Chapter 13

saṃjaya uvāca |
arjuno drauṇinā viddho yuddhe bahubhirāyasaiḥ |
tasya cānucaraiḥ śūraistrigartānāṃ mahārathaiḥ |
drauṇiṃ vivyādha samare tribhireva śilīmukhaiḥ || 1 ||
[Analyze grammar]

tathetarānmaheṣvāsāndvābhyāṃ dvābhyāṃ dhanaṃjayaḥ |
bhūyaścaiva mahābāhuḥ śaravarṣairavākirat || 2 ||
[Analyze grammar]

śarakaṇṭakitāste tu tāvakā bharatarṣabha |
na jahuḥ samare pārthaṃ vadhyamānāḥ śitaiḥ śaraiḥ || 3 ||
[Analyze grammar]

te'rjunaṃ rathavaṃśena droṇaputrapurogamāḥ |
ayodhayanta samare parivārya mahārathāḥ || 4 ||
[Analyze grammar]

taistu kṣiptāḥ śarā rājankārtasvaravibhūṣitāḥ |
arjunasya rathopasthaṃ pūrayāmāsurañjasā || 5 ||
[Analyze grammar]

tathā kṛṣṇau maheṣvāsau vṛṣabhau sarvadhanvinām |
śarairvīkṣya vitunnāṅgau prahṛṣṭau yuddhadurmadau || 6 ||
[Analyze grammar]

kūbaraṃ rathacakrāṇi īṣā yoktrāṇi cābhibho |
yugaṃ caivānukarṣaṃ ca śarabhūtamabhūttadā || 7 ||
[Analyze grammar]

naitādṛśaṃ dṛṣṭapūrvaṃ rājannaiva ca naḥ śrutam |
yādṛśaṃ tatra pārthasya tāvakāḥ saṃpracakrire || 8 ||
[Analyze grammar]

sa rathaḥ sarvato bhāti citrapuṅkhaiḥ śitaiḥ śaraiḥ |
ulkāśataiḥ saṃpradīptaṃ vimānamiva bhūtale || 9 ||
[Analyze grammar]

tato'rjuno mahārāja śaraiḥ saṃnataparvabhiḥ |
avākirattāṃ pṛtanāṃ megho vṛṣṭyā yathācalam || 10 ||
[Analyze grammar]

te vadhyamānāḥ samare pārthanāmāṅkitaiḥ śaraiḥ |
pārthabhūtamamanyanta prekṣamāṇāstathāvidham || 11 ||
[Analyze grammar]

tato'dbhutaśarajvālo dhanuḥśabdānilo mahān |
senendhanaṃ dadāhāśu tāvakaṃ pārthapāvakaḥ || 12 ||
[Analyze grammar]

cakrāṇāṃ patatāṃ caiva yugānāṃ ca dharātale |
tūṇīrāṇāṃ patākānāṃ dhvajānāṃ ca rathaiḥ saha || 13 ||
[Analyze grammar]

īṣāṇāmanukarṣāṇāṃ triveṇūnāṃ ca bhārata |
akṣāṇāmatha yoktrāṇāṃ pratodānāṃ ca sarvaśaḥ || 14 ||
[Analyze grammar]

śirasāṃ patatāṃ caiva kuṇḍaloṣṇīṣadhāriṇām |
bhujānāṃ ca mahārāja skandhānāṃ ca samantataḥ || 15 ||
[Analyze grammar]

chatrāṇāṃ vyajanaiḥ sārdhaṃ mukuṭānāṃ ca rāśayaḥ |
samadṛśyanta pārthasya rathamārgeṣu bhārata || 16 ||
[Analyze grammar]

agamyarūpā pṛthivī māṃsaśoṇitakardamā |
babhūva bharataśreṣṭha rudrasyākrīḍanaṃ yathā |
bhīrūṇāṃ trāsajananī śūrāṇāṃ harṣavardhanī || 17 ||
[Analyze grammar]

hatvā tu samare pārthaḥ sahasre dve paraṃtapa |
rathānāṃ savarūthānāṃ vidhūmo'gniriva jvalan || 18 ||
[Analyze grammar]

yathā hi bhagavānagnirjagaddagdhvā carācaram |
vidhūmo dṛśyate rājaṃstathā pārtho mahārathaḥ || 19 ||
[Analyze grammar]

drauṇistu samare dṛṣṭvā pāṇḍavasya parākramam |
rathenātipatākena pāṇḍavaṃ pratyavārayat || 20 ||
[Analyze grammar]

tāvubhau puruṣavyāghrau śvetāśvau dhanvināṃ varau |
samīyatustadā tūrṇaṃ parasparavadhaiṣiṇau || 21 ||
[Analyze grammar]

tayorāsīnmahārāja bāṇavarṣaṃ sudāruṇam |
jīmūtānāṃ yathā vṛṣṭistapānte bharatarṣabha || 22 ||
[Analyze grammar]

