyahaṃkārādvāyurākāśasaṃbhavaḥ || 25 ||
[Analyze grammar]

vāyostejastataścāpastvadbhyo hi vasudhodgatā |
mūlaprakṛtayo'ṣṭau tā jagadetāsvavasthitam || 26 ||
[Analyze grammar]

jñānendriyāṇyataḥ pañca pañca karmendriyāṇyapi |
viṣayāḥ pañca caikaṃ ca vikāre ṣoḍaśaṃ manaḥ || 27 ||
[Analyze grammar]

śrotraṃ tvakcakṣuṣī jihvā ghrāṇaṃ pañcendriyāṇyapi |
pādau pāyurupasthaśca hastau vākkarmaṇāmapi || 28 ||
[Analyze grammar]

śabdaḥ sparśo'tha rūpaṃ ca raso gandhastathaiva ca |
vijñeyaṃ vyāpakaṃ cittaṃ teṣu sarvagataṃ manaḥ || 29 ||
[Analyze grammar]

rasajñāne tu jihveyaṃ vyāhṛte vāktathaiva ca |
indriyairvividhairyuktaṃ sarvaṃ vyastaṃ manastathā || 30 ||
[Analyze grammar]

vidyāttu ṣoḍaśaitāni daivatāni vibhāgaśaḥ |
deheṣu jñānakartāramupāsīnamupāsate || 31 ||
[Analyze grammar]

tadvatsomaguṇā jihvā gandhastu pṛthivīguṇaḥ |
śrotraṃ śabdaguṇaṃ caiva cakṣuragnerguṇastathā |
sparśaṃ vāyuguṇaṃ vidyātsarvabhūteṣu sarvadā || 32 ||
[Analyze grammar]

manaḥ sattvaguṇaṃ prāhuḥ sattvamavyaktajaṃ tathā |
sarvabhūtātmabhūtasthaṃ tasmādbudhyeta buddhimān || 33 ||
[Analyze grammar]

ete bhāvā jagatsarvaṃ vahanti sacarācaram |
śritā virajasaṃ devaṃ yamāhuḥ paramaṃ padam || 34 ||
[Analyze grammar]

navadvāraṃ puraṃ puṇyametairbhāvaiḥ samanvitam |
vyāpya śete mahānātmā tasmātpuruṣa ucyate || 35 ||
[Analyze grammar]

ajaraḥ so'maraścaiva vyaktāvyaktopadeśavān |
vyāpakaḥ saguṇaḥ sūkṣmaḥ sarvabhūtaguṇāśrayaḥ || 36 ||
[Analyze grammar]

yathā dīpaḥ prakāśātmā hrasvo vā yadi vā mahān |
jñānātmānaṃ tathā vidyātpuruṣaṃ sarvajantuṣu || 37 ||
[Analyze grammar]

so'tra vedayate vedyaṃ sa śṛṇoti sa paśyati |
kāraṇaṃ tasya deho'yaṃ sa kartā sarvakarmaṇām || 38 ||
[Analyze grammar]

agnirdārugato yadvadbhinne dārau na dṛśyate |
tathaivātmā śarīrastho yogenaivātra dṛśyate || 39 ||
[Analyze grammar]

nadīṣvāpo yathā yuktā yathā sūrye marīcayaḥ |
saṃtanvānā yathā yānti tathā dehāḥ śarīriṇām || 40 ||
[Analyze grammar]

svapnayoge yathaivātmā pañcendriyasamāgataḥ |
dehamutsṛjya vai yāti tathaivātropalabhyate || 41 ||
[Analyze grammar]

karmaṇā vyāpyate pūrvaṃ karmaṇā copapadyate |
karmaṇā nīyate'nyatra svakṛtena balīyasā || 42 ||
[Analyze grammar]

sa tu dehādyathā dehaṃ tyaktvānyaṃ pratipadyate |
tathā taṃ saṃpravakṣyāmi bhūtagrāmaṃ svakarmajam || 43 ||
[Analyze grammar]