Chapter 14

vaiśaṃpāyana uvāca |
avyāharati kaunteye dharmarāje yudhiṣṭhire |
bhrātṝṇāṃ bruvatāṃ tāṃstānvividhānvedaniścayān || 1 ||
[Analyze grammar]

mahābhijanasaṃpannā śrīmatyāyatalocanā |
abhyabhāṣata rājendraṃ draupadī yoṣitāṃ varā || 2 ||
[Analyze grammar]

āsīnamṛṣabhaṃ rājñāṃ bhrātṛbhiḥ parivāritam |
siṃhaśārdūlasadṛśairvāraṇairiva yūthapam || 3 ||
[Analyze grammar]

abhimānavatī nityaṃ viśeṣeṇa yudhiṣṭhire |
lālitā satataṃ rājñā dharmajñā dharmadarśinī || 4 ||
[Analyze grammar]

āmantrya vipulaśroṇī sāmnā paramavalgunā |
bhartāramabhisaṃprekṣya tato vacanamabravīt || 5 ||
[Analyze grammar]

ime te bhrātaraḥ pārtha śuṣyanta stokakā iva |
vāvāśyamānāstiṣṭhanti na cainānabhinandase || 6 ||
[Analyze grammar]

nandayaitānmahārāja mattāniva mahādvipān |
upapannena vākyena satataṃ duḥkhabhāginaḥ || 7 ||
[Analyze grammar]

kathaṃ dvaitavane rājanpūrvamuktvā tathā vacaḥ |
bhrātṝnetānsma sahitāñśītavātātapārditān || 8 ||
[Analyze grammar]

vayaṃ duryodhanaṃ hatvā mṛdhe bhokṣyāma medinīm |
saṃpūrṇāṃ sarvakāmānāmāhave vijayaiṣiṇaḥ || 9 ||
[Analyze grammar]

virathāṃśca rathānkṛtvā nihatya ca mahāgajān |
saṃstīrya ca rathairbhūmiṃ sasādibhirariṃdamāḥ || 10 ||
[Analyze grammar]

yajatāṃ vividhairyajñaiḥ samṛddhairāptadakṣiṇaiḥ |
vanavāsakṛtaṃ duḥkhaṃ bhaviṣyati sukhāya naḥ || 11 ||
[Analyze grammar]

ityetānevamuktvā tvaṃ svayaṃ dharmabhṛtāṃ vara |
kathamadya punarvīra vinihaṃsi manāṃsyuta || 12 ||
[Analyze grammar]

na klībo vasudhāṃ bhuṅkte na klībo dhanamaśnute |
na klībasya gṛhe putrā matsyāḥ paṅka ivāsate || 13 ||
[Analyze grammar]

nādaṇḍaḥ kṣatriyo bhāti nādaṇḍo bhūtimaśnute |
nādaṇḍasya prajā rājñaḥ sukhamedhanti bhārata || 14 ||
[Analyze grammar]

mitratā sarvabhūteṣu dānamadhyayanaṃ tapaḥ |
brāhmaṇasyaiṣa dharmaḥ syānna rājño rājasattama || 15 ||
[Analyze grammar]

asatāṃ pratiṣedhaśca satāṃ ca paripālanam |
eṣa rājñāṃ paro dharmaḥ samare cāpalāyanam || 16 ||
[Analyze grammar]

yasminkṣamā ca krodhaśca dānādāne bhayābhaye |
nigrahānugrahau cobhau sa vai dharmaviducyate || 17 ||
[Analyze grammar]

na śrutena na dānena na sāntvena na cejyayā |
tvayeyaṃ pṛthivī labdhā notkocena tathāpyuta || 18 ||
[Analyze grammar]

yattadbalamamitrāṇāṃ tathā vīrasamudyatam |
hastyaśvarathasaṃpannaṃ tribhiraṅgairmahattaram || 19 ||
[Analyze grammar]

rakṣitaṃ droṇakarṇābhyāmaśvatthāmnā kṛpeṇa ca |
tattvayā nihataṃ vīra tasmādbhuṅkṣva vasuṃdharām || 20 ||
[Analyze grammar]