anyonyaspardhinau tau tu śaraiḥ saṃnataparvabhiḥ |
tatakṣaturmṛdhe'nyonyaṃ śṛṅgābhyāṃ vṛṣabhāviva || 23 ||
[Analyze grammar]

tayoryuddhaṃ mahārāja ciraṃ samamivābhavat |
astrāṇāṃ saṃgamaścaiva ghorastatrābhavanmahān || 24 ||
[Analyze grammar]

tato'rjunaṃ dvādaśabhī rukmapuṅkhaiḥ sutejanaiḥ |
vāsudevaṃ ca daśabhirdrauṇirvivyādha bhārata || 25 ||
[Analyze grammar]

tataḥ prahasya bībhatsurvyākṣipadgāṇḍivaṃ dhanuḥ |
mānayitvā muhūrtaṃ ca guruputraṃ mahāhave || 26 ||
[Analyze grammar]

vyaśvasūtarathaṃ cakre savyasācī mahārathaḥ |
mṛdupūrvaṃ tataścainaṃ tribhirvivyādha sāyakaiḥ || 27 ||
[Analyze grammar]

hatāśve tu rathe tiṣṭhandroṇaputrastvayasmayam |
musalaṃ pāṇḍuputrāya cikṣepa parighopamam || 28 ||
[Analyze grammar]

tamāpatantaṃ sahasā hemapaṭṭavibhūṣitam |
ciccheda saptadhā vīraḥ pārthaḥ śatrunibarhaṇaḥ || 29 ||
[Analyze grammar]

sa cchinnaṃ musalaṃ dṛṣṭvā drauṇiḥ paramakopanaḥ |
ādade parighaṃ ghoraṃ nagendraśikharopamam |
cikṣepa caiva pārthāya drauṇiryuddhaviśāradaḥ || 30 ||
[Analyze grammar]

tamantakamiva kruddhaṃ parighaṃ prekṣya pāṇḍavaḥ |
arjunastvarito jaghne pañcabhiḥ sāyakottamaiḥ || 31 ||
[Analyze grammar]

sa cchinnaḥ patito bhūmau pārthabāṇairmahāhave |
dārayanpṛthivīndrāṇāṃ manaḥ śabdena bhārata || 32 ||
[Analyze grammar]

tato'paraistribhirbāṇairdrauṇiṃ vivyādha pāṇḍavaḥ |
so'tividdho balavatā pārthena sumahābalaḥ |
na saṃbhrāntastadā drauṇiḥ pauruṣe sve vyavasthitaḥ || 33 ||
[Analyze grammar]

sudharmā tu tato rājanbhāradvājaṃ mahāratham |
avākiraccharavrātaiḥ sarvakṣatrasya paśyataḥ || 34 ||
[Analyze grammar]

tatastu suratho'pyājau pāñcālānāṃ mahārathaḥ |
rathena meghaghoṣeṇa drauṇimevābhyadhāvata || 35 ||
[Analyze grammar]

vikarṣanvai dhanuḥ śreṣṭhaṃ sarvabhārasahaṃ dṛḍham |
jvalanāśīviṣanibhaiḥ śaraiścainamavākirat || 36 ||
[Analyze grammar]

surathaṃ tu tataḥ kruddhamāpatantaṃ mahāratham |
cukopa samare drauṇirdaṇḍāhata ivoragaḥ || 37 ||
[Analyze grammar]

triśikhāṃ bhrukuṭīṃ kṛtvā sṛkkiṇī parilelihan |
udvīkṣya surathaṃ roṣāddhanurjyāmavamṛjya ca |
mumoca tīkṣṇaṃ nārācaṃ yamadaṇḍasamadyutim || 38 ||
[Analyze grammar]

sa tasya hṛdayaṃ bhittvā praviveśātivegataḥ |
śakrāśanirivotsṛṣṭā vidārya dharaṇītalam || 39 ||
[Analyze grammar]

tatastaṃ patitaṃ bhūmau nārācena samāhatam |
vajreṇeva yathā śṛṅgaṃ parvatasya mahādhanam || 40 ||
[Analyze grammar]

tasmiṃstu nihate vīre droṇaputraḥ pratāpavān |
āruroha rathaṃ tūrṇaṃ tameva rathināṃ varaḥ || 41 ||
[Analyze grammar]

tataḥ sajjo mahārāja drauṇirāhavadurmadaḥ |
arjunaṃ yodhayāmāsa saṃśaptakavṛto raṇe || 42 ||
[Analyze grammar]

tatra yuddhaṃ mahaccāsīdarjunasya paraiḥ saha |
madhyaṃdinagate sūrye yamarāṣṭravivardhanam || 43 ||
[Analyze grammar]

tatrāścaryamapaśyāma dṛṣṭvā teṣāṃ parākramam |
yadeko yugapadvīrānsamayodhayadarjunaḥ || 44 ||
[Analyze grammar]

vimardastu mahānāsīdarjunasya paraiḥ saha |
śatakratoryathā pūrvaṃ mahatyā daityasenayā || 45 ||
[Analyze grammar]