Chapter 186

yudhiṣṭhira uvāca |
ācārasya vidhiṃ tāta procyamānaṃ tvayānagha |
śrotumicchāmi dharmajña sarvajño hyasi me mataḥ || 1 ||
[Analyze grammar]

bhīṣma uvāca |
durācārā durviceṣṭā duṣprajñāḥ priyasāhasāḥ |
asanto hyabhivikhyātāḥ santaścācāralakṣaṇāḥ || 2 ||
[Analyze grammar]

purīṣaṃ yadi vā mūtraṃ ye na kurvanti mānavāḥ |
rājamārge gavāṃ madhye dhānyamadhye ca te śubhāḥ || 3 ||
[Analyze grammar]

śaucamāvaśyakaṃ kṛtvā devatānāṃ ca tarpaṇam |
dharmamāhurmanuṣyāṇāmupaspṛśya nadīṃ taret || 4 ||
[Analyze grammar]

sūryaṃ sadopatiṣṭheta na svapyādbhāskarodaye |
sāyaṃ prātarjapansaṃdhyāṃ tiṣṭhetpūrvāṃ tathāparām || 5 ||
[Analyze grammar]

pañcārdro bhojanaṃ kuryātprāṅmukho maunamāsthitaḥ |
na nindedannabhakṣyāṃśca svādvasvādu ca bhakṣayet || 6 ||
[Analyze grammar]

nārdrapāṇiḥ samuttiṣṭhennārdrapādaḥ svapenniśi |
devarṣināradaproktametadācāralakṣaṇam || 7 ||
[Analyze grammar]

śucikāmamanaḍvāhaṃ devagoṣṭhaṃ catuṣpatham |
brāhmaṇaṃ dhārmikaṃ caiva nityaṃ kuryātpradakṣiṇam || 8 ||
[Analyze grammar]

atithīnāṃ ca sarveṣāṃ preṣyāṇāṃ svajanasya ca |
sāmānyaṃ bhojanaṃ bhṛtyaiḥ puruṣasya praśasyate || 9 ||
[Analyze grammar]

sāyaṃ prātarmanuṣyāṇāmaśanaṃ devanirmitam |
nāntarā bhojanaṃ dṛṣṭamupavāsī tathā bhavet || 10 ||
[Analyze grammar]

homakāle tathā juhvannṛtukāle tathā vrajan |
ananyastrījanaḥ prājño brahmacārī tathā bhavet || 11 ||
[Analyze grammar]

amṛtaṃ brāhmaṇocchiṣṭaṃ jananyā hṛdayaṃ kṛtam |
upāsīta janaḥ satyaṃ satyaṃ santa upāsate || 12 ||
[Analyze grammar]

yajuṣā saṃskṛtaṃ māṃsaṃ nivṛtto māṃsabhakṣaṇāt |
na bhakṣayedvṛthāmāṃsaṃ pṛṣṭhamāṃsaṃ ca varjayet || 13 ||
[Analyze grammar]

svadeśe paradeśe vā atithiṃ nopavāsayet |
kāmyaṃ karmaphalaṃ labdhvā gurūṇāmupapādayet || 14 ||
[Analyze grammar]

gurubhya āsanaṃ deyaṃ kartavyaṃ cābhivādanam |
gurūnabhyarcya yujyante āyuṣā yaśasā śriyā || 15 ||
[Analyze grammar]

nekṣetādityamudyantaṃ na ca nagnāṃ parastriyam |
maithunaṃ samaye dharmyaṃ guhyaṃ caiva samācaret || 16 ||
[Analyze grammar]

tīrthānāṃ hṛdayaṃ tīrthaṃ śucīnāṃ hṛdayaṃ śuciḥ |
sarvamāryakṛtaṃ śaucaṃ vālasaṃsparśanāni ca || 17 ||
[Analyze grammar]

darśane darśane nityaṃ sukhapraśnamudāharet |
sāyaṃ prātaśca viprāṇāṃ pradiṣṭamabhivādanam || 18 ||
[Analyze grammar]

devagoṣṭhe gavāṃ madhye brāhmaṇānāṃ kriyāpathe |
svādhyāye bhojane caiva dakṣiṇaṃ pāṇimuddharet || 19 ||
[Analyze grammar]

paṇyānāṃ śobhanaṃ paṇyaṃ kṛṣīṇāṃ bādyate kṛṣiḥ |
bahukāraṃ ca sasyānāṃ vāhye vāhyaṃ tathā gavām || 20 ||
[Analyze grammar]

saṃpannaṃ bhojane nityaṃ pānīye tarpaṇaṃ tathā |
suśṛtaṃ pāyase brūyādyavāgvāṃ kṛsare tathā || 21 ||
[Analyze grammar]

śmaśrukarmaṇi saṃprāpte kṣute snāne'tha bhojane |
vyādhitānāṃ ca sarveṣāmāyuṣyamabhinandanam || 22 ||
[Analyze grammar]

pratyādityaṃ na meheta na paśyedātmanaḥ śakṛt |
sutastriyā ca śayanaṃ sahabhojyaṃ ca varjayet || 23 ||
[Analyze grammar]

tvaṃkāraṃ nāmadheyaṃ ca jyeṣṭhānāṃ parivarjayet |
avarāṇāṃ samānānāmubhayeṣāṃ na duṣyati || 24 ||
[Analyze grammar]

hṛdayaṃ pāpavṛttānāṃ pāpamākhyāti vaikṛtam |
jñānapūrvaṃ vinaśyanti gūhamānā mahājane || 25 ||
[Analyze grammar]

jñānapūrvaṃ kṛtaṃ pāpaṃ chādayantyabahuśrutāḥ |
nainaṃ manuṣyāḥ paśyanti paśyanti tridivaukasaḥ || 26 ||
[Analyze grammar]

pāpena hi kṛtaṃ pāpaṃ pāpamevānuvartate |
dhārmikeṇa kṛto dharmaḥ kartāramanuvartate || 27 ||
[Analyze grammar]

pāpaṃ kṛtaṃ na smaratīha mūḍho vivartamānasya tadeti kartuḥ |
rāhuryathā candramupaiti cāpi tathābudhaṃ pāpamupaiti karma || 28 ||
[Analyze grammar]

āśayā saṃcitaṃ dravyaṃ yatkāle neha bhujyate |
tadbudhā na praśaṃsanti maraṇaṃ na pratīkṣate || 29 ||
[Analyze grammar]

mānasaṃ sarvabhūtānāṃ dharmamāhurmanīṣiṇaḥ |
tasmātsarveṣu bhūteṣu manasā śivamācaret || 30 ||
[Analyze grammar]

eka eva careddharmaṃ nāsti dharme sahāyatā |
kevalaṃ vidhimāsādya sahāyaḥ kiṃ kariṣyati || 31 ||
[Analyze grammar]

devā yonirmanuṣyāṇāṃ devānāmamṛtaṃ divi |
pretyabhāve sukhaṃ dharmācchaśvattairupabhujyate || 32 ||
[Analyze grammar]