jambūdvīpo mahārāja nānājanapadāyutaḥ |
tvayā puruṣaśārdūla daṇḍena mṛditaḥ prabho || 21 ||
[Analyze grammar]

jambūdvīpena sadṛśaḥ krauñcadvīpo narādhipa |
apareṇa mahāmerordaṇḍena mṛditastvayā || 22 ||
[Analyze grammar]

krauñcadvīpena sadṛśaḥ śākadvīpo narādhipa |
pūrveṇa tu mahāmerordaṇḍena mṛditastvayā || 23 ||
[Analyze grammar]

uttareṇa mahāmeroḥ śākadvīpena saṃmitaḥ |
bhadrāśvaḥ puruṣavyāghra daṇḍena mṛditastvayā || 24 ||
[Analyze grammar]

dvīpāśca sāntaradvīpā nānājanapadālayāḥ |
vigāhya sāgaraṃ vīra daṇḍena mṛditāstvayā || 25 ||
[Analyze grammar]

etānyapratimāni tvaṃ kṛtvā karmāṇi bhārata |
na prīyase mahārāja pūjyamāno dvijātibhiḥ || 26 ||
[Analyze grammar]

sa tvaṃ bhrātṝnimāndṛṣṭvā pratinandasva bhārata |
ṛṣabhāniva saṃmattāngajendrānūrjitāniva || 27 ||
[Analyze grammar]

amarapratimāḥ sarve śatrusāhāḥ paraṃtapāḥ |
eko'pi hi sukhāyaiṣāṃ kṣamaḥ syāditi me matiḥ || 28 ||
[Analyze grammar]

kiṃ punaḥ puruṣavyāghrāḥ patayo me nararṣabhāḥ |
samastānīndriyāṇīva śarīrasya viceṣṭane || 29 ||
[Analyze grammar]

anṛtaṃ mābravīcchvaśrūḥ sarvajñā sarvadarśinī |
yudhiṣṭhirastvāṃ pāñcāli sukhe dhāsyatyanuttame || 30 ||
[Analyze grammar]

hatvā rājasahasrāṇi bahūnyāśuparākramaḥ |
tadvyarthaṃ saṃprapaśyāmi mohāttava janādhipa || 31 ||
[Analyze grammar]

yeṣāmunmattako jyeṣṭhaḥ sarve tasyopacāriṇaḥ |
tavonmādena rājendra sonmādāḥ sarvapāṇḍavāḥ || 32 ||
[Analyze grammar]

yadi hi syuranunmattā bhrātaraste janādhipa |
baddhvā tvāṃ nāstikaiḥ sārdhaṃ praśāseyurvasuṃdharām || 33 ||
[Analyze grammar]

kurute mūḍhamevaṃ hi yaḥ śreyo nādhigacchati |
dhūpairañjanayogaiśca nasyakarmabhireva ca |
bheṣajaiḥ sa cikitsyaḥ syādya unmārgeṇa gacchati || 34 ||
[Analyze grammar]

sāhaṃ sarvādhamā loke strīṇāṃ bharatasattama |
tathā vinikṛtāmitrairyāhamicchāmi jīvitum || 35 ||
[Analyze grammar]

eteṣāṃ yatamānānāmutpadyante tu saṃpadaḥ |
tvaṃ tu sarvāṃ mahīṃ labdhvā kuruṣe svayamāpadam || 36 ||
[Analyze grammar]

yathāstāṃ saṃmatau rājñāṃ pṛthivyāṃ rājasattamau |
māndhātā cāmbarīṣaśca tathā rājanvirājase || 37 ||
[Analyze grammar]

praśādhi pṛthivīṃ devīṃ prajā dharmeṇa pālayan |
saparvatavanadvīpāṃ mā rājanvimanā bhava || 38 ||
[Analyze grammar]

yajasva vividhairyajñairjuhvannagnīnprayaccha ca |
purāṇi bhogānvāsāṃsi dvijātibhyo nṛpottama || 39 ||
[Analyze grammar]